STALE biaje rieeteʼ zeeda gaca Jiobá casi ti pastor. Stiidxabe na: «Naapiaʼ ziyubeʼ ca dendxuʼ stinneʼ ne zapaʼ laacame» (Ezequiel 34:11, 12).

Tuu nga zeeda gaca casi ca dendxuʼ stiʼ Jiobá. Ca binni ni nadxii ne runi adorar laabe. Biblia na: «Laguiuu, guni adorarnu ne guindeteʼ íquenu, guzuxíbinu xañee Jiobá, Dios ni bizáʼ laanu. Purtiʼ laabe nga Dios stinu ne nácanu guidxi ni ró de guixi stibe ne ca dendxuʼ ni cayápabe» (Salmo 95:6, 7). Cani runi adorar Jiobá ruzuubacaʼ stiidxaʼ Pastor sticaʼ, casi runi dendxuʼ. Peru cadi guiráʼ biaje rúnicaʼ ni. Nuu tiru reechendásecaʼ, cananíticaʼ ne rireechucaʼ (Ezequiel 34:12; Mateo 15:24; 1 Pedro 2:25). Neca zacá, pa ti binni guixeleʼ qué ruuyaʼ Jiobá laabe casi tuuxa ni maʼ qué ziuu dxi guibiguetaʼ.

 Para lii, ñee nácaruʼ Jiobá Pastor stiuʼ la? Ximodo rápabe laanu yanna casi runi ti pastor.

Rudiibe laanu guiráʼ ni caquiiñenu. Sicaríʼ na Jiobá: «Zigapaʼ laacame ra nuu guixi nabé galán». Ne laaca guniʼbe: «Racá zaziiláʼdxicame ti lugar ra zanda guiaapacame, ne zócame guixi ni jma galán» (Ezequiel 34:14). Qué rusaana Jiobá de gudii laanu guiráʼ ni caquiiñenu ne órapeʼ caquiiñenu cani ti chuʼnu gaxha de laa. Ñee redasilú lii xiixa tema, libana o videu ni bisihuinni bicabi Jiobá oración stiluʼ la? Ñee qué nucaani lii niníʼ íqueluʼ rizaalaʼdxiʼ Jiobá lii la?

Rápabe ne racanebe laanu. Jiobá na: «Ni biniti zedaniáʼ laa sti biaje, ne ni gucaná zuchendaʼ venda laa ne zacaniáʼ ni qué gapa stipa» (Ezequiel 34:16). Racané Jiobá cani zeeda gaca casi dendxuʼ ni maʼ biree gana pur ca guendanagana ni cadxaagalú. Ruchéndabe venda cani bininá tuuxa, dede pa ti xpinni Cristu biʼniʼ ni. Racanebe ca dendxuʼ ni biniti guibiguétacaʼ ndaaniʼ xquídxibe, purtiʼ zándaca riníʼ íquecaʼ qué risácacaʼ.

Riyúbibe laanu pa guinítinu. Sicaríʼ na Jiobá: «Zicaaʼ laacame ra reechendásecame». Ne nabe: «Ziyubeʼ ni biniti» (Ezequiel 34:12, 16). Qué rusiaandaʼ Jiobá ti dendxuʼ ni guiniti. Rudiibe cuenta ora guiaadxaʼ tobi, nga runi riyúbibe laa ne riéchebe ora guidxélabe laa (Mateo 18:12-14). Ne sicaríʼ rábibe ca xpínnibe ni ruzuubaʼ stiidxabe: «Ca xtendxuáʼ, ca dendxuʼ ni rizaaladxeʼ» (Ezequiel 34:31). Lii nga zeeda gácaluʼ tobi de ca dendxuʼ ca.

Ñee nánnaluʼ xi pur canabaʼ Jiobá lii guibiguétaluʼ la? Purtiʼ racaláʼdxibe guibániluʼ nayecheʼ. Maʼ bidii stiidxabe zaguube ndaayaʼ ca dendxuʼ stibe (Ezequiel 34:26). Ne cadi riníʼsibe. Maʼ biiyaluʼ ximodo rúnibe guiráʼ ni riniʼbe.

Bietenalaʼdxiʼ xi biʼniʼ sentirluʼ ca dxi ziyunibiaʼluʼ Jiobá. Casi dxi gúnnaluʼ tu labe ne xi cá íquebe gúnibe para binni. Ñee rietenaláʼdxiluʼ pabiáʼ biguidxi fe stiluʼ lade ca xpinni Cristu dxi guyeluʼ asamblea la? Cadi dxandíʼ laaca guyuuluʼ nayecheʼ dxiqué guibiguétasiouʼ de chigucheecheluʼ ca diidxaʼ nacubi ne galán ni zeeda lu Biblia la?

Zanda guni sentirluʼ zacá sti biaje. Sicaríʼ biʼniʼ orar ca xpinni Dios ni bibani dxiqué: «Bidxiguetaʼ laadu ra nuuluʼ Jiobá, ne laadu [...] zabiguétadu ra nuuluʼ. Bidxiguetaʼ ca dxi gúpadu dxiqué» (Lamentaciones 5:21). Bicabi Jiobá laacabe, ne bibani xquidxi nayecheʼ sti biaje (Nehemías 8:17). Laaca zanda gúnibe nga pur lii.

Dxandíʼ, guiráʼ cani gacalaʼdxiʼ guibiguetaʼ ra nuu Jiobá ridxaagalucaʼ guendanagana. Yanna guidúʼyanu xii nga ridxaagalúcabe ne ximodo gudxiilúcabe cani.