CA PRIMÉ xpinni Cristu que naquiiñeʼ gúnicaʼ ti dxiiñaʼ nabé risaca para ganda gaca guiráʼ ni maʼ gudixhe ique Dios guni. Peru ca xpinni Cristu que gupa xidé biʼniʼ huantarcaʼ ca binni ni guzananda laacaʼ, ne dede bidxiilucaʼ ca guendanagana ni guyuu ndaaniʼ neza binni ridagulisaa que. Xi bíʼnicabe para qué nucheenécabe Jiobá yaʼ. Ca veintiún carta ni zeeda lu Stiidxaʼ Dios ni gucuá lu diidxaʼ griegu que guluucani gana laacabe ne bidiicani laacabe conseju ni caquiiñepécabe.

Pablu nga bicaa ca primé catorce carta ni zeeda lu Biblia, dede Romanos hasta Hebreos. Lu guirácani cá tu para biseendabe cani, pa para tuuxa binni o para ti neza binni ridagulisaa. Guidúʼyanu caadxi de ca tema ni guníʼ apóstol riʼ.

Modo guni binni ni jneza ne gaca xpiaʼ nayá. Cani riuuné ni cadi xheelaʼ, cani rapa xnadxii ne cani runi xcaadxi cosa dxabaʼ ne qué gaca arrepentir la? qué ziuucaʼ «ra runi mandar Dios» (Gálatas 5:19-21; 1 Corintios 6:9-11). Ca xpinni Jiobá cadi naquiiñeʼ gudiicaʼ lugar guixélecaʼ de xcaadxi xpinni Cristu, neca de gadxé gadxé guidxi laacaʼ (Romanos 2:11; Efesios 4:1-6). Naquiiñeʼ gácacaʼ nachaʼhuiʼ ne gacanecaʼ xcaadxi xpinni Cristu (2 Corintios 9:7). Apóstol Pablu laaca gudxi laacabe guxhálecabe ladxidóʼcabe nezalú Jiobá ne bidiibe conseju riʼ laacaʼ: «Lainíʼ né Dios sin guiaana dxí tu» (1 Tesalonicenses 5:17; 2 Tesalonicenses 3:1; Filipenses 4:6, 7). Para gucaadiaga Dios laacabe la? naquiiñeʼ guni orárcabe ne fe (Hebreos 11:6).

Xi conseju bidii Pablu ca familia yaʼ. Ca hombre ni maʼ bichaganáʼ naquiiñeʼ gannaxhiicaʼ xheelacaʼ casi nadxiicaʼ laacaʼ. Ne ca gunaa ni maʼ bichaganáʼ naquiiñeʼ guni respetarcaʼ xheelacaʼ de guidubi ladxidoʼcaʼ. Dios laaca ribeza guzuubaʼ xiiñiʼ binni stiidxaʼ bixhoze ne jñaa ne laacaʼ naquiiñeʼ gusiniisicaʼ laacabe ne guendarannaxhii casi na ca conseju ni zeeda lu Biblia (Efesios 5:22–6:4; Colosenses 3:18-21).

Ni gudixhe ique Dios guni. Ley ni gucuaa Moisés que gúpani ne biluiʼni ca israelita que xi gúnicaʼ dede ora beeda Mesías ni nexheʼ gueeda que, peru ca xpinni Cristu que maʼ cadi caquiiñeʼ gúnicaʼ ni nani (Gálatas 3:24). Lu carta ni bicaa Pablu ra nuu ca Hebreu, ca xpinni Cristu ni za de ca judíu, bisiénebe laacaʼ xi para bidii Dios ca Ley que Moisés ne xi dxiiñaʼ napa Jesús para gaca ni maʼ gudixhe ique  Dios. Bisiénebe stale de ca cosa ni zeeda lu Ley que bisihuinni cani xi chiguizaaca despué. Ca maniʼ biiticabe para Jiobá que zeeda gácani guendanabani ni bidii Jesús, ne pur laani zanda gutiidilaʼdxiʼ Dios donda stinu tobi si tiru (Hebreos 10:1-4). Ngue runi, ra guti Cristu raqué biluxe pactu stiʼ Ley que (Colosenses 2:13-17; Hebreos 8:13).

Modo raca dxiiñaʼ ndaaniʼ ca neza binni ridagulisaa. Ca hombre ni napa xiixa dxiiñaʼ ndaaniʼ ca neza binni ridagulisaa napa xidé guibánicaʼ jneza ne gúnicaʼ caadxi cosa ni canabaʼ Dios laacaʼ (1 Timoteo 3:1-10, 12, 13; Tito 1:5-9). Laaca cadi naquiiñeʼ gusaana ca xpinni Cristu de guidagulisaacaʼ ti guiziidicaʼ jma de Dios ne uguusaacaʼ gana laacaʼ (1 Corintios 14:26, 31; Hebreos 10:24, 25).

Dxi bicaa Pablu segunda a Timoteo, tobi de ca últimu carta stiʼ, maʼ nuube Roma sti biaje, daguyoobe ne cabézabe guzulú guni juzgárcabe laabe. Chupa chonna si de ca xpinni Cristu que gúcacaʼ nadxibalú ne yegánnacaʼ laabe. Cumu nanna apóstol que mayaca gati la? bicaa: «Bine xhiiña Dios dede biaʼ ra gunda tiʼ, qué nixele de ni rune cre. Casi ñaca bixooñe ne irá stipa stinneʼ, ne yanna ma yendaya lu raya» (2 Timoteo 4:7). Zándaca qué nindaa biiticabe laabe. Peru ca carta stibe que gucanérucani cani dxandíʼ xpinni Cristu gúnicaʼ ni na Dios ne laaca racanécani ca xpinni Cristu yanna.

(Zeedani lu Romanos, 1 ne 2 Corintios, Gálatas, Efesios, Filipenses, Colosenses, 1 ne 2 Tesalonicenses, 1 ne 2 Timoteo, Tito, Filemón ne Hebreos.)