XIMODO ganna binni tuu nga Mesías que yaʼ. Dios zusihuinni tu laabe. Tapa gayuaa iza despué de biluxe gucuá Stiidxaʼ Dios lu diidxaʼ hebreu, guyé ti ángel ni láʼ Gabriel ra nuu María, ti baʼdudxaapaʼ ni nabeza Nazaret, ti guidxi ni nuu ladu guiaʼ de Galilea. Gabriel gudxi María zapa ti baʼduhuiiniʼ. Neca binnidxaapaʼ laabe, Jiobá zaquiiñeʼ stipa o espíritu santu stiʼ para gaca xiiñibe. Baʼduhuiiniʼ ca nga gueeda gaca Rey ni maca bizeetecabe qué ziuu dxi gusaana de guni mandar. Para ganda gaca nga la? zaguu Dios xquendanabani tobi lucha Xiiñiʼ ni nuu guibáʼ ndaaniʼ María.

De guidubi ladxidóʼ María guníʼ zuni ni gudxi Dios laa que. Hombre ni chiguichaganabe que, ti carpinteru ni láʼ José, bichaganáʼ laabe despué de biseendaʼ Dios ti ángel ra nuu para bisiene laa xiñee naca xiiñiʼ María. Yanna, cadi guiaandaʼ laanu maca guníʼcabe zale Mesías que ndaaniʼ guidxi Belén, ne cadi Nazaret diʼ (Miqueas 5:2). Ximodo gaca nga pa Belén nuu biaʼ 150 kilómetru de ra nabézacabe que yaʼ.

Nin qué nindaa, ti hombre ni biʼniʼ gobernar Roma biʼniʼ mandar cheʼ guiráʼ binni guidxi ra gule para guicá lá. Cumu Belén nga xquidxi binnilidxi José ne María la? ngue runi gupa xidé guyécabe ndaaniʼ guidxi que dxi mayaca gapa María baʼduʼ (Lucas 2:3). Jesús gule ndaaniʼ ti currá ne gudíxhecabe laa ra ro maniʼ guixi. Óraque biseendaʼ Dios ti ángel stiʼ ra nuu caadxi hombre cayapa dendxuʼ lu ti layú nuu gaxha de raqué, para gabi laacabe maʼ gule Mesías, o Cristu ni nexheʼ gueeda que.

Laaca ziuuruʼ xcaadxi binni ni zaníʼ Jesús nga Mesías ni nexheʼ gueeda que. Profeta Isaías maca guníʼ zazaniruʼ tuuxa para guiníʼ de dxiiñaʼ risaca ni chiguni Cristu (Isaías 40:3). Hombre que nga Juan ni Riguunisa. Ti biaje, ora bíʼyabe Jesús guniʼbe: «Laguuyaʼ, ndi nga Dendxu huiini sti Dios ni ribee xpecadu binni guidxilayú». Oraqueca, stale de cani canazané Juan gúcacaʼ discípulo stiʼ Jesús. Tobi de laacabe guníʼ: «Ma bidxela du Mesías» (Juan 1:29, 36, 41).

Peru cayaadxaʼ sti cosa ni zusihuinni laabe nga Mesías que. Dxi guluu nisa Juan Jesús, biquiiñeʼ Jiobá espíritu santu stiʼ para bisihuinni Jesús nga Mesías que, ne guníʼ: «Ndi nga Xiiñe ni nadxiee ne ni rusieche naa» (Mateo 3:16, 17). ¡Yanna huaxa maʼ bihuinni tuu nga Mesías ni nexheʼ gueeda que!

Peru padxí bizaaca nga yaʼ. Bizaaca ni lu iza 29 despué de ca dxi stiʼ Jesús, biáʼsipeʼ dxi bizaa tapa gayuaa ochenta y tres iza ni guníʼ Daniel que. Maʼ bizéʼtenu chupa chonna si de guiráʼ ca cosa ni rusihuinni Jesús nga Mesías que. Yanna, xi zusiidibe biaʼ dxi chuʼbe lu Guidxilayú riʼ yaʼ.

(Zeedani lu capítulo 1 dede 3 stiʼ Mateo, capítulo 1 stiʼ Marcos, capítulo 2 stiʼ Lucas ne capítulo 1 stiʼ Juan.)