BIAʼ tiempu bibani ca israelita que Egipto gúpacaʼ stale cosa ne bidálecaʼ ndaaniʼ guidxi que. Ca dxi que bizulú biʼniʼ mandar sti faraón, ti hombre nabé malu ni qué ñunibiáʼ José. Cumu biiyabe cadale ca israelita que la? biʼniʼ mandarbe gácacaʼ esclavu ne guniʼbe ora gale ti hombrehuiiniʼ naquiiñeʼ gusáʼbicabe laa ndaaniʼ guiiguʼ Nilo ti gati. Peru ti gunaa israelita ni nabé nadxibalú, guluu xiiñiʼ ndaaniʼ ti dxumi ne bicaachini lade ca guixi gaʼ nuu ndaaniʼ nisa que. Ne xiiñidxaapaʼ faraón bidxela laabe, gulee lá laabe Moisés ne bisiniisi laabe lade ca binni risaca stiʼ Egipto.

Dxi napa Moisés 40 iza guyuu lu ti guendanagana, purtiʼ gucanebe ti israelita ni cayuniná ti egipciu laa, ngue runi bixooñebe sti guidxi ni nuu zitu de raqué. Peru dxi maʼ nápabe 80 iza, gudxi Dios laabe guibiguétabe Egipto ne gucaabe faraón gundaa ca israelita que.

Cumu qué liica niná faraón nundaa ca israelita que la? ngue runi biseendaʼ Dios chii plaga para guniná xquídxibe. Ante guseendaʼ Dios cada tobi de ca plaga que, rié Moisés ra nuu faraón para gábibe laa xi guni para cadi guseendaʼ Dios cani. Peru faraón bidxiibaʼ laca laa ne bicaalú Moisés ne Jiobá. Últimu plaga que biseendaʼ Jiobá ti ángel stiʼ para guuti guiráʼ baʼduʼ lugola nuu ndaaniʼ guidxi que. Ca yoo si ra qué nidiʼdiʼ ángel que nga ra nabeza ca familia ni bizuubaʼ stiidxaʼ Jiobá ne bitieecaʼ ra puertaʼ lídxicaʼ ne rini stiʼ ti dendxuhuiiniʼ ni biiticaʼ. Ne para guietenalaʼdxiʼ ca israelita que ni bizaaca dxi que la? bizulú bíʼnicabe ti Pascua guiráʼ iza.

Guti si baʼduʼ lugola stiʼ faraón gúdxibe Moisés ne ca israelita que guireecaʼ de Egipto. Oraqueca bitagulisaa Moisés laacabe ne bireené laacabe de ndaaniʼ guidxi que. Peru bidii si faraón lugar zécabe guca arrepentir ne yenanda laacabe ne ca soldadu stiʼ ne ca carru ni riné lu guerra. Ora yendá ca israelita que ruaa nisadóʼ Xiñáʼ que ruluíʼ maʼ gastiʼ pa neza chécabe. Peru Jiobá bixhéleni ne zaqué gunda gudíʼdicabe ndaaniʼ ti neza nabidxi galaa nisadóʼ que. Ora gucalaʼdxiʼ ca egipciu que ninándacaʼ laacabe, Dios bidii lugar bilate guiráʼ nisa que luguiacaʼ ne zaqué bilaahua faraón ne ca xpinni.

Despué yendá ca israelita que ra nuu dani Sinaí ne raqué biʼniné Dios laacabe ti pactu. Jiobá biquiiñeʼ Moisés para gudii guidxi Israel caadxi ley ni zacané ne ni zapa laacaʼ lu stale cosa ni gúnicaʼ lu xquendanabánicaʼ. Pa gúnicabe stipa pur cadi gucheenécabe Dios ne guzuubacabe diidxaʼ la? Jiobá guníʼ qué zusaana laacabe ne zaquiiñeʼ laacabe para uguu ndaayaʼ xcaadxi guidxi.

Peru stale de laacabe qué ñuni crécabe pa zacané Jiobá laacabe. Ngue runi, Dios bicaa laacabe sácabe cuarenta iza lu desiertu. Despué, Moisés gulí Josué, ti hombre ni nabé biʼniʼ ni na Dios, para sániruʼ nezalú guidxi que. Gudiʼdiʼ si iza, yendácabe lu layú ni guníʼ Dios gudii laacabe que.

(Zeedani lu Éxodo, Levítico, Números, Deuteronomio, Salmo 136:10-15 ne Hechos 7:17-36.)