Ndaa 1
Dios bizáʼ ti paraísu para guibani binni ndaaniʼ
Dios bizáʼ guibáʼ ne guiráʼ ni nabani nuu lu Guidxilayú; bizaʼbe ti hombre ne ti gunaa ni qué gapa donda, guluube laacaʼ ndaaniʼ ti jardín ne gúdxibe laacaʼ xi gúnicaʼ
«PRIMÉ que Dios bizáʼ guibáʼ ne guidxilayú.» (Génesis 1:1.) Stale tu riníʼ nabé runibiáʼ binni ca diidxaʼ ni guninu ca. Ne ca diidxaʼ sicarú riʼ rihuinni Jiobá nga binni risaca ni jma rieeteʼ lu Biblia ne laabe nga Dios ni jma nandxóʼ, ni bizáʼ guidubi naca guibáʼ ne Guidxilayú. Lu xcaadxi versículo ca cusiene Biblia biquiiñeʼ Dios stale tiempu ni zeeda gaca casi dxi para bizáʼ Guidxilayú riʼ ne biʼniʼ guiráʼ ca cosa sicarú nuu luni.
Ni jma risaca bizáʼ Jiobá lu Guidxilayú riʼ nga binni. Primé hombre bizaʼbe bíʼnibe laa ne yu dé. Bíʼnibe laa casi laabe, ngue runi laaca zanda gannaxhii, gaca binni nuu xpiaaniʼ ne bidiibe laa xcaadxi guenda ni nápabe. Gulee labe laa Adán ne guluube laa ndaaniʼ ti paraísu ni láʼ Edén. Paraísu que nga ti jardín ni biʼniʼ Dios ra zuhuaa stale yaga cuananaxhi.
Ti dxi biiyaʼ Dios maʼ caquiiñeʼ hombre que ti compañera stiʼ. Ngue runi gucuaabe ti biní xcustiá Adán para bizaʼbe Eva, primé gunaa, ne bicheelabe laa Adán. Nabé biecheʼ Adán, dede guníʼ ti poema ni na: «Ndiʼ huaxa naca de dxita stiʼ ca dxita ladeʼ ne beela de beela ladeʼ». Ne Biblia na: «Nga runi zusaana hombre bixhoze ne jñaa, ne naquiiñeʼ guicanú xheelaʼ, ne gueeda gácacabe ti beela si» (Génesis 2:22-24; 3:20).
Jiobá gudixhe chupa cosa ni naquiiñeʼ guni Adán ne Eva. Primé la? gápacabe Guidxilayú, guzuhuaacabe guiráʼ clase yaga luni ne gápacabe stale xiiñicabe. Guiropa la? cadi gócabe cuananaxhi stiʼ ti yaga si ni zuhuaa ndaaniʼ jardín que: «Cuananaxhi stiʼ yaga stiʼ guendananna ni jneza ne ni cadi jneza» (Génesis 2:17). Xi zazaaca pa qué guzuubacabe diidxaʼ yaʼ. Záticabe. Peru pa guzuubacabe diidxaʼ zusihuínnicabe racaláʼdxicabe guni mandar Dios laacabe, nadxiicabe laa ne cudiicabe xquíxepeʼ laa. Pur modo guyáʼcabe ne pur guiráʼ ni gucuaacabe maʼ qué ñaca nagana para laacabe nuzuubacabe stiidxaʼ Dios ni bizáʼ laacabe cásipeʼ modo na. Sicarú modo bizáʼ Dios laacabe ne gúcacabe binni ni qué gapa donda. Nga runi na Biblia: «Biiyaʼ Dios guiráʼ ni biʼniʼ ne, ¡biaguʼyuʼ!, nabé galán cani» (Génesis 1:31).
(Zeedani lu capítulo 1 ne 2 stiʼ Génesis.)
