CUMU maʼ bicheeche Jesús diidxaʼ chonna iza arondaʼ la? nanna maʼ zeeda dxiña dxi gati. Ca xaíque yuʼduʼ que guníʼ íquecaʼ guuticaʼ laabe, peru bidxíbicaʼ gueeda guni ca binni guidxi que laacaʼ xiixa, purtiʼ nápacaʼ laabe casi profeta. Peru Binidxabaʼ biniibi ladxidóʼ Judas, tobi de ca doce apóstol que, para gutoo maestru stiʼ. Ca xaíque yuʼduʼ que gudíxecaʼ laabe treinta moneda de plata.

Últimu gueelaʼ bibani Jesús lu Guidxilayú riʼ, bidagulisaanebe ca apóstol stibe para gúnicabe Pascua. Gudxi si Cristu Judas guiree de raqué, gudixhestibe ti cosa nacubi guni ca xpínnibe: Guendaroxhi stiʼ Señor. Gucuaabe ti ndaa pan, biʼniʼ orarbe ne gudiizibe ni lade ca once apóstol que. De raqué bisiénebe: «Ndi nga cuerpu stinne ni chi udiee pur laatu. Laguni casi cayuni nu riʼ para guietenaladxi tu naa». Despué bitiidibe ti copa vinu lu nacaʼ ne guniʼbe: «Copa ri nga rini stinne ni chi ixii pur laatu. Ne ra ixii ni zaguixhe Bixhoze ti modo cubi chuʼ né binni laa tobi si» (Lucas 22:19, 20).

Jesús bisiidiʼ ca apóstol stiʼ stale cosa últimu gueelaʼ que. Dede bidiibe laacaʼ ti mandamientu cubi: gannaxhiicaʼ sin cuézacaʼ gannaxhiicabe laacaʼ, ne gúdxibe laacaʼ: «Pa ganaxhii saa tu zacá la? zanna binni xpinne laatu» (Juan 13:34, 35). Gúdxibe laacaʼ cadi chúʼpecaʼ xizaa pur cani chigácabe que, ne despué biʼniʼ orarbe de guidubi ladxidoʼbe pur laacaʼ. Últimu la? biindacabe canción para gusisácacabe Dios ne bireecabe guyécabe ndaaniʼ jardín de Getsemaní.

Ora yendabe raqué bizuxíbibe ne gúdxibe Jiobá guiráʼ ni nuu ndaaniʼ ladxidoʼbe. Peru málasi beeda caadxi soldadu, ni ruzaaquiʼ guʼxhuʼ ne xcaadxi binni para guinaazecaʼ laabe. Para guluíʼ Judas tuu nga Jesús la? gúdxibe ca binni ni zinaazecaʼ Jesús que zudiibe ti bixiduʼ laa. Óraque gunaazeʼ ca soldadu que Cristu ne ca apóstol que bixooñecaʼ.

Jesús guníʼ nezalú ca juez jma risaca stiʼ ca judíu que laa nga Xiiñiʼ Dios. Peru ca juez que nacaʼ caniʼbe mal de Dios, ne para laacaʼ nabé malu ni caniʼbe que ngue runi naquiiñeʼ gátibe. Óraque yenécabe laabe nezalú Poncio Pilatu, ti binni ni cayuni mandar Roma. Neca biiyaʼ hombre riʼ qué gapa Jesús donda la? bíʼnibe ni na ca binni ni canabaʼ gati Jesús que.

Yenécabe Jesús ti lugar láʼ Gólgota ne raqué bicaa ca soldadu de Roma que laabe lu ti yaga. Cá ca gubidxa málasi bicahui. Huadxí biiticabe Jesús que, guca ti xu roʼ. Cuerpu stibe que bicaachicabe ni ndaaniʼ ti baʼ ni guca lu ti guié ne sti dxi que biseeguʼ dxiichiʼ cani ruzaaquiʼ guʼxhuʼ que ruaani ne biseendacaʼ tu chigapa ni. Ñee maʼ raqué nga guiaanabe la? Coʼ, purtiʼ chigaca sti milagru jma naroʼbaʼ.

(Zeedani lu capítulo 26 ne 27 stiʼ Mateo, capítulo 14 ne 15 stiʼ Marcos, capítulo 22 ne 23 stiʼ Lucas ne capítulo 12 dede 19 stiʼ Juan.)