RA BIDALE binni lu Guidxilayú riʼ, jma guyuu binni ni bichee ne ni biʼniʼ guendaquéiquiiñeʼ. Ca dxi que, zándaca Enoc si nga biʼniʼ ni na Dios lu Guidxilayú riʼ, ne guniʼbe chigunitilú Jiobá guiráʼ ca binni malu que. Peru guirutiʼ nulabi guiráʼ cani guniʼbe que, casi ñaca niguucabe cani ndaaniʼ ti sacu ni nade, ngue runi jma bidale cosa malu. Guirutiʼ niníʼ ique pa dede ne ca ángel que nucaalucaʼ Jiobá, bisaanacaʼ dxiiñaʼ ni bidii Dios laacaʼ guibáʼ ne gúcacaʼ casi binni, ne bichaganacaʼ guiráʼ gunaa ni gúpacaʼ gana. Cumu cadi guyáʼcabe para ngue la? ngue runi beeda gaca ca xiiñicabe gigante ne nabé nadipaʼ gúcacaʼ ne gúdxicabe laacaʼ nefilim. Ra guyuu ca gigante que jmaruʼ si bidale guendaquéiquiiñeʼ lu Guidxilayú riʼ. Nanna pabiáʼ naná guca para Jiobá ora biʼyaʼ guiráʼ ni cayuni ca binni que yaʼ.

Guti si Enoc, guyuu sti hombre nachaʼhuiʼ ni láʼ Noé. Laabe ne binnilídxibe bíʼnicabe stipa pur gúnicabe ni riuulaʼdxiʼ Dios. Ti dxi guníʼ ique Jiobá gusaba ti nisaguié naroʼbaʼ para gunitilú guiráʼ ca binni malu que. Cumu qué nabe gati ca maniʼ que ne nin ca Noé la? ngue runi gúdxibe laa guni ti arca, casi ti caja naroʼbaʼ ne ziuulaʼ. Laabe ne binnilídxibe caquiiñeʼ chúʼcabe ndaaniʼ ni ti guilácabe ne uguucabe guiráʼ clase maniʼ ndaaniʼ ni. Noé bizuubaʼ stiidxaʼ Dios ne gudiʼdiʼ biaʼ cuarenta o cincuenta iza para biluxe biʼniʼ arca que. Laaca gúdxibe ca binni que «nusaana ca irá enda ruchee sticaʼ» (2 Pedro 2:5). Gúdxibe ca binni que chiguiaba ti Nisaguié naroʼbaʼ, peru guirutiʼ nulabi laabe. Bidxiña dxi chuʼ Noé ne binnilidxi ne ca maniʼ que ndaaniʼ arca que. Óraque biseeguʼ Dios puertaʼ stini ne bizulú biaba nisaguié.

Biaba dxacha nisaguié cuarenta dxi ne cuarenta gueelaʼ, ngue runi bilaahua guidubi naca Guidxilayú. Qué nilá nin tobi de ca binni malu que. Gudiʼdiʼ beeu para biete nisa que ne beeda guiaana arca que lu ti dani. Biaʼsi ti iza biaana Noé ne binnilidxi ndaaniʼ arca que para bireecaʼ. Para gusihuinni Noé nuu nayecheʼ la? bidiibe ti ofrenda Jiobá para gudiibe xquíxepeʼ laa. Dios guníʼ maʼ qué ziuuruʼ dxi gunitilú guiráʼ ni nuu lu Guidxilayú riʼ ne ti nisaguié naroʼbaʼ. Ne para gúʼyacabe dxandíʼ ni guniʼbe que, bisihuínnibe ti arcu iris guibáʼ. Ne cada guʼyaʼ binni ni, zusietenaláʼdxini laacaʼ ni guníʼ Jiobá que.

Gudiʼdiʼ si Nisaguié naroʼbaʼ que, gudixhe Jiobá xcaadxi cosa ni naquiiñeʼ guni binni. Gúdxibe laacaʼ zanda gocaʼ beela stiʼ ca maniʼ que, peru rini stícame coʼ. Laaca gúdxibe laacaʼ guireechecaʼ lu guidubi naca Guidxilayú, peru guyuu tu qué niná nuzuubaʼ stiidxabe. Stale de laacaʼ bidagulisaacaʼ ndaaniʼ ti guidxi si para gucuicaʼ ti torre ngola ni gunabaʼ Nemrod laacaʼ gúnicaʼ. Peru Jiobá qué nudii lugar ñúnicabe ni cá íquecabe que. Xi bíʼnibe yaʼ. Bicaabe ca binni de guidxi Babel, ni beeda gaca Babilonia despué, guiniʼcaʼ gadxé gadxé diidxaʼ. Ra bíʼyacabe maʼ qué ñene saacabe la? bisaanacabe dxiiñaʼ que ne bireechecabe.

(Zeedani lu capítulo 6 dede 11 stiʼ Génesis ne Judas 14, 15.)