1, 2. a) ¿Xi rucaa lii gusisácaluʼ ti regalu? b) ¿Xiñee naca rescate ca ti regalu jma naroʼbaʼ bidii Dios laanu?

¿GUNÁʼ nga regalu jma galán bidiicabe lii? ¿Xi rucaa lii gusisácaluʼ ti regalu? Cadi caquiiñeʼ gácani caru para guisaca ni. Pa rusiecheʼ regalu ca lii o caquiiñeluʼ ni la? zudiiluʼ xquixe peʼ binni ni bidiini lii.

² De guiráʼ regalu ni maʼ bidii Dios laanu, nuu tobi ni jma caquiiñenu. Laani nga regalu jma risaca ni bidii Dios laanu. Ne bidiibe ni laanu ra biseendabe Xiiñibe casi rescate. Ne pur ni biʼniʼ Jehová riʼ zanda guibáninu para siempre (biindaʼ Mateo 20:28). Ra biseendaʼ Jehová Jesús lu Guidxilayú riʼ, bisihuinni dxandíʼ nadxii laanu. Lu capítulo riʼ zazíʼdinu jma de regalu riʼ.

3. ¿Xiñee rátinu?

³ Rescate nga ni biquiiñeʼ Dios para bilá laanu de pecadu ne guendaguti (Efesios 1:7). Para guiénenu xiñee caquiiñeʼ rescate riʼ, naquiiñeʼ gánnanu xi bizaaca Adán ne Eva, ca primé bixhózenu, raca mil de iza ndaaniʼ jardín de Edén. Bicheecabe, ne pur nga gúticabe. Bisaanané Adán ne Eva laanu pecadu. Pur nga rátinu. (Biindaʼ nota 9, «Pecadu»).

4. ¿Tuu nga Adán, ne xi bidii Dios laabe?

⁴ Adán nga primé binni bizáʼ Dios. Dxi bizáʼ Dios laabe, bidii laabe ti cosa nabé risaca: ti guendanabani  perfectu. Gupa Adán ti guendabiaaniʼ ne ti cuerpu perfectu. Ndiʼ riníʼ, qué zaca huarabe, qué zióʼxhobe ne qué zátibe. Beeda gaca Jehová casi bixhoze Adán, purtiʼ laa bizáʼ laabe (Lucas 3:38). Gatigá guniʼné Jehová Adán ne bisiene chaahuibe laa xi ribézabe guni. Ne laaca bidiibe laa ti dxiiñaʼ guizáʼ galán (Génesis 1:28-30; 2:16, 17).

5. ¿Xi riníʼ bizáʼ Dios Adán «casi laa»?

⁵ Bizáʼ Dios Adán «casi laa» (Génesis 1:27). Ndiʼ riníʼ bizáʼ Jehová laabe né ca cualidad ni napa, casi guendarannaxhii, guendanuuxpiaaniʼ, justicia ne poder. Qué nuzáʼ diʼ Jehová Adán casi ti robot. Bizáʼ Dios laabe né capacidad para cuibe xi gúnibe. Zanda cuibe gúnibe ni jneza o ni cadi jneza. Pa nibí Adán nuzuubaʼ stiidxaʼ Jehová la? nibani para siempre ndaaniʼ Paraísu.

6. a) ¿Xi bizaaca Adán pur qué nuzuubaʼ stiidxaʼ Dios? b) Ra qué nuzuubabe diidxaʼ, ¿ximodo cayuninani laanu?

⁶ Guizáʼ naná modo gudixe Adán pur qué nuzuubaʼ stiidxaʼ Dios. Gudxi Jehová laabe zátibe ne binítibe amistad sicarú ni napanebe laa. Maʼ qué ñácabe perfectu ne gulee Dios laabe de ndaaniʼ Paraísu que (Génesis 3:17-19). Dede né laanu racananu pur qué nuzuubaʼ Adán diidxaʼ. Pur bichee Adán «biuu pecadu ndaaniʼ guidxilayú, ne pur pecadu ca biuu guendaguti, ne zacá gucuá guendaguti que guiráʼ binni, purtiʼ maʼ biʼniʼ pecar guiracaʼ» (Romanos 5:12). Ora bichee Adán, cásica laa, laanu laaca beeda gácanu esclavu stiʼ pecadu ne guendaguti. Biblia ná bitoobe laanu lu náʼ pecadu (Romanos 7:14). Maʼ qué ñapa Adán ne Eva nin ti esperanza, purtiʼ gulicaʼ cadi guzuubacaʼ stiidxaʼ  Dios. Peru laanu yaʼ? ¿Ñee nápanu xiixa esperanza la? Nápanu pue. Biʼniʼ preparar Jehová ti rescate.

7, 8. ¿Xii nga ti rescate?

⁷ ¿Xii nga ti rescate? Laani nga ni riguixe tuuxa para gudxiguétacabe laa xiixa o para gundaacabe tuuxa ni guca secuestrar. Lu Biblia riete ti rescate nga ora riguixe tuuxa pur ni biʼniʼ, ne naquiiñeʼ quíxebe biaʼ risácani.

⁸ Nin ti binni imperfectu qué zanda quixe dañu naroʼbaʼ ni biʼniʼ Adán ora bichee ne guluu laanu lu náʼ guendaguti. Peru biʼniʼ Jehová xiixa para ganda gulá laanu de pecadu ne guendaguti. Guidúʼyanu xi bíʼnibe ne ximodo runi beneficiarni laanu.

9. ¿Xi rescate caquiiñeʼ?

⁹ Rescate ni caquiiñeʼ para ganda guilá binni, caquiiñeʼ guiáxani né sti guendanabani perfectu casi ni gupa Adán. Pur nga caquiiñeʼ gaca rescate que biaʼca ni biniti que (1 Timoteo 2:6). Nga runi caquiiñeʼ ti guendanabani perfectu. Peru casi maca bizéʼtenu, nin ti binni qué zanda quixe rescate riʼ. ¿Xiñee coʼ yaʼ? Purtiʼ imperfectu laanu (Salmo 49:7, 8).

10. ¿Xi biʼniʼ Jehová para bidii rescate que?

¹⁰ ¿Xi biʼniʼ Jehová para bidii rescate que yaʼ? Biseendabe Jesús, Xiiñibe ni jma nadxiibe, lu Guidxilayú (1 Juan 4:9, 10). Guyuu Jesús dispuestu gusaana Bixhoze ne guendanabani ni gupa guibáʼ (Filipenses 2:7). Bitiidiʼ Jehová xquendanabani Jesús ndaaniʼ María. Zacá beeda gale Jesús lu Guidxilayú riʼ casi ti binni perfectu ne sin pecadu (Lucas 1:35).

11. ¿Ximodo zanda gulá ti hombre si guiráʼ xixé binni?

 ¹¹ Casi maʼ bidúʼyanu, qué nuzuubaʼ primé hombre que stiidxaʼ Jehová ne pur nga qué gápanu guendanabani perfectu. ¿Ñee zanda gulá ti hombre guiráʼ xixé binni la? Zanda pue. (Biindaʼ Romanos 5:19) ¿Ximodo zanda gúnibe ni yaʼ? Qué lica nuchee Jesús, nga runi zanda gudiibe guendanabani perfectu stibe casi rescate para gulabe ca xiiñiʼ Adán de lu náʼ guendaguti (1 Corintios 15:21, 22, 45).

12. ¿Xiñee gupa xidé biʼniʼ sufrir Jesús stale?

¹² Biblia rusiene guiráʼ ni biʼniʼ sufrir Jesús ante gatiʼ. Guluucabe chicote laabe, bicaacabe laabe lu ti yaga ne nabé naná modo gútibe (Juan 19:1, 16-18, 30). ¿Xiñee guizáʼ biʼniʼ sufrir Jesús? Purtiʼ Binidxabaʼ maca guníʼ zusaana binni Dios pa tidiʼ lu guendanagana naroʼbaʼ. Peru bisihuinni Jesús neca tidiʼ ti hombre perfectu ra jma nagana qué zusaana de guni ni ná Jehová. ¡Guizáʼ biecheʼ Jehová pur ni biʼniʼ Xiiñiʼ! (Proverbios 27:11). (Biindaʼ nota 15, «Cruz»).

13. ¿Ximodo biaxa rescate que?

¹³ ¿Ximodo biaxa rescate que? 14 de nisán beeu stiʼ ca judíu, lu iza 33, bidii Jehová lugar guuti ca enemigu stiʼ Jesús laa (Hebreos 10:10). Peru chonna gubidxa despué, bisibani Jehová Jesús. Gundisaʼ Jehová laabe casi ti espíritu ne cadi casi binni. Ne ndiʼ nga últimu ni biʼniʼ Jesús para quixe rescate que: bibiguetaʼ guibáʼ ne biʼniʼ presentar Bixhoze guendanabani perfectu stiʼ (Hebreos 9:24). Ra gudixe Jesús rescate que, zanda guireʼnu de lu náʼ pecadu ne guendaguti (biindaʼ Romanos 3:23, 24).

14, 15. ¿Xi naquiiñeʼ gúninu para guni perdonar Jehová laanu?

¹⁴ Rápanu stale beneficiu pur rescate que. Guidúʼyanu ximodo runi beneficiar regalu sicarú bidii Dios laanu yanna riʼ ne ximodo zacaneni laanu lu futuro.

¹⁵ Zanda gaca perdonarnu. Nagana nga gúninu ni jneza siempre. Guiranu rucheʼnu, ne nuu biaje rúninu ne rininu xiixa ni cadi jneza. ¿Ximodo zanda gaca perdonarnu yaʼ? Caquiiñeʼ gaca arrepentirnu de guidubi ladxidoʼno pur guiráʼ ca cosa ni maʼ bíninu ne gácanu humilde ora guinábanu Jehová guni perdonar laanu. Pa gúninu ni la? zanda chuʼnu seguru zuni perdonarbe laanu (Colosenses 1:13, 14; 1 Juan 1:8, 9).

16. ¿Xi caquiiñeʼ gúninu para gápanu ti conciencia nayá?

¹⁶ Zanda gápanu ti conciencia nayá. Guizáʼ feu runi sentirnu ora ruchiiñaʼ conciencia stinu laanu purtiʼ bíninu xiixa cosa malu. Zándaca guiníʼ íquenu qué risácanu ne qué gápanu remediu. Peru cadi guireʼnu gana. Caquiiñeʼ guinábanu Jehová guni perdonar laanu. Pa gúninu ni, zanda chuʼnu seguru zucaadiágabe laanu ne zuni perdonarbe laanu (Hebreos 9:13, 14). Racalaʼdxiʼ Jehová gábinu laa guiráʼ ca problema stinu o ca debilidad ni nápanu (Hebreos 4:14-16). Zacá zanda gápanu ti conciencia nayá nezalú Dios.

17. ¿Xi guiráʼ ndaayaʼ zanda guicaanu pur guti Jesús pur laanu?

¹⁷ Zanda guibáninu para siempre. «Ni riaxa pecadu nga guendaguti, peru regalu ni rudii Dios nga guendanabani ni qué zaluxe pur Cristu Jesús Señor stinu» (Romanos 6:23). Pur guti Jesús pur laanu, nápanu esperanza de guibáninu para siempre ne qué chuʼ dxi gaca huaranu (Apocalipsis 21:3, 4).  ¿Xi caquiiñeʼ gúninu para guicaanu guiráʼ ca ndaayaʼ riʼ yaʼ?

18. ¿Xiñee nuunu seguru nadxii Jehová laanu?

¹⁸ Guníʼ ique pabiáʼ riéchenu ora rudii tuuxa laanu ti regalu galán. Rescate que nga regalu ni jma risaca bidii Jehová laanu, ne caquiiñeʼ gudiʼnu xquixe peʼ laabe pur laani. Juan 3:16 ná «nabé gunnaxhii Dios guidxilayú, nga runi bidii tobi lucha Xiiñiʼ». Zacá ni, guizáʼ nadxii Jehová laanu dede bidii Jesús, Xiiñiʼ ni jma nadxii. Ne laaca nánnanu nadxii Jesús laanu, purtiʼ guyuu dispuestu gatiʼ pur laanu (Juan 15:13). Regalu riʼ rusihuínnini dxandíʼ nadxii Jehová ne Jesús cada tobi de laanu (Gálatas 2:20).

19. ¿Xi zanda gúniluʼ para gaca xhamíguluʼ Jehová?

¹⁹ Yanna ra maʼ nánnaluʼ nadxii Jehová laanu, ¿xi zanda gúniluʼ para gaca xhamíguluʼ laabe yaʼ? Binibiáʼ Jehová. Nagana nga gannaxhiinu tuuxa pa qué runibiaʼnu laa. Peru Juan 17:3 cayuni animar laanu gunibiaʼnu Jehová. Pa gúniluʼ ni la? zannaxhiiluʼ laabe jma, zuyúbiluʼ gusiécheluʼ laabe ne zaca xhamíguluʼ laabe. Nga runi, cadi gusaana de guiziidiluʼ de Jehová ra guni estudiarluʼ Biblia (1 Juan 5:3).

20. ¿Ximodo rusihuínninu nápanu fe lu rescate?

²⁰ Bisihuinni nápaluʼ fe rescate que. Biblia ná «ni gapa fe Xiiñibe zacaa guendanabani ni qué zaluxe» (Juan 3:36). ¿Ximodo rusihuínninu nápanu fe yaʼ? Ra gúninu ni bisiidiʼ Jesús (Juan 13:15). Cadi guinísinu runi crenu Jesús. Caquiiñeʼ gusihuínninu nápanu fe lu rescate ca lu ca ni rúninu. Santiago 2:26 ná  «qué iquiiñeʼ fe stinu pa qué gusihuínninu ni né ca obra stinu».

21, 22. a) ¿Xiñee caquiiñeʼ chuunu dxi rietenaláʼdxinu guendaguti stiʼ Jesús guiráʼ iza? b) ¿Xi chiguidúʼyanu lu capítulo 6 ne 7?

²¹ Cadi guiaadxaluʼ dxi rietenaláʼdxinu guendaguti stiʼ Cristu. Gueelaʼ ante gatiʼ Jesús guníʼ naquiiñeʼ guietenaláʼdxinu guendaguti stiʼ. Ne rúninu ni ora qué riáʼdxanu guiráʼ iza Conmemoración o «Guendaroxhí stiʼ Señor» (1 Corintios 11:20; Mateo 26:26-28). Racalaʼdxiʼ Jesús guietenaláʼdxinu bidii guendanabani perfectu stiʼ para gulá laanu. Laabe guniʼbe: «Cadi gusaana de gúnitu ndiʼ para guietenaláʼdxitu naa» (biindaʼ Lucas 22:19). Ora chuunu Conmemoración, rusihuínninu qué riaandaʼ laanu rescate que ne pabiáʼ nadxii Jehová ne Jesús laanu. (Biindaʼ nota 16, «Conmemoración»).

²² Gástiruʼ sti regalu jma galán que rescate que (2 Corintios 9:14, 15). Lu capítulo 6 ne 7 zadúʼyanu ximodo zacané rescate que millón de binni ni maʼ guti.