1. ¿Tu laa si nga zanda gabi laanu ximodo caquiiñeʼ guni adorarnu Dios?

CASI guiráʼ religión nacaʼ rusiidicaʼ ni dxandíʼ de Dios. Peru cadi dxandíʼ ni, purtiʼ gadxé ni rusiidicabe de Dios ne ximodo guni adorarnu laa. Yanna, ¿ximodo zanda gánnanu gunáʼ nga religión ni dxandíʼ yaʼ? Jehová si zanda gabi laanu ximodo caquiiñeʼ guni adorarnu laa.

2. ¿Xi caquiiñeʼ gúniluʼ para gánnaluʼ ximodo guni adorarluʼ Dios?

² Maʼ bidii Jehová laanu Biblia para gánnanu ximodo guni adorarnu laa, nga runi galán guni estudiarluʼ ni. Zacané Dios lii cueenduluʼ ni galán né ca ni caziidiluʼ, purtiʼ guizáʼ rizaaláʼdxibe lii (Isaías 48:17).

3. ¿Xi ribeza Dios gúninu?

³ Caadxi binni ná runi aceptar Dios guiráʼ ca religión, peru cadi nga diʼ nga ni bisiidiʼ Jesús. Sicaríʼ guniʼbe: «Cadi guiráʼ diʼ ni gabi naa “Señor, Señor” ziuu lu Reinu ni nuu guibáʼ. Ziuu ca ni guni si ni ná Bixhozeʼ». Nga runi, ribeza Dios guizíʼdinu ni racalaʼdxiʼ ne gúninu ni ná. Risaca gúninu ni bizéʼtenu riʼ, purtiʼ Jesús guníʼ ca binni ni qué ruzuubaʼ stiidxaʼ Dios zeeda gácacaʼ «binni qué iquiiñeʼ» (Mateo 7:21-23).

4. ¿Xi guníʼ Jesús zadxaagalunu pa gúninu ni ná Dios?

⁴ Jesús guníʼ zaca nagana para laanu gúninu ni ná Dios. Bichaagabe xquendanabani ca xpínnibe casi ti neza ni nabéʼ ra huaxiéʼ binni riná cheʼ. Sicaríʼ guniʼbe: «Laguiuu ra puertaʼ nabéʼ. Purtiʼ xilaga puertaʼ ne xilaga  neza ni zeʼ lu guendaguti, ne stale tu riuu ra puertaʼ que; peru nabéʼ puertaʼ ne nabéʼ neza ni zeʼ lu guendanabani, ne huaxiéʼ si tu ridxela ni» (Mateo 7:13, 14). Neza nabéʼ ca, runi representar ni religión ni dxandíʼ ne riné ni binni lu guendanabani ni qué zaluxe. Ne neza xilaga ca, runi representar ni religión falsu ne riné ni binni lu guendaguti. Peru qué racalaʼdxiʼ Jehová gatiʼ nin ti binni, nga runi rudiibe oportunidad binni guiziidiʼ de laabe (2 Pedro 3:9).

5. ¿Ximodo zanda gunibiaʼnu ca binni ni runi ni ná religión ni dxandíʼ?

⁵ Jesús guníʼ zanda gunibiaʼnu ca binni ni runi ni ná religión ni dxandíʼ. Para nga, caquiiñeʼ gánnanu xi runi crécabe ne xi rúnicabe. Sicaríʼ guníʼ Jesús: «Zunibiaʼtu laacaʼ pur ni rúnicaʼ». Ne laaca guniʼbe: «Ti yaga nazaaca rudii cuananaxhi galán» (Mateo 7:16, 17). Ndiʼ cadi caníʼ perfectu ca binni ni runi ni ná Dios. Peru rúnicabe stipa pur gúnicabe ni jneza. Guidúʼyanu ximodo zanda gánnanu gunáʼ nga religión ni dxandíʼ.

6, 7. a) ¿Xiñee ni rusiidiʼ religión ni dxandíʼ zeeda ni lu Biblia? b) ¿Xi rusiidiʼ ejemplu stiʼ Jesús laanu?

⁶ Guiráʼ ni rusiidiʼ religión ni dxandíʼ zeeda ni lu Biblia. Biblia ná: «Guiráʼ ni cá lu Stiidxaʼ Dios la? Dios nga guníʼ xi guicá luni, ne nuu ni para gusiidini laanu, para gábini laanu paraa cucheʼnu, para guni corregirni guiráʼ cosa ne para gusiidini binni según ni jneza. Para guiziidiʼ chaahuiʼ ca xpinni Dios ne chuʼcaʼ listu para gúnicaʼ intiica si dxiiñaʼ galán» (2 Timoteo 3:16, 17). Bicaa apóstol Pablo ca diidxaʼ riʼ para ca xpinni Cristu: «Gucuaatu ca diidxaʼ ni gunínedu laatu casi stiidxaʼ Dios ne  cadi casi stiidxaʼ binni» (1 Tesalonicenses 2:13). Guiráʼ ni rusiidiʼ religión ni dxandíʼ zeeda ni lu Biblia si, purtiʼ laani nga Stiidxaʼ Dios. Ne qué rusiidini modo riníʼ ique binni guidxilayú ne ca tradición sticaʼ.

⁷ Guiráʼ ni bisiidiʼ Jesús bireecani de lu Stiidxaʼ Dios (biindaʼ Juan 17:17). Gatigá biquiiñebe Stiidxaʼ Dios para gusiidibe binni (Mateo 4:4, 7, 10). Laanu, ca ni dxandíʼ xpinni Dios rinándanu ejemplu stiʼ Jesús ne guiráʼ ca ni rusíʼdinu zeeda ca ni lu Biblia.

8. ¿Xi bisiidiʼ Jesús de modo gaca adorar Jehová?

⁸ Jehová si nga caquiiñeʼ guni adorarnu. Salmo 83:18 ná: «Ti ganna binni laluʼ nga Jehová, lii si nga ni nuu jma luguiáʼ lu guidubi naca guidxilayú». Ni gucalaʼdxiʼ Jesús nga ñanna binni tuu nga Dios ni dxandíʼ. Nga runi bisiidibe binni lá Dios (biindaʼ Juan 17:6). Jesús guníʼ: «Biʼniʼ adorar Jehová Dios stiluʼ ne laasibe nga naquiiñeʼ gúniluʼ ni ná» (Mateo 4:10). Nga runi, laanu ca xpinni Dios, rinándanu ejemplu stiʼ Jesús. Runi adorarnu Jehová si, riquiiñenu labe ne rusíʼdinu ni xcaadxi binni. Ne laaca rusíʼdinu laacabe xi chiguni Dios para laanu.

9, 10. ¿Ximodo rusihuínninu nadxiisaanu?

⁹ Caquiiñeʼ gusihuínninu dxandíʼ nadxiinu xcaadxi. Bisiidiʼ Jesús ca discípulo stiʼ gannaxhiisaacaʼ (biindaʼ Juan 13:35). Guendarannaxhii ni runi sentirnu pur xcaadxi naquiiñeʼ gucaani laanu chuʼnu tobi si casi hermanu, gastiʼ naca de padé laanu o xi cultura laanu, pa ricu o pobre laanu (Colosenses 3:14). Nga runi, qué riuunu lu guerra ne qué ruutinu binni. Biblia ná, zahuinni dxichi «tuu nga ca xiiñiʼ Dios ne tuu nga ca xiiñiʼ Binidxabaʼ: ni qué runi ni jneza ne ni cadi nadxii  hermanu stiʼ la? cadi zeeda de Dios». Ne laaca ruzeeteʼ ni: «Naquiiñeʼ gannaxhiisaanu; cadi gácanu casi guca Caín, purtiʼ laa zeeda de Binidxabaʼ ngue runi biiti biʼchiʼ» (1 Juan 3:10-12; 4:20, 21).

¹⁰ Riquiiñenu tiempu, stipa stinu ne xcaadxi cosa ni nápanu para gacanenu ne uguʼnu gana xcaadxi (Hebreos 10:24, 25). Nga runi, racanenu «guiráʼ binni» (Gálatas 6:10).

11. ¿Xiñee ruzúʼbanu stiidxaʼ Jesús?

¹¹ Caquiiñeʼ guzúʼbanu stiidxaʼ Jesús, purtiʼ pur laabe zanda guilanu. Biblia ná: «Gástiruʼ stobi ni iquiiñeʼ casi ti mediu para guilá binni, purtiʼ qué nibí Dios sti binni lade guiráʼ xixé binni lu guidxilayú ni ganda gulá laanu» (Hechos 4:12). Lu capítulo 5 stiʼ libru riʼ bizíʼdinu biseendaʼ Jehová Jesús para gudii xquendanabani ti guilá binni ni ruzuubaʼ diidxaʼ (Mateo 20:28). Maʼ gulí Jehová laabe para gácabe Rey ne guni mandarbe Guidxilayú. Nga runi, Biblia ná caquiiñeʼ guzúʼbanu stiidxaʼ Jesús pa racaláʼdxinu guibáninu para siempre (biindaʼ Juan 3:36).

12. ¿Xiñee qué riuʼnu lu política?

¹² Cadi naquiiñeʼ chuʼnu lu política. Qué ñuu diʼ Jesús lu política. Ora cayuni juzgárcabe laabe, sicaríʼ gúdxibe Pilato, gobernador de Roma: «Cadi naca Reinu stinneʼ parte de guidxilayú riʼ» (biindaʼ Juan 18:36). Cásica Jesús, Reinu si stiʼ Dios ni nuu guibáʼ nga runi apoyarnu. Nga runi, ratiica si nabézanu, qué riuʼnu lu política. Peru Biblia ná «naquiiñeʼ guzuubaʼ guiráʼ binni stiidxaʼ ca autoridad» o ca gobiernu (Romanos 13:1). Rúninu ni ná ca ley ni nuu ndaaniʼ guidxi ra nabézanu. Peru ora gucaa xiixa ley laanu guchéʼnenu ca ley  stiʼ Dios, rúninu casi biʼniʼ ca apóstol. Laacaʼ guniʼcaʼ: «Jma naquiiñeʼ guzúʼbadu stiidxaʼ Dios casi gobernante que guzúʼbadu stiidxaʼ hombre» (Hechos 5:29; Marcos 12:17).

13. Ora runi predicarnu, ¿xi rábinu binni zuni Reinu stiʼ Dios?

¹³ Caquiiñeʼ gábinu binni Reinu si stiʼ Dios nga zanda guni chaahuiʼ ca guendanagana nuu lu Guidxilayú. Jesús guníʼ «zaca predicar ca noticia galán stiʼ Reinu lu guidubi guidxilayú» (biindaʼ Mateo 24:14). Nin ti gobiernu qué zanda guni ni chiguni Reinu stiʼ Dios pur laanu (Salmo 146:3). Bisiidiʼ Jesús laanu guinábanu gueeda Reinu stiʼ Dios ora guni orarnu, sicaríʼ guniʼbe: «Gueeda Reinu stiluʼ. Gaca ni naluʼ ndaaniʼ guidxilayú, cásica raca ni guibáʼ» (Mateo 6:10). Biblia ná zunitilú Reinu stiʼ Dios guiráʼ ca gobiernu nuu lu Guidxilayú riʼ, «ne laasini ziaanani para siempre» (Daniel 2:44).

14. Para lii ¿gunáʼ nga religión ni dxandíʼ?

¹⁴ Despué de maʼ bizíʼdinu ca ni maʼ biete riʼ, guníʼ ique ca pregunta riʼ: «¿Tuu nga ca ni rusiidiʼ ni ná Biblia? ¿Tuu nga ca ni rabi binni tu láʼ Dios? ¿Tuu nga ca ni dxandíʼ nadxiisaa? ¿Tuu nga ca ni runi cré biseendaʼ Dios Jesús para gulá laanu? ¿Tuu nga ca ni qué riná chuʼ lu política? ¿Tuu nga ca ni rabi binni Reinu si stiʼ Dios nga zanda guni chaahuiʼ ca guendanagana stinu?». Ca testigu stiʼ Jehová si nga rúninu ca ni (Isaías 43:10-12).

15. ¿Xi caquiiñeʼ gúninu pa racaláʼdxinu chuulaʼdxiʼ Dios modo runi adorarnu laa?

¹⁵ Cadi caquiiñeʼ si guni creluʼ nuu Dios. Purtiʼ ca demonio laaca runi crecaʼ nuu Dios, peru qué rúnicaʼ ni nabe (Santiago 2:19). Pa racaláʼdxinu chuulaʼdxiʼ Dios  modo runi adorarnu laa la? caquiiñeʼ gúninu ni ná, ne cadi guni crésinu nuu.

16. ¿Xiñee caquiiñeʼ guireʼnu de religión falsu?

¹⁶ Para chuulaʼdxiʼ Dios modo runi adorarnu laa la? laaca caquiiñeʼ guireʼnu de religión falsu. Sicaríʼ bicaa profeta Isaías: «Laguiree de ndaaniʼ ni, lagaca nayá» (Isaías 52:11; 2 Corintios 6:17). Pur nga caquiiñeʼ gucáʼnanu guiráʼ ni zeeda de religión falsu.

17, 18. a) ¿Xii nga «Babilonia guidxi roʼ»? b) ¿Xiñee nagueendaca caquiiñeʼ guireeluʼ de ndaaniʼ religión falsu?

¹⁷ ¿Xii nga religión falsu? Laani nga ca religión ni rusiidiʼ zanda guni adorarnu Dios modo tiica ne cadi modo ná Stiidxaʼ Dios. Biblia ribee lá guiráʼ religión falsu «Babilonia guidxi roʼ» (Apocalipsis 17:5). ¿Xiñee yaʼ? Purtiʼ despué de Diluviu que, bizulú bisiidicabe stale cosa ni cadi dxandíʼ ndaaniʼ guidxi Babilonia. Bireeche guiráʼ ni bisiidicabe que lu guidubi Guidxilayú. Guzéʼtenu ti ejemplu, biʼniʼ adorar ca binni de Babilonia grupu de chonna dios. Ne tiempu riʼ, stale religión rusiidiʼ naca Dios ti trinidad, peru Biblia rusiidiʼ Jehová nga tobi lucha Dios ni dxandíʼ ne Jesús nga Xiiñibe (Juan 17:3). Laaca biʼniʼ cré ca binni de Babilonia ribani ti parte de cuerpu stiʼ binni ora rati ne zanda guni sufrir ni ndaaniʼ infiernu. Peru cadi dxandíʼ ni rusiidicabe. (Biindaʼ nota 14, «Trinidad, ti enseñanza ni cadi jneza», 17, «Alma», ne 18, «Espíritu»).

¹⁸ Maʼ guníʼ Dios maʼ cadi candaa zanitilú guiráʼ ca religión falsu (Apocalipsis 18:8). ¿Ñee maʼ biéneluʼ xiñee caquiiñeʼ guireeluʼ de ndaaniʼ religión falsu la? Racalaʼdxiʼ Jehová gúniluʼ ni nagueenda para ganda guilaluʼ (Apocalipsis 18:4).

19. ¿Ximodo zapa Dios lii pa quixhe íqueluʼ gúniluʼ ni ná?

 ¹⁹ Pa gaca decidirluʼ guireeluʼ de ndaaniʼ religión falsu ne gúniluʼ ni ná Jehová, zándaca qué ziene ca xhamíguluʼ ne familia stiluʼ lii ne gucaalucaʼ o maʼ cadi guidxaagacaʼ lii. Peru zapa Jehová lii. Zudiibe lii ti familia ra nuu stale millón de binni ni dxandíʼ nadxiisaa ne napa esperanza de guibani para siempre ndaaniʼ ti guidxilayú cubi (Marcos 10:28-30). Zándaca caadxi de ca xhamíguluʼ o familia stiluʼ ni qué naʼ gúniluʼ ni ná Jehová quixhe ique guni estudiar Biblia despué.

20. ¿Xiñee risaca gácaluʼ parte de religión ni rusiidiʼ ni dxandíʼ?

²⁰ Maʼ cadi candaa zunitilú Dios guiráʼ cosa malu, ne zuni mandar Reinu stibe guidubi Guidxilayú (2 Pedro 3:9, 13). Guizáʼ sicarú zaca tiempu ca. Guiráʼ binni zuni adorar Jehová modo riuulaʼdxiʼ. Nga runi, biʼniʼ stipa gúniluʼ ni ná Dios ne gácaluʼ parte de religión ni rusiidiʼ ni dxandíʼ.