1, 2. a) ¿Xiñee qué zanda guiniʼluʼ runibiaʼluʼ ti binni famoso pa nombre si stibe nánnaluʼ? b) ¿Xi riníʼ ique binni de Jesús?

NUU stale binni famoso ndaaniʼ Guidxilayú riʼ, ne zándaca nánnaluʼ tu láʼ caadxi de laacabe. Peru ¿ñee zanda gunibiaʼluʼ ti binni pa nombre si stibe nánnaluʼ la? Coʼ ¿njaʼ? ¿Xiñee yaʼ? Purtiʼ qué gánnaluʼ stale cosa de laabe ne qué ganna chaahuiluʼ ximodo peʼ laabe.

² Neca maʼ gudiʼdiʼ biaʼ chupa mil iza de beeda Jesucristu lu Guidxilayú, zándaca huayunadiágaluʼ guiníʼ binni de laabe. Peru stale binni qué ganna ximodo peʼ nga guca Jesús. Nuu tu ná gúcabe ti buen hombre. Xcaadxi ná gúcabe ti profeta. Ne nuu tu runi cré Jesús nga Dios. ¿Lii yaʼ? ¿Xi riníʼ íqueluʼ? (Biindaʼ nota 12, «Jesucristu»).

3. ¿Xiñee nabé risaca guiziidiluʼ ni dxandíʼ de Jehová ne de Jesucristu?

³ Guizáʼ risaca gánnaluʼ ni dxandíʼ de Jesús. ¿Xiñee yaʼ? Purtiʼ Biblia ná: «Zacaacabe guendanabani ni qué zaluxe ra gunibiáʼcabe lii, tobi lucha Dios ni dxandíʼ, ne ra gunibiáʼcabe Jesucristu, ni biseendaluʼ» (Juan 17:3). Pa guiziidiluʼ ni dxandíʼ de Jehová ne de Jesús la? zanda guibániluʼ para siempre ndaaniʼ ti paraísu lu Guidxilayú riʼ (Juan 14:6). Ne ra gunibiaʼluʼ Jesús zacaneni lii yanna purtiʼ laasibe bisaanabe ti ejemplu ni jma galán ni zanda chinándanu para gánnanu ximodo  guibáninu ne ximodo guni tratarnu xcaadxi  (Juan 13:34, 35). Lu capítulo 1 bizíʼdinu ni dxandíʼ de Dios. Ne lu capítulo riʼ zazíʼdinu ni rusiidiʼ Biblia de Jesús.

4. Ora ruzeeteʼ Biblia ca título Mesías ne Cristu, ¿tudé caniʼni?

⁴ Stale iza ante gale Jesús, maca guníʼ Jehová lu Biblia zuseendaʼ Mesías o Cristu. Zeeda diidxaʼ Mesías de hebreu ne zeeda diidxaʼ Cristu de griegu. Guiropaʼ título riʼ caníʼcani de binni ni gulí Dios para guni ti dxiiñaʼ nabé risaca. Ne lu futuro, zuni cumplir Mesías riʼ guiráʼ ca promesa stiʼ Dios.

5. ¿Ñee guyuu ca discípulo stiʼ Jesús seguru laabe nga Mesías la?

⁵ Guyuu ca discípulo stiʼ Jesús seguru laabe nga Mesías ni nexheʼ gueeda que (Juan 1:41). Ngue runi, gudxi apóstol Pedro Jesús: «Lii nga Cristu» (Mateo 16:16). Guidúʼyanu xiñee laaca zanda chuʼnu seguru laabe nga Mesías.

6. ¿Xi biʼniʼ Jehová para gacané laanu gánnanu tuu nga Mesías?

⁶ Stale iza ante gale Jesús, bicaa ca profeta stiʼ Dios stale cosa ni zacané binni ganna tuu nga Mesías. ¿Ximodo zacaneni laacabe yaʼ? Guzéʼtenu ti ejemplu para guiene chaahuinu ni. Bixuiʼlú biseendacabe lii chicaaluʼ ti binni ni qué runibiaʼluʼ ra terminal de autobús ne nuu stale binni raqué. Pa gusiene chaahuicabe lii ximodo binni ca ne xi lari nácube la? zándaca casi zeluʼ zadxélaluʼ laabe. Zacagá nga biʼniʼ Jehová, biquiiñeʼ ca profeta stiʼ para gabi laanu xi chiguni Mesías ne xi zazaacabe. Ora biʼyaʼ ca binni ni dxandíʼ racalaʼdxiʼ guni ni ná Dios modo guca cumplir ca profecía riʼ, bidiicaʼ cuenta Jesús nga Mesías o Cristu.

7. Bizeeteʼ chupa profecía ni zacané laanu gánnanu Jesús nga Mesías.

 ⁷ Guidúʼyanu chupa de ca profecía riʼ. Primé profecía ca gucuá ni gadxe gayuaa iza ante gale Jesús. Profeta Miqueas bicaa zale Mesías que ndaaniʼ ti guidxihuiiniʼ láʼ Belén (Miqueas 5:2). Ne raqué peʼ nga gule Jesús (Mateo 2:1, 3-9). Guiropa profecía ca bicaa Daniel ni. Laabe bicaabe zahuinni tuu nga Mesías ca lu iza 29 (Daniel 9:25). Ne laaca guca cumplir ni. * Ca ndiʼ nga chupa si de stale profecía ni zacané laanu gánnanu Jesús nga Mesías ni nexheʼ gueeda que.

8, 9. ¿Ximodo bisihuinni ca ni bizaaca dxi guyuunisa Jesús laa nga Mesías?

⁸ Nayaguieʼ bisihuinni Jehová Jesús nga Mesías. Gudxi Dios Juan Bautista zudiibe laa ti seña para ganna tuu nga Mesías. Lu iza 29, guyé Jesús ra guiiguʼ Jordán para cúʼnisa Juan laa. Dxi que nga biʼyaʼ Juan seña que. Biblia cusiene ni bizaaca: «Casi peʼ guyuunisa Jesús, biree ndaaniʼ nisa, ne óraque bixeleʼ guibáʼ ne biiyabe zedayete espíritu stiʼ Dios casi ti paloma luguiáʼ Jesús. Ne óraque gucuá ti ridxi de guibáʼ: “Ndiʼ nga Xiiñeʼ ni nadxieeʼ; ni rusiecheʼ naa”» (Mateo 3:16, 17). Ni biʼyaʼ Juan ne ni binadiaga bicaani laa chuʼ seguru Jesús nga Mesías (Juan 1:32-34). Dxi guyuunisa Jesús, bisaba  Jehová espíritu santu stiʼ luguiabe. Óraque nga beeda gácabe Mesías o Cristu. Laabe nga binni ni gulí Dios para gaca Rey ne Xaíque (Salmo 2:6; Isaías 55:4).

⁹ Ca profecía ni zeeda lu Biblia ne ca cosa ni biʼniʼ Jehová ne ni guníʼ dxi guyuunisa Xiiñiʼ bisihuínnicani Jesús nga Mesías. Peru ¿padé beeda Jesús? ¿Ne ximodo peʼ nga gúcabe? Guidúʼyanu xiná Biblia.

10. ¿Xi rusiidiʼ Biblia modo bibani Jesús ante gueeda lu Guidxilayú?

¹⁰ Rusiidiʼ Biblia xadxí bibani Jesús guibáʼ ante gueeda lu Guidxilayú. Guzéʼtenu ti ejemplu, guníʼ profeta Miqueas maca xadxí de nabani binni ni chigaca Mesías (Miqueas 5:2). Ne stale biaje guníʼ Jesús maca nabani guibáʼ ante gale lu Guidxilayú (biindaʼ Juan 3:13; 6:38, 62; 17:4, 5). Dxi guyuu Jesús guibáʼ la? guizáʼ guyuube nayecheʼ purtiʼ gúpabe ti tratu especial né Jehová.

11. ¿Xiñee nabé especial runi sentir Jehová né tratu ni napané Jesús?

¹¹ Nabé especial runi sentir Jehová né tratu ni napané Jesús. ¿Xiñee yaʼ? Purtiʼ laabe «nga ni bizáʼ Dios primé lade guiráʼ cosa» (Colosenses 1:15). * Laaca nabé especial Jesús para Jehová purtiʼ laabe nga «tobi lucha Xiiñiʼ». Ndiʼ riníʼ stubi si Jehová nga bizáʼ Jesús (Juan 3:16). Ne laaca Jesús si nga biquiiñeʼ Jehová para bizáʼ guiráʼ cosa (Colosenses 1:16). Ne Jesús si nga rábicabe «Diidxaʼ», purtiʼ riquiiñeʼ Jehová laabe para gudii instrucción ne mensaje ca ángel ne binni (Juan 1:14).

12. ¿Xiñee nánnanu cadi laaca Jesús nga Dios?

¹² Nuu binni runi cré laaca Dios nga Jesús, peru cadi nga diʼ nga ni rusiidiʼ Biblia. Biblia ná guyuu tu bizáʼ Jesús, ndiʼ rusihuinni cadi maca nuube dede ante. Peru Jehová la? siempre huayuu. Ne laa bizáʼ guiráʼ ni nuu (Salmo 90:2). Nayaʼniʼ dxindxi modo rusiene  Biblia jma napa Jehová poder que Xiiñiʼ. Ne qué ñuu dxi niníʼ Jesús biaʼca laa Bixhoze (biindaʼ Juan 14:28; 1 Corintios 11:3). Jehová si nga «Dios ni jma napa poder» (Génesis 17:1). Ne guirútiruʼ jma risaca ne jma napa poder que laabe. (Biindaʼ nota 14, «Trinidad, ti enseñanza ni cadi jneza»).

13. ¿Xiñee ná Biblia naca Jesús «casi Dios ni qué ridúʼyanu»?

¹³ Ante chaʼ guibáʼ ne Guidxilayú, maca biʼniné Jehová Jesús dxiiñaʼ juntu stale mil millón de iza. Cumu guyuucabe juntu stale iza la? nabé gúpacabe ti cariñu especial (Juan 3:35; 14:31). Nga runi riete lu Biblia naca Jesús «casi Dios ni qué ridúʼyanu». ¿Xiñee yaʼ? Purtiʼ nabé galán modo bisihuinni Jesús ca cualidad stiʼ Bixhoze (Colosenses 1:15).

14. ¿Ximodo beeda gale Jesús casi binni?

¹⁴ Guyuu Jesús dispuestu gusaana guibáʼ ne gueeda lu Guidxilayú. Peru ¿ximodo beeda gálebe casi binni yaʼ? Biʼniʼ Jehová ti milagru. Dede guibáʼ guluu Dios xquendanabani Xiiñiʼ ndaaniʼ ti binnidxaapaʼ láʼ María. Pur nga qué niquiiñeʼ ti hombre para ñaca xiiñiʼ María. Nga runi gule baʼduhuiiniʼ ca sin donda, ne gulee láʼ María laabe Jesús (Lucas 1:30-35).

15. ¿Ximodo zanda gunibiáʼ chaahuiluʼ Jehová?

¹⁵ Jesús guníʼ: «Ni maʼ biiyaʼ naa la? laaca maʼ biiyaʼ Bixhozeʼ» (Juan 14:9). Cumu rusihuinni Jesús ximodo nga Bixhoze la? nga runi, zunibiáʼ chaahuiluʼ Jehová ra guiziidiluʼ de Jesús. Zanda guiziidiluʼ jma de modo bibani Jesús ne modo laa, ra gúʼndaluʼ guidapaʼ libru stiʼ Biblia ni runibiáʼcabe casi ca Evangeliu: Mateo, Marcos, Lucas ne Juan.

16. a) ¿Xi bisiidiʼ Jesús? b) ¿Tudé biziidiʼ Jesús guiráʼ ni bisiidiʼ?

 ¹⁶ Stale binni gudxi Jesús «Maestru» (Juan 1:38; 13:13). Lade ca cosa jma risaca ni bisiidiʼ Jesús nga «ca noticia galán stiʼ Reinu». ¿Xi Reinu yaʼ? Reinu stiʼ Dios, ni chiguni mandar Guidxilayú dede guibáʼ ne zedané ni ndaayaʼ para ca binni ni guzuubaʼ stiidxaʼ Dios (Mateo 4:23). ¿Tudé biziidiʼ Jesús guiráʼ ni bisiidiʼ yaʼ? Biziidibe ca ni de Jehová. Jesús guníʼ: «Cadi ni rabeʼ nga rusiideʼ, sínuque rusiideʼ ni ná ni biseendaʼ naa» (Juan 7:16). Gunna dxichi Jesús racalaʼdxiʼ Dios gunadiaga binni ca noticia galán ni cuzeeteʼ zuni mandar Reinu stiʼ Dios lu Guidxilayú.

17. a) ¿Paraa bisiidiʼ Jesús? b) ¿Xiñee bíʼnibe stale stipa para gusiidibe binni?

¹⁷ ¿Paraa bisiidiʼ Jesús yaʼ? Ra tiica si nuu binni. Bisiidibe lu layú, ndaaniʼ guidxi ne guidxihuiiniʼ, ra luguiaa, ra templu, ndaaniʼ sinagoga ne ra lidxi binni. Qué nibézadibe ñé binni ra nuube sínuque laabe yeyúbibe laacaʼ (Marcos 6:56; Lucas 19:5, 6). Gulee Jesús stale tiempu ne biʼniʼ stipa para gusiidiʼ binni. ¿Xiñee yaʼ? Bíʼnibe ni purtiʼ nánnabe nga nga ni racalaʼdxiʼ Dios, ne siempre bizuubabe stiidxaʼ Bixhózebe (Juan 8:28, 29). Laaca bisiidibe purtiʼ riabe binni (biindaʼ Mateo 9:35, 36). Biiyabe qué rusiidiʼ ca xaíque yuʼduʼ que ni dxandíʼ de Dios ne de Reinu stiʼ. Ngue runi gudixhe íquebe guiníʼnebe binni de ca noticia galán stiʼ Reinu stiʼ Dios biaʼ ganda.

18. ¿Xii nga ni jma riuuláʼdxiluʼ de modo naca Jesús?

¹⁸ Guizáʼ gunnaxhii Jesús binni ne bizaaláʼdxibe laacaʼ. Gúpabe cariñu binni, ne guyuulaʼdxiʼ binni guiniʼné laabe. Dede ca xcuidihuiiniʼ riuuláʼdxicaʼ chuʼcaʼ ra  nuube (Marcos 10:13-16). Siempre biʼniʼ Jesús ni jneza. Gucananaláʼdxibe guendaribaʼnaʼ ne injusticia (Mateo 21:12, 13). Tiempu bibani Jesús, qué ñapa ca gunaa stale derechu ne qué ñuni respetárcabe laacaʼ. Peru Jesús la? biʼniʼ tratarbe ca gunaa né respetu ne bisisácabe laacaʼ (Juan 4:9, 27). Laaca dxandíʼ peʼ guca Jesús humilde. Ti dxi, gudiibibe ñee ca apóstol stibe, ti dxiiñaʼ ni runi ti mozo (Juan 13:2-5, 12-17).

19. ¿Xi ejemplu rusihuinni nanna Jesús xi caquiiñeʼ binni ne racaláʼdxibe gacanebe laacaʼ?

¹⁹ Gunna Jesús xi caquiiñeʼ binni ne gucanebe laacaʼ. Bisihuínnibe ni ora biquiiñebe poder bidii Dios laabe para gusiándabe binni (Mateo 14:14). Guzéʼtenu ti ejemplu, ti dxi bidxiña ti hombre napa lepra laabe ne ná: «Nannaʼ zanda gusiándaluʼ naa pa gacaláʼdxiluʼ». Cumu biiyabe cayacaná hombre riʼ ne cayuni sufrir la? gucaná ladxidoʼbe. Nga runi biá Jesús laabe ne gucané laabe. Óraque bisigaanáʼ Jesús, gudaʼnaʼ laabe ne guníʼ: «Racalaʼdxeʼ pue. Bianda». ¡Oraqueca zeʼ lepra que, ne bianda hombre que! (Marcos 1:40-42). ¿Ñee ruxuíʼluluʼ ximodo biʼniʼ sentir hombre que la?

20, 21. ¿Xiñee Jesús nga ejemplu ni jma galán para laanu ra bizuubaʼ stiidxaʼ Dios?

²⁰ Jesús nga ejemplu ni jma galán para laanu ra bizuubaʼ stiidxaʼ Dios. ¿Xiñee yaʼ? Purtiʼ qué nusaana de ñúnibe ni ná Bixhózebe neca bizaacabe stale cosa ne bicaalú ca enemigu stibe laabe. Guzéʼtenu ti ejemplu, qué ñúnibe ni ná Binidxabaʼ dxi bicaa laabe gucheebe (Mateo 4:1-11). Ne laaca qué ñuni cré caadxi de  ca familia stibe pa laabe nga Mesías, ne dede guniʼcaʼ cayaca íquebe. Neca zacá, qué nusaanabe de ñúnibe ni ná Jehová (Marcos 3:21). Ne ora bininá ca enemigu stibe laabe la? bíʼnirube ni ná Dios ne qué nuquíxebe ni bíʼnicaʼ laabe (1 Pedro 2:21-23).

²¹ Qué nusaana Jesús de ñuni ni ná Jehová neca guizáʼ feu ne naná modo biiticabe laa (biindaʼ Filipenses 2:8). Guníʼ ique guiráʼ ni biʼniʼ huantarbe dxi gútibe: gunaazecabe laabe, guníʼ caadxi falsu testigu caniʼbe mal de Dios, ne guníʼ caadxi juez ni qué runi ni jneza gátibe, biʼniʼ burla binni laabe, ne nabé feu modo bininá caadxi soldadu laabe ne bicaacaʼ laabe lu ti yaga. Ne ora mayaca gatiʼ Jesús, guníʼ: «¡Maʼ guca cumplir ni!».  Ni jma racaláʼdxibe nga gaca cumplir ni ná Dios (Juan 19:30). Chonna gubidxa despué de gútibe, bisibani Jehová laabe ne bidii laabe ti cuerpu de espíritu (1 Pedro 3:18). Gudiʼdiʼ si caadxi semana, bibiguetaʼ Jesús guibáʼ, guribe «ladu derechu stiʼ Dios» ne gulézabe guni Bixhózebe laabe Rey (Hebreos 10:12, 13).

22. ¿Xi zanda u

²² Pur bizuubaʼ Jesús stiidxaʼ Bixhoze lu guiráʼ ni biʼniʼ la? zanda guibáninu para siempre ndaaniʼ ti paraísu lu Guidxilayú. Nga nga ni racalaʼdxiʼ Jehová dede dxi bizáʼ Guidxilayú. Lu sti capítulo ca zazíʼdinu ximodo zacané guendaguti stiʼ Jesús para gaca cumplir ca cosa sicarú ni racalaʼdxiʼ Dios lu futuro.