1. ¿Xi zándaca guinabadiidxaluʼ despué de maʼ biʼniʼ estudiarluʼ libru riʼ?

LU LIBRU riʼ maʼ biziidiluʼ stale cosa ni dxandíʼ rusiidiʼ Biblia, casi promesa ni napa Dios de gudii laanu ti guendanabani ni qué zaluxe, nánnanu xi rizaaca binni ora gatiʼ ne esperanza de guibani ca binni ni maʼ guti sti biaje (Eclesiastés 9:5; Lucas 23:43; Juan 5:28, 29; Apocalipsis 21:3, 4). Zándaca maʼ rieluʼ ca reunión ni rapa ca testigu stiʼ Jehová ne maʼ runi creluʼ laacabe nga religión ni rusiidiʼ ni dxandíʼ (Juan 13:35). Ne zándaca  maʼ cayaca xhamíguluʼ Jehová ne maʼ gudixhe íqueluʼ gúniluʼ ni ná. Nga runi, zándaca guinabadiidxaluʼ: «¿Xiruʼ caquiiñeʼ guneʼ para guneʼ ni ná Dios yaʼ?».

2. ¿Xiñee gunabaʼ hombre de Etiopía que chúʼnisa?

² Ne ndiʼ peʼ nga ni gunabadiidxaʼ ti hombre de Etiopía ni bibani lu primé siglu. Cadi tan xadxí de biasa Jesús de lade gueʼtuʼ, ti discípulo stiʼ ni láʼ Felipe biʼniʼ predicar hombre que ne bisiene laabe Jesús nga Mesías. Nabé bidxagayaa hombre de Etiopía que né ca ni biziidiʼ ne oraqueca guníʼ: «¡Biiyaʼ! Raríʼ daʼ nisa. ¿Xi cucueeza naa de chuaanisaʼ yaʼ?» (Hechos 8:26-36).

3. a) ¿Xi biʼniʼ mandar Jesús guni ca discípulo stiʼ? b) ¿Ximodo naquiiñeʼ chúʼnisa binni?

³ Biblia rusiidiʼ pa quixhe íqueluʼ guni servirluʼ Jehová la? naquiiñeʼ chuʼnísaluʼ. Biʼniʼ mandar Jesús ca discípulo stiʼ: «Lagacané binni de guiráʼ guidxi gaca discípulo stinneʼ». Ne laaca guniʼbe: «Lacuunisa laacaʼ» (Mateo 28:19). Ne Jesús peʼ gudixhe ejemplu riʼ. Peru qué nurúbacabe caadxi nisa íquebe, sínuque biaaziʼ guidubi xcuérpube ndaaniʼ nisa (Mateo 3:16). Ca dxi riʼ, ora riuunisa ti xpinni Cristu laaca naquiiñeʼ guiaaziʼ guidubi xcuerpu ndaaniʼ nisa.

4. ¿Xi rusihuínninu ora chuʼnísanu?

⁴ Ora riuunisa ti binni rusihuinni nezalú xcaadxi dxandíʼ peʼ racalaʼdxiʼ gaca xhamigu Dios ne guni servir laabe (Salmo 40:7, 8). Nga runi, zándaca guinabadiidxaluʼ: «¿Xi caquiiñeʼ guneʼ para ganda chuaanisaʼ yaʼ?».

5. a) ¿Xi caquiiñeʼ gúniluʼ ante chuʼnísaluʼ? b) ¿Xiñee nabé risaca cheluʼ reunión?

⁵ Ante chuʼnísaluʼ, caquiiñeʼ gunibiaʼluʼ Jehová ne  Jesús. Ne maʼ cayúniluʼ ni ra cayuni estudiarluʼ Biblia (biindaʼ Juan 17:3). Peru caquiiñeʼ gúniluʼ xcaadxi cosa. Biblia ná caquiiñeʼ guiene chaahuiluʼ xii nga ni racalaʼdxiʼ Dios gúniluʼ (Colosenses 1:9). Zacané ca reunión ni rapa ca testigu stiʼ Jehová lii para chuʼluʼ jma gaxha de Jehová. Pur nga nabé risaca cadi gusaana de cheluʼ ca ni (Hebreos 10:24, 25).

6. ¿Pabiáʼ naquiiñeʼ gánnaluʼ de lu Biblia para ganda chuʼnísaluʼ?

⁶ Cadi cabeza Jehová gánnaluʼ xiná guidubi naca Biblia para ganda chuʼnísaluʼ. Laaca qué nibeza Jehová ñanna hombre de Etiopía que guirani para ñuunisa (Hechos 8:30, 31). Ni dxandíʼ nga qué zusaana de guizíʼdinu de Jehová (Eclesiastés 3:11). Peru para ganda chuʼnísaluʼ naquiiñeʼ gánnaluʼ ne guni aceptarluʼ caadxi de ca cosa ni jma naquiiñeʼ guiziidiluʼ de lu Biblia (Hebreos 5:12).

7. Ra cayuni estudiarluʼ Biblia ¿ximodo cayacané ni lii?

⁷ Biblia cusiene «pa qué gápanu fe qué ziuulaʼdxiʼ Dios ni rúninu» (Hebreos 11:6). Nga runi, naquiiñeʼ gápaluʼ fe para ganda chuʼnísaluʼ. Laaca ruzeeteʼ Biblia xi biʼniʼ caadxi binni de Corinto ora binadiágacaʼ ni cananíʼ ca xpinni Cristu, oraqueca «biʼniʼ crecaʼ ne guyuunísacaʼ» (Hechos 18:8). Zacaca nga naquiiñeʼ gúniluʼ, ra cayuni estudiarluʼ Biblia cayacané ni lii gápaluʼ fe lu ca promesa stiʼ Dios ne ra gutiʼ Jesús pur laanu zanda guilanu de lu náʼ pecadu ne guendaguti (Josué 23:14; Hechos 4:12; 2 Timoteo 3:16, 17).

8. ¿Xi zucaa lii guiníʼneluʼ xcaadxi binni de ca ni caziidiluʼ?

⁸ Ra guiziidiluʼ jma de ca ni rusiidiʼ Biblia ne  gúʼyaluʼ ximodo cayacané ni lii lu xquendanabániluʼ, zaca fe stiluʼ jma naguidxi. Ne zucaa ni lii guiníʼneluʼ xcaadxi binni de ca ni caziidiluʼ (Jeremías 20:9; 2 Corintios 4:13). Peru ¿tu laa zanda guiníʼneluʼ yaʼ?

9, 10. a) ¿Tu guiráʼ zanda guzulú guiníʼneluʼ ca ni maʼ biziidiluʼ de lu Biblia? b) ¿Xi naquiiñeʼ gúniluʼ pa maʼ racaláʼdxiluʼ guni predicarneluʼ congregación?

⁹ Zanda gacaláʼdxiluʼ guiníʼneluʼ binnilídxiluʼ, xhamíguluʼ, xpecínuluʼ, ca ni runineluʼ dxiiñaʼ o ca xcompañéruluʼ de scuela de ca ni caziidiluʼ de lu Biblia. Guizáʼ galán pa gúniluʼ ni. Cadi guiaandaʼ lii gácaluʼ nachaʼhuiʼ ne gápaluʼ respetu ora guiníʼneluʼ laacabe. Ra tidiʼ tiempu maʼ zanda guzulú guni predicarneluʼ congregación. Ne ora gúʼyaluʼ maʼ nuuluʼ listu la? zanda guiníʼneluʼ Testigu ni rudii lii estudiu de lu Biblia ne gábiluʼ laa maʼ racaláʼdxiluʼ guni predicarneluʼ congregación. Pa guʼyaʼ Testigu ca maʼ nuuluʼ listu ne nabániluʼ modo rusiidiʼ Biblia, zaca reunir guirópatu né chupa ancianu de congregación.

¹⁰ Lu reunión riʼ, zaniʼné ca ancianu ca lii para gúʼyacaʼ pa riéneluʼ ne runi creluʼ caadxi de ca cosa ni jma naquiiñeʼ guiziidiluʼ de lu Biblia ne pa nabániluʼ modo rusiidini. Laaca zuuyacabe pa dxandíʼ peʼ racaláʼdxiluʼ gácaluʼ ti testigu stiʼ Jehová. Bietenalaʼdxiʼ, rapa ca ancianu guiráʼ ca hermanu ne hermana ni nuu ndaaniʼ congregación ne laaca rápacabe lii. Nga runi, cadi guidxíbiluʼ guiníʼneluʼ laacabe (Hechos 20:28; 1 Pedro 5:2, 3). Despué de reunión ca, zabi ca ancianu ca lii pa maʼ zanda guzulú guni predicarneluʼ congregación.

11. ¿Xiñee nabé risaca guchaʼnu modo nabáninu ante guzulú guni predicarnenu congregación?

 ¹¹ Zándaca gabi ca ancianu ca lii caquiiñeʼ guchaaluʼ caadxi cosa lu xquendanabániluʼ ante guzulú guni predicarneluʼ congregación. ¿Xiñee nabé risaca gúniluʼ ni yaʼ? Purtiʼ nácanu representante stiʼ Dios ora runi predicarnu. Pur nga, caquiiñeʼ guibáninu jneza para gusisácanu laabe (1 Corintios 6:9, 10; Gálatas 5:19-21).

12. ¿Xiñee guiranu caquiiñeʼ gaca arrepentirnu?

¹² Nuu sti cosa ni caquiiñeʼ gúniluʼ ante chuʼnísaluʼ. Apóstol Pedro guníʼ: «Lagaca arrepentir ne laibiguetaʼ ra nuu Dios para guixiá ca pecadu stitu» (Hechos 3:19). ¿Xi riníʼ gaca arrepentirnu yaʼ? Laani nga guiuubaʼ ladxidoʼno pur ca cosa ni cadi jneza bíninu dxiqué. Quíxhenu ti ejemplu, pa dxiqué biʼniʼ cometerluʼ pecadu sexual la? naquiiñeʼ gaca arrepentirluʼ. Peru pa qué huayuu dxi gúniluʼ cosa malu yaʼ? Neca zacá, naquiiñeʼ gaca arrepentirluʼ purtiʼ guiranu rucheʼnu ne caquiiñeʼ guni perdonar Dios laanu (Romanos 3:23; 5:12).

13. ¿Xi riníʼ guibiguétaluʼ casi ñaca nudiiluʼ ti vuelta?

¹³ Peru ¿ñee caquiiñeʼ si chuʼnu triste o guiuubaʼ ladxidoʼno pur ni bíninu la? Coʼ. Apóstol Pedro laaca guníʼ: «Laibiguetaʼ». Ndiʼ riníʼ naquiiñeʼ gucaanaluʼ guiráʼ ca cosa malu bíʼniluʼ dxiqué ne guzulú guibániluʼ jneza. Guníʼ ique ndiʼ: bixuiʼlú ziusaluʼ xcárruluʼ zeluʼ ti lugar ra qué huayuu dxi cheluʼ. Gudiʼdiʼ si ratu, bidiiluʼ cuenta gadxé neza gucuaaluʼ. ¿Xi ñúniluʼ? Ni dxandíʼ nga nindételuʼ velocidad stiʼ carru ca, nibezadxiluʼ ne nudiiluʼ vuelta para guicaaluʼ neza ni ziné lii lugar ra cheluʼ  que. Zacagá rizaaca ora runi estudiarluʼ Biblia, zándaca zudiiluʼ cuenta nuuruʼ caadxi cosa ni caquiiñeʼ guchaaluʼ lu xquendanabániluʼ. Nga runi, biʼniʼ stipa pur guchaaluʼ casi ñaca nudiiluʼ ti vuelta, ni caninu nga gúniluʼ cambiu lu xpídaluʼ ne gúniluʼ ni jneza.

14. ¿Xi caquiiñeʼ gúniluʼ para gaca dedicarluʼ Dios?

¹⁴ Sti cosa ni naquiiñeʼ gúniluʼ ante chuʼnísaluʼ nga gaca dedicarluʼ Dios. Ora tuuxa racalaʼdxiʼ gaca dedicar Dios, naquiiñeʼ guni ti oración Jehová ne guni prometer zuni adorar laasibe ne ni jma zasaca lu xquendanabani nga guni servir laabe (Lucas 4:8).

15, 16. ¿Xi rucaa ti binni gaca dedicar Dios?

¹⁵ Guni prometerluʼ Jehová zuni servirluʼ laasi nga casi ñaca ñuni prometerluʼ ti binni ni guizáʼ nadxiiluʼ zabanineluʼ laa dede dxi gátiluʼ. Guníʼ ique ti hombre ne ti gunaa ni naca novio. Ra jma ziyunibiáʼ hombre ca xnovia, jma rannaxhiibe laa ne racaláʼdxibe guichaganabe laa. Neca nánnabe cadi guendariguite ni naguixhe íquebe gúnibe ca, peru nuube dispuestu gúnibe ni purtiʼ nadxiibe xnóviabe.

¹⁶ Yanna, ra jma gunibiáʼ chaahuiluʼ Jehová, jma zannaxhiiluʼ laa ne zucaa guendarannaxhii ca lii gúniluʼ stipa guni servirluʼ laabe. Ne nga zucaa lii gaca dedicarluʼ Dios. Gudxi Jesús ca discípulo stiʼ: «Pa nuu tu racalaʼdxiʼ gaca xpinneʼ la? cadi guibani para laa» (Marcos 8:34). Nga riníʼ, ni jma guisaca lu xquendanabániluʼ nga guzuubaluʼ stiidxaʼ Jehová. Ne ni jma guisaca para lii nga gúniluʼ ni racalaʼdxiʼ Jehová que gúniluʼ ni racaláʼdxiluʼ (biindaʼ 1 Pedro 4:2).

17. ¿Xiñee qué riná caadxi binni gaca dedicarcaʼ Jehová?

¹⁷ Nuu binni qué riná gaca dedicar Jehová purtiʼ ridxibi ne riníʼ ique qué zanda guni cumplir promesa ni biʼniʼ. Zándaca qué racaláʼdxicaʼ guninacaʼ ladxidóʼ Jehová. O guiníʼ íquecaʼ cumu caʼruʼ gaca dedicarcaʼ la? qué zabidxi Jehová cuenta laacaʼ pur ni gúnicaʼ.

18. ¿Xi zacané lii para cadi guidxíbiluʼ guninaluʼ ladxidóʼ Jehová?

¹⁸ Guendarannaxhii ni nápaluʼ Jehová zacaneni lii cadi guidxíbiluʼ gucheeneluʼ laa. Laaca zacaneni lii gúniluʼ stipa pur guni cumplirluʼ promesa bíʼniluʼ laabe (Eclesiastés 5:4; Colosenses 1:10). Ne cadi nagana zaca para lii gúniluʼ ni nabe. Apóstol Juan guníʼ: «Sicaríʼ nga gannaxhiinu Dios: gúninu ni ná ca mandamientu stiʼ, ne cadi nagana ca mandamientu stiʼ» (1 Juan 5:3).

19. ¿Xiñee cadi naquiiñeʼ guidxíbiluʼ gaca dedicarluʼ Jehová?

¹⁹ Cadi naquiiñeʼ gácanu perfectu para gaca dedicarnu Jehová. Qué ribézabe gúninu xiixa ni qué zanda gúninu (Salmo 103:14). Zacané Jehová laanu gúninu ni jneza (Isaías 41:10). Casi ná Biblia: «Laabe zúnibe ca neza stiluʼ derechu». Nga runi, de guidubi ladxidoʼloʼ gupa confianza Jehová (Proverbios 3:5, 6).

20. ¿Xi naquiiñeʼ gúniluʼ despué de gaca dedicarluʼ Jehová?

²⁰ ¿Ñee rábiluʼ maʼ nuuluʼ listu para gaca dedicarluʼ Jehová la? Ora maʼ guca dedicarluʼ, maʼ nuuluʼ listu para gúniluʼ sti cosa, ¿xi laani yaʼ? chuʼnísaluʼ.

21, 22. ¿Ximodo zanda gusihuínniluʼ fe stiluʼ nezalú binni?

²¹ Zanda gábiluʼ coordinador stiʼ cuerpu de ancianu de congregación ra rieluʼ, maʼ guca dedicarluʼ Jehová  ne racaláʼdxiluʼ chuʼnísaluʼ. Laabe zuyúbibe caadxi ancianu para guinabadiidxacaʼ lii caadxi cosa ni jma naquiiñeʼ guiziidiluʼ de lu Biblia. Pa ruuyaʼ ca ancianu ca maʼ nuuluʼ listu la? zábicaʼ lii maʼ zanda chuʼnísaluʼ lu sti asamblea stiʼ ca testigu stiʼ Jehová. Lu asamblea ca zadiʼdiʼ ti discursu ni zusiene xi raca significar guendariuunisa. Zuni hermanu ni gutiidiʼ discursu  ca chupa pregunta ni cadi nagana para ca hermanu ne hermana ni chichuunisa. Ra guicábiluʼ ca pregunta ca, zusihuínniluʼ fe stiluʼ nezalú binni (Romanos 10:10).

²² De racá la? ziuunísaluʼ. Guidubi cuerpu stiluʼ ziuu ndaaniʼ nisa. Ne ra chuʼnísaluʼ zusihuínniluʼ nezalú  binni maʼ guca dedicarluʼ Dios ne maʼ nácaluʼ ti testigu stiʼ Jehová.

23. ¿Xi riníʼ chuʼnísanu lu lá Dios, «lu lá Xiiñiʼ ne lu lá espíritu santu»?

²³ Guníʼ Jesús ziuunisa ca discípulo stiʼ lu lá Bixhoze, «lu lá Xiiñiʼ ne lu lá espíritu santu» (biindaʼ Mateo 28:19). ¿Xi riníʼ ca diidxaʼ ca? De que Jehová si nga napa autoridad, ne nánnanu riquiiñebe Jesús para gúnibe ni naguixhe íquebe ne modo riquiiñeʼ Jehová espíritu santu stiʼ para gúnibe ni nabe (Salmo 83:18; Mateo 28:18; Gálatas 5:22, 23; 2 Pedro 1:21).

24. ¿Xi raca representar guendariuunisa?

²⁴ Guendariuunisa ca runi representar ni ti cosa nabé risaca. Ora guiaaziluʼ ndaaniʼ nisa casi ñaca «ñátiluʼ» purtiʼ cusaanaluʼ modo bibániluʼ dxiqué. Ne ora guireeluʼ ndaaniʼ nisa la? cusihuínniluʼ maʼ chiguibániluʼ para gúniluʼ ni ná Jehová. Ne laaca cusihuínniluʼ maʼ nácaluʼ ti xpinni Dios. Cadi guiaandaʼ lii, qué nudiiluʼ xquendanabániluʼ ti binni, ti organización o xiixa dxiiñaʼ, sínuque Jehová nga bidiiluʼ xquendanabániluʼ.

25. ¿Xi zadúʼyanu lu últimu capítulo ca?

²⁵ Ora maʼ guca dedicarluʼ Jehová zacaneni lii para gaca xhamíguluʼ laabe jma (Salmo 25:14). Peru cadi guiníʼ íqueluʼ maʼ bilaluʼ purtiʼ si maʼ guyuunísaluʼ. Apóstol Pablo bicaa: «Laguni stipa [...] ti ganda guilatu» (Filipenses 2:12). Ora chúʼnisa ti binni la? deruʼ nga cuzulú. Yanna ¿xi zanda gúniluʼ para cadi guixéleluʼ de Jehová yaʼ? Últimu capítulo stiʼ libru riʼ zacábinu pregunta riʼ.