1, 2. a) ¿Xiñee ruuyaluʼ oración casi ti regalu nabé galán? b) ¿Xiñee risaca gánnanu xi rusiidiʼ Biblia de oración?

JMA naroʼbaʼ universu que Guidxilayú. Para Jehová, zeeda gaca guiráʼ binni nabeza ndaaniʼ Guidxilayú casi ti gota nisa (Salmo 115:15; Isaías 40:15). Neca jma naroʼbaʼ universu que laanu, Biblia ná: «Jehová nuu gaxha de guiráʼ ca ni canabaʼ ruaa laa, de guiráʼ ca ni dxandíʼ rinabaʼ ruaa laa. Zudiibe ni gacalaʼdxiʼ ca ni ridxibi laabe; zucaadiágabe ora guinábacaʼ gacanebe laacaʼ, ne zulabe laacaʼ» (Salmo 145:18, 19). Nápanu ti privilegiu guizáʼ galán. Jehová nga ni bizáʼ guiráʼ ni nuu ne ni jma napa poder, ne racalaʼdxiʼ gaca xhamígunu laa ne gucaadiaga ca oración stinu. Oración nga ti regalu nabé galán ni maʼ bidii Jehová cada tobi de laanu.

² Zucaadiaga Jehová laanu pa guni orarnu laa modo riuulaʼdxiʼ. ¿Ximodo zanda gúninu ni yaʼ? Guidúʼyanu xi rusiidiʼ Biblia laanu de oración.

3. ¿Xiñee caquiiñeʼ guni orarluʼ Jehová?

³ Racalaʼdxiʼ Jehová guni orarluʼ laa, guiníʼneluʼ laa. ¿Ximodo nánnanu ni yaʼ? Guníʼ ique invitación sicarú ni cayuni Dios lii ni zeeda lu Filipenses 4:6, 7 (biindaʼ ni). Dios ni bizáʼ guiráʼ ni nuu nabé rizaalaʼdxiʼ lii ne racalaʼdxiʼ gábiluʼ laa ni runi sentirluʼ ne ca guendanagana nápaluʼ.

4. Pa qué gusaana de guni orarnu, ¿xi zazaaca amistad ni nápanu né Jehová ne xiñee?

 ⁴ Racané oración laanu para jma gaca xhamígunu Jehová. Ora siempre ruíʼ chupa binni diidxaʼ ne riniʼcaʼ xi riníʼ íquecaʼ, xi runi sentircaʼ, xi naguu xizaa laacaʼ la? jma raca xhamígucaʼ. Zacaca runi Jehová, rabi lii lu Biblia ni riníʼ ique, ni runi sentir, ne maʼ gudxi lii xi zuni lu futuro. Ne zanda guni orarluʼ Jehová ne gábiluʼ laa guiráʼ ni nuu ndaaniʼ ladxidoʼloʼ. Pa qué gusaana de guni orarluʼ Dios, jma zaca xhamíguluʼ laa (Santiago 4:8).

5. ¿Ximodo nánnanu qué rucaadiaga Jehová guiráʼ oración?

⁵ ¿Ñee rucaadiaga Jehová guiráʼ oración la? Coʼ. Ca dxi bibani profeta Isaías, gudxi Jehová ca israelita: «Ne ora gusigaanatu rucacheluáʼ de laatu. Neca gúnitu stale oración, qué zucaadiagaʼ laatu; maʼ dxaʼ natu de rini» (Isaías 1:15). Pa qué gápanu cuidadu, zanda gúninu  xiixa ni guxheleʼ laanu de Jehová. Pa gaca nga la? qué zucaadiágabe oración stinu.

6. a) ¿Xiñee risaca gápanu fe? b) ¿Ximodo rusihuínninu nápanu fe?

⁶ Pa racaláʼdxinu gucaadiaga Jehová oración stinu, caquiiñeʼ gápanu fe laa (Marcos 11:24). Sicaríʼ guníʼ apóstol Pablo: «Pa qué gápanu fe qué ziuulaʼdxiʼ Dios ni rúninu, purtiʼ binni guidxiña laabe naquiiñeʼ guni cré dxandíʼ nuube ne rudiibe premiu ca ni ruyubi laabe sin guiree gana» (Hebreos 11:6). Peru cadi caquiiñeʼ si guininu nápanu fe. Caquiiñeʼ gusihuínninu ni ra guzúʼbanu stiidxaʼ Jehová guiráʼ ora (biindaʼ Santiago 2:26).

7. a) ¿Xiñee caquiiñeʼ gácanu humilde ne guinínenu Jehová né respetu ora guni orarnu laa? b) ¿Ximodo rusihuínninu runi orarnu de guidubi ladxidoʼno?

⁷ Ora guni orarnu Jehová caquiiñeʼ gácanu humilde ne guinínenu laa né respetu. ¿Xiñee yaʼ? Pa caquiiñeʼ guinínenu ti rey o ti presidente la? ñúninu ni né respetu. Jehová nga Dios ni jma napa poder, nga runi jmaruʼ si caquiiñeʼ guinínenu laa né respetu ne gácanu humilde (Génesis 17:1; Salmo 138:6). Laaca caquiiñeʼ guinínenu laabe de guidubi ladxidoʼno, ne cadi guininu ngueca ca ngueca (Mateo 6:7, 8).

8. ¿Xi caquiiñeʼ gúninu ora guinábanu Jehová xiixa lu oración?

⁸ Últimu la? ora guinábanu xiixa lu oración, caquiiñeʼ gúninu stipa para gusihuínninu racaláʼdxinu gacané Jehová laanu. Guzéʼtenu ti ejemplu, zándaca guinábanu Jehová gacané laanu gápanu ni caquiiñenu. Peru cadi gácanu nachaabaʼ ne cuézanu gudii Jehová laanu guiráʼ ni. Pa zanda gúninu dxiiñaʼ para gápanu ni gunábanu Jehová la? caquiiñeʼ gúninu dxiiñaʼ nadipaʼ ne guicaanu intiica dxiiñaʼ zanda gúninu (Mateo 6:11; 2 Tesalonicenses 3:10). Ne pa guni orarnu Jehová ne guinábanu  laa gacané laanu gusaana de gúninu xiixa cosa malu la? guixélenu de ca cosa ni zanda gucaa laanu guiábanu lu tentación (Colosenses 3:5). Guidúʼyanu caadxi pregunta ni runi binni de oración.

9. a) ¿Tuu nga caquiiñeʼ guni orarnu? b) ¿Xi rusiidiʼ Juan 14:6 laanu de oración?

⁹ ¿Tuu nga caquiiñeʼ guni orarnu? Sicaríʼ bisiidiʼ Jesús ca xpinni guni orarcaʼ: «Bixhózedu ni nuu guibáʼ» (Mateo 6:9). Nga runi caquiiñeʼ guni orarnu Jehová si. Jesús laaca guníʼ: «Naa nga neza, ni dxandíʼ ne guendanabani. Guirutiʼ zanda cheʼ ra nuu Bixhozeʼ pa cadi pur naa» (Juan 14:6). Ndiʼ rusiidiʼ laanu caquiiñeʼ guni orarnu lu lá Jesús. ¿Xi riníʼ nga yaʼ? Pa racaláʼdxinu chuulaʼdxiʼ Jehová ca oración stinu la? caquiiñeʼ guni respetarnu dxiiñaʼ risaca bidiibe Xiiñibe. Casi maʼ bizíʼdinu, beeda Jesús lu Guidxilayú para gulá laanu de pecadu ne guendaguti (Juan 3:16; Romanos 5:12). Laaca maʼ gulí Jehová laabe para gácabe Juez ne Sumo Sacerdote (Juan 5:22; Hebreos 6:20).

10. ¿Ñee caquiiñeʼ peʼ guzuxíbinu para guni orarnu la? Bisiéneni.

¹⁰ ¿Ñee caquiiñeʼ peʼ guzuxíbinu para guni orarnu la? Coʼ. Cadi canabaʼ Jehová gúninu ni zacá. Biblia rusiidiʼ laanu zanda guni orarnu Jehová né respetu ora zúbanu, ugaanda íquenu, guzuxíbinu o zuhuaanu (1 Crónicas 17:16; Nehemías 8:6; Daniel 6:10; Marcos 11:25). Para Jehová la? ni jma risaca nga guinínenu laabe né respetu ne de guidubi ladxidoʼno. Zanda guni orarnu en voz alta, ra tiica si nuunu ne ora tiica si, ridxíʼ ne huaxhinni. Ora runi orarnu, zanda chuʼnu seguru rucaadiágabe laanu neca guirutiʼ gucaadiaga laanu (Nehemías 2:1-6).

11. ¿Xi peʼ caquiiñeʼ guinábanu ora guni orarnu?

 ¹¹ ¿Xi peʼ caquiiñeʼ guinábanu ora guni orarnu? Zanda guinábanu Jehová intiica cosa peru gaca ni ni riuuláʼdxibe. Biblia ná: «Zanda guinábanu laa intiica cosa, peru gaca ni ni racalaʼdxiʼ, ne zucaadiaga laanu» (1 Juan 5:14). ¿Zanda gábinu laabe ni cazaacanu la? Zanda. Guinínenu Jehová zeeda gaca ni casi ora caníʼnenu tuuxa ni guizáʼ xhamígunu. Zanda gábinu laabe ni riníʼ íquenu ne ni runi sentirnu (Salmo 62:8). Laaca zanda guinábanu laabe gudiibe laanu espíritu santu stibe para gúninu ni jneza (Lucas 11:13). Ne galán guinábanu Jehová gudii laanu guendabiaaniʼ para guicaanu decisión jneza ne stipa para gudxíʼlunu ca guendanagana stinu (Santiago 1:5). Caquiiñeʼ guinábanu Jehová guni perdonar ca pecadu stinu (Efesios 1:3, 7). Laaca caquiiñeʼ guni orarnu pur xcaadxi binni, casi familia stinu ne ca hermanu de congregación (Hechos 12:5; Colosenses 4:12).

12. ¿Xii nga ni jma caquiiñeʼ guisaca lu ca oración stinu?

¹² ¿Xii nga ni jma caquiiñeʼ guisaca lu ca oración stinu? Ni jma guisaca nga Jehová ne gaca ni ná. Caquiiñeʼ gudiʼnu xquixe peʼ Jehová de guidubi ladxidoʼno pur guiráʼ ni maʼ biʼniʼ pur laanu (1 Crónicas 29:10-13). Dxi bisiidiʼ Jesús ca discípulo stiʼ guni orarcaʼ la? biluiʼbe xii nga ni jma guisaca lu ca oración stinu (biindaʼ Mateo 6:9-13). Laabe guniʼbe primé cosa ni caquiiñeʼ guinábanu nga gaca santificar lá Jehová, gaca ni nayá o guisaca ni. Despué, bisiidiʼ Jesús caquiiñeʼ guinábanu gueeda Reinu stiʼ Dios ne gaca ni ná lu Guidxilayú. Guniʼbe despué de guinábanu ca cosa risaca riʼ, maʼ zanda guinábanu ni caquiiñenu. Ora rininu gaca santificar lá Jehová primeru ne gaca ni ná lu ca oración stinu la? rusihuínninu xii nga ni jma risaca para laanu.

13. ¿Pabiáʼ tiempu caquiiñeʼ guindaa ca oración stinu?

 ¹³ ¿Pabiáʼ tiempu caquiiñeʼ guindaa ca oración stinu? Qué riete diʼ lu Biblia. Zanda gaca ca oración stinu nachucu o ziuulaʼ. Guzéʼtenu ti ejemplu, zanda gúninu ti oración nachucu ante guidoʼno, peru zanda gúninu ti oración ziuulaʼ ora cudiʼnu xquixe peʼ Jehová o cayábinu laa xiixa guendanagana nápanu (1 Samuel 1:12, 15). Qué racaláʼdxinu gúninu ti oración ziuulaʼ para si guʼyaʼ  binni laanu, casi biʼniʼ caadxi binni ca dxi bibani Jesús (Lucas 20:46, 47). Qué riuulaʼdxiʼ Jehová guni binni tipu oración ca. Ni racaláʼdxibe nga guni orarnu laabe de guidubi ladxidoʼno.

14. a) ¿Panda biaje caquiiñeʼ guni orarnu? b) ¿Xi rusiidiʼ ndiʼ laanu de Jehová?

¹⁴ ¿Panda biaje caquiiñeʼ guni orarnu? Cayabi Jehová laanu cadi gusaana de guni orarnu laa. Biblia ná: «Cadi gusaana de guni orartu» (Mateo 26:41; 1 Tesalonicenses 5:17; Romanos 12:12). Nuuca Jehová listu para gucaadiaga laanu. Guiráʼ dxi zanda gudiʼnu xquixe peʼ laabe pur nadxiibe ne nacháʼhuibe né laanu. Laaca zanda guinábanu laabe gábibe laanu xi gúninu ne gudiibe stipa laanu ne quixhedxibe ladxidoʼno. Pa rusisácanu  oración, regalu stiʼ Dios riʼ la? zuni orarnu Jehová ora tiica si.

15. ¿Xiñee caquiiñeʼ guininu «amén» ora guiluxe guni orarnu?

¹⁵ ¿Xiñee caquiiñeʼ guininu «amén» ora guiluxe guni orarnu? Diidxaʼ amén riniʼni «zacá gácani» o «dxandíʼ peʼ». Ora rininu ni, rusihuínninu dxandíʼ ni canábanu lu oración ne cayúninu ni de guidubi ladxidoʼno (Salmo 41:13). Ne Biblia rusiidiʼ laanu, despué de maʼ guca ti oración nezalú binni nabé risaca guininu «amén», zanda gaca ni en voz alta o en voz baja. Zacá rusihuínninu nuunu de acuerdu né ni biete luni (1 Crónicas 16:36; 1 Corintios 14:16).

16. ¿Xiñee nánnanu ricabi Dios ca oración stinu?

¹⁶ ¿Ñee ricabi Dios ca oración stinu la? Ricabi. Biblia ná rucaadiaga Dios «oración» ne ricábibe laanu (Salmo 65:2; Isaías 30:19). Rucaadiaga Jehová ca oración stiʼ millón de binni ni rúnini de guidubi ladxidóʼ ne ricábibe ni de stale modo.

17. ¿Ximodo riquiiñeʼ Jehová ca ángel ne ca xpinni para guicabi ca oración stinu?

¹⁷ Riquiiñeʼ Jehová ca ángel ne ca xpinni para guicabi ca oración stinu (Hebreos 1:13, 14). Stale binni runi orar para guinabaʼ gacanécabe laa guiene Biblia, ne ti tiempu despué riganna ca Testigu laa. Ndiʼ rusihuinni cayacané ca ángel gaca predicar ca «noticia galán» lu guidubi Guidxilayú (biindaʼ Apocalipsis 14:6). Ne stale de laanu huayuni orarnu Jehová purtiʼ nápanu ti guendanagana o caquiiñenu xiixa, ne huadúʼyanu modo huayacané ca hermanu de congregación laanu (Proverbios 12:25; Santiago 2:16).

18. ¿Ximodo riquiiñeʼ Jehová espíritu santu stiʼ ne Biblia para guicabi ca oración stinu?

 ¹⁸ Laaca riquiiñeʼ Jehová espíritu santu stiʼ para guicabi ca oración stinu. Ora rinábanu laabe gacanebe laanu para gudxíʼlunu xiixa guendanagana, zándaca iquiiñebe espíritu santu stibe para gábibe laanu xi gúninu ne gudii stipa laanu (2 Corintios 4:7). Laaca riquiiñeʼ Jehová Biblia para guicabi ca oración stinu ne gacané laanu guicaanu decisión jneza. Zándaca ora gúʼndanu Biblia guidxélanu caadxi textu ni gacané laanu. Ne laaca zanda iquiiñeʼ Jehová tuuxa para guni comentar ra reunión ni peʼ caquiiñeʼ gucaʼdiáganu. Ne laaca zanda iquiiñebe ti ancianu de congregación para guluíʼ laanu xiixa ni zeeda lu Biblia (Gálatas 6:1).

19. ¿Xi naquiiñeʼ gánnanu pa nuu biaje ruluíʼ cadi cacabi Jehová ca oración stinu?

¹⁹ ¿Ñee huanabadiidxaluʼ xiñee qué huacabi Jehová ca oración stiluʼ la? Cadi guiaandaʼ lii laabe nga nánnabe padxí ne ximodo guicábibe ca ni. Nánnabe xi peʼ caquiiñenu. Peru zándaca caquiiñeʼ guni orarnu ti tiempu para gusihuínninu Jehová dxandíʼ peʼ caquiiñenu ni canábanu laa ne gusihuínninu nápanu fe laa (Lucas 11:5-10). Nuu biaje ricabi Jehová laanu de ti modo cadi cabézanu. Guzéʼtenu ti ejemplu, zándaca runi orarnu laabe purtiʼ nápanu ti guendanagana naroʼbaʼ, peru lugar de guni chaahuibe ni, zanda gudiibe stipa laanu para guni huantarnu ni (biindaʼ Filipenses 4:13).

20. ¿Xiñee cadi naquiiñeʼ gusaana de guni orarnu?

²⁰ Rihuinni dxíchica oración ca nga ti regalu nabé galán maʼ bidii Jehová laanu. Zanda chuʼnu seguru rucaadiágabe ca oración stinu (Salmo 145:18). Nga runi, laga jma guni orarnu laabe de guidubi ladxidoʼno, jma zaca xhamígunu laabe.