1, 2. ¿Xiñee qué nidxagayaa Pablo guzanándacabe laa Jerusalén?

 NECA bilá Pablo de lu náʼ ti grupu de binni ni guizáʼ cadxiichi, peru bieguyoobe sti biaje. Qué nidxagayaabe ora guzanándacabe laabe Jerusalén purtiʼ maca guyuu tu gudxi laabe «zuseguyoocabe laabe ne zápabe guendanagana» (Hech. 20:22, 23). Que gánnabe xi peʼ guizaaca de laabe peru ni nánnabe nga zuni sufrirbe purtiʼ caquiiñebe lá Jesús (Hech. 9:16).

² Caadxi xpinni Cristu ni naca profeta maca gúdxicabe Pablo zundiibi binni laabe ne «zuni entregarcaʼ laabe lu náʼ binni de xcaadxi guidxi» (Hech. 21:4, 10, 11). Ti grupu de judíu ni guizáʼ cadxiichi bilá ñuuticaʼ laabe, ne despué de ngue ra cadinde diidxaʼ ca hombre ni nuu lu Sanedrín bilá nuxuuxecaʼ Pablo. Yanna cayapa caadxi soldadu romanu laabe laga cabézabe chebe lu justicia ne ugaanicabe donda íquebe (Hech. 21:31; 23:10). Rihuinni dxíchica ni jma caquiiñeʼ Pablo nga uguucabe gana laa.

3. ¿Ximodo riuʼnu gana para cadi gusaana de guni predicarnu?

³ Tiempu riʼ, ra mayaca guiluxe guidxilayú, nánnanu guiráʼ ca ni racalaʼdxiʼ chuʼ tobi si né Cristu Jesús ne «ca ni racalaʼdxiʼ guni adorar Dios, laaca zazanándacabe laacaʼ» (2 Tim. 3:12). Ne cásica Pablo, nuu ora guiranu riquiiñenu uguucabe gana laanu para cadi gusaana de guni predicarnu. Nga runi, ¡guizáʼ rudiʼnu xquixe peʼ ora zeeda ti diidxaʼ ni uguu gana laanu ora peʼ caquí’ñenu ni lu ca publicación ne lu ca reunión ni runi preparar «mozo ni nuu xpiaaniʼ ne ni runi jneza»! (Mat. 24:45). Ne cayabi Jehová laanu qué zunitilú ca enemigu ni qué riuuladxiʼ gaca predicar xquidxi Dios ne qué zucueezacaʼ de gaca predicar (Is. 54:17; Jer. 1:19). Peru guinírunu de Pablo. ¿Ñee guyuu tu gucané laabe para cadi gusaana de guni predicarbe biaʼ gándatiʼ neca nuu tu cucaalú laabe la? Pa zacá ni, ¿xi gucané laabe, ne xi bicaa ni laabe gúnibe yaʼ?

4, 5. ¿Ximodo guyuu Pablo gana, ne xiñee bedandá ni ora peʼ caquiiñebe ni?

⁴ Gueelaʼ ca bilá Pablo de lu náʼ Sanedrín, gucuaabe caadxi diidxaʼ  ni peʼ caquiiñebe para chuʼbe gana. Ndiʼ nga ni bizaaca: «Bizuhuaa Señor cueʼ Pablo ne gudxi laabe: “¡Gupa valor! Purtiʼ cásica maʼ bidiiluʼ testimonio completu de naa Jerusalén, zaqueca zudiiluʼ testimonio Roma”» (Hech. 23:11). Né ca diidxaʼ galán riʼ, gudxi Jesús Pablo qué zaca gastiʼ neca cucaalú binni laa purtiʼ cheruʼ Roma, ra zápabe privilegiu guni predicarbe de Jesús.

⁵ Nga peʼ nga ca diidxaʼ ni caquiiñeʼ Pablo óraque, purtiʼ sti dxi que jma de 40 judíu guníʼ stiidxacaʼ «ne bíʼnicaʼ ti juramentu, nacaʼ qué zocaʼ ne qué zeʼcaʼ pa qué guuticaʼ Pablo». Gudixhe ique ca hombre riʼ guuticaʼ laabe dede biʼniʼ jurarcaʼ zúnicaʼ ni, ne guníʼ íquecaʼ ziaba ti maldición luguiacaʼ pa qué guuticaʼ laabe (Hech. 23:12-15). Ngue runi biʼniʼ ca judíu que ti plan —ni guyuulaʼdxiʼ ca sacerdote principal ne ca ancianu— guinábacabe cheʼ Pablo sti biaje nezalú Sanedrín purtiʼ nácabe caquiiñeruʼ gúnicabe laa pregunta. Peru zabeza ca judíu laabe neza para guiaaxhacaʼ luguiabe ne guuticaʼ laabe.

6. ¿Ximodo gunna Pablo ni cá ique ca judíu que guni, ne ximodo zanda chinanda ca joven ejemplu stiʼ sobrinu Pablo?

⁶ Yanna, ora gunna sobrinu Pablo —ni qué gánnanu tu láʼ— ni cá ique ca hombre que guni, yetídxibe ni laa. Óraque, biseendaʼ Pablo laabe ra nuu comandante Claudio Lisias (Hech. 23:16-22). ¡Guizáʼ nadxibalú joven riʼ! Nadxii Jehová ca joven casi laabe, ca ni nuu dispuestu cuʼ xquendanabani lu peligru pur ca hermanu stiʼ ne ca ni runi guiráʼ ni nuu lu náʼ para gacané lu xhiiñaʼ Reinu.

7, 8. ¿Xi biʼniʼ Lisias para cadi guuticabe Pablo?

⁷ Naca Claudio Lisias xaíque stiʼ ti mil hombre, ngue runi ora gúnnabe racalaʼdxiʼ ca judíu guuticaʼ Pablo, biʼniʼ mandarbe tapa gayuaa setenta soldadu, hombre naaze lanza ne ni riguiʼbaʼ maniʼ, guireecaʼ gueelaʼ que de Jerusalén ne chinecaʼ Pablo Cesarea, guidxi ra runi gobiernu stiʼ Roma dxiiñaʼ lu región stiʼ Judea, ra nuu gobernador Félix. a Raqué zalá Pablo ne qué zaca gastiʼ. Neca nabeza stale judíu ndaaniʼ guidxi Cesarea, peru jma stale binni de guidxi que cadi judíu laacaʼ. Laaca gadxé guidxi riʼ de Jerusalén, purtiʼ Jerusalén nabé ridinde binni pur religión. Ne laaca Cesarea nga lugar ra riaana ca soldadu stiʼ Roma ni runi dxiiñaʼ lu región stiʼ Judea.

⁸ Ne casi runi mandar ley stiʼ Roma, biseendaʼ Lisias ti carta ra nuu Félix para gusiénebe laa xi cazaaca né Pablo. Lu carta que ná ora gúnnabe romanu Pablo ne mayaca guuti ca judíu laa, gudixhe íquebe gulabe laa. Ne laaca guniʼbe para laabe qué gapa Pablo donda para guuticabe laa o guieguyoo. Peru cumu gúnnabe racalaʼdxiʼ ca judíu guuticaʼ Pablo la? ngue runi biseendabe Pablo Cesarea para gucaadiaga Félix ca ni cugaani donda ique ne laa guiníʼ xi gácabe (Hech. 23:25-30).

9. a) ¿Xi biʼniʼ Lisias ni bisihuinni qué ñuni respetar ca derechu ni napa Pablo casi binni romanu? b) ¿Xiñee ziuu ora zuyúbinu guni respetárcabe derechu ni nápanu ndaaniʼ guidxi ra nabézanu?

 ⁹ ¿Ñee dxandíʼ guiráʼ ni bicaa Lisias lu carta stiʼ la? Coʼ. Zándaca ni nuube nga guiaanabe bien né gobernador que. Primé la? cadi dxandíʼ diʼ bilabe Pablo purtiʼ nánnabe romanu laa. Ne laaca qué nuzeetebe biʼniʼ mandarbe gundiibicabe Pablo «né chupa cadena» ne despué uguucabe chicote laa dede cueeruaa diidxaʼ (Hech. 21:30-34; 22:24-29). Ra biʼniʼ Lisias nga qué ñuni respetarbe derechu napa Pablo purtiʼ naca ti romanu. Tiempu riʼ, laaca zanda iquiiñeʼ Binidxabaʼ ca binni ni nuu lu religión ni qué rusiidiʼ ni dxandíʼ para sanándacaʼ laanu ne gacaláʼdxicaʼ gáxhacaʼ derechu ni nápanu de guni adorarnu Dios, cásica bizaaca Pablo. Peru cásica laabe, stale biaje zanda iquiiñenu derechu ni nápanu ndaaniʼ guidxi stinu para guyúbinu gacané gobiernu laanu ne cadi guniná binni laanu.

10. ¿Xi ca cosa cadi jneza guníʼcabe cayuni Pablo?

¹⁰ Maʼ nuu Pablo Cesarea ne laga cabézabe gueeda ca ni caguu xquéjabe de Jerusalén, biʼniʼ mandárcabe guieguyoobe «ndaaniʼ palaciu stiʼ Herodes» (Hech. 23:35). Gaayuʼ gubidxa despué yendá sumo sacerdote Ananías, ti abogado láʼ Tértulo ne caadxi ancianu. Bizulú bisisaca Tértulo Félix pur guiráʼ ca cosa galán ni cayuni pur ca judíu, bíʼnibe ni para uguube naroʼ stiʼ ne para guiaanabe bien né laa. b Ne oraqueca guniʼbe xi zebe ne sicaríʼ guniʼbe de Pablo: «Maʼ bidúʼyadu nuu hombre riʼ casi ti guendahuará. Rucaabe ca judíu ni nuu lu guidubi guidxilayú gucaalucaʼ gobiernu ne laabe nga zanírube lu secta stiʼ ca nazarenu. Ne laaca gucaláʼdxibe ñuni contaminarbe templu peru gunáʼzedu laabe». Ne xcaadxi judíu que laaca «caguucaʼ xqueja Pablo, ne caniʼcaʼ dxandíʼ guiráʼ ni caníʼ Tértulo» (Hech. 24:5, 6, 9). Gucaalú ti binni gobiernu, sániru lu ti secta malu ne guni contaminar templu naca ca ni cosa nabé grave, ne pa igaa tuuxa cayuni ca ni la? castigu ca nga gatiʼ.

11, 12. ¿Ximodo guca defender Pablo?

¹¹ Yanna, bidiicabe lugar guiníʼ Pablo. Sicaríʼ bizulube: «Nayecheʼ zuhuaaʼ nezaluluʼ para gacaʼ defender». Despué guniʼbe cadi dxandíʼ diʼ biʼniʼ contaminarbe templu ne qué nucaabe guirutiʼ nucaalú gobiernu. Ne laaca guniʼbe maʼ zinebe «stale iza» nuube fuera de Jerusalén, ne  biguétabe raqué zinebe «donación» para ca xpinni Cristu ni biaana pobre pur hambre o pur guzananda binni laacaʼ. Ne bisiénebe laacaʼ ora guyuube ndaaniʼ templu que maʼ nuube nayá casi «ná ley» ne rúnibe stipa chuʼ conciencia stibe «nayá nezalú Dios ne nezalú binni» (Hech. 24:10-13, 16-18).

¹² Peru ndiʼ huaxa gudxi Pablo laacabe: «Runeʼ adorar Dios stiʼ ca bixhozebiidaʼ modo gudíxhebe gaca ni, [...] peru para ca judíu riʼ ti secta ni». Ne laaca guniʼbe runi crebe «guiráʼ ni cá lu Ley ne ni bicaa ca Profeta», ne cásica stale de ca ni cugaaniʼ donda íquebe, guniʼbe laaca cabézabe «gusibani Dios ca ni maʼ guti, ca ni biʼniʼ ni jneza ne ca ni qué ñuni ni jneza». Óraque gúdxibe laacaʼ: «Guiníʼ ca hombre nuu raríʼ xi cosa malu bineʼ dxi gucaʼ juzgar nezalú Sanedrín. Ti cosa si zanda ugaanicabe iqueʼ, laani nga ni gunieeʼ riʼ: “¡Cayacaʼ juzgar yannadxí purtiʼ runeʼ cré zabani ca ni maʼ guti!”» (Hech. 24:14, 15, 20, 21).

13-15. Pa caquiiñeʼ guininu de ni runi crenu nezalú ca autoridad, ¿ximodo zanda chinándanu ejemplu stiʼ Pablo?

¹³ Guiníʼ íquenu ndiʼ, pa pur fe stinu chinécabe laanu nezalú autoridad purtiʼ caníʼcabe ni cadi dxandíʼ de laanu casi nácanu binni riuulaʼdxiʼ tinde, rucaʼnu xcaadxi gucaalú gobiernu o nuunu ndaaniʼ ti «secta» nabé malu. ¿Ximodo zanda chinándanu ejemplu stiʼ Pablo yaʼ? Guietenaláʼdxinu qué niguube xnaroʼ gobernador que para guiaanabe bien né laa, casi biʼniʼ Tértulo. Lugar de ñúnibe ngue guníʼ íquebe xi chiguiniʼbe, guniʼbe né diidxaʼ nadóʼ, bíʼnibe ni né respetu, biaʼsi modo guca  defenderbe ne qué nusiguiibe. Ne laaca guniʼbe qué nidxiña «caadxi judíu de provincia stiʼ Asia» raqué, ni guníʼ biʼniʼ contaminarbe templu que; peru ñuuláʼdxibe ñuucaʼ raqué para gucaadiágabe laacaʼ ne ñaca defenderbe (Hech. 24:18, 19).

¹⁴ Peru ni jma risaca nga, qué nidxibi Pablo niníʼ de ni runi cré, sínuque né stale valor guniʼbe sti biaje nápabe fe zabani ca ni maʼ guti, ndiʼ nga tema ni biquiiñebe dxi guyebe nezalú Sanedrín ne pur ngue gudinde diidxaʼ ca binni que (Hech. 23:6-10). ¿Xiñee biquiiñeʼ Pablo tema que para guca defender yaʼ? Purtiʼ runi predicarbe de Jesús ne rusiidibe dxandíʼ maʼ biasa de lade gueʼtuʼ, ne pur nga rucaalú ca enemigu stibe laabe (Hech. 26:6-8, 22, 23). Nga runi, nuube nezalú justicia purtiʼ runi crebe zabani ca ni maʼ guti, jmaruʼ si purtiʼ caniʼbe maʼ biasa Jesús de lade gueʼtuʼ.

¹⁵ Cásica Pablo, laanu laaca zanda guininu de ni runi crenu né stale valor, ne jma zápanu valor ra guietenaláʼdxinu ca diidxaʼ ni gudxi Jesús ca discípulo stiʼ: «Zaca nanalaʼdxiʼ guiráʼ binni laatu purtiʼ xpinneʼ laatu. Peru tu guni huantar dede ora gueeda fin la? zalá». Yanna, ¿ñee naquiiñeʼ chuʼnu xizaa ne guiníʼ íquenu xi guininu ora guizaaca nga la? Coʼ, purtiʼ ante guiníʼ Jesús ni bizéʼtenu ca, biʼniʼ prometerbe: «Ora maʼ zinécabe laatu para guni entregárcabe laatu lu náʼ ca autoridad, cadi chuʼtu xizaa pur gánnatu xi guiniʼtu; laguiníʼ ni gabi espíritu santu laatu, purtiʼ cadi laatu nga chiguiniʼtu, sínuque espíritu santu» (Mar. 13:9-13).

16, 17. a) ¿Xi biʼniʼ Félix ne xi guníʼ dxi cayaca juzgar Pablo? b) ¿Xiñee bidxibi Félix, ne xiñee biguetaʼ guníʼnebe Pablo?

¹⁶ Cadi ngue diʼ nga primé biaje gunadiaga gobernador Félix de «neza stiʼ Señor», zacá nga binibiáʼcabe congregación stiʼ ca xpinni Cristu de tiempu que. Sicaríʼ ná relatu que: «Cumu runibiáʼ chaahuiʼ Félix neza stiʼ Señor, guladxi laacabe ne guníʼ: “Ora gueeda Lisias, comandante militar que, maʼ guneʼ decidir xi gaca de laani”. Ne biʼniʼ mandar Félix oficial stiʼ ejércitu que gapa Pablo, peru gudii lugar laabe gúnibe caadxi cosa ne chuʼ ca xhamígube para gudii ni iquiiñebe» (Hech. 24:22, 23).

¹⁷ «Gudiʼdiʼ si chupa chonna gubidxa bedané Félix Drusila, xheelaʼ, ti judía. Biseendacaa Félix Pablo ne bicaadiaga ora bisiénebe ni runi cré binni de Cristu Jesús» (Hech. 24:24). «Peru ora bizulú caníʼ Pablo guni binni ni jneza, gucueeza binni laca laa ne de juiciu ni chigueeda, bidxibi Félix». Zándaca purtiʼ bichiiñaʼ conciencia stibe laabe pur guiráʼ ca cosa malu ni maʼ bíʼnibe lu xquendanabánibe. Ngue runi gúdxibe Pablo cheʼ ora guniʼbe: «Guyé yanna. Zuseendacaaʼ lii sti biaje ora gapaʼ tiempu». Dxandíʼ, biguetaʼ guníʼnebe Pablo stale biaje, peru cadi purtiʼ racaláʼdxibe  guiziidibe ni dxandíʼ, sínuque purtiʼ gulézabe nudii Pablo laabe bueltu (Hech. 24:25, 26).

18. ¿Xiñee guníʼ Pablo de «guni binni ni jneza, gucueeza binni laca laa ne de juiciu ni chigueeda» yaʼ?

¹⁸ ¿Xiñee guniʼné Pablo Félix ne xheelaʼ de «guni binni ni jneza, gucueeza binni laca laa ne de juiciu ni chigueeda» yaʼ? Purtiʼ racaláʼdxicabe gánnacabe «ni runi cré binni de Cristu Jesús». Nanna Pablo inmoral guirópacabe, runinácabe binni ne qué rúnicabe ni jneza, ngue runi gudxi laacabe xi caquiiñeʼ gúnicabe para gácacabe xpinni Cristu. Zaqué nga bisihuinni Pablo maʼ gadxé modo nabánicabe de ni rinabaʼ Dios binni guni. Nánnanu biénecabe zuni juzgar Dios guiranu pur ni riníʼ íquenu, ni rininu ne ni rúninu. Ne laaca nánnanu biénecabe zuni juzgar Dios laacabe nécaxa óraque napa Félix autoridad para guni juzgar Pablo. ¡Ngahuaʼ runi «bidxibi Félix»!

19, 20. a) ¿Xi zanda gúninu né ca binni ni ruluíʼ riuulaʼdxiʼ guiziidicaʼ de lu Biblia peru qué nacaʼ guchaacaʼ? b) ¿Ximodo nánnanu qué niná Félix ñacané Pablo?

¹⁹ Lu predicación zándaca guidxélanu binni ni naca casi Félix, zándaca primerugá ruluíʼ riuuláʼdxicabe guiziidicabe de lu Biblia, peru ni dxandíʼ nga jma riuuláʼdxicabe guibánicabe modo racaláʼdxicabe. Ora guizaaca nga naquiiñeʼ gápanu cuidadu. Neca zacá, cásica Pablo, laaca zanda gusiénenu laacabe né stale respetu xi caquiiñeʼ gúnicabe para chuulaʼdxiʼ Dios ni rúnicabe. Málasi nga gucaa laacabe guchaacabe. Yanna, pa ridúʼyanu cadi cá íquecabe gusaanacabe ca cosa ni nanalaʼdxiʼ Dios, jma galán gusaananu laacabe ne guyúbinu ca binni ni dxandíʼ cuyubi guiziidiʼ ni dxandíʼ.

²⁰ ¿Xi nuu ndaaniʼ ladxidóʼ Félix yaʼ? Relatu que ná: «Gudiʼdiʼ si chupa iza, biuu Porcio Festo lugar stiʼ Félix. Peru qué nundaa Félix Pablo, purtiʼ racalaʼdxiʼ guiaana bien né ca judíu» (Hech. 24:27). Zaqué bisihuínnibe qué racaláʼdxibe gacanebe Pablo. Nánnabe qué rucaa ca ni zinanda «neza stiʼ Señor» binni gucaalú gobiernu ne nánnabe qué nucheené Pablo nin ti ley stiʼ Roma (Hech. 19:23). Neca zaqué, «qué nundaa Félix Pablo, purtiʼ racalaʼdxiʼ guiaana bien né ca judíu».

21. ¿Xi bizaaca né Pablo dxi guca Porcio Festo gobernador, ne xi gucané laabe para gaca fe stibe nadipaʼ?

²¹ Casi bidúʼyanu lu Hechos 24:27, guca Porcio Festo gobernador lugar stiʼ Félix, peru nuuruʼ Pablo ndaaniʼ cárcel. Ne bizulú yenécabe apóstol nadxibalú riʼ nezalú stale autoridad. Racá ridúʼyanu bizaacabe ni ná ca diidxaʼ ni zeeda lu Lucas 21:12, purtiʼ stale biaje yenécabe laabe «nezalú rey ne gobernador». Peru siempre guca fe stibe nadipaʼ neca despué laaca guyebe ne guniʼbe de ni runi crebe nezalú gobernante jma risaca de tiempu que: césar. Nánnanu qué nusiaandabe ca diidxaʼ ni guníʼ Jesús ni guluu gana laabe: «¡Gupa valor!».