1, 2. a) ¿Xi guendanagana bidxaagalú Pablo ne ca xcompañeru ndaaniʼ guidxi Éfeso? b) ¿Xi zazíʼdinu lu capítulo riʼ?

 GUIZÁʼ cayaca ruidu ndaaniʼ ca calle stiʼ guidxi Éfeso. Guizáʼ stale binni ziguxooñeʼ, cayúnicaʼ ridxi ne guizáʼ cadxiichicaʼ. Gunaazeʼ ca binni riʼ chupa de ca xcompañeru Pablo ne zixubiyucaʼ laacabe. Gudiʼdiʼ guiráʼ binni que ndaaniʼ ti calle ra nuu stale negocio. Ne cumu bieeguʼ stale de ca binni ni cutoo que laacabe la? jmaruʼ si stale gúcacabe dede maʼ guirutiʼ ñaana lu calle que. Zécabe ndaaniʼ teatru ni jma naroʼbaʼ nuu ndaaniʼ guidxi que, ti lugar ra randa riuu veinticinco mil binni. Stale de laacabe qué lica ganna xi cayaca, peru guníʼ íquecabe zándaca nuu tu cucaalú templu stícabe ne diosa Ártemis ni rusisácabe. Ngue runi cucaacabe ridxi ne nácabe: «¡Viva Ártemis, diosa stiʼ ca binni de Éfeso!» (Hech. 19:34).

² Casi maʼ bidúʼyanu ca, caquiiñeʼ Binidxabaʼ ti grupu de binni sti biaje para cadi gaca predicar ca noticia galán stiʼ Reinu. Ne nánnanu ndiʼ nga tobi de ca trampa ni riquiiñebe. Lu capítulo riʼ zazíʼdinu ximodo gucalaʼdxiʼ Binidxabaʼ nucueeza de ñaca predicar ne nucaa ca xpinni Cristu ni guyuu lu primé siglu que ñaca dividir. Peru ni jma galán zazíʼdinu nga, qué ñanda ñúnibe gastiʼ ne jmaruʼ si «né stale poder ziroobaʼ stiidxaʼ Jehová ne zicaa ni stipa» (Hech. 19:20). ¿Xi gucané ca xpinni Cristu riʼ gudxiilucaʼ modo bicaalúcabe laacaʼ yaʼ? Laaca ni racané laanu yanna riʼ. Dxandíʼ, racané Jehová laanu guni ganarnu peru cada tobi de laanu naquiiñeʼ quixheʼ de parte stiʼ. Zacané espíritu santu laanu gápanu ca cualidad ni caquíʼñenu para cadi gusaana de guni predicarnu. Peru primeru guidúʼyanu xi rusiidiʼ ejemplu stiʼ Apolos laanu.

3, 4. ¿Xi bidii Áquila ne Priscila cuenta, ne xi bíʼnicaʼ?

³ Laga zeʼ Pablo Éfeso, lu guionna viaje misional stiʼ, yendá ti judíu ni láʼ Apolos ndaaniʼ guidxi riʼ. Beedabe de ti guidxi láʼ Alejandría (Egipto)  ne gúpabe caadxi cualidad galán: «Nabé galán modo riníʼ [hombre riʼ] ne nabé nanna de Stiidxaʼ Dios. [...] Ne rihuínnica nápabe stale espíritu santu». Né stale gana ne valor guyé Apolos yegudii ti discursu ndaaniʼ sinagoga nezalú ca judíu que (Hech. 18:24, 25).

⁴ Bicaadiaga Áquila ne Priscila discursu ni bidii Apolos que. Nuunu seguru guizáʼ guyuuláʼdxicabe ora bíʼyacabe «jneza modo riniʼbe ne biaʼsi ni rusiidibe de Jesús». Peru bidiicabe cuenta nuu ti cosa nabé risaca ni qué ganna Apolos, neca biaʼsi ngue ni cusiidibe de Jesús la? «peru ni nánnasibe nga bautismo ni biʼniʼ predicar Juan». Neca nabé galán rusiidibe ne nánnabe stale qué nidxibi diʼ Áquila ne Priscila laabe, «yenecaʼ laabe ra lídxicaʼ ne bisiene chaahuicaʼ laabe neza stiʼ Dios» (Hech. 18:25, 26). ¿Ximodo biiyaʼ Apolos ni bíʼnicabe riʼ yaʼ? Rihuínnica nácabe humilde purtiʼ bicaadiágabe laacaʼ.

5, 6. ¿Xi gucané Apolos guni xhiiñaʼ Jehová jma jneza, ne xi rusiidiʼ ejemplu stibe laanu?

⁵ Cumu bidii Apolos lugar gacané Áquila ne Priscila laa la? gucané ni laabe gúnibe xhiiñaʼ Jehová jma jneza. Gudiʼdiʼ si ti tiempu guyebe Acaya, ne «nabé gucanebe ca discípulo». Laaca qué nidxíbibe ora guniʼbe nezalú ca judíu ni nuu raqué, Jesús nga Mesías ni maca cá gueeda que. Sicaríʼ bicaa Lucas: «Qué ridxíbibe ora rusiénebe [...] cadi jneza ni rusiidiʼ ca judíu, ne riquiiñebe Stiidxaʼ Dios para guluiʼbe laacaʼ Jesús nga Cristu» (Hech. 18:27, 28). Beeda gaca Apolos ti ndaayaʼ naroʼbaʼ purtiʼ gucanebe guiroobaʼ «stiidxaʼ Jehová» ne gápani stipa. ¿Xi rusiidiʼ ejemplu stibe laanu yaʼ?

⁶ Nabé risaca gaca ca xpinni Cristu humilde. Guiranu nápanu stale cosa galán, zándaca nabé nánnanu, nápanu experiencia o xiixa habilidad. Peru pa cadi humilde laanu la? pur gana si nápanu ca ni. Pa qué gápanu laanu la? zanda gucaa ca habilidad o experiencia ni nápanu ca laanu guni presumirnu (1 Cor. 4:7; Sant. 4:6). Pa dxandíʼ nácanu humilde, zúninu stipa pur guiníʼ íquenu jma risaca xcaadxi que laanu (Filip. 2:3). Zudiʼnu lugar gusiidicabe laanu ne qué zadxiichinu ora chuʼ tu guni corregir laanu. Laaca qué zácanu orgulloso ne qué zacanu tema gaca peʼ ni rábinu pa maʼ cadi zacá cusiidiʼ espíritu santu ni laanu yanna. Pa qué gusaana de gácanu humilde la? zaquiiñeruʼ ruʼ Jehová ne Jesús laanu (Luc. 1:51, 52).

7. ¿Xi ejemplu galán bisaana Pablo ne Apolos para laanu?

⁷ Pa gácanu humilde, zacané ni laanu cadi gápanu envidia guirutiʼ. ¡Nanna pabiáʼ ñuulaʼdxiʼ Binidxabaʼ nutinde ca xpinni Cristu riʼ yaʼ! Guizáʼ ñuuláʼdxibe ñuuyabe Apolos ne Pablo, chupa hombre ni runi xhiiñaʼ Dios né stale gana ne nuu xpiaaniʼ, nidíndecaʼ para nihuinni tu laa ngue jma napa binni ndaaniʼ ca congregación que. Cadi nagana ñácani para laacabe, purtiʼ guyuu caadxi binni de Corinto guniʼcaʼ  «“Xpinni Pablo naa”, peru xcaadxi riníʼ “Xpinni Apolos naa”». Peru ¿ñee ni racaláʼdxicabe nga gaca dividir congregación la? ¡Coʼ! Purtiʼ bisisaca Pablo dxiiñaʼ ni biʼniʼ Apolos, dede bidii laabe jma dxiiñaʼ para gúnibe. Ne Apolos la? yenanda ni gudxi Pablo laa (1 Cor. 1:10-12; 3:6, 9; Tito 3:12, 13). Gúcacabe humilde ne bíʼnicabe dxiiñaʼ juntu. ¡Guizáʼ galán ejemplu bisaanacabe riʼ!

8. ¿Xi neza bibiguetaʼ Pablo Éfeso, ne xiñee?

⁸ Guníʼ Pablo zabiguetaʼ Éfeso, a ne bíʼnibe ni (Hech. 18:20, 21). Peru guidúʼyanu pa ladu bibiguétabe guidxi riʼ. Cadi guiaandaʼ laanu Antioquía de Siria nuube. Ngue runi ñanda ñebe Seleucia, ne raqué niguíʼbabe lu barcu, ne jma nagueenda nindabe Éfeso. Peru lugar de ñebe lu barcu la? guzabe ne gudíʼdibe «ca lugar ni nuu zitu de ruaa nisadóʼ» (Hech. 19:1). Ndiʼ riníʼ, zándaca guzabe ti mil xhoopaʼ gayuaa kilómetru. ¿Xiñee gulibe chebe neza ni riaana laabe jma zitu yaʼ? Purtiʼ racaláʼdxibe gacanebe «guiráʼ ca discípulo guzuhuaa chaahuicaʼ» (Hech. 18:23). Nánnabe caquiiñeʼ gúnibe stale sacrificiu lu guionna biaje misional riʼ, cásica bíʼnibe lu xhupa que, peru laaca nánnabe cadi pur gana si cayúnibe ni. Zacaca nga runi ca superintendente de circuito ca dxi riʼ, rúnicabe stipa pur gacanécabe laanu purtiʼ nadxiicabe laanu. ¿Cadi dxandíʼ rudiʼnu xquixe peʼ pur ni rúnicabe pur laanu la?

9. ¿Xiñee guyuunisa stale de ca discípulo stiʼ Juan, ne xi rusiidiʼ ejemplu riʼ laanu?

⁹ Ora yendá Pablo Éfeso la? bidxaagabe 12 discípulo stiʼ Juan Bautista. Guluunisa Juan laacabe, peru maʼ qué risaca ni ne zándaca qué gánnacabe gastiʼ de espíritu santu. Ngue runi bisiidiʼ Pablo laacabe, ne cásica Apolos la? gúcacabe humilde ne bicaadiágacabe. Ne óraque guyuunísacabe lu lá Jesús ne gucuaacabe espíritu santu ne caadxi don. ¿Xi rusiidiʼ ejemplu riʼ laanu yaʼ? Rusiidiʼ ni laanu riguu Jehová ndaayaʼ ca binni humilde ni ricaa ca cambiu ni raca ndaaniʼ organización stibe (Hech. 19:1-7).

10. ¿Xiñee maʼ ndaaniʼ ti auditorio bidii Pablo discursu stiʼ, ne ximodo zanda chinándanu ejemplu stibe?

¹⁰ Guidúʼyanu xi bizaaca despué. Né stale valor biʼniʼ predicar Pablo chonna beeu ndaaniʼ sinagoga. Neca biyubi Pablo «modo gucuudxi binni ora riníʼ de Reinu stiʼ Dios» la? guyuu tu laa qué niná nucaadiaga laabe ne bicaalucaʼ laabe. Cumu qué racaláʼdxibe gunítibe tiempu né ca ni caníʼ «mal de neza stiʼ Señor» la? guyebe ndaaniʼ ti auditorio stiʼ ti scuela, ne maʼ raqué bidiibe discursu stibe guiráʼ dxi (Hech. 19:8, 9). Ca ni racalaʼdxiʼ guiziidiruʼ de Reinu stiʼ Dios la? guyecaʼ ndaaniʼ auditorio  stiʼ scuela que ne maʼ qué ñecaʼ ndaaniʼ sinagoga. Nga runi, pa chuʼ tuuxa qué náʼ gucaadiaga laanu o racalaʼdxiʼ tinde diidxaʼ la? galán pa gúninu casi biʼniʼ Pablo, guireʼnu de ra nuube. Cadi guiaandaʼ laanu, stale ruʼ binni caquiiñeʼ gucaadiaga stiidxaʼ Reinu para gatadxí ladxidoʼcaʼ.

11, 12. a) ¿Ximodo bisihuinni Pablo guizáʼ biʼniʼ xhiiñaʼ Dios ne guca adaptar binni? b) ¿Ximodo rusihuínninu, laanu ca testigu stiʼ Jehová, laaca nabé rúninu xhiiñaʼ Jehová ne raca adaptarnu binni?

¹¹ Zándaca guiráʼ dxi bisiidiʼ Pablo ndaaniʼ auditorio stiʼ scuela que, de once de la mañana hasta las cuatro de la tarde (biiyaʼ nota de estudiu stiʼ Hechos 19:9 ni zeeda lu Biblia de estudiu diidxastiá). Neca ca hora ca nga jma nandáʼ raca la? peru hora ca nga jma randa rucaadiágacabe laabe purtiʼ óraca ruzuhuaadxícabe de dxiiñaʼ para gócabe gueta ne guiziiláʼdxicabe. Pa guiráʼ dxi biʼniʼ Pablo zacá lu chupa iza guyuu raqué la? nga riníʼ jma de chonna mil hora bisiidibe binni. b ¡Nga huaʼ runi biroobaʼ stiidxaʼ Jehová ne gucuaaniʼ stipa! Guizáʼ biʼniʼ Pablo xhiiñaʼ Jehová ne guca adaptarbe binni ni nuu lu territorio stibe. Ne pur nga la? «binadiaga guiráʼ ca guidxi stiʼ Asia stiidxaʼ Señor, cásica judíu zaqueca griegu» (Hech. 19:10). ¡Nga nga dxandíʼ bisiidiʼ guiráʼ binni!

¹² Laanu ca testigu stiʼ Jehová, zacaca nga rúninu ca dxi riʼ, nabé rúninu xhiiñaʼ Jehová ne raca adaptarnu binni. Rúninu stipa pur guni predicarnu ra jma nuu binni ne hora zadxélanu laacaʼ. Ne pur nga runi predicarnu lu calle, ra nuu negocio ne xcaadxi lugar ra jma ridiʼdiʼ binni, ne laaca zanda guni predicarnu pur teléfono ne pur carta. Laaca riuunu ra lidxi binni hora nánnanu zadxélanu laacaʼ.

13, 14. a) ¿Xi poder bidii Jehová Pablo? b) ¿Xi ti cosa cadi jneza biʼniʼ ca xiiñiʼ Esceva, ne xiñee zanda guchaaganu laacabe né ca binni ni ná naca xpinni Cristu ca dxi riʼ?

¹³ Lucas cusiene bidii Jehová poder Pablo despué para guni «stale milagru naroʼbaʼ». Dede bayuʼ stibe ne xhábabe (o delantal stibe) biquiiñeʼ para guianda binni ne guiree demonio luguiacaʼ (Hech. 19:11, 12). c Neca bidxagayaa stale binni ora biʼyaʼ cayuni ganárcabe Binidxabaʼ ne ca demonio stiʼ la? nuu tu laa qué ñuulaʼdxiʼ diʼ ni cayúnicabe que.

¹⁴ Guyuu «caadxi judíu ni canazá guiráʼ ladu ne canabeecaʼ demonio», ne gucaláʼdxicaʼ ñúnicaʼ ca milagru ni biʼniʼ Pablo. Lu relatu ca riete biquiiñecabe lá Jesús ne Pablo para nibeecabe demonio luguiáʼ binni. Ne nga nga ni gucalaʼdxiʼ gadxe hombre ñuni, ca xiiñiʼ ti sacerdote principal ni láʼ Esceva. Peru ti demonio gudxi laacabe: «Runebiaʼyaʼ Jesús ne nannaʼ tuu nga Pablo. Peru laatu yaʼ, ¿tu laatu?». Óraque biaaxha hombre ni nuu espíritu malu lu cuerpu stiʼ que luguiácabe casi ti maniʼ duxhuʼ, ne gudiñe laacabe dede biree guxooñecabe xieeládicabe (Hech. 19:13-16). Guiráʼ binni bidii cuenta caguite ca hombre que binni cásica riguite religión sticaʼ binni. Peru laaca guiráʼ binni bidii cuenta Dios ngue bidii poder Pablo para guni milagru. Ne zaqué nga gupa «stiidxaʼ Jehová» stipa. Ca dxi stinu riʼ, millón de binni runi cré inque si iquiiñecaʼ lá Jesús o guiniʼcaʼ nácacaʼ xpinni Cristu la? ziuulaʼdxiʼ Dios ni rúnicaʼ, peru cadi dxandíʼ ni runi crécabe ca. Purtiʼ Jesús bisiidiʼ ca ni guni si ni ná Bixhoze nga zanda gápacaʼ ti esperanza ni dxandíʼ lu ca dxi ni zeeda ca (Mat. 7:21-23).

15. ¿Ximodo zanda chinándanu ejemplu stiʼ ca binni de Éfeso ni gucaʼ xpinni Cristu?

¹⁵ Stale binni biʼniʼ magia ndaaniʼ guidxi Éfeso, ngue runi nabé biʼniʼ binni brujería, biquiiñecaʼ amuletu ne libru ni caníʼ de magia. Peru ni bizaaca ca xiiñiʼ Escevas que, bicaani stale binni de guidxi que guidxíbicaʼ Dios, gácacaʼ xpinni Cristu ne gusaana de gúnicaʼ brujería. Stale de laacabe, beedanécabe ca libru de magia stícabe ne bizaaquicabe ni  nezalú ca binni qué, nécaxa risaca ca ni stale mil de dolar. d Sicaríʼ bicaa Lucas: «Né stale poder ziroobaʼ stiidxaʼ Jehová ne zicaa ni stipa» (Hech. 19:17-20). ¡Guizáʼ galán modo biʼniʼ ganar Jehová Binidxabaʼ ne ca demonio stiʼ! Nabé galán ejemplu bisaana ca binni de Éfeso riʼ para laanu, purtiʼ bisáʼbicaʼ ca cosa de espiritismo ni gúpacaʼ. Ca dxi nabáninu riʼ laaca stale binni runi espiritismo ne ocultismo. Nga runi, pa gudiʼnu cuenta nápanu xiixa cosa ni napa espiritismo la? naquiiñeʼ gúninu cásica biʼniʼ ca binni de Éfeso que, gusáʼbinu ca ni nagueenda ca, nécaxa risaca ca ni stale. Qué racaláʼdxinu gúninu o gápanu ca cosa yuudxuʼ ca.

16, 17. a) ¿Ximodo bicaa Demetrio ca binni que gucaalucaʼ ca xpinni Cristu yaʼ? b) ¿Ximodo nánnanu guizáʼ bisisaca ca binni de Éfeso ni runi crecaʼ yaʼ?

¹⁶ Yanna guzéʼtenu xi sti cosa guníʼ Lucas riquiiñeʼ Binidxabaʼ: Ca binni ni rucaalú. Hechos 19:23 ná «biasa ca binni que ne bíʼnicaʼ ti bulla naroʼbaʼ pur neza stiʼ Señor», ne jmaruʼ si nagana guca ni para laacabe. e Bizulú guendanagana riʼ ora gudxi ti plateru ni láʼ Demetrio ca artesanu ni runiné dxiiñaʼ, pa racaláʼdxicaʼ guni ganar ru caʼ bueltu la? caquiiñeʼ gutoorucaʼ bidóʼ. Ne gúdxibe laacaʼ qué runi convenir diʼ ni cayuni predicar Pablo que laacaʼ, purtiʼ ca ni raca xpinni Cristu maʼ qué runi adorar bidóʼ. Ne cumu nánnabe guizáʼ rusisaca ca binni que xquídxicaʼ ne país sticaʼ la? gúdxibe laacaʼ, pa gudiicaʼ lugar gucaadiaga binni Pablo la? «zucaanácabe» templu sticaʼ ne maʼ guirutiʼ zusisaca Ártemis, diosa ni runi adorarcaʼ (Hech. 19:24-27).

¹⁷ Bireené Demetrio xtema. Purtiʼ guizáʼ bidxiichi ca plateru que ne bicaacaʼ ridxi :«¡Viva Ártemis, diosa stiʼ ca binni de Éfeso!». Pur ngue biasa ca binni guidxi que cayúnicaʼ ridxi purtiʼ qué gánnacaʼ xi cayaca. Ne ndiʼ nga ni bicaa ca binni ni rusisaca Ártemis que gucaalucaʼ Pablo ne ca xcompañeru casi riete lu primé párrafo que. f Cumu nabé nadxibalú Pablo la? nuu cheʼ ndaaniʼ teatru que para guiníʼ nezalú guiráʼ binni que, peru qué niná ca discípulo que ñebe purtiʼ nuu stale peligru raqué. Óraque bizuhuaa ti hombre ni láʼ Alejandro nezalú guiráʼ binni  que ne gucalaʼdxiʼ niniʼné laacabe. Cumu judíu laabe la? zándaca gucaláʼdxibe nusiénebe maʼ gadxé ni runi crecaʼ judíu de ni runi cré ca xpinni Cristu. Peru cumu guizáʼ cadxiichi ca binni que la? qué ninacaʼ nucaadiágacaʼ laabe. Ora bidiicabe cuenta judíu laabe la? bicaacabe ridxi laabe para maʼ cadi guiniʼbe, ne biaʼ chupa hora guniʼcaʼ: «¡Viva Ártemis, diosa stiʼ ca binni de Éfeso!». Ca dxi riʼ, laaca nuu stale binni napa religión stiʼ ne qué lica rinacaʼ gucaadiágacaʼ ne qué riuuca razón (Hech. 19:28-34).

18, 19. a) ¿Ximodo bicueeza registrador stiʼ guidxi Éfeso guiráʼ binni que? b) ¿Ximodo huayacané ca ni napa autoridad ca xpinni Jehová, ne xi naquiiñeʼ gúninu para gacanécabe laanu?

¹⁸ Últimu la? gupa xidé guníʼ registrador stiʼ guidxi que. Bicueeza hombre riʼ guiráʼ binni que, ne gudxi laacabe qué zuni ca xpinni Cristu riʼ gastiʼ templu stícabe ne ninca diosa stícabe. Ne cadi biʼniʼ diʼ Pablo né ca xcompañeru gastiʼ templu stiʼ Ártemis. Ne pa ni nuucabe nga ugaanicabe xiixa luguiáʼ ca xpinni Cristu riʼ la? naquiiñeʼ gúnicabe ni modo ná ley. Peru zándaca ni jma bicaa laacabe chúʼcabe razón nga ora guníʼ hombre riʼ cadi jneza ni cayúnicabe, casi ná ley stiʼ Roma, ne pur ngue zándaca gaca castigárcabe. Despué la? gúdxibe ca binni que checaʼ de raqué. Pur ca diidxaʼ ni guníʼ hombre riʼ, gucané ni laacabe chúʼcabe razón ne chuʼdxícabe (Hech. 19:35-41).

¹⁹ Cadi ndiʼ diʼ nga primé biaje chuʼ ti binni ni napa autoridad ne nuu xpiaaniʼ gacané ca discípulo stiʼ Jesús ne cadi laa diʼ ni nga últimu. Ne nga peʼ nga ni biʼyaʼ apóstol Juan lu ti visión ni zazaaca lu ca últimu dxi riʼ. Biiyabe cayabi «guidxilayú», nga nga ca autoridad ni nuu luni riʼ, ti «guiiguʼ», lani nga ora sananda Binidxabaʼ ca xpinni Cristu (Apoc. 12:15, 16). Ne zacá rizaaca ni. Stale juez ni runi jneza racanecaʼ laanu, ca testigu stiʼ Jehová, ne riniʼcaʼ nápanu derechu de guni predicarnu ne chuunu reunión para guni adorarnu Dios. Ne zándaca ra ruuyacabe modo laanu la? rucaani laacabe gacanécabe laanu. Cásica Pablo, zándaca ni bicaa ca funcionariu de Éfeso gacané laabe nga, nánnacaʼ ximodo laabe ne runibiaʼcaʼ laabe (Hech. 19:31). Nga runi, pa gácanu honradu ne guni respetarnu binni la? zunibiaʼcaʼ laanu casi binni ni runi ni jneza. Ne zándaca nga gucaa laacabe gacanécabe laanu.

20. a) ¿Xi runi sentirluʼ ora gánnaluʼ gupa stiidxa’ Jehová stipa lu primé siglu que, ne zaqueca yanna yaʼ? b) ¿Xi maʼ gudixhe íqueluʼ gúniluʼ yaʼ?

²⁰ ¿Cadi dxandíʼ ridxagayaanu ora gánnanu guizáʼ biroobaʼ stiidxaʼ Jehová lu primé siglu que ne gúpani stipa la? Laaca guizáʼ riéchenu gánnanu racaneruʼ Jehová ca xpinni tiempu riʼ. ¿Lii yaʼ? ¿Ñee ñuuláʼdxiluʼ ñacaneluʼ la? Pa zacá ni la? guníʼ ique guiráʼ ni maʼ bizíʼdinu riʼ: biʼniʼ stipa gácaluʼ humilde, yenanda ca cambiu ni runi organización stiʼ Jehová, cadi gusaana de guni predicarluʼ, bicaanáʼ intiica cosa stiʼ ca demonio ca ne biʼniʼ stipa guni respetarluʼ binni ne gácaluʼ honradu ti zacá guiníʼ binni bien de xquidxi Dios.