CAPÍTULO 7
«Guniʼné laabe ca noticia galán ni caníʼ de Jesús»
Felipe, ti xpinni Cristu ni nabé biʼniʼ predicar
Zeeda ni lu Hechos 8:4-40
1, 2. ¿Xi bizaaca dxi gucalaʼdxiʼ ca enemigu stiʼ Dios nucueezacaʼ de ñaca predicar?
BIZULÚ canazanándacabe ca xpinni Cristu. Ne Saulo nga tobi de ca ni guizáʼ cayuniná laacabe ne qué lica ñá guirutiʼ casi runi ti maniʼ duxhuʼ (Hech. 8:3). Cumu bixooñelú ca xpinni Cristu de Jerusalén la? ngue runi stale tu guníʼ ique zuuti Saulo guirácabe. Peru ra bireeche ca xpinni Cristu que bizaaca xiixa ni cadi cabézacabe. Guidúʼyanu xi bizaaca.
2 Nin qué nindaa, ca ni biree de Jerusalén que mápeca cayuni «predicarcaʼ ca noticia galán» ndaaniʼ ca guidxi ra yegucaachilucaʼ que (Hech. 8:4). Guendaridxagayaa nga lugar de nucueezacabe de ñaca predicar ca noticia galán stiʼ Reinu que laga jmaruʼ si yendani ra nuu stale binni. Qué ñaca ni guleza ca enemigu que, ¿xiñee yaʼ? Purtiʼ ra bicaacabe ca xpinni Cristu que chindézacaʼ sti lugar la? gunda bireeche ca noticia stiʼ Reinu ndaaniʼ ca guidxi jma zitu. Ne ca dxi nabáninu riʼ la? laaca huazaaca ni bizéʼtenu riʼ.
«Ca ni maʼ bireeche ndase» (Hechos 8:4-8)
3. a) ¿Tu guca Felipe? b) ¿Xiñee qué huayunadiaga ca binni de Samaria ca noticia galán? ¿Xi maca guníʼ Jesús de guidxi Samaria?
3 Tobi de ca xpinni Cristu ni biree de xquidxi nga Felipe, a ne guyebe ndaaniʼ guidxi Samaria (Hech. 8:4; biiyaʼ cuadru ni láʼ « Felipe, ti hombre ni runi predicar ca noticia galán», ni zeeda lu yaza 53). Stale de ca binni ni nabeza raqué qué huayunadiágacaʼ ca noticia galán stiʼ Reinu purtiʼ maca gudxi Jesús ca apóstol stiʼ: «Cadi guiuutu nin ti guidxi stiʼ Samaria. Ndiʼ nga ni naquiiñeʼ gúnitu: cadi gusaana de guyúbitu ca dendxuʼ ni cananiti stiʼ guidxi Israel» (Mat. 10:5, 6). Peru maca nanna Jesús zuni predicárcabe guiráʼ xixé binni de Samaria, purtiʼ ante chebe guibáʼ guniʼbe: «Zácatu testigu stinneʼ Jerusalén, guidubi Judea ne Samaria, ne dede ra jma zitu lu guidxilayú» (Hech. 1:8).
4. ¿Ximodo biʼniʼ sentir ca binni de Samaria que ora biʼniʼ predicar Felipe laacaʼ, ne xiñee biʼniʼ sentírcabe zacá?
4 Biiyaʼ Felipe guidxi Samaria casi ti layú ni maʼ nuu «listu para guiasa cosecha» (Juan 4:35). Ne guizáʼ guyuulaʼdxiʼ ca binni de Samaria modo bisiidibe laacaʼ dede biʼniʼ sentircaʼ galán. Maʼ gadxé modo nácabe que xcaadxi judíu, purtiʼ laacaʼ rúnicaʼ menu ca samaritanu ne qué rinacaʼ guidxaagacaʼ laacabe. Laaca qué ñaca Felipe casi ca fariseu que purtiʼ qué nibídibe tu nusiidibe, sínuque biʼniʼ predicarbe guiráʼ clase binni. Pur modo biʼniʼ predicarbe ca samaritanu que, bisihuínnibe cadi nácadibe casi ca judíu ni qué riná guidxaaga ca samaritanu que. Nga runi, cadi guendaridxagayaa nga ná Biblia «rucaadiaga chaahuiʼ guiráʼ ca binni que ni caníʼ Felipe» (Hech. 8:6).
5-7. Bizeeteʼ ti experiencia ni rusihuinni jmaruʼ si stale binni riziidiʼ de Jehová ora rizanándacabe ca xpinni Cristu.
5 Cásica lu primé siglu que, ca dxi riʼ laaca qué ganda gucueeza ca enemigu stinu laanu de guni predicarnu. Stale biaje rinécabe ca xpinni Cristu xiixa lugar o ruseguyoocabe laacaʼ para cadi guni predicarcaʼ, peru lugar de gucueezacabe laacaʼ laga racanécabe para guni predicarcaʼ ra nuu jma binni. Nga peʼ nga ni bizaacaʼ lu Segunda Guerra Mundial, qué nusaana ca testigu stiʼ Jehová de ñuni predicarcaʼ dede né ndaaniʼ ca campu de concentración sti’ ca nazi que. Sicaríʼ guníʼ ti judíu ni biʼniʼ predicárcabe laa ndaaniʼ ti campu de concentración que: «Ora biiyaʼ nadxibalú ca Testigu ni deguyoo que bidieeʼ cuenta dxandíʼ de lu Biblia nga zeeda guiráʼ ni runi crécabe ne pur ngue gucaʼ Testigu».
6 Nuu biaje dede né ca binni ni rizananda laanu reeda gácacaʼ xpinni Cristu. Nga peʼ nga ni bizaacaʼ ti guardia stiʼ SS ni gupa campu de concentración stiʼ Gusen (Austria). Bidiibe lugar gudii hermanu Franz Desch estudiu laabe, ti Testigu ni biseguyoocabe raqué. Chupa chonna iza despué biiyacabe ra ti asamblea. ¡Guizáʼ biéchecabe! Jmaruʼ si ora gunna Franz maʼ naca guardia que publicador.
7 Ne ngaca nga rizaaca ora ribíʼ ti xpinni Cristu sti guidxi pur canazanándacabe laa. Casi lu iza 1970, yebiʼ caadxi xpinni Cristu de Malahui Mozambique purtiʼ canazanándacabe laacaʼ, ne pur ngue la? biʼniʼ predicárcabe stale binni de raqué. Neca despué guzanándacabe ca Testigu ndaaniʼ guidxi Mozambique, peru qué nusaana de ñuni predicarcaʼ. Ti hermanu láʼ Francisco Coana guníʼ: «Stale biaje gunaazecabe laadu pur cayuni predicardu peru ra bidúʼyadu stale binni caziidiʼ de Jehová la? guyuʼduʼ seguru dxandíʼ peʼ cayacané Dios laadu, cásica gucanebe ca xpinni Cristu de primé siglu que».
8. ¿Ximodo huayacané ca cambiu políticu ne económicu para gaca predicar?
8 Peru cadi pur ruxooñelú ca xpinni Cristu de xquídxicaʼ nga randa runi predicarcaʼ xcaadxi guidxi. Lu ca últimu iza riʼ, stale binni runadiágacaʼ mensaje stiʼ Reinu ne ruzulú riziidicaʼ de lu Biblia ora ribiʼcaʼ ndaaniʼ sti guidxi purtiʼ cuxooñelucaʼ de guerra, purtiʼ nabé pobre lugar ra nabézacaʼ o pur guiráʼ cambiu políticu ne económicu ni nuu. Cumu stale binni nga ribíʼ sti guidxi la? caquiiñeʼ gaca predicar lu stale idioma. Peru ¿ñee rúninu stipa guni predicarnu binni de «guiráʼ nación, tribu, guidxi ne idioma» la? (Apoc. 7:9).
«Lagudii naa poder ca» (Hechos 8:9-25)
«Ora biʼyaʼ Simón ricaa binni espíritu santu ora riguixhenáʼ ca apóstol que luguiacaʼ la? gucalaʼdxiʼ nudii laacabe bueltu» (Hechos 8:18).
9. ¿Tu guca Simón, ne xiñee bidxíñabe Felipe?
9 Laaca biʼniʼ Felipe stale milagru ndaaniʼ guidxi Samaria casi gusianda ca ni napa xiixa discapacidad ne cuee espíritu malu luguiáʼ binni (Hech. 8:6-8). Guyuu ti hombre ni guizáʼ bidxagayaa ora biʼyaʼ poder ni bidii Dios Felipe, laabe nga Simón. Gúcabe ti magu ni nabé ridxagayaa binni guiráʼ ni runi ne dede riníʼcabe: «Nuu poder naroʼbaʼ stiʼ Dios luguiáʼ hombre riʼ». Peru ora bíʼyabe ca milagru cayuni Felipe que, laapebe bidiibe cuenta dxandíʼ né poder stiʼ Dios nga cayuni Felipe ca milagru que, ngue runi biʼniʼ crebe ne guyuunísabe (Hech. 8:9-13). Peru ¿xi bizaaca né Simón despué yaʼ? Guidúʼyanu ni.
10. a) ¿Xi biʼniʼ Pedro ne Juan ndaaniʼ guidxi Samaria? b) ¿Xi biʼniʼ Simón ora biʼyaʼ poder ni napa Pedro ne Juan?
10 Ora gunna ca apóstol que stale binni cayaca xpinni Cristu ndaaniʼ guidxi Samaria la? biseendacaʼ Pedro ne Juan raqué (biiyaʼ cuadru ni láʼ « Modo biquiiñeʼ Pedro “ca llave stiʼ Reinu”», ni zeeda lu yaza 56). Ne ora yendácabe gudixhenácabe luguiáʼ ca ni nacubi cayaca xpinni Cristu ne oraqueca gucuaacaʼ espíritu santu. b Ora biʼyaʼ Simón ni cazaaca que, guizáʼ bidxagayaa ne gudxi ca apóstol que: «Lagudii naa poder ca, ti ora quixhenaʼyaʼ luguiáʼ tuuxa laaca guicaa espíritu santu». Ne dede gucaláʼdxibe nudiibe laaca bueltu purtiʼ guníʼ íquebe zanda sibe poder stiʼ Dios (Hech. 8:14-19).
11. ¿Xi gudxi Pedro Simón, ne xi biʼniʼ Simón despué?
11 Né stale valor gudxi Pedro laabe: «Gatineluʼ bueltu stiluʼ, purtiʼ guníʼ íqueluʼ zanda siluʼ ni bisigaʼdeʼ Dios. Qué zanda diʼ gápaluʼ derechu para guʼnuʼ dxiiñaʼ riʼ, purtiʼ cadi nayá nuu ladxidoʼloʼ nezalú Dios». Ne despué gudxi Pedro laabe: «Guca arrepentir de cosa malu stiluʼ riʼ ne gunabaʼ Jehová, pa ganda la? gaca perdonar ca cosa malu nuu ndaaniʼ ladxidoʼloʼ». Cadi naca diʼ Simón ti hombre malu, peru xi si la? qué ñúnibe ni jneza biaje riʼ. Ngue runi gunábabe ca apóstol que: «Laguinabaʼ Jehová pur naa ti cadi gueeda ca cosa ni guniʼtu ca luguiaʼyaʼ» (Hech. 8:20-24).
12. ¿Xii nga simonía, ne ximodo huayúnicabe ni ndaaniʼ caadxi religión?
12 Modo guluu jneza Pedro Simón que rusietenalaʼdxiʼ ni laanu cadi jneza gacaláʼdxinu sinu xiixa privilegiu ndaaniʼ congregación. Laani nga ni rábicabe simonía, zeeda diidxaʼ riʼ de Simón purtiʼ laa gucalaʼdxiʼ nizíʼ ti privilegiu ne riquiiñecabe ni ora siʼ tuuxa o gutoocabe ti privilegiu ndaaniʼ xiixa religión. Ne ndiʼ nga ti cosa ni maʼ xadxí runi ca ni cadi dxandíʼ naca xpinni Cristu. Casi ora ribícabe tuuxa para gaca papa la? ti enciclopedia ni nabé runibiáʼ binni bizeeteʼ lu iza 1878: «Guirácabe gupa xidé gudíxecabe para gácacabe papa ne de tantu stale biaje huayúnicabe ni maʼ qué lica rituilúcabe sícabe xiixa puestu ndaaniʼ religión stícabe» (The Encyclopædia Britannica, novena edición).
13. ¿Xi cadi naquiiñeʼ gúninu ti cadi gácanu casi Simón?
13 ¿Xi zanda gúninu para cadi gácanu zacá yaʼ? Cadi gudiʼnu regalu risaca o guininu bien de tuuxa hermanu ni zániru ndaaniʼ congregación para si guicaanu xiixa privilegiu. Ne pa laanu nga nápanu xiixa privilegiu ndaaniʼ congregación, cadi nisi maʼ cuyúbinu guiaananu bien né ca ni napa stale bueltu. Naquiiñeʼ gápanu cuidadu cadi gúninu ca ni bizéʼtenu riʼ, ti cadi gácanu casi Simón. Guiranu naquiiñeʼ gácanu humilde ne gácanu «casi tobi de ca ni jma nahuiiniʼ». Ne gudiʼnu lugar espíritu santu nga cuiʼ tu guicaa xiixa privilegiu ndaaniʼ congregación (Luc. 9:48). Ndaaniʼ xquidxi Dios la? cadi naquiiñeʼ chuʼ tuuxa ni gacalaʼdxiʼ guicaa xiixa puestu para si gusisácacabe laa (Prov. 25:27).
«¿Ñee dxandíʼ cayéneluʼ ni cayuundaluʼ la?» (Hechos 8:26-40)
14, 15. a) ¿Tu guca eunuco de Etiopía que, ne ximodo bidxela Felipe laabe? b) ¿Ximodo bisihuinni eunuco que biene xii ngue caquiiñeʼ guni, ne xiñee nánnanu cadi pur si cayéchebe nga gunábabe chúʼnisabe? (Biiyaʼ nota).
14 Guzéʼtenu sti biaje de Felipe. Gunabaʼ ángel stiʼ Jehová laabe chebe lu neza ni zeeda de Jerusalén para Gaza. Zándaca guníʼ ique Felipe xiñee gunabaʼ ángel que laa cheʼ raqué, peru qué nindaa bidiibe cuenta xiñee. Málasi lu neza que bidxaagalube ti eunuco de Etiopía ni zuba ndaaniʼ carru stiʼ ne ziyuundaʼ en voz alta ni bicaa profeta Isaías (biiyaʼ cuadru ni láʼ « ¿Xiñee riete lu Biblia nácabe ti eunuco?», ni zeeda lu yaza 57). Bicaa espíritu santu Felipe guidxiña ra nuu hombre que ne gunabadiidxabe eunuco que: «¿Ñee dxandíʼ cayéneluʼ ni cayuundaluʼ la?». Para bicabi eunuco que laabe: «¿Ximodo guieneʼ ni pa guirutiʼ gusiene ni naa?» (Hech. 8:26-31).
15 Gunabaʼ eunuco que Felipe quibaʼ lu carru que ne cuiné laabe. ¡Guizáʼ galán modo byuíʼ ca hombre riʼ diidxaʼ! Xadxí nga qué ñanna binni tuu nga chigaca dendxuʼ o siervu ni riete lu Isaías (Is. 53:1-12). Peru laga zécabe neza bisiene Felipe laabe de Jesús nga caníʼ profecía que. Ngue runi cásica ca xpinni Cristu ni guyuunisa lu Pentecostés stiʼ iza 33 que, biene hombre riʼ xii ngue caquiiñeʼ guni purtiʼ neca cadi judíu laabe peru runi adorarbe Dios. Ngue runi gúdxibe Felipe: «¡Biiyaʼ! Raríʼ daʼ nisa. ¿Xi cucueeza naa de chuaanisaʼ yaʼ?». Ne oraqueca guluunisa Felipe laabe (biiyaʼ cuadru ni láʼ « Guyuunísabe “ti lugar ra daʼ nisa”»). c Despué yendá Felipe Asdod, ne bizulú cayuni predicar raqué (Hech. 8:32-40).
16, 17. ¿Ximodo racané ca ángel laanu ora runi predicarnu?
16 Ca dxi stinu riʼ laaca nápanu ti dxiiñaʼ risaca cásica gupa Felipe. Ne runi predicarnu ora tiisi, casi ora ziuunu pa xa raaʼ. Stale biaje ridxélanu binni ni riuulaʼdxiʼ guiziidiʼ de Jehová. Peru cadi naquiiñeʼ guidxagayaanu purtiʼ Biblia ná cayacané ca ángel ca laanu para gaca predicar ca noticia galán ti ganda chindani ra nuu «binni de guiráʼ nación, tribu, idioma ne guidxi» (Apoc. 14:6) Ne nga peʼ nga ni guníʼ Jesús ora bizeeteʼ parábola stiʼ trigu ne guixi malu, guniʼbe ca ángel que nga chigutopa cosecha dxi guiluxe guidxilayú. Ne ra gúnicabe dxiiñaʼ riʼ zabeecabe de lu Reinu stiʼ Dios «guiráʼ cosa ni riné lu pecadu ne ca binni ni runi guendaquéiquiiñeʼ» (Mat. 13:37-41). Laaca zutagulisaacabe guiráʼ ca ni chiguni mandarné Jesús guibáʼ lu Reinu stiʼ Dios. Ne despué zutagulisaacabe «gran muchedumbre» o guiráʼ ca binni ni zeeda gaca de «xcaadxi dendxuʼ» ni maʼ bichiña Jehová ndaaniʼ xquidxi (Apoc. 7:9; Juan 6:44, 65; 10:16).
17 ¿Xiñee nánnanu racané ca ángel ca laanu ora maʼ cayuni predicarnu? Purtiʼ stale biaje ridxélanu binni ni rabi laanu maʼ napa ratu cayuni orar Dios para guseendaʼ tuuxa gacané laa. Nga peʼ nga ni bizaacaʼ chupa hermana, ti dxi canayuni predicarnécabe ti xcuidi ne maʼ para guilúxecabe, gucuá xcuidi que tema guxhidxinácabe sti ra yoo que. Guizáʼ caziñe xcuidi que, ne últimu stubi guyé yeguxhidxi timbre ra puertaʼ que. Ne óraque biree ti baʼdudxaapaʼ ne bidxiña ca hermana que guníʼnecaʼ laabe. Guizáʼ bidxagayaacabe ora gudxi baʼdudxaapaʼ que laacabe casi peʼ gunabaʼ lu ti oración cheʼ tuuxa gusiidiʼ laa de lu Biblia. Ne zaqué nga bizulú gucuaa baʼdudxaapaʼ que estudiu.
«Qué runebiaʼyaʼ lii Dios, peru rinabaʼ lii gacaneluʼ naa».
18. ¿Xiñee caquiiñeʼ gusisácanu dxiiñaʼ ni nápanu riʼ?
18 Cásica guiráʼ xpinni Cristu, lii laaca nápaluʼ ti ndaayaʼ naroʼbaʼ: gunineluʼ ca ángel ca dxiiñaʼ ne gusiidiluʼ binni ni zeeda lu Biblia. ¡Qué chuʼ dxi gusaanaluʼ privilegiu galán ni nápaluʼ riʼ! Ne cadi gusaana de guni predicarluʼ «ca noticia galán ni caníʼ de Jesús» (Hech. 8:35). Pa gúniluʼ ni la? dxandíʼ peʼ ziuuluʼ nayecheʼ.
a Cadi apóstol Felipe nga riete raríʼ, sínuque laabe nga tobi de ca «gadxe hombre» ni gulícabe para chisaana guendaró ra nuu ca viuda de Jerusalén ni riníʼ hebreu ne griegu, lu capítulo gaayuʼ stiʼ libru riʼ riete xi dxiiñaʼ biʼniʼ ca hombre riʼ (Hech. 6:1-6).
b Tiempu que, zándaca casi peʼ chúʼnisa ca ni nacubi naca xpinni Cristu ricaacaʼ espíritu santu, ne zaqué nga rápacabe oportunidad de chécabe guibáʼ ra nuu Jesús ne gácacabe rey ne sacerdote (2 Cor. 1:21, 22; Apoc. 5:9, 10; 20:6). Peru ca ni nacubi naca xpinni Cristu riʼ, qué nicaacaʼ espíritu santu ora guyuunísacaʼ, sínuque gucuaacabe ni despué, dxi gudixhenáʼ Pedro ne Juan luguiácabe ne zaqué maʼ gunda bíʼnicabe milagru.
c Cadi pur cayecheʼ si eunuco que nga gunabaʼ chúʼnisa. Maca runi adorarbe Jehová neca cadi nácabe judíu, maʼ nánnabe stale de lu Stiidxaʼ Dios dede né ca profecía ni caníʼ de Mesías. Ngue runi, ora biziidibe Jesús nga Mesías ne beeda guni ni ná Dios lu Guidxilayú la? maʼ gastiʼ nucueeza laabe de chuʼnísabe.
