CAPÍTULO 1
«Laché ne lagacané binni [...] gaca discípulo»
Zadúʼyanu xi zeeda lu libru stiʼ Hechos ne xiñee risaca ni para laanu
1-6. Bizeeteʼ xiixa experiencia ni cusiene modo huayuni predicar ca Testigu neca cadxaagalucaʼ guendanagana.
REBECCA, ti dxaapahuiiniʼ Testigu de guidxi Ghana, gudixhe ique guni predicar ra scuela. Nga runi siempre rinebe publicación ndaaniʼ mochila stibe ne runi aprovecharbe ora recreu para guni predicarbe. Dede maʼ rudiibe estudiu chupa chonna xcompañerabe.
2 Lu isla stiʼ Madagascar, gaxha de continente stiʼ África, nabeza ti guendaxheelaʼ ni naca precursor. Cada biaje chécabe ndaaniʼ ti guidxihuiiniʼ para chigusiidicabe binni de lu Biblia, napa xidé sácabe 25 kilómetru lu gubidxa ndaʼ.
3 Nagana gaca predicar ca noticia galán ra nuu ca binni ni nabeza guriá guiiguʼ stiʼ Paraguay ne Paraná. Ngue runi, ti grupu de Testigu de Paraguay ne xcaadxi hermanu ni nabeza ndaaniʼ 15 guidxi, bizaʼcaʼ ti barcu de biaʼ 45 tonelada ni zanda chiné 12 binni. Gucané ndiʼ laacabe para ganda guni predicárcabe ca binni ni nabeza ndaaniʼ ca guidxi riʼ.
4 Ca testigu stiʼ Jehová ni nabeza Alaska, runi aprovecharcaʼ temporada nandáʼ para guni predicarcaʼ ca turista ni zeeda de gadxé gadxé guidxi. Ruzuhuaanécabe exhibidor ra nuu muelle stiʼ guidxi riʼ ne rinécabe stale publicación de gadxé gadxé idioma lu ca exhibidor ca. Ne laaca riquiiñecabe avioneta para chiguni predicárcabe ca noticia galán ra nuu ca binni aleutiana, atabascana, chimesiana ne tlingit.
5 Ti Testigu de Texas láʼ Larry, nabeza ndaaniʼ ti asilo de ancianu. Cumu gúpabe ti accidente la? zúbabe lu ti silla de rueda, peru neca zacá, runi predicarbe guiráʼ ca ni nuu ndaaniʼ asilo que de Reinu stiʼ Dios ne rábibe laacaʼ zedandá dxi zabiguetaʼ zazabe (Is. 35:5, 6).
6 Biʼniʼ viajar ti grupu de Testigu de Myanmar chonna gubidxa lu barcu para checaʼ ti asamblea ndaaniʼ guidxi Mandalay. Cumu nuucabe guni predicárcabe la? yenécabe publicación para gudiicabe ca ni zinécabe ndaaniʼ barcu que. Ne cada biaje cuezadxí barcu que ti lugar, riétecabe para quíʼzicabe publicación ra nuu ca binni de lugar que. Ne ora ribiguétacabe ndaaniʼ barcu que runi predicárcabe sti biaje purtiʼ maʼ gadxé binni dxiʼbaʼ.
7. ¿Ximodo runi predicar ca xpinni Jehová de Reinu stiʼ Dios, ne xiñee rúnicabe ni?
7 Rusihuinni ca ejemplu riʼ né stale gana cayuni ca xpinni Jehová dxiiñaʼ ne cusiene chaahuicabe binni de Reinu stiʼ Dios lu guidubi naca Guidxilayú (Hech. 28:23). Runi predicárcabe binni dede ra lidxi, lu calle ne pur teléfono. Runi aprovechárcabe para guni predicárcabe ora maʼ zécabe lu autobús, ora maʼ nuucabe ra parque ne ora maʼ nuucabe ra dxiiñaʼ. Gadxé gadxé método riquiiñecabe, peru rúnicabe ni para guni predicárcabe ca noticia galán stiʼ Reinu ra tiica nuu binni (Mat. 10:11).
8, 9. a) ¿Xiñee zanda guininu ti milagru nga modo cayaca predicar ca noticia stiʼ Reinu? b) ¿Xi pregunta zándaca gúninu, ne xi caquiiñeʼ gúninu para guicábinu ni?
8 ¿Ñee nuuluʼ lade millón de publicador ni runi predicar ndaaniʼ jma de chupa gayuaa treinta y cinco guidxi ne territorio la? Pa zacá ni, gunna cayúniluʼ ti dxiiñaʼ nabé risaca, purtiʼ pur laani cayanna stale binni de Reinu stiʼ Dios. ¿Cadi dxandíʼ ti milagru ndiʼ la? Neca cayuni prohibírcabe dxiiñaʼ stinu, canazanándacabe laanu ne cadxaagalunu xcaadxi guendanagana, cayacanenu binni de guiráʼ guidxi gánnacaʼ ni dxandíʼ de Reinu stiʼ Dios.
9 Ora ridúʼyanu pabiáʼ nagueenda cayaca predicar ca noticia galán, zándaca guiníʼ íquenu: «¿Xiñee guirutiʼ qué huayanda gucueeza dxiiñaʼ riʼ, nin ne racalaʼdxiʼ Binidxabaʼ gucueeza ni yaʼ?». Para guicábinu pregunta riʼ caquiiñeʼ gánnanu xi bizaaca lu primé siglu que purtiʼ laaca dxiiñaʼ bíʼnicabe dxiqué nga cayúninu dede yanna.
Ti dxiiñaʼ naroʼbaʼ ni cadi cabezadxí
10. ¿Xi dxiiñaʼ biʼniʼ Jesús, ne xi maca nánnabe?
10 Jesucristu, hombre ni gucané chuʼ primé congregación que, biquiiñeʼ guiráʼ stipa stiʼ ne guiráʼ ni napa para guni predicar ca noticia galán. Laabe guniʼbe: «Naquiiñeʼ guneʼ predicar ca noticia galán stiʼ Reinu stiʼ Dios ndaaniʼ xcaadxi guidxi, purtiʼ para nga bendaʼ» (Luc. 4:43). Peru maca nanna Jesús qué zunduuxeʼ diʼ dxiiñaʼ riʼ purtiʼ laapebe guniʼbe ante gátibe naquiiñeʼ gaca predicar ca noticia galán «ndaaniʼ guiráʼ guidxi» (Mar. 13:10). Yanna, ¿tuu nga ca ni chiguni dxiiñaʼ riʼ ne ximodo gúnicabe ni yaʼ?
«Laché ne lagacané binni de guiráʼ guidxi gaca discípulo stinneʼ» (Mateo 28:19).
11. ¿Xi dxiiñaʼ bisaanané Jesús ca discípulo stiʼ, ne xi biʼniʼ prometerbe laacaʼ?
11 Biasa si Jesús de lade gueʼtuʼ bihuínnibe nezalú ca discípulo stibe ne bisaananebe laacaʼ ti dxiiñaʼ naroʼbaʼ ne risaca, gúdxibe laacaʼ: «Laché ne lagacané binni de guiráʼ guidxi gaca discípulo stinneʼ. Lacuunisa laacaʼ lu lá Bixhozeʼ, lu lá Xiiñiʼ ne lu lá espíritu santu. Lagusiidiʼ laacaʼ gúnicaʼ guiráʼ ni maʼ bineʼ mandar laatu. Ne laguietenalaʼdxiʼ, qué ziuu dxi guixeleʼ de laatu dede ora guiluxe guidxilayú riʼ» (Mat. 28:19, 20). Ora guníʼ Jesús «qué ziuu dxi guixeleʼ de laatu», ni cayábibe ca discípulo que nga zacanebe laacaʼ gusiidicaʼ binni de Reinu stiʼ Dios ne gúnicaʼ discípulo. Ne dxandíʼ peʼ zaquiiñecabe tu gacané laacabe purtiʼ maca guníʼ Jesús «zaca nanalaʼdxiʼ guiráʼ guidxi» laacabe (Mat. 24:9). Peru laaca gudxi Jesús laacabe ziuuruʼ tu zacané laacabe. Ante chebe guibáʼ biʼniʼ prometerbe ca discípulo stibe zudiibe laacaʼ espíritu santu ti gápacaʼ stipa ni caquiiñecaʼ para guni predicarcaʼ «dede ra jma zitu lu guidxilayú» (Hech. 1:8).
12. ¿Xi pregunta caquiiñeʼ guicábinu, ne xiñee risaca gánnanu respuesta stícani?
12 ¿Xi biʼniʼ ca apóstol ne xcaadxi xpinni Cristu ni bibani lu primé siglu yaʼ? ¿Ñee biiyacabe dxiiñaʼ biaananécabe casi xiixa nabé risaca la? ¿Ñee gunda bisiidiʼ chaahuicabe binni de Reinu stiʼ Dios neca huaxiéʼcabe ne nuu tu canazánanda laacabe la? ¿Ñee dxandíʼ gucané Jehová laacabe ne bidii laacabe espíritu santu stiʼ la? Ndiʼ nga caadxi de ca pregunta ni ricabi libru stiʼ Hechos ne nabé risaca gánnanu respuesta stícani. ¿Xiñee yaʼ? Purtiʼ Jesús guníʼ caquiiñeʼ guni predicarnu ne gúninu discípulo «dede ora guiluxe guidxilayú riʼ» ne cumu maʼ nabáninu tiempu ra mayaca gueeda fin la? caquiiñeʼ gúninu dxiiñaʼ riʼ. Nga runi nabé risaca guidúʼndanu ca relatu ni zeeda lu libru stiʼ Hechos.
Ni zeeda lu libru stiʼ Hechos
13, 14. a) ¿Tu bicaa libru stiʼ Hechos, ne ximodo gúnnabe ca relatu zeeda luni? b) ¿Xidé caníʼ libru stiʼ Hechos?
13 ¿Tu bicaa libru riʼ? Neca luni cadi ca lá binni ni bicaa ni peru pur ca diidxaʼ ni zeeda ra ruzulú ni rihuinni laaca hombre ni bicaa Evangeliu stiʼ Lucas nga bicaa ni (Luc. 1:1-4; Hech. 1:1, 2). Nga runi, maʼ raca stale siglu riníʼcabe Lucas nga bicaa libru riʼ, ti doctor ni nabé gunnaxhiicabe (Col. 4:14). Ruzeeteʼ libru riʼ ni bizaaca biaʼ 28 iza, dede dxi biasa Jesús zeʼ guibáʼ lu iza 33 hasta dxi biseguyoocabe Pablo ra lidxi, ndaaniʼ guidxi Roma biaʼ lu iza 61. Stale biaje biquiiñeʼ Lucas diidxaʼ laadu lu libru stiʼ Hechos, nga rusihuinni guyuube ra bizaaca stale de ca relatu ni zeeda luni (Hech. 16:8-10; 20:5, 6; 27:1). Cumu nabé riuulaʼdxiʼ Lucas guni investigar la? ante gucaabe libru stiʼ Hechos, zándaca gunabadiidxabe Pablo, Bernabé, Felipe ne xcaadxi binni xiruʼ bizaaca, ngue runi jneza guiráʼ ni zeeda luni.
14 ¿Xidé caníʼ libru stiʼ Hechos? Lu libru stiʼ Lucas riete guiráʼ ni biʼniʼ Jesús ne ni bisiidiʼ, peru lu libru stiʼ Hechos riete guiráʼ ni biʼniʼ ca discípulo stibe. Caníʼ libru riʼ de dxiiñaʼ naroʼbaʼ ni biʼniʼ caadxi hombre ne gunaa nécaxa para binni qué nizácabe scuela ne qué risácacabe (Hech. 4:13). Peru zanda guininu ni jma ruzeeteni nga modo beeda chuu primé congregación stiʼ ca xpinni Cristu ne modo bidálecaʼ ne cusiéneni xi guiráʼ bíʼnicabe para biʼniʼ predicárcabe ne ximodo bíʼnicabe ni (Hech. 4:31; 5:42). Laaca ruzeeteni modo gucané espíritu santu ca xpinni Cristu que para gunda biʼniʼ predicarcaʼ ca noticia galán (Hech. 8:29, 39, 40; 13:1-3; 16:6; 18:24, 25). Ne lu libru riʼ riete tema principal stiʼ Biblia: zaquiiñeʼ Dios Reinu stiʼ para gaca santificar lá. Ne últimu la? caníʼ ni ximodo cayaca predicar ca noticia galán stiʼ Reinu neca nuu tu cucaalú laanu (Hech. 8:12; 19:8; 28:30, 31).
15. ¿Xiñee galán guni estudiarnu libru stiʼ Hechos?
15 Nabé galán guni estudiarluʼ guiráʼ ni bizaaca ca discípulo stiʼ Cristu ni bibani lu primé siglu que, purtiʼ zacané ni lii gápaluʼ jma confianza Dios. Ne ora gúʼndaluʼ pabiáʼ gúpacabe valor, fe ne bíʼnicabe xhiiñaʼ Dios né stale gana la? zucaani lii chinándaluʼ ejemplu stícabe ne zacá ziuuluʼ listu para gúniluʼ dxiiñaʼ bisaana Jesús, laa guníʼ: «Laché ne lagacané binni [...] gaca discípulo». Zacané libru riʼ lii guni estudiar chaahuiluʼ ni zeeda lu libru stiʼ Hechos. Guidúʼyanu ximodo zanda gúniluʼ ni.
Ni zacané laanu guni estudiarnu Biblia
16. ¿Ximodo zacané libru riʼ laanu?
16 ¿Ximodo zacané libru riʼ laanu? 1) Zacaneni laanu chuʼnu seguru rudii Jehová laanu espíritu santu stiʼ para guni predicarnu ca noticia galán stiʼ Reinu ne gúninu discípulo, 2) zucaani laanu guni predicarnu né stale gana casi biʼniʼ ca primé xpinni Cristu que ne 3) zacané ni laanu guni respetarnu ca hermanu ni zániru ndaaniʼ xquidxi Jehová ni ruuyaʼ xi caquiiñeʼ congregación ne modo naquiiñeʼ gaca predicar.
17, 18. ¿Ximodo nexheʼ chaahuiʼ libru riʼ, ne ximodo zanda gacaneni laanu ora guni estudiarnu stúbinu?
17 ¿Ximodo nexheʼ chaahuiʼ libru riʼ yaʼ? Napa ni xhono sección, ne cada tobi de laacani cusiene ni bizaaca lu caadxi capítulo stiʼ Hechos. Cadi cusiene libru riʼ versículo pur versículo, sínuque cayábini laanu xi zanda guizíʼdinu de ca relatu ni zeeda luni ne ximodo zanda gúninu ca ni lu xquendanabáninu. Ra ruzulú cada capítulo zeeda xi chiguieteʼ luni ne ca textu ra zeeda ca relatu ni chiguizíʼdinu.
18 Laaca né libru riʼ xcaadxi cosa ni zacané laanu guni estudiar chaahuinu libru stiʼ Hechos. Nabé galán ca imagen zeeda luni purtiʼ zacané ca ni laanu guxuíʼlunu guiráʼ ni bizaaca lu xiixa relatu. Lu stale capítulo zeeda cuadru ra riete xcaadxi información, casi ejemplu stiʼ ca xpinni Jehová ni bisihuinni napa fe ne de xcaadxi binni ni riete lu libru stiʼ Hechos. Laaca zeeda información ni caníʼ de xiixa lugar, xiixa ni bizaaca ne costumbre gúpacabe dxiqué.
Caquiiñeʼ gusíʼdinu guiráʼ binni de Reinu stiʼ Dios purtiʼ maʼ huaxiéʼ tiempu riaana.
19. ¿Xi ti cosa nabé risaca caquiiñeʼ gúninu?
19 Zacané libru riʼ laanu guidúʼyanu ximodo cayúninu dxiiñaʼ bisaanané Jesús laanu. Pa maʼ xadxí de cusíʼdinu binni de Reinu stiʼ Dios o deruʼ cayúninu ni, nabé risaca guiníʼ íquenu gunáʼ nga ca cosa ni jma rusisácanu lu xquendanabáninu ne pa cayuni predicarnu ne cayúninu discípulo casi ribeza Jehová gúninu ni (2 Cor. 13:5). Galán guiníʼ íqueluʼ ndiʼ: «¿Ñee dede yanna cayuuyaʼ dxiiñaʼ riʼ casi xiixa ni caquiiñeʼ gaca nagueendaca la?» (1 Cor. 7:29-31). «¿Ñee runeʼ ni né stale gana ne rusihuinneʼ nuaaʼ seguru dxandíʼ ni runeʼ predicar la?» (1 Tes. 1:5, 6). «¿Ñee runeʼ predicar biaʼ gándatiʼ la?» (Col. 3:23).
20, 21. ¿Xiñee nabé risaca gúninu dxiiñaʼ biaananenu riʼ nagueendaca, ne xi caquiiñeʼ quixhe íquenu gúninu?
20 Cadi gusiaandanu gulí Jehová laanu para gúninu ti dxiiñaʼ nabé risaca. Cumu mayaca gueeda fin la? maʼ huaxiéʼ tiempu riaana ne zándaruʼ guilá stale binni. Qué gánnanu xpanda binni ni nachaʼhuiʼ ladxidóʼ ziuulaʼdxiʼ guiziidiʼ de Reinu stiʼ Dios (Hech. 13:48). Ni nánnanu nga caquiiñeʼ gacanenu laacabe biaʼ gándatiʼ para guiziidicabe de Reinu stiʼ Dios purtiʼ maʼ huaxiéʼ tiempu riaana (1 Tim. 4:16).
21 Nabé risaca guni predicarnu né stale gana casi biʼniʼ ca xpinni Cristu ni bibani lu primé siglu. Pa guni estudiar chaahuinu libru riʼ, zacaneni laanu guni predicarnu né stale gana ne gápanu valor. Ne zacaneni laanu quixhe íquenu gusíʼdinu guiráʼ binni de Reinu stiʼ Dios (Hech. 28:23).
