CAPÍTULO 11
Bidxá ladxidóʼcabe «de guendanayecheʼ ne de espíritu santu»
Bidxaagalú Pablo caadxi binni ni biʼniʼ tratar laa mal ne ni qué riuulaʼdxiʼ Stiidxaʼ Dios
Zeeda ni lu Hechos 13:1-52
1, 2. ¿Xiñee maʼ gadxé peʼ biaje ni chiguni Bernabé ne Saulo? ¿Ximodo zacané dxiiñaʼ stícabe para gaca cumplir ni ná Hechos 1:8?
BIZAACA ti cosa nabé risaca ndaaniʼ congregación stiʼ Antioquía de Siria. De lade ca profeta ne ca maestru ni nuu ndaaniʼ congregación que, gulí espíritu santu Bernabé a ne Saulo para chigusiidicaʼ ca noticia galán stiʼ Reinu ca lugar jma zitu (Hech. 13:1, 2). Maruʼ huaseendacabe misioneru para chiguni predicar ndaaniʼ xcaadxi guidxi, peru ndaaniʼ si ca guidxi ra maʼ nuu xpinni Cristu (Hech. 8:14; 11:22). Peru biaje riʼ zié Bernabé ne Saulo, ne zinécabe Juan Marcos ca lugar ra huaxiéʼ huayunadiaga binni de Dios o zándaca dede ca lugar ra qué huayunadiaga binni ca noticia galán stiʼ Reinu.
2 Raca biaʼ 14 iza gudxi Jesús ca discípulo stiʼ: «Zácatu testigu stinneʼ Jerusalén, guidubi Judea ne Samaria, ne dede ra jma zitu lu guidxilayú» (Hech. 1:8). Nagueenda zaca cumplir profecía riʼ pur dxiiñaʼ ni guni Bernabé ne Saulo casi misioneru. b
«Lacueechú Bernabé ne Saulo para gúnicaʼ ti dxiiñaʼ» (Hechos 13:1-12)
3. ¿Xiñee guca nagana para binni guni viajar lu primé siglu que?
3 Tiempu riʼ nuu carru, avión ne xcaadxi modo para guni viajar binni ti lugar zitu ne guni ni nagueenda. Peru lu primé siglu que la? a pie nga biʼniʼ viajar binni, ne nabé feu ca neza que. Zándaca biaʼ 30 kilómetru runi viajar binni lu ti dxi ne nabé ridxágacaʼ. c Neca nabé galán dxiiñaʼ ni chiguni Bernabé ne Saulo, peru laaca nánnacabe napa xidé gúnicabe stale stipa ne sacrificiu para gúnicabe dxiiñaʼ riʼ (Mat. 16:24).
4. a) ¿Tu gulí Bernabé ne Saulo para gúnicaʼ ti dxiiñaʼ, ne ximodo biiyaʼ ca hermanu que ni? b) ¿Xi zanda gúninu para guni apoyarnu ca ni guicaa ti dxiiñaʼ ndaaniʼ congregación?
4 ¿Xiñee Bernabé ne Saulo peʼ nga gulí espíritu santu para gúnicaʼ dxiiñaʼ riʼ yaʼ? (Hech. 13:2). Qué rusiene Biblia ni, peru nuunu seguru gucané espíritu santu para guicaacabe dxiiñaʼ riʼ. Ne laaca qué riete diʼ lu Biblia pa guníʼ ca profeta o ca maestru ni nuu Antioquía de Siria xiñee gucuaacabe dxiiñaʼ riʼ. Sínuque biʼniʼ apoyarcaʼ Bernabé ne Saulo ne qué ñápacabe envidia laacaʼ purtiʼ «biʼniʼ orárcabe, gudixhenácabe luguiacaʼ ne guca despedírcabe de laacaʼ» (Hech. 13:3). ¡Nanna pabiáʼ biecheʼ Bernabé ne Saulo! Laanu laaca naquiiñeʼ guni apoyarnu ca ni maʼ gucuaa xiixa dxiiñaʼ o responsabilidad ndaaniʼ congregación casi ca ancianu. Ne cadi gápanu envidia laacabe, sínuque chinándanu conseju ra ná: «Lagaca nachaʼhuiʼ né laacabe ne lagannaxhii laacabe pur dxiiñaʼ ni cayúnicabe» (1 Tes. 5:13).
5. ¿Xi biʼniʼ Bernabé ne Saulo para gunda biʼniʼ predicarcaʼ guidxi Chipre?
5 Guzá Bernabé ne Saulo dede ra yendacaʼ Seleucia, ti puertu ni riaana gaxha de Antioquía ne raqué gudxíʼbacabe lu ti barcu ne biʼniʼ viajárcabe chupa gayuaa kilómetru dede ra yendácabe Chipre. d Cumu de Chipre Bernabé la? guizáʼ maʼ napa gana guni predicar ca binni xquidxi. Ngue runi casi yendácabe ti guidxihuiiniʼ ni riaana ruaa nisadóʼ ni láʼ Salamina, «biʼniʼ predicárcabe stiidxaʼ Dios ndaaniʼ ca sinagoga stiʼ ca judíu» (Hech. 13:5). e Ne despué zándaca biʼniʼ predicar Bernabé ne Saulo guiráʼ ca guidxihuiiniʼ riaana ndaaniʼ isla riʼ. Qué gánnadinu xi peʼ neza gucuaacabe, peru zándaca guzácabe jma de 160 kilómetru.
6, 7. a) ¿Tu guca Sergio Paulo? ¿Xiñee gucalaʼdxiʼ Bar-Jesús nusaanabe de nucaadiágabe ca noticia galán stiʼ Reinu? b) ¿Xi biʼniʼ Saulo para cadi gucaa Bar-Jesús Sergio Paulo gusaana de gapa fe Señor yaʼ?
6 Lu primé siglu que nabé binni adorar binni bidóʼ ndaaniʼ guidxi Chipre. Ngue runi dxi yendá Bernabé ne Saulo guidxi Pafos la? nagueendaca bidiicaʼ cuenta de laani, «raqué bidxaagalúcabe ti judíu láʼ Bar-Jesús, bruju hombre riʼ ne ti falsu profeta laa. Nuube ra nuu gobernador Sergio Paulo, ti hombre nuu xpiaaniʼ». f Tiempu que, stale binni risaca riecaʼ ra nuu ca bruju ne ra nuu ca astrólogo ante guicaacaʼ ti decisión risaca. Dede né Sergio Paulo, ni ná binni naca «ti hombre nuu xpiaaniʼ» guyé ra nuucaʼ. Peru neca zaqué, nabé guyuulaʼdxiʼ Sergio Paulo mensaje stiʼ Reinu ne «racalaʼdxiʼ gucaadiaga stiidxaʼ Dios». Peru Bar-Jesús, ni runibiáʼcabe casi Elimas, ni riníʼ «bruju» que la? qué ñuulaʼdxiʼ diʼ ni bizaaca riʼ (Hech. 13:6-8).
7 Bicaalú Bar-Jesús mensaje stiʼ Reinu. Laaca gudixhe íquebe gucaabe gobernador Sergio Paulo gusaana de gapa fe Señor ti cadi gunítibe xhiiñabe (Hech. 13:8). Peru ¿xi biʼniʼ Saulo para cadi guni Bar-Jesús ni cá ique que yaʼ? Relatu ca ná: «Óraque bidxá Saulo, laaca laa nga Pablo, de espíritu santu ne biiyadxí laabe ne gudxi laabe: “Lii, hombre ni nabé rusiguii ne runi stale guendaquéiquiiñeʼ, xiiñiʼ Binidxabaʼ, riuuláʼdxiluʼ gúniluʼ guiráʼ ni cadi jneza, ¿xiñee nuuluʼ guchaaluʼ ca cosa jneza ni rusiidiʼ Jehová pue? ¡Biiyaʼ! Zusabanáʼ Jehová lii: ziaanaluʼ ciegu ne qué zuuyaluʼ xpiaaniʼ gubidxa ti tiempu”. Ne oraqueca bichuunduʼ lube ne bicheepaʼ ne canazabe canayúnibe tu guinaaze nabe». g ¿Xi bizaaca ra bíʼnibe milagru que yaʼ? «Ora biʼyaʼ gobernador que ni bizaaca riʼ, biʼniʼ cré, purtiʼ bidxagayaa guiráʼ ni biziidiʼ de Jehová» (Hech. 13:9-12).
Cásica Pablo, gácanu nadxibalú ora gusíʼdinu ni dxandíʼ neca gucaalúcabe laanu.
8. ¿Ximodo zanda gácanu nadxibalú cásica Pablo?
8 Cásica qué nidxibi Pablo Bar-Jesús, laanu laaca cadi naquiiñeʼ guidxíbinu ca ni ruyubi modo cuee gana ca binni ni riuulaʼdxiʼ guiziidiʼ. Ne cadi guiaandaʼ laanu siempre guininu «diidxaʼ ni guiaba binni, […] cásica riaba zidi lu guendaró para gaca nanixe» (Col. 4:6). Peru qué riníʼ diʼ nga naquiiñeʼ igáninu ora gacalaʼdxiʼ tuuxa gusirá fe stiʼ ca binni ni riuulaʼdxiʼ guiziidiʼ de Dios. Laaca cadi naquiiñeʼ guidxíbinu ca religión ni qué rusiidiʼ ni dxandíʼ ra guininu cadi jneza ni rusiidicaʼ, purtiʼ laacaʼ ruchaacaʼ «ca cosa jneza ni rusiidiʼ Jehová», cásica biʼniʼ Bar-Jesús (Hech. 13:10). Cásica Pablo, naquiiñeʼ gácanu nadxibalú ora gusíʼdinu ni dxandíʼ ne guyúbinu ca binni ni racalaʼdxiʼ ganna de laani. Nánnanu qué zudii Jehová laanu poder para gúninu milagru cásica bidiibe ni Pablo. Peru nuunu seguru zaquiiñeʼ Jehová espíritu santu stiʼ para guchiña binni ra nuu ne guiziidicaʼ ni dxandíʼ (Juan 6:44).
Ti «diidxaʼ ni cuʼ gana» (Hechos 13:13-43)
9. ¿Xi ejemplu bisaana Pablo ne Bernabé para ca ni zániru ndaaniʼ congregación?
9 Despué biree Pablo ne Bernabé de Pafos, gudxíʼbacaʼ lu ti barcu ne biʼniʼ viajarcaʼ biaʼ chupa gayuaa cincuenta kilómetru para yendacaʼ Perga, costa stiʼ Asia Menor. Lu Hechos 13:13 riete diidxaʼ «Pablo ne ca xcompañeru», ndiʼ riníʼ maʼ Pablo nga zániru lu grupu que. Peru qué lica riete pa gupa Bernabé envidia laabe, sínuque guiropaʼ amigu riʼ bíʼnicaʼ dxiiñaʼ juntu para gúnicaʼ ni ná Dios. ¡Guizáʼ galán ejemplu bisaanacabe para ca ni zániru ndaaniʼ congregación! Lugar de guyúbinu tuu nga ni jma risaca la? guietenaláʼdxinu guníʼ Jesús: «Guiratu bíʼchitu». Ne laaca guniʼbe: «Qué zusisaca Dios binni orgulloso, peru zusisácabe ca binni humilde» (Mat. 23:8, 12).
10. ¿Ximodo guca neza stiʼ Perga dede Antioquía de Pisidia?
10 Qué gánnanu xiñee bisaana Juan Marcos Pablo ne Bernabé ora yendacaʼ Perga ne biguétabe Jerusalén. Peru Pablo ne Bernabé qué ñaanacaʼ Perga, sínuque biʼniʼ seguircaʼ viaje que ne guyecaʼ Antioquía de Pisidia, ti guidxi ni nuu lu provincia stiʼ Galacia. Nagana guca viaje riʼ, purtiʼ riaana Antioquía de Pisidia ti mil ti gayuaa metru luguiáʼ de nivel stiʼ nisadóʼ. Ne napa xidé tídicabe ti región ni nuu lade dani ra nuu stale gubaanaʼ, ne ni jma feu nga zándaca ca dxi riʼ nga maʼ bizulú cayaca huará Pablo. h
11, 12. ¿Ximodo bicuaaniʼ Pablo interés stiʼ ca binni ni bicaadiaga laa ndaaniʼ sinagoga ni nuu Antioquía de Pisidia?
11 Guyé Pablo ne Bernabé ndaaniʼ sinagoga ni nuu Antioquía de Pisidia dxi sábadu. Relatu ca ná: «Biindasícabe Ley ne ca Profeta nezalú ca binni que, biseendatidxi ca presidente stiʼ sinagoga que laacabe: “Hermanu caʼ, pa nápatu xiixa diidxaʼ ni cuʼ gana laadu, lagabi ni laadu”» (Hech. 13:15). Ne óraque bizuhuaa Pablo ne bizulú guníʼ.
12 Sicaríʼ bizulú Pablo guníʼ: «Hombre de Israel caʼ, ne guiráʼ ca ni ridxibi Dios, lagucaadiaga» (Hech. 13:16). Guniʼbe sicaríʼ purtiʼ cadi ca judíu si nga cucaadiaga laabe, sínuque né ca binni de sti guidxi. Cumu qué ganna ca binni que xi dxiiñaʼ risaca napa Jesús lu propósitu stiʼ Dios la? ngue runi biyubi Pablo modo gucuaa ni interés sticaʼ. Primé ca la? bizeetebe historia stiʼ guidxi Israel. Bisiénebe bisisaca Jehová ca «binni guidxi riʼ dxi nabánicaʼ Egipto» ne guleesibe laacaʼ de raqué «biaʼ 40 iza biʼniʼ huantarbe laacaʼ lu desiertu». Laaca bisietenalaʼdxiʼ Pablo laacabe gucané Jehová ca israelita que chuʼcaʼ ndaaniʼ Tierra Prometida ne bidiibe laacaʼ ca layú que «casi herencia» (Hech. 13:17-19). Nuu tu ná biquiiñeʼ Pablo ca relatu ni zeeda lu Biblia ni bíʼndacabe lu ceremonia ni bíʼnicabe dxi sábadu que. Ne pa zacá ni la? ndiʼ nga sti ejemplu ni rusihuinni biyubi Pablo modo guiniʼné «guiráʼ clase binni» (1 Cor. 9:22).
13. ¿Xi zanda gúninu para chuulaʼdxiʼ binni gucaadiaga mensaje stiʼ Reinu?
13 Laanu laaca racaláʼdxinu gucuáʼninu interés stiʼ ca binni ni runi predicarnu. Ruyúbinu tema ni chuláʼdxicabe ne ruyúbinu gánnanu xi riníʼ íquecabe de religión. Casi pa ruundacabe Biblia la? zanda guidúʼndanenu laacabe textu ni maca runibiáʼcabe, ne dede zanda guinábanu laacabe gúʼndacabe ni lu Biblia stícabe. Modo tiica si gúninu ni, ni racaláʼdxinu nga chuláʼdxicabe guiziidicabe jma.
14. a) ¿Ximodo gunda bisiene Pablo ca binni que de Jesús, ne xidé gudixhenabe laacaʼ? b) ¿Ximodo biiyaʼ ca binni que discursu bisiénebe riʼ yaʼ?
14 Despué gudxi Pablo laacabe, de lade ca rey stiʼ guidxi Israel beeda tobi ni chigulá binni ne laabe nga Jesús ni maca guníʼ Juan Bautista que. Laaca bizeetebe guti Jesús, peru despué biasa de lade gueʼtuʼ (Hech. 13:20-37). Ne despué gúdxibe laacaʼ: «Hermanu caʼ, cayábidu laatu pur guti hombre riʼ zanda guni perdonar Dios ca pecadu stitu, ne pur mediu de laabe, guiráʼ ni guni cré zanda guiníʼ Dios qué gápacaʼ donda». Peru gudixhená apóstol riʼ laacabe ora guníʼ: «Lachuu cuidadu laatu ti cadi guizaacatu ni bicaa ca Profeta: “Laguuyaʼ laabe, laatu, ca ni runi burla, laidxagayaa ne lagati, purtiʼ zuneʼ xiixa ca dxi stitu ni qué zuni cretu neca chuʼ tu gusiene chaahuiʼ ni laatu”». Nabé guyuulaʼdxiʼ ca binni riʼ discursu que, ngue runi gunábacaʼ laacabe guiníʼrucabe «de tema riʼ sti sábadu zeeda que». Ne «biluxe si reunión ni guca ndaaniʼ sinagoga que, stale judíu ne prosélito ni runi adorar Dios yenándacaʼ Pablo ne Bernabé» (Hech. 13:38-43).
«Maʼ chuudu xcaadxi nación» (Hechos 13:44-52)
15. ¿Xi bizaaca sti sábadu dxi bidii Pablo discursu que?
15 «Sti sábadu que, casi guidubi guidxi que guca reunir para» gucaadiágacaʼ apóstol que. Peru nuu caadxi judíu qué ñuuláʼdxicaʼ ni binadiágacaʼ que, ngue runi «bizulú guniʼcaʼ cadi dxandíʼ guiráʼ ni caníʼ Pablo» ne guniʼcaʼ mal de laabe. Né stale valor guníʼ Pablo ne Bernabé: «Primeru ra nuunu nga naquiiñeʼ gaca predicar Stiidxaʼ Dios. Peru, cumu cucaanatu ni ne riníʼ íquetu qué runi merecertu guicaatu guendanabani ni qué zaluxe la? maʼ chuudu xcaadxi nación. Purtiʼ maʼ bidii Jehová laadu mandamientu riʼ: “Maʼ bineʼ nombrar lii casi biaaniʼ para guiráʼ nación, para guni predicarluʼ lu guidubi guidxilayú ne guiniʼluʼ zalá binni”» (Hech. 13:44-47; Is. 49:6).
Guládxicabe «Pablo ne Bernabé» peru ca discípulo que bidxá ladxidoʼcaʼ «de guendanayecheʼ ne de espíritu santu» (Hechos 13:50-52).
16. ¿Xi biʼniʼ ca judíu ora binadiágacaʼ ca diidxaʼ ni guníʼ Pablo ne Bernabé, ne xi biʼniʼ ca misioneru riʼ ora bicaalúcabe laacaʼ?
16 Ora binadiaga ca binni de xcaadxi nación que Stiidxaʼ Dios biéchecaʼ ne bisisácacaʼ ni, «ne guiráʼ ca ni nachaʼhuiʼ ladxidóʼ ni maʼ nuu para guicaa guendanabani ni qué zaluxe, biʼniʼ crecaʼ» (Hech. 13:48). Ngue ru ni qué nindaa, yendá stiidxaʼ Jehová ndaaniʼ guiráʼ guidxi, peru ca judíu qué ñuuláʼdxicaʼ nucaadiágacaʼ ni. Gudxi Pablo ne Bernabé laacabe zaca castigárcabe purtiʼ qué ninácabe nucaadiágacabe ca noticia galán ni caníʼ de Mesías, laandacabe gucuaacabe ni primeru. Pur ngue nabé bidxiichi ca judíu que ne bicaacabe «ca gunaa ni risaca stiidxaʼ ne ca hombre risaca stiʼ guidxi para guiládxicaʼ Pablo ne Bernabé de territorio» stícabe. ¿Xi biʼniʼ Pablo ne Bernabé yaʼ? «Gudxíbicabe yu naze ñeecabe ne guyécabe Iconio». ¿Ñee pur nga maʼ qué ñuuruʼ xpinni Cristu Antioquía de Pisidia la? ¡Coʼ! Guyuuruʼ, purtiʼ biaanaruʼ xcaadxi discípulo ne bidxá ladxidoʼcaʼ «de guendanayecheʼ ne de espíritu santu» (Hech. 13:50-52).
17-19. ¿Ximodo zanda chinándanu ejemplu stiʼ Pablo ne Bernabé, ne ximodo zanda gacané ni laanu cadi guirá guendanayecheʼ stinu?
17 Ejemplu stiʼ Pablo ne Bernabé rusiidiʼ laanu cadi naquiiñeʼ gusaana de guni predicarnu neca chuʼ binni risaca gacalaʼdxiʼ gucueeza laanu. Lu relatu ca ná ora biʼyaʼ Pablo ne Bernabé qué niná ca binni que nucaadiágacaʼ stiidxaʼ Dios gudxíbicaʼ yu naze ñeecaʼ, peru cadi purtiʼ cadxiichicaʼ, sínuque purtiʼ maʼ cadi laacaʼ nápacaʼ donda pur ni guizaacacabe. Neca qué zanda guni obligárcabe ca binni que guicaacaʼ stiidxaʼ Dios, peru ni zanda gúnicabe nga guni predicárcabe. Ngue runi guyécabe Iconio.
18 ¿Xi bizaaca ca discípulo ni biaanaʼ Antioquía de Pisidia que yaʼ? Neca nadipaʼ modo bicaalú binni laacabe, nabé nayecheʼ guyuucabe. ¿Xiñee yaʼ? Purtiʼ Jesús peʼ guníʼ: «¡Dichoso nga ca ni rucaadiaga stiidxaʼ Dios ne rúnicaʼ ni ná ni!» (Luc. 11:28). Ne zacá nga biʼniʼ sentir ca discípulo de Antioquía que.
19 Cásica Pablo ne Bernabé, qué chuʼ dxi guiaandaʼ laanu naquiiñeʼ guni predicarnu ca diidxaʼ nacubi ne galán stiʼ Reinu. Maʼ binni guʼyaʼ pa gucaadiaga laanu o coʼ. Ora ruluíʼ qué nácabe gucaadiágacabe laanu, gúninu casi biʼniʼ ca discípulo ni bibani lu primé siglu que. Pa nadxiinu Stiidxaʼ Dios ne rúninu ni ná espíritu santu la? neca qué naʼ binni gucaadiaga laanu, qué zará guendanayecheʼ stinu (Gál. 5:18, 22).
a Biiyaʼ cuadru ni láʼ « Bernabé, “tobi ni riguixhedxí ladxidóʼ binni”», ni zeeda lu yaza 86.
b Para tiempu riʼ maʼ nuu congregación ni riaana zitu de Jerusalén casi Antioquía de Siria, riaana ni biaʼ 550 kilómetru ladu guiaʼ.
c Biiyaʼ cuadru ni láʼ « Ca neza guyuu dxiqué», ni zeeda lu yaza 87.
d Lu primé siglu que, ora galán nuu tiempu runi viajar ca barcu 160 kilómetru ti dxi, peru ora nuu mal tiempu la? jma xadxí rindaa viaje ca.
e Biiyaʼ cuadru ni láʼ « Sinagoga stiʼ ca judíu», ni zeeda lu yaza 89.
f Guyuu Chipre lu náʼ Senado romano, ne ti gobernante stícabe biʼniʼ mandar raqué ni binibiáʼcabe casi procónsul.
g Dede lu relatu riʼ maʼ qué riquiiñeʼ nombre Saulo (lu diidxaʼ hebreu) ne maʼ riete ni casi Pablo lu diidxaʼ romanu (zeeda ni de diidxaʼ latín). Nuu tu ná pur gobernador Sergio Paulo nga gucuaa apóstol riʼ lá Pablo (o Paulo). Ne dxi zebe Chipre biquiiñerube lá riʼ purtiʼ zándaca dede dxi nahuiinibe nga nápabe lá romanu riʼ, ne yanna maʼ biquiiñebe ni sti biaje purtiʼ gúcabe «apóstol ni rié ra nuu binni de xcaadxi guidxi». Laaca zándaca maʼ qué niquiiñeʼ Pablo lá Saulo purtiʼ lu diidxaʼ griegu huaxiéʼ galán modo riquiiñecabe lá riʼ (Rom. 11:13).
