1-3. a) ¿Xiñee nabé bidxiichi Pablo dxi nuu Atenas? b) ¿Xi zusiidiʼ ejemplu stiʼ Pablo laanu?

 TI DXI zidiʼdiʼ Pablo ndaaniʼ guidxi Atenas (Grecia), ti guidxi ra nuu stale binni guzá scuela ne stale iza ante la? raqué nga bisiidiʼ caadxi filósofo casi Sócrates, Platón ne Aristóteles. Ne cada pasu gundaa Pablo jma cadxiichi. ¿Xiñee yaʼ? Biiyabe nabé napa ca binni que religión ne runi adorarcaʼ stale bidóʼ. Guiráʼ ladu nu bidóʼ cadi ndaaniʼ ca templu que si, dede né ndaaniʼ ca plaza, ndaaniʼ calle... Nanna Pablo ni riníʼ ique Dios ni dxandíʼ de ca bidóʼ ca (Éx. 20:4, 5). Nga runi cásica Jehová laabe laaca nanaláʼdxibe guni adorar binni bidóʼ.

² Ora yendabe ra plaza stiʼ luguiaa, biiyabe ti cosa nabé feu. Neza squina ladu rindani gubidxa gaxha de entrada stiʼ lugar que, nuu ti fila naroʼbaʼ de caadxi estatua yuudxuʼ o inmoral stiʼ dios Hermes ne nuu stale yuʼduʼ lu guidubi naca plaza que. ¿Xi zanda guni Pablo para guni predicar ca binni riʼ yaʼ? ¿Zanda gucueezabe laabe ne guiníʼnebe ca binni que de ni riuuláʼdxicaʼ la? ¿Ñee zanda gacanebe tuuxa guyubi ne guidxela Dios ni dxandíʼ la?

³ Lu Hechos 17:22-31 zanda guidúʼndanu discursu ni bidii Pablo nezalú ca binni ni guzá scuela de guidxi Atenas. Ora guni estudiarnu ejemplu stibe zazíʼdinu modo guni predicarnu sin guchiichinu binni. Chuʼnu seguru de ni cusíʼdinu ne gánnanu gusíʼdinu jneza. Ne zazíʼdinu ximodo zanda guinínenu binni de ni riuulaʼdxiʼ para gucaʼnu laaca guiníʼ íquecaʼ.

4, 5. ¿Paraa biʼniʼ predicar Pablo ndaaniʼ guidxi Atenas, ne xiñee nagana nga guni predicarbe ra plaza stiʼ luguiaa que?

⁴ Guyé Pablo guidxi Atenas a biaʼ lu iza 50, lu guiropa viaje biʼniʼ casi misioneru. Laga cabézabe guedandá Silas ne Timoteo de Berea, «guyebe ndaaniʼ sinagoga, gucanebe ca judíu [...] guiénecaʼ Stiidxaʼ Dios» casi maca rúnibe ni. Laaca guyebe ti lugar ra zanda guni predicarbe binni ni cadi judíu ni nabeza Atenas. Laani nga «plaza stiʼ luguiaa» laaca rábicabe lugar que ágora  (Hech. 17:17). De ra nuu Acrópolis que la? riaana plaza riʼ ladu rindani gubidxa ne nápani biaʼ gaayuʼ hectárea. Peru cadi ti luguiaa si nga lugar que, laaca laani nga lugar jma risaca ra raca junta ndaaniʼ guidxi Atenas. Nuu ti libru ná laani nga lugar ra jma raca junta stiʼ ca hombre ni runi negocio. Ca políticu, ca filósofo ne ca binni ni rucaa libru. Nabé riuulaʼdxiʼ ca binni guzá scuela checaʼ raqué para gúnicaʼ junta sticaʼ ne güicaʼ de xiixa cosa.

⁵ Nagana nga gaca predicar ra plaza stiʼ luguiaa que. Lade guiráʼ binni ni rié raqué rié chupa grupu de filósofo: ca epicúreo ne ca estoico. b Runi crecaʼ epicúreo málasi guca xiixa ne pur laani nga biuu guendanabani. Para laacabe la? sicaríʼ nga guendanabani: «Cadi naquiiñeʼ guidxíbinu Dios, qué runi sentir binni gastiʼ lu guendaguti. Zanda guni binni ni jneza ne zanda guni huantar cosa malu». Peru ca estoico la? runi crecaʼ jma risaca nga guiziidiʼ binni ne guiene. Qué runi crecaʼ pa naca Dios ti binni. Ne nin tobi de ca grupu riʼ qué runi crecaʼ pa zanda guiasa binni ni maʼ guti casi rusiidiʼ ca xpinni Cristu. Racá ridúʼyanu gadxé peʼ ni rusiidiʼ guiropaʼ grupu riʼ ne ni ziné Pablo ra nuucabe. Laani nga ca cosa jneza ne nayani ni rusiidiʼ ca xpinni Cristu.

6, 7. ¿Xi guníʼ caadxi Filósofo griegu ora binadiágacaʼ de ni cusiidiʼ Pablo, ne xi riníʼ binni tiempu riʼ ora runadiágacaʼ de ni rusíʼdinu?

⁶ ¿Xi biʼniʼ ca filósofo griegu que ora binadiágacaʼ ni cusiidiʼ Pablo yaʼ? Nuu tu gudxi laabe «muxteru» o ni riníʼ diidxaʼ riʼ lu diidxaʼ griegu nga «tobi ni rutopa semiá» (biiyaʼ nota de estudiu stiʼ Hechos 17:18 ni zeeda lu Biblia de estudiu diidxastiá). Ti binni ni nabé riene de diidxaʼ griegu ná biquiiñecabe diidxaʼ riʼ para guiníʼcabe «de ca pajaruhuiiniʼ ni maʼ zitopa semiá riʼ layú. Despué laaca biquiiñecabe diidxaʼ riʼ para guníʼcabe de ca binni ni maʼ zeʼ zitopa guendaró ni bisaʼbiʼ binni ra luguiaa o intiica si sti cosa. Despué laaca biquiiñecabe diidxaʼ riʼ para guiníʼcabe de ca binni ni runadiaga intiica si cosa ne maʼ caníʼ ni. Peru despué maʼ qué ganna ximodo gusiene ni caníʼ». Racá ridúʼyanu caníʼcabe mal de Pablo ne laaca caníʼcabe nácabe ti binni ni qué ganna gastiʼ ne caniʼbe diidxaʼ si ni binadiágabe guníʼ sti binni. Peru zadúʼyanu qué nudiibe lugar nuchibi ni caníʼ ca binni que laabe.

⁷ Ca dxi stinu riʼ, zacaca nga binni. Stale binni runi burla laanu purtiʼ nácanu testigu stiʼ Jehová ne runi crenu ni ná Biblia. Nuu stale maestru rusiidicaʼ qué gapa binni ra quiñeyú evolución ne pa nácaluʼ ti binni nuu xpiaaniʼ la? napa xidé guni creluʼ ni. Para laacabe la? binni ni qué runi cré evolución, naca ti binni ni qué gana gastiʼ. Ca binni nuu xpiaaniʼ riʼ riníʼ íquecaʼ nácanu binni huati purtiʼ rusíʼdinu ni ná Biblia ne ruluinu dxandíʼ nuu tu bizáʼ guiráʼ cosa. Peru laanu qué ridxíbidinu laacabe sínuque rininu né stale valor Jehová Dios ni nuu xpiaaniʼ, laa nga bizáʼ guiráʼ ni nuu lu Guidxilayú riʼ (Apoc. 4:11).

8. a) ¿Xi guníʼ xcaadxi binni ora binadiágacaʼ ni cusiidiʼ Pablo? b) ¿Xi zándaca riníʼ diidxaʼ Areópago? (Biiyaʼ nota stiʼ yaza 142).

⁸ Laaca nuu xcaadxi de ca binni que maʼ gadxé modo guniʼcaʼ, nacaʼ: «Ruluíʼ  cayuni predicarbe stiidxaʼ ca dios stiʼ xcaadxi guidxi» (Hech. 17:18). Peru pa ñaca canayuíʼ Pablo stiidxaʼ xcaadxi dios ndaaniʼ guidxi Atenas la? cayuu lu ti guendanagana. ¿Xiñee yaʼ? Purtiʼ caadxi iza ante nga nga ni biʼniʼ filósofo Sócrates ngue runi biiticabe laa. Ngue nga runi yenécabe Pablo ra Areópago c ne gunábacabe laa gusiene guiráʼ ni caníʼ purtiʼ qué lica huayunadiágacabe ni. ¿Ximodo guiniʼbe jneza ni cusiidibe nezalú caadxi binni ni qué ganna gastiʼ de Stiidxaʼ Dios yaʼ?

9-11. a) ¿Xi biʼniʼ Pablo para gunda guníʼnebe ca binni que? b) ¿Ximodo zanda chinándanu ejemplu stiʼ Pablo lu predicación?

⁹ Cadi guiaandaʼ laanu guizáʼ bidxiichi Pablo ora biiyaʼ guiráʼ xixé bidóʼ que. Peru lugar de nugúnabe ca binni que diidxaʼ pur guiráʼ ca bidóʼ que, bicueezabe laabe. Né stale cuidadu, biyúbibe xiixa ni riuulaʼdxiʼ ca binni que  para ganda ucuudxibe laacaʼ. Sicaríʼ bizulube: «Hombre de Atenas caʼ, ruuyaʼ jma runi cretu ca dios ca que xcaadxi binni» (Hech. 17:22). Biaʼsi peʼ modo biuu Pablo ca binni riʼ ne gúdxibe laaca galán stipa ni cayúnicaʼ. Casi ñaca ñábibe laacaʼ: «Nabé riuuláʼdxitu gápatu religión, ¿njaʼ?». Biene Pablo neca nuu binni runi cré cosa ni cadi dxandíʼ, zándaca nayá ladxidoʼcaʼ ne zanda chuláʼdxicaʼ guiziidicaʼ ni dxandíʼ. Biʼniʼ Pablo zaqué purtiʼ ante gácabe xpinni Cristu laaca qué gánnabe xi cayúnibe ne caʼruʼ gápabe fe (1 Tim. 1:13).

¹⁰ Despué bizeeteʼ Pablo ti detalle ni rusihuinni pabiáʼ riuulaʼdxiʼ ca binni que religión. Nápacabe ti altar ra cá ca diidxaʼ riʼ «para ti Dios ni qué runibiaʼdu». Nuu ti libru ni ruzeeteʼ «nabé riuulaʼdxiʼ binni de Grecia ne de xcaadxi guidxi gúnicaʼ altar para ca dios ni qué runibiaʼcaʼ, purtiʼ ridxíbicabe cadi málasi gusiaandacabe tuuxa dios ne guchiichicabe laa sin gudiicabe cuenta». Ngue runi cumu biʼniʼ ca binni de Atenas que altar que la? ngue cusihuinni nuu ti Dios ni qué runibiáʼcabe. Ne biquiiñeʼ Pablo ni para ganda guzulú gusiidiʼ laacabe ca noticia galán. Sicaríʼ gúdxibe laacaʼ: «De Dios ni qué runibiaʼtu ne ni runi adorartu riʼ nga cayueniáʼ laatu» (Hech. 17:23). Neca né diidxaʼ nadóʼ biuu Pablo ca binni que, peru nabé nadipaʼ mensaje bidiibe laaca. Cadi cusiidibe de caadxi dios nacubi o dios de xcaadxi guidxi, ngue nga ni ná ca binni que cayúnibe. Sínuque ni racaláʼdxibe nga gusiidibe laacaʼ de Dios ni qué runibiaʼcaʼ: Dios ni dxandíʼ.

¹¹ ¿Ximodo zanda chinándanu ejemplu stiʼ Pablo lu predicación yaʼ? Pa guiduʼyaʼ chaahuinu zudiʼnu cuenta pa napa binni religión stiʼ. Zanda gúʼyanu pa nándabe xiixa bigaʼ o pa nápabe xiixa ra lídxibe o lu patiu stibe ni guluíʼ laanu xi religión laabe. Zanda gábinu laabe: «Cayuuyaʼ nápaluʼ religión ne naa riuuladxeʼ guinieniáʼ binni ni riuulaʼdxiʼ ganna de Dios». Pa gábinu laabe jneza ni rúnibe ne gánnabe laanu laaca riuuláʼdxinu guizíʼdinu de Dios, zanda gacaneni laanu para ganda guinínenu laabe. Cadi naquiiñeʼ guininu cadi jneza ni runi crécabe. Guietenaláʼdxinu stale de ca hermanu stinu dxiqué biʼniʼ crécabe ni cadi dxandíʼ.

12. ¿Xi biʼniʼ Pablo para gunda biʼniʼ predicar ca binni que?

¹² Bidxela Pablo modo ganda guiniʼné ca binni que. Peru, ¿xi zanda gúnibe para cadi gusaana ca binni que de gucaadiágacaʼ yaʼ? Gunna Pablo nanna ca binni que stale de ni bisiidiʼ ca Filósofo griegu peru qué gánnacabe gastiʼ de Stiidxaʼ Dios. Nga runi, gadxé gadxé modo biʼniʼ predicarbe laacaʼ. Primé, guníʼnebe laacaʼ de ni rusiidiʼ Stiidxaʼ Dios sin nuxhélebe ni. Guiropa, qué nudxiibabe laca laabe, sínuque biquiiñebe diidxaʼ laanu para guníʼnebe laacaʼ. Guionna, bizeetebe ni bicaa caadxi hombre de Grecia para gusihuínnibe laaca guníʼ ca hombre que chupa chonna de ca cosa ni caniʼbe. Yanna, ora bisiidiʼ Pablo ca binni de Atenas que, ¿xi cosa risaca bisiidibe laaca de Dios ni qué runibiaʼcaʼ que yaʼ? Guni estudiar chaahuinu discursu stibe.

13. ¿Xi guníʼ Pablo de modo guyáʼ universu, ne xi bisiénebe ca binni que?

 ¹³ Dios nga bizáʼ universu. Sicaríʼ guníʼ Pablo: «Dios ni bizáʼ guidxilayú ne guiráʼ ni nuu ndaaniʼ ni nga Señor stiʼ guibáʼ ne stiʼ guidxilayú, nga runi cadi nabézabe ndaaniʼ templu ni bicuí binni» (Hech. 17:24). d Cadi málasi guca xiixa ne guyáʼ universu, Dios ni dxandíʼ nga bizáʼ guiráʼ cosa (Sal. 146:6). Laabe nga Señor ni runi mandar guiráʼ xixé ni nuu guibáʼ ne ni runi mandar lu Guidxilayú. Ne qué zanda guni adorarnu laabe ndaaniʼ ti yuʼduʼ, cadi nácabe casi Atenea o casi xcaadxi dios. Purtiʼ laacaʼ runi adorar binni laacaʼ pur ca bidóʼ ca o ndaaniʼ yuʼduʼ (1 Rey. 8:27). Nga runi bisiene Pablo jma risaca Jehová Dios ni dxandíʼ que ca ni runi adorárcabe ndaaniʼ ca yuʼduʼ que, casi ca bidóʼ ni bizáʼ binni (Is. 40:18-26).

14. ¿Ximodo bisihuinni Pablo cadi caquiiñeʼ Dios de binni?

¹⁴ Cadi caquiiñeʼ Dios chuʼ tu gacané laa. Ca binni que rugácucaʼ ca bidóʼ que lari ni jma caru ne rúnicaʼ ofrenda ni jma galán. Ne rinécabe ni gocaʼ ne ni guecaʼ casi ora caquiiñecaʼ ni. Ne zándaca caadxi de ca filósofo ni cucaadiaga Pablo que guníʼ íquecaʼ cadi caquiiñeʼ ca dios que ni rudiicabe laacaʼ. Guníʼ íquecabe biaʼsi nga ni nabe cadi cabeza Dios «gacané binni laa casi ñaca niquiiñebe de laacaʼ». Ne ni dxandíʼ la? cadi caquiiñeʼ Dios gudiʼnu laa cosa material. Sínuque rudiibe laanu «guendanabani ne ricaanu bi ne pur laabe nápanu guiráʼ cosa» ni caquíʼñenu. Casi gubidxa, nisaguié ne ca lay̱ú ca rudii ni guidoʼno (Hech. 17:25; Gén. 2:7). Cadi caquiiñeʼ Dios de binni, sínuque laabe nga rudiibe laanu guiráʼ ni.

15. ¿Ximodo gucané Pablo ca binni de Atenas que guiénecaʼ cadi jneza ni riníʼ íquecaʼ ne xi rusiidiʼ ni laanu?

¹⁵ Dios nga bizáʼ primé hombre. Guníʼ ique ca binni de Atenas que, jma risácacaʼ que ca binni ni cadi naca griegu. Biblia qué rusiidiʼ naquiiñeʼ gusisaca binni raza stiʼ o xquidxi (Deut. 10:17). Peru gunna Pablo ximodo zanda guiníʼ de tema riʼ. Zándaca bicaabe guiráʼ binni que guiníʼ íquecaʼ ora guniʼbe:  «De ti hombre si biree guiráʼ binni ni nuu ndaaniʼ guiráʼ guidxi» (Hech. 17:26). Raríʼ ni caníʼ Pablo nga ni zeeda lu Génesis ra caníʼ de ti hombre, Adán, bixhoze guiráʼ binni (Gén. 1:26-28). Cumu guiranu zeedanu de ti binni si la? nga runi gastiʼ ti raza o ti guidxi jma risaca que xcaadxi. Cadi nagana para guiene ca binni que ni cusiidibe. Rusiidiʼ ejemplu stiʼ Pablo laanu ti cosa nabé risaca. Neca risaca guni respetarnu binni, naquiiñeʼ gusíʼdinu laacabe ni dxandíʼ ne cadi ni riuulaʼdxiʼ sícabe gunadiágacabe.

16. ¿Xi para bizáʼ Dios binni?

¹⁶ Racalaʼdxiʼ Dios guidxíñanu laa. Zándaca pur stale iza gadxé gadxé nga ni guníʼ ca filósofo ca de xiñee nabáninu. Nga runi, pa ñaca de laasicabe qué ñanda nusiénecabe ni. Peru nabé nayaʼniʼ modo bisiene Pablo ni laacabe ra guníʼ Dios bizáʼ guiráʼ binni «ti guyúbicaʼ Dios, ne pa gúnicaʼ ni casi ñaca zixubinacaʼ, dxandíʼ peʼ zadxélacaʼ laabe, purtiʼ cadi zitu diʼ nuube de cada tobi de laanu» (Hech. 17:27). Nga runi, zanda gunibiáʼcabe Dios, Dios ni qué runibiáʼ ca binni de Atenas que. Ne nuube gaxha de ca binni ni runi stipa pur guidxélacaʼ ne guiziidicaʼ de laabe (Sal. 145:18). Ra biquiiñeʼ Pablo diidxaʼ «laanu» guniʼbe laaca naquiiñeʼ guyúbibe Dios neca qué ruuyabe laa.

17, 18. ¿Xiñee caquiiñeʼ gunibiáʼ binni Dios? ¿Xi rizíʼdinu de ejemplu stiʼ Pablo pur modo biuube ca binni que para gucaadiágacaʼ laabe?

¹⁷ Caquiiñeʼ gunibiáʼ binni Dios. Laaca guníʼ Pablo: «Purtiʼ laabe bizaʼbe laanu, pur laabe nabáninu ne riniibinu». Nuu chupa chonna binni ni nanna de ndiʼ naca caníʼ Pablo ca diidxaʼ stiʼ Epiménides, ti poeta de Creta ni bibani lu siglu sexto ante de ca dxi stinu. Ne laabe nga ti binni risaca lu religión stiʼ ca binni de Atenas. Despué guníʼ Pablo xiñee naquiiñeʼ gunibiáʼ binni  Dios: «Casi maʼ guníʼ caadxi de ca poeta stitu: “Purtiʼ laaca xiiñibe laanu”» (Hech. 17:28). Ne ni dxandíʼ la? guiraʼnu caquiiñeʼ guni sentirnu nácanu parte de familia stiʼ Jehová purtiʼ laabe bizaʼbe hombre, bixhoze guiráʼ binni Guidxilayú. Casi bidúʼyanu, para ganda gucaadiaga ca binni que Pablo la? biiyabe jneza peʼ guiniʼbe caadxi diidxaʼ ni bicaa caadxi binni de Crecia purtiʼ runi respetar binni de raqué laacaʼ. e Cásica Pablo, nuu biaje laaca zanda iquíʼñenu libru de historia o xcaadxi libru ni nabé riuulaʼdxiʼ binni guʼndaʼ. Guzéʼtenu ti ejemplu, pa iquiiñenu caadxi diidxaʼ ni biree lu xiixa libru ne biaʼsi ni nani la? zanda gacaneni binni cucaadiaga laanu para guixeleʼ lu ne gúʼyacaʼ paraa peʼ nga biasa xiixa costumbre o ca cosa ni runi ca religión ca.

¹⁸ Dede ra caninu riʼ la? guizáʼ maʼ stale cosa risaca bisiidiʼ Pablo de Dios, né stale gracia guníʼnebe ca binni que de ni riuuláʼdxicaʼ. Peru, ¿xii ngue racaláʼdxibe guni ca binni ni cucaadiaga laabe que yaʼ? Nga peʼ nga ni gúdxibe laaca despué.

19, 20. a) ¿Xiñee biaʼsi peʼ modo guníʼ Pablo para gusihuinni cadi jneza guni adorar binni bidóʼ? b) ¿Xi naquiiñeʼ guni ca binni de Atenas?

¹⁹ Maʼ bedandá ora gabi Pablo ca binni que gúnicaʼ xiixa pur guiráʼ ni maʼ bisiidibe laacaʼ. Cumu maca bizeetebe ni guníʼ ca hombre de Grecia que la? guniʼbe ca diidxaʼ riʼ: «Nga runi, cumu xiiñiʼ Dios laanu, cadi naquiiñeʼ guiníʼ íquenu zeeda gaca Dios casi xiixa de oro, o plata, o guié, o casi xiixa ni bizáʼ binni modo ná xquendabiaaniʼ» (Hech. 17:29). Dxandíʼ ni guniʼbe ca, pa Dios nga bizáʼ binni guidxilayú, ¿zanda xa guni binni xiixa imagen stibe? Biaʼsi peʼ nga modo guníʼ Pablo para gusihuinni cadi jneza nga guni adorar binni ti bidóʼ (Sal. 115:4-8; Is. 44:9-20). Ora guluube né laabe ra guniʼbe «cadi naquiiñeʼ guiníʼ íquenu», maʼ qué ñaca nagana para ca binni que nicaacaʼ conseju ni cudiibe que.

²⁰ Despué gúdxibe laacaʼ: «Guyuu ti tiempu biʼniʼ binni ca cosa riʼ purtiʼ qué gánnacaʼ, peru qué nulabi Dios ni bíʼnicabe riʼ, peru yanna maʼ cayábibe guiráʼ binni de guiráʼ ladu gaca arrepentir» (Hech. 17:30). Ora guníʼ Pablo ca diidxaʼ riʼ bisiénebe ca binni que cadi jneza iquiiñecaʼ bidóʼ para guni adorarcaʼ Dios. Ngue runi bisiene chaahuibe laacaʼ xi caquiiñeʼ gúnicaʼ: gaca arrepentircaʼ. Zándaca guyuu de laacaʼ bidxagayaacaʼ ni. Peru cumu para laapecabe discursu bidii Pablo riʼ la? bisiene chaahuiʼ laacabe Dios nga bidii laacabe guendanabani ne ngue runi zabidxi cuenta laacabe. Naquiiñeʼ guyúbicabe laabe, guiziidicabe ni dxandíʼ de laabe, ne guibánicabe modo racalaʼdxiʼ Dios guibánicabe. Para ca binni de Atenas que, naquiiñeʼ guiénecabe ti pecadu nga runi adorárcabe ca bidóʼ que. Ne naquiiñeʼ gusaanacabe de gúnicabe ni.

21, 22. ¿Xiñee galán modo biluxe Pablo discursu stiʼ, ne xi riníʼ ca diidxaʼ ni guniʼbe?

 ²¹ Biluxe Pablo ne caadxi diidxaʼ nadipaʼ: «Purtiʼ maʼ gudíxhebe [Dios] ti dxi guni juzgarbe binni guidxilayú ne maʼ biʼniʼ nombrarbe ti hombre para guni ni ne zuni juzgar jneza. Ne zanda guni cré binni dxandíʼ zaca ni purtiʼ maʼ gundísabe laa de lade gueʼtuʼ» (Hech. 17:31). Cumu maʼ nánnacabe zedandá dxi zuni juzgar Dios binni la? ngue nga ti razón risaca para guyúbicabe ne guidxélacabe Dios ni dxandíʼ. Qué niniʼbe lá juez que peru guniʼbe ti cosa ni bidxagayaa ca binni que de laa: gúcabe binni, gútibe ne bisibani Dios laabe.

²² Laanu maʼ nanna chaahuinu xi riníʼ ca diidxaʼ ni guníʼ Pablo ra biluxe discursu stiʼ. Nánnanu juez ni maʼ biʼniʼ nombrar Dios nga Jesucristu (Juan 5:22). Ne laaca maʼ nánnanu dxi chigaca juzgar binni ca zandaani ti mil iza ne maʼ cadi candaa zuzuluni (Apoc. 20:4, 6). Ne laaca maʼ nánnanu juez ca nga chiguiníʼ tuu nga ca ni guca fiel ne laacaʼ nga chicaacaʼ stale ndaayaʼ ni qué ñuu dxi niníʼ íquecaʼ. Nga runi, qué ridxíbinu guedandá dxi ca. ¿Xi rucaa laanu guni crenu dxandíʼ ni cabézanu ne cadi ti cuentu si ni yaʼ? Laani nga milagru ni jma naroʼbaʼ ni maʼ guca: dxi biasa Jesucristu de lade gueʼtuʼ.

23. ¿Xi biʼniʼ sentir ca binni que ora bicaadiágacaʼ discursu stiʼ Pablo?

²³ Gadxé gadxé ni biʼniʼ ca binni que ora binadiágacaʼ ni guníʼ Pablo. Ora guniʼbe maʼ nuu tu biasa de lade gueʼtuʼ «guyuu tu biʼniʼ burla laabe». Xcaadxi nabé nachaʼhuiʼ gúcacaʼ né laabe, peru qué naca chuʼcaʼ compromisu, gúdxicaʼ laabe: «Sti biaje ndaʼ gucaʼdiágadu ni caniʼluʼ riʼ» (Hech. 17:32). Peru guyuu chupa chonna tu laa guyuulaʼdxiʼ ni. Ndiʼ nga ni ná relatu ca: «Guca unir caadxi hombre laabe ne biʼniʼ crecaʼ. Ládecabe nuu Dionisio, juez stiʼ tribunal stiʼ Areópago, ne ti gunaa láʼ Dámaris, ne xcaadxi binni» (Hech. 17:34). Ngaca nga rizaaca ora maʼ cayuni predicarnu, nuu chupa chonna binni ni ruxidxi laanu. Stale binni nabé nachaʼhuiʼ peru qué rinacaʼ guiziidicaʼ. Ne nuu xcaadxi né stale guendanayecheʼ ricaacaʼ mensaje stiʼ Reinu ne reeda gácacaʼ Testigu.

24. ¿Xi rusiidiʼ discursu stiʼ Pablo laanu?

²⁴ Ora guiduʼndaʼ chaahuinu discursu ni bidii Pablo, zazíʼdinu ximodo gusiene chaahuinu xiixa cosa para ganda chuulaʼdxiʼ binni ni cusíʼdinu ne gacanenu laacabe guiénecabe dxandíʼ ni cusíʼdinu laacabe. Laaca rusiidiʼ ni laanu risaca nga gápanu paciencia, ca binni ni nuu lu ca religión ni qué rusiidiʼ ni dxandíʼ ne naquiiñeʼ guyúbinu modo guinínenu laacabe. Sti cosa risaca ni rusiidiʼ ni laanu nga cadi naquiiñeʼ gucáʼchinu ca ni rusiidiʼ Biblia para cadi guidxiichi binni. Pa gúninu guiráʼ ni maʼ bizíʼdinu riʼ, jma ziuʼnu listu para gacanenu sti binni ne zusíʼdinu jma jneza. Zusiidiʼ chaahuiʼ ca publicador lu predicación ne ca ancianu zúnicaʼ dxiiñaʼ sticaʼ jneza ndaaniʼ congregación. Zacá zácanu casi Pablo purtiʼ laa gucané xcaadxi para «guyúbicaʼ Dios ne [...] dxandíʼ peʼ zadxélacaʼ laabe» (Hech. 17:27).