Maʼ chonna gubidxa de naca Natanael discípulo stiʼ Jesús. Yanna zeʼ Jesús né ca discípulo stiʼ ladu guiaʼ de guidxi Galilea, xquidxi Jesús. Guca invitárcabe ti guendaró ra cayaca ti guendaxheelaʼ ndaaniʼ guidxi Caná, xquidxi Natanael. Riaana guidxi riʼ lade ca dani nuu ladu guiaʼ de guidxi Nazaret, ra biniisi Jesús.

Laaca nuu María, jñaaʼ Jesús, ra guendaxheelaʼ riʼ. Cumu runibiaʼbe familia stiʼ ca ni cachaganáʼ que la? ngue runi zándaca cayacanebe para gaca tender guiráʼ invitadu que. Bidii María cuenta maʼ birá vinu ra cayaca guendaxheelaʼ que ne gúdxibe ni Jesús (Juan 2:3).

Nuu María guni Jesús xiixa purtiʼ maʼ birá vinu que. Peru biquiiñeʼ Jesús caadxi diidxaʼ ni biquiiñecabe dxiqué para gusihuinni qué ñuulaʼdxiʼ ni guníʼ jñaaʼ: «Gunaa, ¿ñee runi importar nga naa ne lii la?» (Juan 2:4). Cumu Jesús nga Rey ni maʼ gulí Dios la? nga runi Bixhózesibe ni nuu guibáʼ nga zanda gabi laabe xi gúnibe, cadi familia stibe nin ca xhamígube. Cumu nuu xpiaaniʼ María la? bisaana ni lu náʼ xiiñiʼ ne gudxi ca ni cayuni servir que: «Laguni guiráʼ ni gábibe laatu» (Juan 2:5).

Nuu xhoopaʼ tinaja de guié raqué ne cada tobi ni riné jma de 40 litru nisa. Para gudxi Jesús laacabe: «Laguchá ca tinaja ca de nisa». Óraque gudxi Jesús laacabe: «Lacuee caadxi ne lachiné ni ra nuu director stiʼ guendaxheelaʼ riʼ» (Juan 2:7, 8).

Cadxagayaa director stiʼ guendaxheelaʼ que pur vinu chaʼhuiʼ cudiicabe, peru qué ganna pa ti milagru ngue biʼniʼ Jesús. Ngue runi, bicaabe ridxi novio que ne gúdxibe laa: «Guiráʼ binni primeru rudii vinu chaʼhuiʼ, ne ora maʼ naxudxi ca invitadu la? rudii vinu huaxiéʼ galán. Peru lii deruʼ cudiiluʼ vinu chaʼhuiʼ» (Juan 2:10).

Ndiʼ nga primé milagru biʼniʼ Jesús ne guizáʼ biquidxi ni fe stiʼ ca primé discípulo stiʼ. Despué de guendaxheelaʼ que, yené Jesús jñaaʼ ne ca biʼchiʼ Capernaúm, ni riaana ladu noroeste de nisadóʼ stiʼ Galilea.