Despué de gunaazecabe Jesús ndaaniʼ jardín de Getsemaní que, bisaana ca apóstol stibe laabe stúbibe purtiʼ bidxíbicaʼ. Peru chupa de laacaʼ yenándacaʼ laabe de zitu. Pedro ne sti «discípulo», zándaca apóstol Juan (Juan 18:15; 19:35; 21:24). Zándaca bigaandacabe Jesús ora zinécabe laa ra lidxi Anás. Ne ora biseendaʼ Anás Jesús ra lidxi sumo sacerdote Caifás, de zitu zinanda ca apóstol riʼ laabe. Zándaca stale cosa nga cadiʼdiʼ ndaaniʼ ique ca apóstol riʼ, zándaca cadxíbicabe guuti binni laacabe ne laaca nuucabe xizaa pur Maestru stícabe.

Cumu runibiáʼ Juan sumo sacerdote que la? ngue runi gunda guyuu lu patiu stibe. Peru biaana Pedro fuera zuhuaa ra puertaʼ que cabeza, para beeda Juan ne guniʼné gunaa ni cayapa ra puertaʼ que ne guluube Pedro dentru que.

Cumu nananda gueelaʼ que la? bíʼnicabe ti guí lu patiu que, ne bidxiña Pedro para guidxaa laga cabeza. Para ganna xi guizaaca Jesús (Mateo 26:58). Yanna, ora maʼ zuhuaa Pedro gaxha de guí que, biiyadxí gunaa ni bidii lugar chuʼbe que laabe ne gunabadiidxaʼ: «Laaca tobi de ca discípulo stiʼ hombre riʼ lii, ¿njaʼ?» (Juan 18:17). Ne cadi gunaa que si binibiáʼ Pedro, laaca binibiáʼ xcaadxi binni laabe (Mateo 26:69, 71-73; Marcos 14:70).

Nabé bidxiichi Pedro, purtiʼ cadi nuu guʼyaʼ guirutiʼ laa, ne bireebe zebe neza ra entrada que. Dede guniʼbe qué ñuu dxi nizánebe Jesús, ne guniʼbe: «Qué runebiaʼyaʼ laabe ne qué lica gannaʼ xii nga caniʼluʼ» (Marcos 14:67, 68). Ne bizulú cayuni «maldecir ne cayuni jurar» dxandíʼ ni caníʼ. Né ni guniʼbe riʼ bisihuínnibe nuube dispuestu guiaba ti maldición luguiabe pa cadi dxandíʼ ni caniʼbe (Mateo 26:74).

Laga cayuni juzgárcabe Jesús, zándaca ti parte nasoo de ra lidxi Caifás. Zándaca biiyaʼ Pedro ne xcaadxi binni nuu xagueteʼ que cayuu ne caree testigu ra cayaca juiciu que.

Nagueendaca bidiicabe cuenta cusiguii Pedro pur modo riníʼ, purtiʼ de Galilea laa. Ne lade ca binni que nuu ti pariente stiʼ Malco, hombre bigá Pedro diaga que. Ngue runi sti biaje ca gúdxicabe Pedro: «Biiyaʼ né lii nuuluʼ ndaaniʼ leʼ ra nuube que, ¿cadi dxandíʼ la?». Né ndiʼ nga guionna biaje guni negar Pedro Jesús, ne óraqueca biindaʼ ti gallu, guca ni casi guníʼ Jesús (Juan 13:38; 18:26, 27).

Zándaca zuhuaa Jesús cayuuyadxí lu patiu que. Óraque bidxiguetalú Señor ne biiyadxí Pedro. ¡Nanna pabiáʼ biuubaʼ ladxidóʼ apóstol riʼ yaʼ! Bietenaláʼdxibe ni guníʼ Jesús cadi tan xadxí ante goxhicabe Pascua que. ¡Bixuiʼlú ximodo biʼniʼ sentir Pedro! Aque naná nuu ladxidóʼ Pedro pur ni biʼniʼ riʼ. Bireebe de raqué ne bizulú cayuunabe dede guyuu yuubaʼ ladxidoʼbe (Lucas 22:61, 62).

Peru ¿xiñee bizaaca Pedro ndiʼ yaʼ? Guizáʼ ndaʼ nuube seguru qué zaxélebe de Jesús ne guizáʼ naguidxi nuu fe stibe. Yanna peʼ nga naquiiñeʼ ñuni defenderbe Jesús purtiʼ candísacabe falsu luguiáʼ ne caníʼcabe naca ti binni qué iquiiñeʼ. Lugar de ñuni defenderbe ti hombre ni qué gapa donda, laga bidxiidéchebe hombre ni riníʼ diidxaʼ ni rudii «guendanabani ni qué zaluxe» (Juan 6:68).

Rizíʼdinu ti cosa nabé risaca pur ni bizaaca Pedro riʼ: dede ti binni guizáʼ napa fe ne runi adorar Dios zanda guirá stipa stiʼ ora guidxaagalú xiixa prueba ni cadi cabeza. Guiráʼ ca xpinni Dios naquiiñeʼ guiziidiʼ de ni bizaaca Pedro riʼ.