De dxi beeda Jesús ne ca discípulo stiʼ de Jericó, maʼ zinecaʼ chonna gueelaʼ de nuucaʼ Betania. Ne lunes siadóʼ 10 de nisán, bireecabe zécabe Jerusalén. Cumu bindaana Jesús neza la? casi biʼyaʼ ti yaga duʼgaʼ bidxiña ra zuhuaa ni. ¿Ñee cá cuananaxhi luni la?

Mayaca guiluxe beeu marzo, ne dede lu junio nga temporada ricá cuananaxhi lu yaga duʼgaʼ. Peru guizáʼ napa yaga riʼ bandaga. Ngue runi guníʼ ique Jesús maʼ cá cuananaxhi luni, peru nin ti cuananaxhi cadi cá luni. Puru bandaga nápani. Óraque ná Jesús: «Qué chuʼruʼ dxi gó tuuxa cuananaxhi stiluʼ» (Marcos 11:14). Oraqueca bibidxi yaga que. Peru maʼ sti dxi siadóʼ que gusiene Jesús xi riníʼ ni guníʼ que.

Yendá si Jesús ne ca discípulo stiʼ Jerusalén, cumu maca yeguuyabe xi cayaca ra templu que ti dxi ante la? zebe raqué. Peru dxi riʼ bíʼnibe ti cosa casi ni bíʼnibe raca chonna iza, lu Pascua stiʼ iza 30 que (Juan 2:14-16). Biaje riʼ, guladxi Jesús ca ni cutoo ne ca ni cazíʼ. Laaca bitiixhibe mexaʼ stiʼ ca ni cuchaa bueltu ne banguʼ stiʼ ca ni cutoo paloma (Marcos 11:15). Ne laaca qué nudiibe lugar nididiné ca binni que ca cosa sticaʼ ndaaniʼ templu que, para ninecaʼ ni sti ladu guidxi que.

¿Xiñee guladxi Jesús ca ni cuchaa bueltu ne ca ni cutoo maniʼ? Laapebe guniʼbe: «¿Cadi cá lu Stiidxaʼ Dios: “Zábicabe lidxeʼ yoo ra raca oración para guiráʼ guidxi” la? Peru laatu maʼ bíʼnitu ni lidxi gubaanaʼ» (Marcos 11:17). Gúdxibe laaca gubaanaʼ purtiʼ caru cutoocaʼ ca maniʼ ni rizíʼ binni para gudii sacrificiu. Ne para Jesús la? maʼ cabáʼnacabe.

Binadiaga si ca sacerdote principal, ca escriba ne ca binni risaca de guidxi que ni bíʼnibe jmaruʼ si biyúbicaʼ modo guuticaʼ laabe. Peru qué gánnacaʼ ximodo gúnicaʼ ni purtiʼ nabé rizananda binni Jesús para gucaadiaga guiráʼ ni rusiidibe.

Peru cadi ca judíu si nga guyecaʼ para guni celebrarcaʼ Saa Pascua que, laaca guyé ca prosélito, ca binni ni guyuu lade religión stiʼ ca judíu. Lade ca binni riʼ nuu caadxi griegu ni beeda para guni adorar Dios. Bidxiña ca binni riʼ Felipe, zándaca purtiʼ nápabe ti lá griegu, ne gunábacabe laa gúʼyacabe Jesús. Peru qué ganna Felipe pa jneza ngue ni canábacabe que, ngue runi yenabadiidxabe Andrés pa zanda guʼyaʼ ca binni que Jesús. Óraque guyé guirópacabe yetídxicabe ni Jesús, zándaca nuuruʼ ra templu.

Nanna Jesús mayaca guuticabe laa, cadi nuube gunítibe tiempu para güínebe binni diidxaʼ ti gunibiáʼ xcaadxi binni laabe. Ngue runi biquiiñeʼ Jesús ti ejemplu para bicabi ca apóstol que: «Maʼ bidxiña hora guisaca Xiiñiʼ Hombre. Dxandíʼ ni chitidxeʼ laatu riʼ, pa qué gatiʼ ti biidxiʼ stiʼ trigu ora guiaba ndaaniʼ yu la? qué zandani ni. Peru pa gatiʼ ni la? zandani ni ne zacá stale luni» (Juan 12:23, 24).

Ruluíʼ qué risaca ti biidxiʼ trigu. Peru pa guiaba ni ndaaniʼ yu ne «gatiʼ» ni, zandani ni ne ra tidiʼ tiempu zaca ni ti yagahuiiniʼ ni zapa stale espiga. Zacaca nga zeeda gaca Jesús, naca ti hombre perfectu ne ra gatiʼ sin gucheené Dios, zanda gudiibe guendanabani ni qué zaluxe ca binni ni nuu dispuestu guni sacrificiu casi laabe. De raqué guníʼ Jesús: «Tu gannaxhii xquendanabani zunitilú ni, peru tu gaca nanalaʼdxiʼ xquendanabani ndaaniʼ guidxilayú riʼ cayapa ni para guicaa guendanabani ni qué zaluxe» (Juan 12:25).

Peru cadi caníʼ diʼ Jesús de laa si, purtiʼ guniʼbe: «Pa racalaʼdxiʼ tuuxa gaca xpinneʼ, guedananda naa, ne ra chaaʼ, raqueca zié. Pa racalaʼdxiʼ tuuxa gaca xpinneʼ, zusisaca Bixhozeʼ laa»  (Juan 12:26). ¡Aque galán ca ndaayaʼ chicaa ca binni riʼ xa! Ca ni gusisaca Bixhózebe laa, zuni mandárnecaʼ Cristu lu Reinu nuu guibáʼ.

Ora bietenalaʼdxiʼ Jesús ca yuubaʼ ni chitidiʼ ne pabiáʼ feu modo chiguuticabe laa, guníʼ: «Cadi nuudxí diʼ ladxiduáʼ. ¿Xi guinieeʼ yaʼ? Bixhozeʼ, bilá naa de ni chitideʼ riʼ. Peru para tideʼ ni nga bidxiñaʼ dede raríʼ» (Juan 12:27). Nanna Jesús naquiiñeʼ gudii xquendanabani para gaca cumplir ni maʼ gudixhe ique Dios gaca.