Bindiibisicabe Jesús casi riliibi ti binni qué iquiiñeʼ, yenécabe laa ra nuu Anás, ni naca sumo sacerdote dxi guyé Jesús ndaaniʼ templu dxi nahuiiniʼ, dxi bidxagayaa ca maestru pabiáʼ riene ne biaʼsi ricabi (Lucas 2:42, 47). Laaca guca caadxi de ca xiiñiʼ Anás sumo sacerdote despué, peru yanna xpigudxibe ni láʼ Caifás nga naca sumo sacerdote.

Laga nuu Jesús ra lidxi Anás, napa Caifás tiempu para guni reunir Sanedrín que. Laani nga tribunal ni jma risaca stiʼ ca judíu ne nuu 71 binni lu tribunal riʼ, nuu sumo sacerdote que luni ne xcaadxi binni ni guca sumo sacerdote dxiqué.

De raqué gunabadiidxaʼ Anás Jesús «de ca discípulo stiʼ ne de ni rusiidiʼ». Peru sicaríʼ bicabi Jesús laabe: «Maʼ gunieeʼ nezalú guiráʼ binni. Ne siempre bisiideʼ ndaaniʼ sinagoga ne ndaaniʼ templu ra rié stale judíu, ne gastiʼ qué ninieeʼ nagaʼchiʼ. ¿Xiñee canabadiidxaluʼ naa pue? Gunabadiidxaʼ ca ni binadiaga ni gudxeʼ laacaʼ. Laacaʼ nánnacaʼ xi gunieeʼ» (Juan 18:19-21).

Óraque gudapa ti oficial ni zuhuaa gaxha de raqué ruaa Jesús ne ná rabi laabe: «¿Zacá nga ricábiluʼ sacerdote principal la?». Peru nanna Jesús cadi cayuni xiixa ni cadi jneza, ngue runi gudxi laabe: «Pa cadi jneza ni gunieeʼ, guníʼ xi laani; peru pa jneza ni gunieeʼ, ¿xiñee cagápaluʼ naa?»  (Juan 18:22, 23). De raqué biʼniʼ mandar Anás chinécabe Jesús ra nuu Caifás, xpigudxi.

Laga zinécabe Jesús ra lidxi Caifás, maʼ nuu guiráʼ ni nuu lu Sanedrín que raqué, ni naca sumo sacerdote iza que, ca ancianu de guidxi que ne ca escriba. Ley que ná cadi naquiiñeʼ gaca juzgar tuuxa dxi Pascua, ngue runi maʼ cucheenécabe Ley que pa guni juzgárcabe Jesús, peru nin ne zaqué cá íquecabe gúnicabe ni.

Nagana nga guni juzgar ca binni riʼ Jesús jneza. Gundisaʼ si Jesús Lázaro, guiracaʼ guníʼ stiidxacaʼ guuticaʼ laabe (Juan 11:47-53). Ne caadxi dxi ante, guníʼ stiidxaʼ ca sacerdote principal ne ca ancianu stiʼ guidxi que quíxhecaʼ ti trampa Jesús ne guuticaʼ laabe (Mateo 26:3, 4). Nánnanu maca cá íquecabe guuticabe Jesús ante gaca juzgar.

Aparte de cucheenécabe Ley pur nuucabe reunidu para guni juzgárcabe Jesús, cuyubi ca sacerdote principal ne ca ni nuu lu Sanedrín que binni gudii testimonio falsu contra Jesús. Neca bidxélacabe stale binni, peru gadxé gadxé ni caniʼcaʼ. Últimu bidxélacabe chupa testigu ni ná: «Binadiágadu guniʼbe: “Zusabaʼ templu ni bicuí binni riʼ ne lu chonna si gubidxa zuneʼ stobi peru qué zaquiiñeʼ binni para gucuí ni”» (Marcos 14:58) Peru dede nin laacaʼ cadi ngueca testimonio cudiicaʼ.

Óraque gunabadiidxaʼ Caifás Jesús: «¿Qué zaniʼluʼ xiixa la? ¿Xii ndiʼ cugaaniʼ ca hombre riʼ luguialuʼ pue?» (Marcos 14:60). Peru nin ti diidxaʼ qué niníʼ Jesús ne qué nicabi testimonio falsu ni gundísacabe luguiáʼ. Ngue runi biʼniʼ Caifás sti cosa.

Nanna Caifás ridxiichi ca judíu guiníʼ tuuxa naca Xiiñiʼ Dios. Ca biaje guníʼ Jesús Dios nga Bixhoze, biasa ca judíu que ne guyuucaʼ ñuuticaʼ laabe, purtiʼ naca «rúnibe laabe cásica Dios» (Juan 5:17, 18; 10:31-39). Cumu nanna Caifás xi riníʼ ique ca judíu la? ngue runi gudxi Jesús: «¡Cayabeʼ lii guni jurarluʼ nezalú Dios ni nabani ne gaʼbuʼ laadu pa lii nga Cristu, Xiiñiʼ Dios!» (Mateo 26:63). Maca riníʼ Jesús Bixhoze nga Dios (Juan 3:18; 5:25; 11:4). Ne pa qué guicábibe ni gunabadiidxacabe laabe la? zándaca nusihuínnibe cayuni negarbe laabe nga Cristu ne Xiiñiʼ Dios. Ngue runi bicábibe: «Naa. Ne zuuyatu Xiiñiʼ Hombre zuba ladu derechu stiʼ Dios ni napa poder ne zeeda lu za» (Marcos 14:62).

Ora binadiaga Caifás ni guniʼbe riʼ, dede gucheza xhaba ne ná: «¡Maʼ guniʼbe contra Dios! ¿Ñee caquiiñerunu jma testigu la? ¡Laguuyaʼ, maʼ binadiágatu ni guniʼbe contra Dios! ¿Xi rábitu yaʼ?». Peru neca cadi jneza sentencia que, guníʼ Sanedrín que: «¡Naquiiñeʼ gátibe!» (Mateo 26:65, 66).

Bizulú cayuni búrlacabe Jesús ne guluucabe puñete laa. Nuu tu laa bichá xhinni lube ne gudapa ruaabe. De raqué bichiicabe lube ne gudápacabe ruaabe sti biaje ne rábicabe laabe: «Pa profeta lii, gudxi laadu, ¿tu gudapa lii?» (Lucas 22:64). ¡Nabé feu modo cayuni tratárcabe Xiiñiʼ Dios ne cayuni juzgárcabe laa ti dxi ni cadi naquiiñeʼ gaca juzgar binni!