Últimu gueelaʼ guyuuné Jesús ca apóstol stiʼ, gúdxibe laacaʼ: «Ora maʼ biasaʼ de lade gueʼtuʼ, ziaaʼ Galilea primé que laatu» (Mateo 26:32; 28:7, 10). Ngue runi zeʼ stale de ca discípulo stibe raqué, peru ¿xi chigúnicabe Galilea yaʼ?

Yendásicabe raqué, gudxi Pedro xhoopaʼ de ca apóstol que: «Chaaʼ guuzeʼ». Para nacaʼ rábicaʼ laabe: «Laaca zinedu lii» (Juan 21:3). Peru gastiʼ qué ninaazecaʼ gueelaʼ que. Birá si gueelaʼ, bihuinni Jesús ruaa playa que, peru guirutiʼ qué ñunibiáʼ laabe. Para bicaa Jesús ti ridxi laacabe ná: «Xiiñeʼ caʼ, qué gápatu ni goto, ¿njaʼ?». Para bicábicaʼ laabe: «Coʼ». Ngue runi gudxi Jesús laacabe: «Lagusaba chin stitu cueʼ canuá ca, ladu derechu, ne zanaazetu» (Juan 21:5, 6). Ne ora bisábacabe chin stícabe bidxá ni de benda dede qué ganda cueecabe ni.

Óraque gudxi Juan Pedro: «¡Señor nga!» (Juan 21:7). Nagueendaca gucu Pedro xhaba ne biaba ndaaniʼ nisa que ne bixuubaʼ biaʼ 90 metru dede yendá ruaa nisadóʼ laga zeeda xcaadxi apóstol que ndaaniʼ canuá zeeda xubiyucaʼ chin ra cá guiráʼ benda que.

Ora yendacaʼ ruaa nisadóʼ que biiyacaʼ ti guí ne nexheʼ caadxi benda lu buu ne nuu pan raqué. Óraque gudxi Jesús laacabe: «Latané chupa chonna benda de ni gunaazetu nagasi». Ne óraque guxubiyú Pedro chin que ne gulee ni lu yuxi que, ne cá 153 benda naroʼbaʼ lu ni. Para ná Jesús rabi laacabe: «Latáʼ guetu». Nin tobi de laacaʼ qué ninacaʼ ninabadiidxacaʼ tu laabe purtiʼ nánnacaʼ Jesús ngue (Juan 21:9-12). Ndiʼ nga guionna biaje guihuinni Jesús nezalú ca discípulo stiʼ.

Bidii Jesús cada tobi de laacabe ti ndaa pan ne benda. Despué, zándaca laga cayuuyadxí Jesús ca benda cá lu chin que, gunabadiidxaʼ Pedro: «Simón xiiñiʼ Juan, ¿nadxiiluʼ naa jma que guiráʼ ndiʼ la?». Nuu Jesús ganna xii nga ni jma risaca para Pedro, negocio ni napa que la? o dxiiñaʼ ni racalaʼdxiʼ Jesús gúnibe. Para bicabi Pedro: «Nadxieeʼ pue Señor, lii nannuʼ nadxieeʼ lii». Para ná Jesús rabi laabe: «Bidii ni gó ca dendxuhuiiniʼ stinneʼ» (Juan 21:15).

Sti biaje ca gunabadiidxaʼ Jesús laabe: «Simón xiiñiʼ Juan, ¿nadxiiluʼ naa la?». Zándaca neca cayuubaʼ ladxidóʼ Pedro bicabi: «Nadxieeʼ pue Señor, lii nannuʼ nadxieeʼ lii». De raqué gunabaʼ Jesús laabe xiixa ni maca gunabaʼ laabe: «Gupa ca dendxuhuiiniʼ stinneʼ» (Juan 21:16).

Para gunabadiidxaʼ Jesús laabe guionna biaje: «Simón xiiñiʼ Juan, ¿nadxiiluʼ naa la?». Zándaca caníʼ ique Pedro cadi cayuni cré Jesús laa. Ngue runi nagueendaca bicabi Pedro laabe: «Señor, lii nannuʼ guiráʼ cosa; lii nannuʼ nadxieeʼ lii». Sti biaje ca gudxi Jesús laabe xi dxiiñaʼ risaca naquiiñeʼ gúnibe: «Bidii ni gó ca dendxuhuiiniʼ stinneʼ» (Juan 21:17). Zacá nga laani, ca ni zániru ndaaniʼ congregación naquiiñeʼ guni servircaʼ ca dendxuhuiiniʼ stiʼ Dios.

Jesús la? gunaazecabe laa ne biiticabe laa purtiʼ biʼniʼ guiráʼ ni biʼniʼ mandar Dios laa. Ne bisiénebe Pedro zacá ga zazaaca: «Dxi nahuiiniluʼ, stúbiluʼ gúculuʼ lari ne guyeluʼ ra gucaláʼdxiluʼ; peru ora maʼ nagólaluʼ, zusigaanaluʼ ne stobi ugacu lari lii ne ziné lii ra qué racaláʼdxiluʼ cheluʼ». Neca zacá gunabaʼ Jesús laabe: «Cadi gusaana de guedanándaluʼ naa» (Juan 21:18, 19).

De raqué, biiyadxí Pedro apóstol Juan ne gunabadiidxabe Jesús: «Señor, ¿xi gácaxa de laabe pue?». ¿Xi gaca xa de apóstol ni nabé nadxii Jesús riʼ? Bicabi Jesús: «Pa gacalaʼdxeʼ guiaanabe dede dxi guendaʼ, ¿runi importar ni lii la?» (Juan 21:21-23). Naquiiñeʼ chinanda Pedro Jesús ne cadi guicá ique ni runi xcaadxi binni. Peru laaca bisiene Jesús, jma xadxí zabani Juan que xcaadxi apóstol que ne zuuyabe ti visión de dxi gueeda Jesús casi Rey.

Nánnanu stale ruʼ cosa nga biʼniʼ Jesús, dede nin qué nugaanda guiráʼ rollo ni nuu para nicá ca ni lú.