Qué nucaachiʼ Jesús pa naca rey nezalú Pilato. Peru cadi chigucaalú diʼ Reinu stibe guidxi Roma ngue runi rábibe laa: «Cadi naca Reinu stinneʼ parte de guidxilayú riʼ. Pa ñaca Reinu stinneʼ parte de guidxilayú riʼ la? nidinde ca xpinneʼ para cadi ninaazeʼ ca judíu naa. Peru, ni dxandíʼ la? cadi de guidxilayú riʼ Reinu stinneʼ» (Juan 18:36). Qué nucaachiʼ Jesús napa ti Reinu, peru cadi naca ni parte de guidxilayú.

Peru racaláʼdxiruʼ Pilato ganna jma. Ngue runi gunabadiidxabe Jesús: «Yanna yaʼ, ¿rey lii la?». Para gudxi Jesús laabe biaʼsi ngue ni nabe: «Laca lii caniʼluʼ rey naa. Beeda galeʼ ne bendaʼ ndaaniʼ guidxilayú riʼ para guinieeʼ xii nga ni dxandíʼ. Guiráʼ ni nuu pur ni dxandíʼ, rucaadiaga naa» (Juan 18:37).

Cadi tan xadxí gudxi Jesús Tomás: «Naa nga neza, ni dxandíʼ ne guendanabani». Ne biaje riʼ dede Pilato maʼ gunna beeda Jesús lu Guidxilayú para guiníʼ ni dxandíʼ de Reinu stiʼ Dios. Ne qué zusaana Jesús de guiníʼ ni dxandíʼ riʼ neca guuticabe laa. Yanna, gunabadiidxaʼ Pilato laabe: «¿Xii nga ni dxandíʼ yaʼ?». Peru qué racaláʼdxibe gánnabe respuesta ca, purtiʼ maʼ zanda guni juzgarbe Jesús pur ni maʼ binadiágasibe (Juan 14:6; 18:38).

De raqué guyé Pilato ra nuu ca binni ni cabeza fuera de palaciu que. Zándaca nuu Jesús cueʼbe. Ne ndiʼ nga ni gudxi Pilato ca sacerdote principal ne ca binni que: «Maʼ biiyaʼ gastiʼ donda luguiáʼ hombre riʼ». Jmaruʼ si bidxiichi ca binni que ne caniʼcaʼ: «Cusiguiibe binni pur ni canagusiidibe guidubi Judea; bizulube Galilea ne maʼ beedandabe raríʼ» (Lucas 23:4, 5).

Nabé bidxagayaa Pilato tantu cá ca judíu que tema guuticaʼ Jesús. Ngue runi, laga cucaa ca sacerdote principal ne ca ancianu que ridxi, gunabadiidxaʼ Pilato Jesús: «¿Ñee cadi cayunadiágaluʼ xi guiráʼ cugaanicabe luguialuʼ la?» (Mateo 27:13). Neca zaqué qué niníʼ Jesús nin ti diidxaʼ. Nabé bidxagayaa Pilato pabiáʼ tranquilu nuu Jesús neca cugaaniʼ ca judíu que donda ique.

Ora binadiaga Pilato guníʼ ca judíu que «bizulube [Jesús] Galilea», bidii Pilato cuenta de Galilea Jesús. Ngue runi guníʼ íquebe gúnibe ti cosa para cadi guni juzgarbe Jesús. Cumu nanna Pilato beeda Herodes Antipas, gobernador de Galilea, Jerusalén para Pascua que la? biseendabe Jesús ra nuu. Herodes Antipas, xiiñiʼ Herodes el Grande, nga biʼniʼ mandar ugácabe yanni Juan Bautista. Ngue runi ora binadiaga Herodes Antipas cayuni Jesús milagru, guyuu xizaa purtiʼ zácaxa Juan ngue biasa de ladeʼ gueʼtuʼ (Lucas 9:7-9).

Biecheʼ Herodes purtiʼ chiguuya Jesús. Peru cadi para gacané laabe o ganna pa dxandíʼ ni caníʼcabe de laabe, sínuque napa si gana guʼyaʼ laabe ne cabeza «guʼyaʼ gúnibe milagru» (Lucas 23:8). Peru qué niná Jesús ñuni milagru para si gúʼyabe laa. Ne ora gunabadiidxaʼ Herodes laabe qué lica nicábibe laa. Qué ñuulaʼdxiʼ Herodes qué niná Jesús nicabi laa, ngue runi «bizulú biʼniʼ despreciar» laabe ne ca soldadu stiʼ (Lucas 23:11). Bigácucaʼ laabe ti lari sicarú para guni búrlacaʼ laabe. De raqué bidxiguetaʼ Herodes laabe ra nuu Pilato. Neca gúcacaʼ enemigu dxiqué, peru yanna maʼ amigu laacaʼ.

Ne ora biguetaʼ Jesús, biʼniʼ reunir Pilato ca sacerdote principal, ca gobernante ne guiráʼ binni guidxi que, ne rábibe laacaʼ: «Beedanetu hombre riʼ ra nuaaʼ purtiʼ natu cucaabe binni guidxi riʼ gaca rebelde. Peru, laguuyaʼ, maʼ gunabadiidxaʼ laabe nezalutu ne qué nidxelaʼ xiixa ni gusihuinni napa hombre riʼ donda. Nin Herodes qué nidxela donda luguiabe, nga runi bidxiguetaʼ laabe ra nuunu. Laguuyaʼ, qué runi merecer  hombre riʼ gatiʼ purtiʼ qué huayuni gastiʼ. Nga runi, zuneʼ castigar laabe ne zundaaʼ laabe» (Lucas 23:14-16).

Nuu Pilato gundaa Jesús purtiʼ bidii cuenta biʼniʼ entregar ca sacerdote que laabe purtiʼ nápacaʼ envidia laabe. Ne laaca nuu Pilato gundaa laabe purtiʼ laga zuba lu tribunal que biseendatidxi xheelaʼ laa: «Cadi gúniluʼ gastiʼ hombre chaʼhuiʼ ca. Purtiʼ nuchiʼ nabé bidxibeʼ lu ti bacaandaʼ pur laabe» (Mateo 27:19).

Nanna Pilato naquiiñeʼ gundaa hombre qué gapa donda riʼ. Peru ¿zúnibe ni la?