Zeeda Jesús de Perea ne maʼ nuube gaxha de Betania, ti guidxihuiiniʼ ni riaana biaʼ chonna kilómetru ladu este stiʼ Jerusalén. Raca chupa chonna gubidxa de guti Lázaro, ne cayuubaruʼ ladxidóʼ ca bizaʼnaʼ, María ne Marta. Ne stale binni guyé para quixhedxí ladxidóʼcabe.

De raqué, guyuu tu gudxi Marta zeeda Jesús neza, ngue runi, nagueenda biree Marta yechagalú laabe. Ora yendá Marta ra nuu Jesús, gúdxibe laa xiixa ni maʼ raca tapa gubidxa de caníʼ íquecabe, laabe ne María. Gúdxibe Jesús: «Señor, pa ñuuluʼ raríʼ, qué ñati diʼ bizanaʼ». Peru cadi guníʼ Marta sicaríʼ purtiʼ qué runi cré pa nuu ti esperanza, purtiʼ guníʼ: «Nannaʼ, intiica cosa guinábaluʼ Dios, zudii Dios ni lii» (Juan 11:21, 22). Runi cré Marta zándaruʼ guni Jesús xiixa pur bizaʼnaʼ.

Para ná Jesús rabi laabe: «Ziasa bizáʼnaluʼ». Peru zácaxa Marta caníʼ Jesús de ora guiasa ca ni maʼ guti para guibánicaʼ lu Guidxilayú, casi Abrahán, ne xcaadxi binni ni biʼniʼ ni ná Dios. Ne cumu nánnabe zazaaca ni la? gúdxibe Jesús: «Nannaʼ ziásabe lu últimu dxi, dxi guiasa ca ni maʼ guti» (Juan 11:23, 24).

¿Zándaruʼ guni Jesús xiixa la? Bisietenaláʼdxibe Marta maʼ bidii Dios laabe poder luguiáʼ guendaguti, ora gúdxibe laa: «Ni gapa fe naa, neca gatiʼ, zabani; ne guiráʼ ni nabani ne gapa fe naa la? qué ziuu dxi gatiʼ» (Juan 11:25, 26).

Cadi caníʼ diʼ Jesús qué ziuu dxi gatiʼ ca discípulo stiʼ. Purtiʼ dede laabe naquiiñeʼ gátibe, casi maca gúdxibe ca apóstol stibe (Mateo 16:21; 17:22, 23). Ni guníʼ Jesús nga guiráʼ ca ni gapa fe laa zanda guibani para siempre. Stale tu laa zacaa ndaayaʼ riʼ despué de guiasa de lade gueʼtuʼ. Ne zándaca ora gueeda fin stiʼ sistema riʼ ziuu xpinni Dios ni qué zati. Intiica si ni gueeda guizaaca, guiráʼ ni gusihuinni napa fe Jesús, zanda chuʼ seguru neca gueeda gati, zabani sti biaje.

Yanna, pa Jesús guníʼ: «Naa nga rusibaneʼ gueʼtuʼ, ne naa nga guendanabani» ¿Ñee zanda gúnibe xiixa pur Lázaro, ni maʼ ziné tapa gubidxa de guti la? Jesús gunabadiidxaʼ Marta: «¿Runi creluʼ nga la?». Para bicabi Marta: «Runeʼ cré Señor, maʼ bineʼ cré lii nga Cristu, Xiiñiʼ Dios, ni nexheʼ gueeda ndaaniʼ guidxilayú». Nanna dxichi Marta zanda guni Jesús xiixa. Ngue runi, nagueendaca guyebe ra lídxibe ne gúdxibe béndabe: «Maʼ bedandá Maestru ne caníʼnebe lii» (Juan 11:25-28). Ne oraqueca biree María de ra lidxi, ne stale tu nanda laa, purtiʼ guníʼ íquecaʼ zebe ra baʼ stiʼ Lázaro.

Peru ra nuu Jesús zeʼ María, ne casi biʼyaʼ laabe, bizuxibi xañeebe ne cayuunaʼ, óraque gudxi María Jesús ni maca guníʼ Marta: «Señor, pa ñuuluʼ raríʼ, qué ñati diʼ bizanaʼ». Ora biʼyaʼ Jesús cayuunaʼ María ne cayuunaʼ ca binni nanda laabe, gucuaalaʼdxiʼ ne gucaná ladxidóʼ; ne bizulú cayuunaʼ. Nabé bidxagayaa ca ni nuu raqué o bíʼyacaʼ laabe. Ngue runi, chupa chonna de laacaʼ gunabadiidxacaʼ: «Pa gunda bisianda hombre riʼ lú ciegu que, ¿ñee qué ñanda ñúnibe xiixa para cadi ñati Lázaro la?» (Juan 11:32, 37).