Stale ni maʼ biʼniʼ Jesús dxi riʼ ne guizáʼ maʼ bidxaga. Bixhinni si, gúdxibe ca discípulo stibe: «Tídinu chericaʼ nisa riʼ», ni caniʼbe nga chécabe ca guidxi ni nuu chericaʼ de Capernaúm (Marcos 4:35).

Ladu este de nisadóʼ stiʼ Galilea, neza zécabe que, nuu región stiʼ ca gadarenu, laani nga tobi de ca guidxi stiʼ Decápolis. Ndaaniʼ ca guidxi stiʼ Decápolis, cultura stiʼ ca griegu guyuu raqué, ne laaca nabeza stale judíu raqué.

Ora bidii ca binni que cuenta biree Jesús de Capernaúm, gudxíʼbacaʼ ndaaniʼ caadxi canuá ne yenándacaʼ laabe (Marcos 4:36). Cadi zitu diʼ riaana sti ladu nisa que. Nabé gueteʼ nisadóʼ stiʼ Galilea ne cadi naxí nisadóʼ ca, ziuulaʼ ni 21 kilómetru ne xilaga ni 12 kilómetru.

Neca perfectu Jesús, peru bidxaga cásica binni, purtiʼ guizáʼ guyuu xhiiñaʼ dxi que. Laga zécabe lu nisa que, guʼtaʼ Jesús atrá de canuá que, guluu xaíque ti almuhada ne gusi.

Neca maʼ biaaʼ caadxi de ca apóstol que checaʼ lu nisadóʼ, peru nabé nagana zaca viaje riʼ para laacabe. Cumu guidubi buelta nisadóʼ que nuu dani la? nga runi nuu biaje raca nandáʼ nisadóʼ que. Riuu biaje riete ca bi nanda ni zeeda lu ca dani que ne ridxelasaa ni calor stiʼ nisadóʼ ne nga rindísani tormenta naroʼbaʼ. Ne nga peʼ nga ni bizaaca biaje riʼ. Bizulú cadxelasaa ca ola que canuá stícabe ne «zidxá canuá que de nisa», maʼ nuucabe lu peligru (Lucas 8:23). Nin ne cayaca ngue ¡Nisiaasiruʼ Jesús!

Neca cayuni ca hombre que tirá pur gucueezacaʼ canuá que casi maca huayúnicaʼ ni xcaadxi biaje. Peru biaje riʼ qué ganda gúnicaʼ gastiʼ. Cumu maʼ qué guidxélacaʼ xi gúnicaʼ la? bidxíñacaʼ Jesús ne gúdxicaʼ laabe: «¡Señor, bilá laadu! ¡Maʼ chigátidu!» (Mateo 8:25). Cadxibi ca discípulo que gáticaʼ guiiguʼ.

Ora bibani Jesús, gudxi laacabe: «¡Aque huaxiéʼ fe nápatu xa, hombre caʼ! ¿Xiñee nabé cadxíbitu pue?» (Mateo 8:26). Óraque gudindenebe bi ne nisadóʼ: «¡Bigani! ¡Gutadxí!» (Marcos 4:39). Oraqueca gulezadxí bi que ne biaba ti calma raqué. (Laaca bicaa Marcos ne Lucas ni bizaaca riʼ. Peru primeru bizeetecabe milagru ni biʼniʼ Jesús riʼ ne despué bizeetecabe huaxiéʼ fe gupa ca discípulo).

¡Bixuiʼlú pabiáʼ bidxagayaa ca discípulo que! Biiyacabe bicueeza Jesús ti tormenta naroʼbaʼ. Guizáʼ bidxíbicabe ne caníʼcabe: «¿Peru tu hombre riʼ pue? Dede bi ne nisadóʼ ruzuubacaʼ stiidxabe». Yanna huaxa maʼ yendácabe sti ladu nisadóʼ que ne gastiʼ nizaacacabe (Marcos 4:41–5:1). Zándaca gunda biguetaʼ xcaadxi canuá que neza ra bireecaʼ, ladu oeste stiʼ nisadóʼ que.

Guizáʼ ratadxí ladxidoʼno gánnanu napa Xiiñiʼ Dios poder para guni controlar guiráʼ ni nuu lu Guidxilayú. Ora guni mandarbe lu Guidxilayú riʼ, maʼ qué zadxibi binni purtiʼ maʼ qué ziuu desastre natural.