Laga cayuni predicar ca apóstol stiʼ Jesús Galilea, deguyooroʼ Juan Bautista, laa nga biʼniʼ preparar neza para ora guedandá Jesús. Ne maʼ biaʼ chupa iza de nuu Juan ndaaniʼ cárcel.

Guníʼ Juan cadi jneza biʼniʼ rey Herodes Antipas bichaganáʼ Herodías, purtiʼ xheelaʼ bíʼchibe, Filipo, gunaa riʼ. Ná Herodes zinanda Ley ni gucuaa Moisés, peru ra guca divorciar de primé xheelaʼ para guichaganáʼ Herodías qué ninanda ni ná Ley que purtiʼ maʼ guendarapa jnadxii ngue. Cumu caníʼ Juan cadi jneza ni cayuni Herodes la? ngue runi biseguyoobe laa, zándaca Herodías nga bicaa Herodes guni ni.

Peru qué guidxela Herodes xi guniné Juan, purtiʼ ruuyaʼ binni Juan casi ti profeta (Mateo 14:5). Peru Herodías maʼ nanna xi guniné laabe. Guizáʼ nanaláʼdxibe Juan, pa ñanda si maʼ ñuutibe laa (Marcos 6:19). Peru bidxiña dxi ni cabeza Herodías.

Ante gaca Pascua lu iza 32, biʼniʼ Herodes ti saa roʼ dxi cusaa iza. Biʼniʼ invitarbe ca hombre risaca runinebe dxiiñaʼ, ca comandante militar ne guiráʼ hombre jma risaca de Galilea. Ne ra cayaca saa que biyaa ti baʼdudxaapaʼ ni láʼ Salomé, xiiñiʼ Herodías ne Filipo. Guyuulaʼdxiʼ guiráʼ ca ni nuu raqué modo biyaabe.

Laaca guizáʼ guyuulaʼdxiʼ Herodes modo biyaa baʼdudxaapaʼ que, ngue runi gúdxibe laa: «Gunabaʼ naa ni gacalaʼdxuʼ, ne zudieeʼ ni lii». Dede biʼniʼ jurarbe laa: «Zudieeʼ lii intiica ni guinabuʼ naa, dede galaa reinu stinneʼ». Peru ante guicabi baʼdudxaapaʼ que laabe, guyé ra nuu jñaa ne gúdxibe laa: «¿Xi guinabaʼ laabe?» (Marcos 6:22-24).

¡Yanna huaxa bidxiña dxi cabeza Herodías que! Nagueendaca gúdxibe xiiñibe: «Ique Juan Bautista». Oraqueca guyé baʼdudxaapaʼ que ra nuu rey que ne gúdxibe laa: «Nagásica racalaʼdxeʼ gudiiluʼ naa ique Juan Bautista ndaaniʼ ti bandeja» (Marcos 6:24, 25).

Nabé gucaná ladxidóʼ Herodes óraque. Cumu binadiaga ca invitadu que ni biʼniʼ jurarbe la? ngue runi naquiiñeʼ guni cumplirbe ni guniʼbe que para cadi guituílube neca napa xidé guutibe ti hombre ni qué gapa donda. Nga runi, biseendaʼ Herodes tobi de ca guardia stiʼ para chiugá yanni Juan. Qué nindaa de ngue bedané guardia que ique Juan ndaaniʼ ti bandeja, ne bidii ni baʼdudxaapaʼ que ne laa yené ni ra nuu jñaa.

Ora binadiaga ca discípulo stiʼ Juan ni bizaacaʼ, guyecaʼ, gucuaacaʼ xcuérpube ne bicaachicaʼ ni ndaaniʼ ti baʼ. Ne yetídxicaʼ Jesús xi bizaaca.

Despué, guizáʼ bidxibi Herodes ora binadiaga caníʼ binni cusianda Jesús binni huará ne cabee demonio luguiáʼ binni, zácaxa pa hombre ni cayuni guiráʼ ca cosa que nga Juan Bautista ni maʼ biasa lade gueʼtuʼ (Lucas 9:7). Ngue runi, guizáʼ nápabe gana gúʼyabe Jesús, peru cadi para gucaadiágabe mensaje stiʼ. Ni racaláʼdxibe gánnabe nga pa naquiiñeʼ guidxíbibe.