Cuyubi ca fariseu ne ca ni nuu lu partidu stiʼ Herodes guuticaʼ Jesús. Ora gunna Jesús ne ca discípulo stiʼ ni nuucabe gúnicabe, bireecaʼ zecaʼ ra nisadóʼ stiʼ Galilea. Ora yendacaʼ raqué, yenanda stale binni ni zeeda de guiráʼ ladu laacaʼ: binni de Galilea, ca ni nabeza gaxha de Tiro ne Sidón, ca ni nuu ladu este stiʼ Jordán, de Jerusalén ne de Idumea, ti guidxi ni riaana jma gueteʼ. Cumu maʼ bisianda Jesús stale binni la? beeda ca ni napa guendahuará malu ne dede cayábacaʼ luguiabe. Guizáʼ racaláʼdxicaʼ guiándacaʼ dede qué ribézacaʼ canaʼ Jesús laacaʼ (Marcos 3:9, 10).

Cumu nuu stale binni raqué la? ngue runi, gudxi Jesús ca discípulo stiʼ guyúbicaʼ ti canuáhuiiniʼ para guixélecaʼ de guriá nisadóʼ que ne cadi guquiichiʼ binni laabe. Zacá la? maʼ zanda guiniʼbe dede ndaaniʼ canuáhuiiniʼ que ne maʼ zanda chebe guriá nisadóʼ que para gacanebe jma binni.

Bicaa discípulo Mateo pur guiráʼ ni biʼniʼ Jesús biʼniʼ cumplir ti profecía ni bicaa Isaías (Mateo 12:17). ¿Xi profecía ca yaʼ?

«Laguuyaʼ, ndiʼ nga xpinneʼ ni gulieeʼ, xpinneʼ ni nadxieeʼ ne ni rusiecheʼ naa. Zudieeʼ laabe espíritu stinneʼ, ne zusiénebe ca guidxi xii nga justicia. Qué zuni discutirbe ne qué zucaabe ridxi. Guirutiʼ zunadiaga voz stibe ndaaniʼ ca calle principal. Qué zagúzabe ti ubaguí ni maʼ caluuza, ne qué zusuiʼbe ti mecha ni mayaca guizuíʼ, dede ora guni chaahuibe guiráʼ ni cadi cayaca jneza. Ne dxandíʼ zaguixhe guiráʼ nación esperanza stiʼ lu nombre stibe» (Mateo 12:18-21; Isaías 42:1-4).

Zanda chuʼnu seguru nadxii Dios Jesús ne riuulaʼdxiʼ Dios ni rúnibe. Cusiidiʼ Jesús binni xii nga ni dxandíʼ justicia, raca nagana para binni ganna xii ni pur ca costumbre ni rusiidiʼ ca religión falsu que. Cadi lica jneza modo biquiiñeʼ ca fariseu Ley stiʼ Dios dede qué ñacanecaʼ tuuxa binni huará dxi sábadu. Maʼ gadxé modo guca Jesús, laa bisihuinni justicia stiʼ Dios ne bisihuinni napa espíritu santu ra gucané binni guilá de carga stiʼ ca costumbre ni cadi jneza que. Ngue runi, racalaʼdxiʼ ca líder stiʼ ca religión que guuticaʼ laabe. ¡Qué lica rituí lú ca hombre riʼ!

¿Ximodo guca cumplir ca diidxaʼ bicaa Isaías riʼ luguiáʼ Jesús: «Qué zuni discutirbe ne qué zucaabe ridxi. Guirutiʼ zunadiaga voz stibe  ndaaniʼ ca calle principal» yaʼ? Guca cumplir ca diidxaʼ riʼ ora bisianda Jesús binni huará, ne gúdxibe laacaʼ ne ca demonio cadi gábicaʼ guirutiʼ tu laabe (Marcos 3:12). Qué racalaʼdxiʼ Jesús gunibiáʼ binni laa pur ca noticia ni cadi dxandíʼ riníʼ binni de laa ndaaniʼ calle.

Laaca caníʼ Jesús ti mensaje ni riguixhedxí ladxidóʼ binni ni nuu casi ti ubaguí ni maʼ caluuza, ca binni ni nuu casi ti mecha ni mayaca guizuíʼ. Qué rigúzabe ne qué rusuiʼbe ca binni nadóʼ, sínuque riguube gana laacaʼ né diidxaʼ nadóʼ ne guendarannaxhii. Nga runi, zanda quixheʼ guiráʼ nación esperanza stiʼ luguiabe.