Guizáʼ stale ni maʼ biʼniʼ Jesús dxi riʼ. Despué de biguétabe de región ni rábicabe Decápolis, bisiándabe ti gunaa caxii rini ne bisibánibe xiiñiʼ Jairo. Peru caʼruʼ guiluxe dxi riʼ para laabe. Bireesibe ra lidxi Jairo, yenanda chupa hombre ciegu laabe ne cucaacaʼ ridxi: «¡Biá laadu, Xiiñiʼ David!» (Mateo 9:27).

Ora gudxi ca hombre riʼ Jesús «Xiiñiʼ David», bisihuínnicaʼ runi crecaʼ laabe nga ni chiguicaa trono stiʼ David o laabe nga Mesías que. Qué nulabi Jesús ni caníʼcabe que, purtiʼ nuu guuyaʼ pabiáʼ guni insistircaʼ. Peru qué nusaana ca hombre que de gucaacaʼ ridxi Jesús. Ne yenándacaʼ laabe ora guyuube ndaaniʼ ti yoo. Para gunabadiidxaʼ Jesús laacabe: «¿Nápatu fe zanda gusiandaʼ laatu la?». Laacaʼ bicábicaʼ: «Nápadu fe, Señor». Óraque gudaʼnaʼ Jesús guié lúcabe ne gudxi laacabe: «Gaca ni gunábatu según fe ni nápatu» (Mateo 9:28, 29).

¡Oraqueca biándacaʼ! Cásica huayuni Jesús, gunábabe ca hombre riʼ cadi gábicaʼ guirutiʼ xi bíʼnibe pur laacaʼ. Cumu guizáʼ cayéchecabe la? nga runi guyécabe ne bizulú guníʼcabe de Jesús guidubi región que.

Zeʼ si ca hombre que, yenécabe ti hombre ni qué randa riníʼ ra nuu Jesús purtiʼ nuu ti demonio lu xcuerpu. Gulee si Jesús demonio que lu xcuerpu hombre que bizulú guníʼ. Guizáʼ bidxagayaaʼ ca binni que ora bíʼyacaʼ ni bíʼnibe ne caniʼcaʼ: «Qué huayuu dxi guihuinni xiixa zacá ndaaniʼ guidxi Israel». Laaca nuu caadxi fariseu raqué. Cumu qué zanda guiniʼcaʼ cadi dxandíʼ ca milagru cayuni Jesús la? ngue runi guniʼcaʼ sti biaje: «Ribeebe demonio pur poder stiʼ gobernante stiʼ ca demonio» (Mateo 9:33, 34).

Guca si guiráʼ ndiʼ, guyé Jesús né ca discípulo stiʼ Nazaret, guidxi ra biniisi. Biaʼ ti iza ante, biʼniʼ predicarbe ndaaniʼ sinagoga stiʼ guidxi riʼ. Biaje que, guizáʼ bidxagayaaʼ ca binni de guidxi que pur modo cusiidiʼ Jesús laacaʼ, peru despué bidxiichicaʼ ne gucaláʼdxicaʼ ñuuticaʼ laabe. Yanna maʼ biguetaʼ Jesús para gacané ca binni riʼ.

Ne gunda si sábadu, bizulú bisiidiʼ Jesús ndaaniʼ sinagoga que. Bidxagayaaʼ stale de ca ni cucaadiaga laabe ne gunabadiidxacaʼ: «¿Paraa gucuaa hombre riʼ guendabiaaniʼ riʼ ne poder para guni ca milagru riʼ pue? ¿Cadi laabe nga xiiñiʼ carpinteru que la? ¿Ñee cadi María nga láʼ jñaabe ne ca bíʼchibe nga Santiago, José, Simón ne Judas la? ¿Cadi raríʼ nga nabeza ca bizáʼnabe la? Yanna, ¿paraa gucuaabe guiráʼ ca cosa riʼ pue?» (Mateo 13:54-56).

Ruuyacabe Jesús casi tutiica binni de guidxi que. Guníʼ íquecabe: «Peru laadu biiyadu biniisibe, ¿ximodo nga nabe laabe nga Mesías?». Qué ñuni crecaʼ laabe, neca biiyacaʼ ca milagru ni bíʼnibe ne pabiáʼ nuu xpiaanibe. Nin familia stiʼ Jesús, ni runibiáʼ laabe de dxi nahuiinibe, qué ñuni crecaʼ laabe. Ngue runi, guníʼ Jesús: «Guiráʼ ladu rusisácabe ti profeta, menu si ndaaniʼ xquidxi ne ndaaniʼ xfamilia» (Mateo 13:57).

Nabé bidxagayaa Jesús purtiʼ huaxiéʼ fe napa ca binni de Nazaret. Ne maʼ «qué ñúnibe nin ti milagru raqué, sínuque bisiándabe chupa chonna binni huará ora gudixhenabe luguiacaʼ» (Marcos 6:5, 6).