Despué de biaana Jesús Samaria chupa gubidxa, bibiguetaʼ Galilea, lugar ra biniisi. Neca maʼ xadxí de cayuni predicarbe Judea, cadi bibiguétabe Galilea para guiziiláʼdxibe, sínuque para guzulube ti dxiiñaʼ jma naroʼbaʼ. Zándaca cadi cabézabe guidxaagalúcabe laabe galán raqué, purtiʼ laapebe guniʼbe «qué risaca ti profeta ndaaniʼ xquidxi» (Juan 4:44). Peru lugar de ñaanané ca discípulo que laabe, laga bibiguétacaʼ ra nuu familia sticaʼ ne bíʼnicaʼ dxiiñaʼ ni maca rúnicaʼ.

Bizulú biʼniʼ predicar Jesús mensaje riʼ ndaaniʼ guidxi Galilea: «Maʼ gaxha nuu Reinu stiʼ Dios. Lagaca arrepentir ne laguni cré ca noticia galán stiʼ Dios» (Marcos 1:15). Peru, ¿ñee guyuulaʼdxiʼ ca binni de Galilea dxiiñaʼ cayúnibe que la? Stale tu bidxaagalú laabe galán ne bisisácacaʼ laabe, peru cadi pur mensaje si que, sínuque purtiʼ biiyacaʼ guiráʼ milagru ni bíʼnibe Jerusalén lu Pascua, ni guca caadxi beeu ante (Juan 2:23).

¿Paraa bizulú Jesús biʼniʼ xhiiñaʼ Dios lu región de Galilea? Zándaca bizulube Caná, ra bíʼnibe nisa que vinu lu ti guendaxheelaʼ. Peru yanna, gunna Jesús guizáʼ huará ti joven, ne maʼ biaʼ qué gatiʼ si. Laabe nga xiiñiʼ ti oficial ni runi dxiiñaʼ para Herodes Antipas, rey ni despué biʼniʼ mandar igá yanni Juan Bautista. Binadiaga oficial riʼ biree Jesús de Judea ne yanna maʼ nuu Caná, ngue runi biree de Capernaúm ne zeʼ ra nuu Jesús. Ora biʼyaʼ oficial riʼ Jesús, gunabaʼ laabe: «Señor, chuu ante gatiʼ xiiñeʼ» (Juan 4:49).

Óraque gudxi Jesús laabe: «Bibiguetaʼ ra lídxiluʼ, nabani xiiñiluʼ» (Juan 4:50). Nanna pabiáʼ bidxagayaa oficial stiʼ Herodes que ora binadiaga ca diidxaʼ riʼ yaʼ. Biʼniʼ cré hombre riʼ Jesús ne bibiguetaʼ ra lidxi. Ante chindabe ra lídxibe bidxaagalube caadxi esclavu stibe, ziyúbicaʼ laabe para gábicaʼ laabe maʼ bianda xiiñibe. Gunabadiidxaʼ oficial que laacabe pora bianda xiiñiʼ, purtiʼ nuu ganna pa hora guníʼ Jesús que nga bianda xiiñiʼ.

Para bicabi ca esclavu que: «Zeʼ xindxaʼ stibe neegueʼ biaʼ la una de la tarde» (Juan 4:52).

Óraque bidiibe cuenta biaʼsi peʼ hora que nga gudxi Jesús laabe: «Nabani xiiñiluʼ». Pur ni guca riʼ, neca ricu hombre que ne napa esclavu, beeda gaca xpinni Cristu, laa ne familia stiʼ.

Casi maʼ bidúʼyanu, biʼniʼ Jesús chupa milagru ndaaniʼ guidxi Caná: primé, bíʼnibe nisa que vinu ne despué bisiándabe ti joven ni nuu zitu de laabe, biaʼ 26 kilómetru. Cadi ngue si nga milagru ni maʼ bíʼnibe hasta nagasi. Peru nabé risaca milagru biʼniʼ Jesús riʼ, purtiʼ raqué nga bizulú dxiiñaʼ naroʼbaʼ ni chiguni Galilea, ne bisihuinni milagru que naca Jesús profeta stiʼ Dios. Yanna, ¿pabiáʼ zusisácacabe laabe ndaaniʼ xquídxibe yaʼ?

Zacábinu pregunta riʼ ora chindá Jesús Nazaret. Guidúʼyanu xi chiguizaacabe raqué.