Guizáʼ bidxagayaa binni ora bíʼyacaʼ zanda gudii Jesús ni gó mil de binni pur ti milagru biʼniʼ. Guníʼ íquecaʼ «dxandíʼ peʼ laabe nga Profeta ni chigueeda lu guidxilayú», Mesías que, ne zácabe ti rey nachaʼhui (Juan 6:14; Deuteronomio 18:18). Ngue runi, gucalaʼdxiʼ ca binni que ñúnicaʼ laabe rey neca qué nabe.

Cumu nanna Jesús xi nuu ca binni que gúnicaʼ laabe la? gúdxibe laacaʼ maʼ zanda checaʼ ne gúdxibe ca discípulo stibe quíbacaʼ ndaaniʼ canuá que ne checaʼ neza Betsaida ne despué Capernaúm. Peru gudxiʼbaʼ Jesús lu ti dani para guni orar stubi gueelaʼ que.

Nacándaruʼ, biiyaʼ Jesús maʼ zitu zeʼ canuá que. Biiyabe cadxelasaa ca ola que canuá que ne cayaca nagana para ca apóstol chinecaʼ canuá que purtiʼ cudxiilucaʼ bi (Marcos 6:48). Óraque bieteʼ Jesús lu dani que zeʼ ra nuucabe zizá lu nisadóʼ neca guizáʼ reciu cundubi bi. Maʼ biʼniʼ remar ca apóstol «biaʼ gaayuʼ o xhoopaʼ kilómetru» (Juan 6:19). Óraque biiyacabe Jesús, zácaxacabe nidíʼdibe lucaʼ, ngue runi cadxíbicaʼ bicaacaʼ ridxi: «¡Ti fantasma nga!» (Marcos 6:49).

Peru oraqueca gudixhedxí Jesús ladxidóʼcabe ne gudxi laacabe: «¡Lauguu gana! Naa ndiʼ. Cadi guidxíbitu». Óraque bicabi Pedro laabe: «Señor, pa lii nga la? gudxi naa chaaʼ ra nuuluʼ lu nisa riʼ». Para rabi Jesús laabe: «¡Gudáʼ!». Óraque biete Pedro ndaaniʼ canuá que ne zizá lu nisa que ne zeʼ ra nuu Jesús. Peru, ora biiyadxibe pabiáʼ reciu nuu bi que, bidxíbibe ne bizulú biaazibe. Ngue runi, bicaabe ridxi: «¡Señor, bilá naa!». Nagueendaca bisigaanáʼ Jesús ne gunaazeʼ laabe ne guníʼ: «Hombre, aque huaxiéʼ fe napuʼ xa, ¿xiñee biʼniʼ dudarluʼ pue?» (Mateo 14:27-31).

Despué de gudxiʼbaʼ Pedro ne Jesús ndaaniʼ canuá que, gulezadxí bi que. Guizáʼ bidxagayaa ca discípulo ora bíʼyacaʼ ni guca riʼ, peru ¿ñee nápacabe razón para guidxagayaacabe la? Pa ñénecabe «significadu napa milagru stiʼ ca pan», ni biʼniʼ Jesús chupa chonna hora ante ora bidii ni gudó mil de binni, qué nidxagayaacabe gunda guzabe lu nisadóʼ ne gudixhedxibe bi que. Óraque, bisisácacaʼ Jesús ne guniʼcaʼ: «Dxandíʼ, lii nga Xiiñiʼ Dios» (Marcos 6:52; Mateo 14:33).

Qué nindaa, yendácabe Genesaret, ti lugar sicarú ra rudii cuananaxhi, ne riaana ni ladu gueteʼ stiʼ Capernaúm. Bisábacabe ancla ne biétecabe ndaaniʼ canuá que. Guiráʼ ca ni nuu raqué binibiaʼcaʼ Jesús ne bizulú bedané ca binni de región que ca ni huará. Ne guiracaʼ biándacaʼ ora gudáʼnacaʼ neca ñee xhábabe.

Ca binni ni bidii Jesús ni gó que, bidiicaʼ cuenta maʼ qué guínnibe raqué. Ngue runi ora yendá caadxi canuá ni zeeda de Tiberíades gaxha de ra gudócabe que, gudxíʼbacabe ndaaniʼ ca canuá que ne zécabe Capernaúm, ziyúbicabe Jesús. Ora bidxela ca binni que laabe, gunabadiidxacaʼ laabe: «Rabí, ¿pora beeduʼ raríʼ?» (Juan 6:25). Óraque gudindené Jesús laacabe, casi chiguizíʼdinu despué.