Ladu este stiʼ nisadóʼ stiʼ Galilea, biʼniʼ Jesús ti milagru para bidii ni gudó mil de binni, peru cumu nuu ca binni que gúnicaʼ laabe rey la? bireebe de raqué. Huaxhinni que guzabe lu nisadóʼ neca cundubi ti bi reciu ne bilabe Pedro, laaca ndaʼ guzá lu nisadóʼ peru bizulú biaaziʼ purtiʼ huaxiéʼ fe gupa. Ne laaca bicueeza Jesús bi que para cadi guilaahua canuá que.

Yanna, maʼ nuu Jesús chericaʼ nisadóʼ, lu región stiʼ Capernaúm. Bidxela ca binni ni bidiibe ni gudó que laabe ne gúdxicaʼ laabe: «¿Pora beeduʼ raríʼ?». Peru gudíndenebe laacaʼ purtiʼ cuyúbisicaʼ gudiibe ni gocaʼ. Gúdxibe laacaʼ cadi gúnicaʼ dxiiñaʼ para gápacaʼ «guendaró ni raca feu», sínuque gúnicaʼ dxiiñaʼ para gápacaʼ «guendaró ni qué raca feu ne rudii guendanabani ni qué zaluxe». Ora binadiágacaʼ ni gudxi Jesús laacaʼ, gunabadiidxacaʼ laabe: «¿Xi naquiiñeʼ gúnidu para gúnidu ca dxiiñaʼ stiʼ Dios yaʼ?» (Juan 6:25-28).

Zándaca ni caníʼ ique ca binni que nga ca dxiiñaʼ ni rinabaʼ Ley que gúnicaʼ, peru caníʼ Jesús de ti cosa jma risaca: «Ndiʼ nga xhiiñaʼ Dios: lagusihuinni nápatu fe naa, purtiʼ laa biseendaʼ naa». Peru qué gapa ca binni que fe Jesús. Neca maʼ biiyacabe ca milagru ni biʼniʼ Jesús, peru gunábarucabe laa guni sti milagru ti guni crécabe laa. Gúdxicabe Jesús: «¿Xi dxiiñaʼ rúniluʼ? Ca bixhozebiidanu gudocaʼ maná lu desiertu, casi cá lu Stiidxaʼ Dios: “Bidiibe laacaʼ pan de guibáʼ para gocaʼ”» (Juan 6:29-31; Salmo 78:24).

Cumu canabaʼ ca binni que guni Jesús sti milagru la? ngue runi gúdxibe laacaʼ tuu nga runi ca milagru que: «Dxandíʼ ni chitidxeʼ laatu riʼ, qué nudii Moisés laacabe pan de guibáʼ, peru Bixhozeʼ cudii laatu ni dxandíʼ pan de guibáʼ. Purtiʼ pan stiʼ Dios nga ni biete de guibáʼ ne rudii guendanabani binni guidxilayú». Cumu cadi cayene ca binni que xii ngue cayabi Jesús laacaʼ, gunábacaʼ laabe: «Señor, siempre bidii laadu pan riʼ» (Juan 6:32-34). Yanna, ¿xi runi representar pan ni guníʼ Jesús ca yaʼ?

Bisiene Jesús laacabe: «Naa nga pan de guendanabani. Tu gueeda ra nuaaʼ qué ziuu dxi guindaana, ne tu gapa fe naa qué ziuu dxi gati nisa. Peru, casi maca gudxeʼ laatu, neca maʼ biiyatu naa qué runi cretu naa. [...] Purtiʼ bieteʼ de guibáʼ, cadi para guneʼ ni racalaʼdxeʼ, sínuque para guneʼ ni racalaʼdxiʼ ni biseendaʼ naa. Ndiʼ nga ni racalaʼdxiʼ ni biseendaʼ naa: cadi guniteʼ nin tobi de ca ni bidiibe naa, sínuque guindisaʼ laacaʼ de lade gueʼtuʼ lu últimu dxi. Purtiʼ ndiʼ nga ni racalaʼdxiʼ Bixhozeʼ: guiráʼ tu guni aceptar ne gapa fe Xiiñibe, zapa guendanabani ni qué zaluxe» (Juan 6:35-40).

Guizáʼ bidxiichi ca judíu que ora binadiágacaʼ ni guniʼbe, ne bizulú biʼniʼ criticarcaʼ laabe. ¿Ximodo nga nabe laabe «nga pan ni biete de guibáʼ»? (Juan 6:41). Para laacabe naca Jesús xiiñiʼ ti guendaxheelaʼ ni nabeza ndaaniʼ guidxi Nazaret ni nuu Galilea. Ngue runi, guniʼcaʼ: «¿Ñee cadi Jesús xiiñiʼ José ndiʼ la? ¿Ñee cadi runibiaʼnu bixhózebe ne jñaabe la?» (Juan 6:42).

Ora biʼyaʼ Jesús modo nuu ca binni que, gúdxibe laacaʼ: «Cadi guni criticartu. Bixhozeʼ nga biseendaʼ naa, ne guirutiʼ zanda gueeda ra nuaaʼ pa cadi laabe cuídxibe laa, ne zandisaʼ laa de lade gueʼtuʼ lu últimu dxi. Sicaríʼ bicaa ca Profeta: “Zusiidiʼ Jehová guirácabe”. Guiráʼ ni gucaadiaga Bixhozeʼ ne guiziidiʼ la? zeeda ra nuaaʼ. Cadi purtiʼ maʼ biiyaʼ tuuxa binni Dios, purtiʼ tobi si nga maʼ biiyaʼ Dios; laa nga ni beeda de ra nuube. Dxandíʼ ni chitidxeʼ laatu riʼ, ni guni cré zacaa guendanabani ni qué zaluxe» (Juan 6:43-47; Isaías 54:13).

Dxi guniʼné Jesús Nicodemo, bisiidibe laa caquiiñeʼ gapa fe Xiiñiʼ Hombre, o tobi lucha Xiiñiʼ  Dios para gapa guendanabani ni qué zaluxe. Bisiidibe guiráʼ tu gapa fe laabe qué zanitilú, sínuque zacaa guendanabani ni qué zaluxe (Juan 3:15, 16). Peru biaje riʼ, gúdxibe stale binni, zanda guicaacaʼ guendanabani ni qué zaluxe pur laabe, ti cosa ni qué zanda gudii maná que ne ni qué zanda gudii pan ni gócabe guiráʼ dxi Galilea. Nga runi, bisiene Jesús laacabe sti biaje tuu nga zanda gudii laacabe guendanabani ni qué zaluxe, ora guníʼ: «Naa nga pan de guendanabani» (Juan 6:48).

Cadi raríʼ si nga guníʼ Jesús de pan de guibáʼ, sínuque laaca bizeetebe ni ndaaniʼ ti sinagoga ni nuu Capernaúm.