Guizáʼ nuu xhiiñaʼ Jesús cayuni predicar Galilea, peru ra maʼ zedadxiña saa stiʼ Pascua de iza 32, zándaca zebe Jerusalén para guni celebrarbe saa ca, casi rinabaʼ Ley stiʼ Dios ni. Peru rápabe cuidadu purtiʼ cuyubi ca judíu guuticaʼ laabe (Juan 7:1). Despué, bibiguétabe Galilea.

Zándaca nuu Jesús Capernaúm ora guyé caadxi fariseu ne escriba ni zeeda de Jerusalén ra nuu. ¿Xiñee guyécabe ra nuu Jesús yaʼ? Purtiʼ cuyúbicabe ugaanicabe donda ique Jesús, nácabe qué rinanda Jesús ni rusiidiʼ religión. Gúdxicabe laa: «¿Xiñee qué rinanda ca discípulo stiluʼ tradición stiʼ ca bixhozebiidanu pue? Purtiʼ qué riguibinacaʼ ora maʼ chitocaʼ» (Mateo 15:2). Ni dxandíʼ nga qué lica ñuni mandar Dios niguibináʼ xquidxi «dede lu codo» (Marcos 7:3). Neca zacá, riníʼ ique ca fariseu cuchee binni pa qué guni ni.

Lugar de nicabi Jesús ca fariseu ne ca escriba que pur donda ni cugaanicaʼ íquebe, gúdxibe laacaʼ laapecaʼ ruyúbicaʼ gucheenecaʼ Ley stiʼ Dios. Ne gunabadiidxaʼ Jesús ca hombre riʼ: «¿Xiñee ga laatu qué rinándatu ca mandamientu stiʼ Dios pur chinándatu ca tradición stitu yaʼ? Dios guníʼ: “Biʼniʼ respetar bixhózeluʼ ne jñaaluʼ”. Ne laaca guniʼbe: “Tu guiníʼ né despreciu de bixhoze o de jñaa naquiiñeʼ gatiʼ”. Peru laatu riniʼtu: “Tu gabi bixhoze o jñaa «Guiráʼ ni napaʼ ni ñanda niquiiñeʼ para gacaniaʼ lii la? ti regalu para Dios ni», binni ca maʼ cadi naquiiñeʼ guni respetar bixhoze ne jñaa”» (Mateo 15:3-6; Éxodo 20:12; 21:17).

Ca fariseu que nacaʼ pa gudii binni regalu Dios casi bueltu, ti layú o sti cosa, maʼ stiʼ templu ni ne cadi jneza iquiiñe ni para sti cosa. Peru ni dxandíʼ nga stiruʼ binni regalu ca. Guzéʼtenu ti ejemplu, zanda gabi ti binni bixhoze o jñaa, maʼ corbán o ti regalu para Dios o para templu que xpueltu o guiráʼ ni napa, casi ñaca jma risaca gacanebe templu que bixhózebe ne jñaabe. Casi ñaca cusihuínnicabe qué zanda iquiiñebe ni nápabe para gacanebe bixhózebe ne jñaabe ni maʼ huaniisi ne ni caquiiñeʼ gacanebe, peru zanda iquiiñebe ca cosa stibe pa racaláʼdxibe. Zacá maʼ qué raca obligarbe gacanebe bixhózebe ne jñaabe (Marcos 7:11).

Bidxiichi Jesús ora biʼyaʼ cuchaacabe ni cá lu Ley stiʼ Dios, ngue runi gudxi laacabe: «Maʼ bicaanatu stiidxaʼ Dios pur ca tradición stitu. ¡Aque hipócrita laatu! Con razón biʼniʼ profetizar Isaías de laatu: “Riníʼ si guidxi riʼ ruzuubaʼ stiidxaʼ, peru guizáʼ zitu nuu ladxidóʼ de naa. Pur gana si cayuni adorarcaʼ naa, purtiʼ rusiidicaʼ ni ná binni casi ñaca stiidxaʼ Dios”». Qué ganna ca fariseu que xi guicábicaʼ Jesús pur ni gúdxibe laacaʼ. Óraque gudxi Jesús ca binni que guidxíñacaʼ ra nuu ne gudxi laacabe: «Lagucaadiaga ne laguiene ni canieeʼ: Cadi ni riguu binni ruaa nga ni runi contaminar laa, sínuque ni riree ruaa binni nga ni runi contaminar laa» (Mateo 15:6-11; Isaías 29:13).

Despué, ora nuu Jesús né ca discípulo stiʼ ndaaniʼ ti yoo, gunabadiidxacaʼ laabe: «¿Ñee bidiiluʼ cuenta bidxiichi ca fariseu ora binadiágacaʼ ni guniʼluʼ la?». Para bicábibe laacaʼ: «Guiráʼ yaga ni cadi Bixhozeʼ ni nuu guibáʼ bizuhuaa la? ziaaxha dede xcu. Zaa nuucabe. Nácacabe guía ciegu. Nga runi, pa guni guiar ti ciegu sti ciegu la? ziaba guirópacaʼ ndaaniʼ ti barranca» (Mateo 15:12-14).

Óraque, cumu racalaʼdxiʼ ca discípulo que gusiene Jesús laacaʼ xii nga ni runi contaminar binni, ngue runi gunabadiidxaʼ Pedro ni Jesús. Zándaca dede bidxagayaa Jesús, ngue runi bicabi laacabe: «¿Qué gánnatu pa guiráʼ ni riguu binni ruaa ridiʼdiʼ ni ndaaniʼ ne riaba ni ndaaniʼ letrina la? Peru intiica cosa guiree de ruaa binni la? zeeda ni de ndaaniʼ ladxidóʼ, ne nga nga ni runi contaminar ti binni. Purtiʼ de ndaaniʼ ladxidóʼ binni reeda cosa malu ni riníʼ ique, guuti, gapa jnadxii,  guni cometer pecadu sexual, cuanaʼ, gudii falsu testimonio, cuʼ dí. Nga nga ca cosa ni runi contaminar binni, peru pa gó binni sin quiʼbiʼ náʼ, qué runi contaminar ni laa» (Mateo 15:17-20).

¿Ñee caníʼ Jesús cadi caquiiñeʼ quiʼbinácabe ora gúnicabe guendaró ne ora gócabe la? Coʼ, cadi nga diʼ nga ni guníʼ Jesús. Ni caniʼbe nga cadi jneza ni cayuni ca líder stiʼ ca religión que purtiʼ zinándacaʼ ca tradición stiʼ binni ne cadi cayúnicaʼ ni ná Dios. Ni dxandíʼ runi contaminar ti binni nga guiráʼ ca cosa malu ni riale de ndaaniʼ ladxidóʼ guni.