Mayaca guiluxe iza 32 ne maʼ napa Jesús chonna iza de guyuunisa. Maʼ biʼniʼ celebrar Jesús ne ca discípulo stiʼ Saa stiʼ ca Tabernáculo ndaaniʼ guidxi Jerusalén ne zándaca nuurúcabe gaxha de raqué (Lucas 10:38; Juan 11:1). Maʼ xhoopaʼ beeu de cayuni Jesús xhiiñaʼ Dios, maʼ biʼniʼ predicar lu región stiʼ Judea ne Perea —riaana Perea sti ladu guiiguʼ Jordán—, purtiʼ laaca caquiiñeʼ gaca predicar ca lugar riʼ.

Caadxi iza ante, gudiʼdiʼ si Pascua stiʼ iza 30, biaana Jesús caadxi beeu Judea cayuni predicar ne despué guyé Samaria. Despué, lu Pascua stiʼ iza 31, gucalaʼdxiʼ ca judíu ni nuu Jerusalén ñuuticaʼ Jesús. Guca si ngue guyé Jesús ladu guiaʼ de Galilea ne biʼniʼ predicar raqué biaʼ ti iza arondaʼ. Ne tiempu guyuube raqué stale binni guca xpínnibe. Laga nuu Jesús Galilea, bisiidiʼ ca apóstol stiʼ ne bisiénebe laacaʼ: «Laguni predicar sicaríʼ: “Maʼ bidxiña Reinu ni nuu guibáʼ”» (Mateo 10:5-7). Yanna, biʼniʼ Jesús ti campaña de predicación para chigaca predicar Judea.

Para gaca ndiʼ la? gulí Jesús 70 discípulo stiʼ ne biseendabe laacaʼ chupa chupa. Biaʼsi bizaa 35 pareja para chiguni predicar stiidxaʼ Reinu lugar riʼ, ra nuu stale cosecha peru huaxiéʼ trabajador (Lucas 10:2). Ne gudxi Jesús laacabe sanírucabe ca lugar ra cá ique cheʼ. Naquiiñeʼ gusianda 70 discípulo riʼ binni huará ne guiniʼcaʼ de mensaje ni maca cayuni predicar Jesús.

Qué ñabi diʼ Jesús ca discípulo stiʼ nusiidicaʼ ndaaniʼ ca sinagoga, sínuque gúdxibe laacaʼ chiguni predicarcaʼ de yoo pur yoo ne biʼniʼ mandarbe laacaʼ: «Intiica yoo guiuutu, primé laguiníʼ: “Chuʼ paz ndaaniʼ yoo riʼ”. Pa nuu tuuxa ni riuulaʼdxiʼ gapa paz la? ziaana paz stitu luguiáʼ». ¿Xi mensaje naquiiñeʼ chiné ca discípulo que yaʼ? Laani nga: «Maʼ bidxiña Reinu stiʼ Dios ra nuutu» (Lucas 10:5-9).

Raca biaʼ ti iza, bidii Jesús caadxi instrucción ca 12 apóstol, ne yanna bidiibe xcaadxi instrucción casi laacani 70 ni chiguni predicar. Laaca bisiene Jesús laacabe qué zadxaagalú binni laacabe galán. Peru stipa ni gúnicabe para gacanécabe binni zacané ni para ora gueeda Jesús, ti chuulaʼdxiʼ ca binni ca gunibiaʼcaʼ ne guiziidicaʼ de laabe.

Mayaca guibiguetaʼ 35 pareja ni ziguni predicar stiidxaʼ Reinu ra nuu Jesús. Nayecheʼ bibiguétacaʼ ne gúdxicaʼ laabe: «Señor, dede ca demonio ruzuubacaʼ stiidxadu ora riquiiñedu laluʼ». Nánnanu laaca guyuu Jesús nayecheʼ ora binadiaga ni guníʼcabe que, ne gudxi laacabe: «Cayuuyaʼ maʼ biaba Binidxabaʼ casi riaba rayu de guibáʼ. Laguuyaʼ, maʼ bidieeʼ autoridad laatu para guxhatañeetu beendaʼ ne meuxubi» (Lucas 10:17-19).

 Né ca diidxaʼ que bisiene Jesús laacabe zanda gudxiilúcabe ca guendanagana gápacabe casi ñaca nuxhatañeecabe «beendaʼ ne meuxubi». Ne gúdxibe laacaʼ zabeebe Binidxabaʼ de guibáʼ. Laaca gucané Jesús 70 discípulo que para gánnacaʼ xii nga ni jma naquiiñeʼ guisaca para laacaʼ, ora guníʼ: «Peru cadi guiéchetu purtiʼ ruzuubaʼ ca espíritu ca stiidxatu, sínuque laguiecheʼ purtiʼ maʼ cá latu guibáʼ» (Lucas 10:20).

Guizáʼ nayecheʼ guyuu Jesús ne bisisaca Bixhoze nezalú guirácabe, purtiʼ caquiiñeʼ Bixhózebe binni humilde para guni xhiiñaʼ. Ne óraque gudxi Jesús ca discípulo stiʼ: «Nayecheʼ nga guielú ca binni ni cayuuyaʼ ca cosa ni cayuuyatu riʼ. Purtiʼ cayabeʼ laatu, ñuulaʼdxiʼ stale profeta ne rey ñuuyacaʼ ni cayuuyatu, peru qué ñuuyacaʼ ni, ne ñuuláʼdxicaʼ ñunadiágacaʼ ni cayunadiágatu, peru qué ñunadiágacaʼ ni» (Lucas 10:23, 24).