ÑEE runibiaʼluʼ tuuxa hombrehuiiniʼ o dxaapahuiiniʼ ni runi cré laa jma nadipaʼ ne nabé ruyubi tinde la?... Ñee riuláʼdxiluʼ guidxaagaluʼ tuuxa zacá la? O riuláʼdxiluʼ guidxaagaluʼ cani nachaʼhuiʼ ne nadóʼ.... Maestru Ni Jma Nanna Gusiidiʼ que guníʼ: Dichoso nga cani nadóʼ purtiʼ zapa Dios laacabe casi xiiñiʼ (Mateo 5:9).

Peru nuu tiru la? stuudxi binni rúnicaʼ xiixa ni ruchiichi laanu, cadi dxandíʼ nga la?... Nga runi, nuu tiru riuláʼdxinu guquíxenu laacabe ni rúnicabe laanu. Zacagá nga guca ca discípulo stiʼ Jesús ora zinécabe laabe Jerusalén. Chitidxeʼ lii xi guca.

Guzásicabe zituhuiiniʼ, Jesús biseendaʼ caadxi de ca discípulo stiʼ checaʼ ti guidxihuiiniʼ stiʼ Samaria para guyúbicaʼ paraa guiaanacabe gueelaʼ que. Peru ca binni de guidxihuiiniʼ que qué ninádicaʼ ñaanacabe  raqué purtiʼ gadxé religión sticaʼ. Ne ca samaritanu que, qué ridxaagacabe cani rié Jerusalén para guni adorarcaʼ Dios.

Pa ñácaluʼ ni lii, xi ñúniluʼ yaʼ. Ñee nidxiichiluʼ la? Ñuuláʼdxiluʼ nuquíxeluʼ ni laacabe la?... Ngapeʼ nga ni guyuu Jacobo ne Juan ñúnicaʼ. Gúdxicabe Jesús: Ñee racalaʼdxuʼ guinábadu guiaba guí de guibáʼ ti guinitilúcabe la? Qué ridxagayaadinu nga gudxi Jesús laacabe Xiiñiʼ Rayu. Jesús gudxi laacabe cadi galán diʼ nga gúnicabe stuudxi binni zaqué (Lucas 9:51-56; Marcos 3:17).

Dxandíʼ, nuu tiru binni runi laanu xiixa ni cadi galán. Zándaca stuudxi baʼduʼ qué chuláʼdxicaʼ quitenecaʼ lii. Dede gábicabe lii: «Qué racaláʼdxidu gúʼyadu lii cheríʼ». Ora gaca xiixa zacá, cadi dxandíʼ racananu la? Zándaca guiníʼ íquenu gúninu laacabe zaqueca. Peru, nouʼ naquiiñeʼ gúninu ni la?...

Ndaaniʼ Biblia lu Proverbios, capítulo 24, versículo 29 na: «Cadi guiniʼluʼ: “Cásica bíʼnibe naa zaqueca zuneʼ laabe. Zuquixeʼ cada tobi de laacabe modo gúnicabe”».

Ximodo rieʼnuʼ ca diidxaʼ riʼ yaʼ.... Riníʼ ni cadi gúninu laacabe cásica modo rúnicabe laanu. Cadi naquiiñeʼ diʼ guninanu tuuxa binni purtiʼ si zaqueca bíʼnibe laanu. Peru pa tuuxa gucaalú laanu yaʼ. Zándaca gábibe lii stale diidxaʼ feu para guchiichibe lii o guxídxibe de lii ne guiniʼbe cadxíbiluʼ. Jmaruʼ si pa gábibe lii namúxeluʼ. Xi riquiiñeʼ gúniluʼ yaʼ. Ñee naquiiñeʼ guicábiluʼ laabe ne tindeneluʼ laabe la?...

Guidúʼyanu sti biaje xiná Biblia. Biyubi Mateo, capítulo 5, versículo 39. Jesús cayabi laanu: «Pa ucaa lú cabe laatu la? cadi ucaa lú tu laacabe. Ne pa chuʼ tu capa ti ladu xhaga tu la? laudii ca né sti ladu». Xi raʼbuʼ gucalaʼdxiʼ Jesús niníʼ ne ca diidxaʼ riʼ yaʼ. Ni nuube niniʼbe nga pa tuuxa gudii ti puñete ti ladu xhágaluʼ naquiiñeʼ gudiiluʼ ne sti ladu ca la?...

 Coʼ, cadi nga diʼ gucalaʼdxiʼ Jesús niníʼ. Cápacabe ti ladu xháganu cadi casi diʼ ora nudiicabe ti puñete ni. Jma nga zeeda gácani casi ora nulaanácabe laanu. Pa tuuxa capa ti xháganu o gulaanáʼ laanu la? zándaca cuyubi tinde. Nuube guchiichibe laanu. Yanna xi zaca pa guidxiichinu ne laaca gulaananu laabe yaʼ.... Zándaca tíndenu.

Peru Jesús qué niná nidinde cani zinanda laabe. Ngue runi guniʼbe pa tuuxa capa ti laadu xháganu la? cadi naquiiñeʼ diʼ gudxiguétanu ni. Ne cadi guidxiichinu nin tíndenu. Ne pa gúninu ni la? cusihuínninu nácanu cásica binni ni bizulú cadindené laanu ca.

Peru pa gúʼyanu cadxiichi binni ca, xii nga jma jneza gúninu yaʼ.... Jma galán nga guixélenu. Zándaca gulaanabe lii  sti biaje. Peru zándaca raqué guiluxe guirani. Pa guixéleluʼ la? cadi cusihuínniluʼ cadxíbiluʼ, sínuque nadípaluʼ, purtiʼ riquiiñeʼ stipa nga para guni binni ni jneza.

Peru xi gácaxa pa tíndeluʼ ne lii guni ganarluʼ yaʼ. Xi zándaca gueeda gaca yaʼ.... Ni biniti que zándaca guibiguetané ca xhamigu, ne guindaacaʼ íqueluʼ o guchuugucaʼ lii ne ti gudxíu. Ñee riéneluʼ yanna xiñee qué ñulaʼdxiʼ Jesús nidinde binni la?...

Xi riquiiñeʼ gúninu pa gúʼyanu stuudxi binni cadíndecaʼ yaʼ. Riquiiñeʼ chuʼnu pur tobi de laacabe la?... Biblia cayabi laanu xi gúninu. Ndaaniʼ Biblia lu Proverbios, capítulo 26, versículo 17 na: «Casi tuuxa ni rigubayú diaga ti biʼcuʼ, zacá nga binni ni zidiʼdiʼ ra cadinde binni ne riuu lu pleitu ni cadi stiʼ».

Xi ñaca pa nigubayuluʼ diaga ti biʼcuʼ yaʼ. Cadi dxandíʼ ñacaname ne ñacaláʼdxime ñaaxhame luguialuʼ la? Ne ora ñacaláʼdxime nundaaluʼ laame la? jma nadipaʼ nigápiluʼ laame ne óraque jma nidxiichime. Yanna pa nundaaluʼ laame pue, zándaca guizáʼ naná ñoyaame lii. Peru nouʼ zanda guiaanuʼ guidubi dxi o guiráʼ dxi zaa naazuʼ diágame la?...

Pa gúʼyanu cadíndecabe ne chichuʼnu luni la? laaca cuyúbinu gacananu. Jmaruʼ si pa qué gánnanu tu bizulú bicaalú ne qué gánnanu xi pur cadíndecabe. Zándaca binni ni caguíñecabe ca guláʼnabe xiixa  nga runi caguíñecabe laabe. Pa gacanenu laabe la? cayacanenu ti gubaanaʼ. Ne cadi jneza diʼ nga, njaʼ.

Nga runi, xi naquiiñeʼ gúniluʼ ora gúʼyaluʼ cadíndecabe yaʼ.... Pa ra scuela ni la? zanda guxooñeluʼ chitídxiluʼ maestru. Yanna pa gadxé ladu ni la? zanda gábiluʼ bixhózeluʼ o ti puliciá. Neca stuudxi binni gacalaʼdxiʼ tinde, laanu naquiiñeʼ gácanu nadóʼ.

Laanu cani dxandíʼ zinándanu Jesús rúninu stale stipa pur cadi tíndenu. Zacá zusihuínninu dxandíʼ nadípanu stale para gúninu ni jneza. Biblia na cadi naquiiñeʼ diʼ tinde ca discípulo stiʼ Jesús, sínuque gácacaʼ nachaʼhuiʼ ne guiráʼ binni (2 Timoteo 2:24).