NUU binni na ni ruuyaʼ si nga runi cré, peru cadi nga diʼ nga laani. Nuu stale cosa ni qué huayuu dxi gúʼyanu, peru dxandíʼ nuu cani. Gunáʼ ndiʼ caadxi de laacani yaʼ....

Ñee zanda guni sentirnu bi ricaanu ca la?... Gundisaʼ naluʼ ne bindubi ni. Runi sentirluʼ xiixa la?... Ya, runi sentirluʼ bi ca, njaʼ, peru, cadi dxandíʼ qué zanda gúʼyanu ni la?....

Lu ca capítulo ni maʼ bíʼndanu que guninu de caadxi binni ni qué randa rúʼyanu, cani nácacaʼ espíritu. Bizíʼdinu caadxi de laacabe ca nachaʼhuiʼ ne xcaadxi ca malu laacaʼ. Ñanda niniʼluʼ lá chupa chonna de cani nachaʼhuiʼ ca la?... Ñanda pue, casi Jiobá, Jesús ne ca ángel chaʼhuiʼ ca. Ñee laaca nuu ángel malu la?... Biblia na nuu. Xi biziiduʼ de laacabe yaʼ....

Nánnanu jma nadipaʼ ca ángel nachaʼhuiʼ ca ne ca ángel malu ca que laanu. Maestru Ni Jma Nanna Gusiidiʼ que nanna stale cosa de laacabe purtiʼ ante gálebe lu Guidxilayú riʼ gúcabe tobi de laacaʼ. Gulezanebe millón de ángel guibáʼ. Ñee nápacaʼ ángel ca lacaʼ la?...

Bizíʼdinu gulaʼquiʼ Dios lá ca beleguí ca. Nga runi nánnanu laaca napa ca ángel ca lacaʼ. Ne laaca nánnanu ruíʼcabe diidxaʼ, purtiʼ Biblia riníʼ de idioma stiʼ ca ángel ca (1 Corintios 13:1). Xidé raʼbuʼ riníʼcabe yaʼ. Ñee riníʼcabe de laanu, cani nabézanu lu Guidxilayú riʼ la?...

 Laaca maʼ bíʼyanu racalaʼdxiʼ ca ángel stiʼ Binidxabaʼ cadi guzúʼbanu stiidxaʼ Jiobá. Nga runi zándaca riníʼcabe ximodo gúnicabe para guchéʼnenu Dios. Racaláʼdxicabe gácanu casi laacabe para guidxiichiné Jiobá laanu. Yanna ca ángel nachaʼhuiʼ ca yaʼ. Ñee laaca riníʼcabe de laanu la?... Riníʼcabe, purtiʼ racaláʼdxicabe gacanécabe laanu. Chigüeniáʼ lii ximodo caadxi de laacabe gucanécabe tuudxi binni ni gunnaxhiicaʼ ne bíʼnicaʼ ni na Jiobá.

Dxiqué guyuu ti hombre láʼ Daniel, laabe gulézabe ndaaniʼ guidxi Babilonia. Huaxiéʼ binni nadxii Jiobá raqué. Dede bíʼnicabe ti ley ra na zuninácabe tuuxa ni guni orar Dios. Peru Daniel qué nusaana diʼ de ñuni orar. Nannuʼ xi bíʼnicabe laabe la?...

Tuudxi hombre malu bisábacabe Daniel ra nuu caadxi lión. Xi guca Daniel ora bisábacabe laa ra nuu ca maniʼ duxhuʼ ni  candaana que yaʼ.... Laabe guniʼbe: «Biseendaʼ Dios ángel stiʼ ne biseegube ruaa ca lión» que. ¡Qué ñuniná ca lión que laabe! Ca ángel ca zanda gúnicaʼ xiixa ni qué huahuinni pur ca xpinni Jiobá (Daniel 6:18-22).

Ti dxi biseguyoocabe Pedru, rietenaláʼdxiluʼ la? laabe nga guca xhamígube Maestru Ni Jma Nanna Gusiidiʼ que, Jesucristu. Caadxi de ca binni que bidxiichicabe ora guníʼ Pedru Xiiñiʼ Dios nga Jesús. Pur ngue biseguyoocabe laabe ne guluucabe soldadu gapa laabe para cadi guireebe. Raʼbuʼ ñanda ñacané tuuxa laabe la?...

 Pedru nisiaasiʼ galaa de ca soldadu que ne nuu cadena nabe. Peru Biblia na: ¡Biiyaʼ! Málasi beeda ti ángel stiʼ Jiobá ndaaniʼ lidxi guiibaʼ que ne bizaaniʼ ti biaaniʼ raqué. Ángel que gudaʼnaʼ cueʼ tíʼxhibe ne bicuaani laabe ne na: «¡Biasa, guiuba!».

Oraqueca biree ca cadena que náʼ Pedru, ne gudxi ángel que laabe: Gulaʼquiʼ lari, bicaa elaguidi ñeeluʼ ne dananda naa. Ca soldadu que qué ñanda nucueezacaʼ laacabe purtiʼ ángel que nga cayacané Pedru. Óraque bidxíñacabe ra nuu ti puertaʼ de guiibaʼ ne guca xiixa ni qué huayaca: puertaʼ que bixaleʼ laasi. Ángel que guleebe Pedru para chigucheecheruʼ diidxaʼ (Hechos 12:3-11).

Ñee laaca zanda gacané ca ángel stiʼ Dios laanu la?... Zanda pue. Riníʼ nga qué ziuu dxi gudiicabe lugar gacananu la?... Coʼ. Pa laapenu guyúbinu ni la? ca ángel ca qué zacanecaʼ laanu. Peru nuu tiru zacananu neca cadi laapenu guyúbinu ni. Qué ñabi diʼ Dios laacabe gápacabe laanu guiráʼ ora. Peru bidii Dios laacabe ti dxiiñaʼ nabé risaca.

Biblia caníʼ de ti ángel ni cayabi binni ni nuu guiráʼ ladu guni adorarcaʼ Dios (Apocalipsis 14:6, 7). Ximodo rúnibe ni yaʼ. Ñee rucaabe ridxi dede guibáʼ para gunadiaga guiráʼ binni de guidxilayú laabe la?... Coʼ. Ca xpinni Jesús ni nuu lu Guidxilayú riʼ nga riniʼné binni de Dios, ne ca ángel ca rizanírucaʼ lúcabe ora maʼ zigucheechecabe diidxaʼ. Nuu binni dxandíʼ racalaʼdxiʼ gunibiáʼ Dios, ne ca ángel ca ruuyacaʼ ximodo ganda guiziidicabe de Dios. Laanu zanda gúninu dxiiñaʼ riʼ, ne ca ángel ca zacanecaʼ laanu.

Peru, xi gúninu pa ca binni ni cadi nadxiicaʼ Dios guninacaʼ laanu yaʼ. Ne pa guseguyoocabe laanu yaʼ. Zulá ca ángel ca laanu la?... Ñándaca, peru cadi guiráʼ diʼ ora nga rúnicabe ni.

Ti dxi laga zinécabe Pablu, tobi de ca xpinni Cristu que lu ti barcu para guseguyoocabe laa, bigaacabe ti nisaguié roʼbaʼ ne ti bi  yooxhoʼ. Peru ca ángel que qué nuládicaʼ laabe oraqueca, purtiʼ nuuruʼ binni caquiiñeʼ gunadiágacaʼ de Dios. Ti ángel gudxi laabe: «Cadi idxibi lu, Pablu, purti naquiiñe chi uzuhuaa lu lu César». Yenécabe Pablu nezalú xaíque stiʼ Roma para guiníʼnebe laa stiidxaʼ Dios. Ca ángel que gúnnacabe guiráʼ ra guyuu Pablu ne gucanécabe laabe. Laaca zacanécabe laanu pa laanu gúninu ni na Dios ne cadi chuʼ dxi gusaananu laabe (Hechos 27:23-25).

Ca ángel ca nápacaʼ sti dxiiñaʼ jma risaca ni gúnicaʼ, ne zúnicabe ni nagueenda. Maʼ cadxiña dxi gunduuxeʼ Dios ca binni qué iquiiñeʼ ca, guiráʼ cani qué runi adorar laabe. Ca binni ni riníʼ qué runi cré pa nuu ca ángel ca purtiʼ si qué randa ruuyacabe laacaʼ la? zánnacabe dxandíʼ nuucaʼ (2 Tesalonicenses 1:6-8).

Xi riníʼ nga para laanu yaʼ.... Pa chuʼnu pur ca ángel stiʼ Dios la? zacanécabe laanu. Peru, nuunu xláducabe la?.... Ziuʼnu xláducabe pa gúninu ni na Jiobá. Ne pa cayúninu ni na Jiobá la? zacanenu sti binni para gúnicaʼ ni nabe.