CAPÍTULO 44
Ca xhamígunu riquiiñeʼ gannaxhiicaʼ Dios
CA XHAMÍGUNU nga ca binni ni riuláʼdxinu guinínenu ne chúʼnenu laacaʼ juntu. Peru riquiiñeʼ guyúbinu tuu nga zanda gaca xhamígunu. Tuu nga raʼbuʼ jma galán gaca xhamígunu yaʼ.... Ya, nga nga Jiobá Dios.
Peru, ñee dxandíʼ nga zanda gaca xhamígunu Dios la?... Biblia na Abrahán guca «xhamigu Dios»; laabe nga ti hombre ni bibani maʼ raca stale iza (Santiago 2:23). Ñee nannuʼ xiñee la?... Purtiʼ Biblia na Abrahán bizuubaʼ stiidxaʼ Dios, ne bíʼnibe ni neca nagana ni gunabaʼ Dios laabe gúnibe. Nga runi para gaca xhamígunu Jiobá la? naquiiñeʼ gúninu ni riuláʼdxibe, casi biʼniʼ Abrahán ne casi huayuni Maestru Ni Jma Nanna Gusiidiʼ que (Génesis 22:1-14; Juan 8:28, 29; Hebreos 11:8, 17-19).
Xiñee guca Abrahán «xhamigu Dios».
Jesús gudxi ca apóstol stiʼ: «Laatu nga xhamigua pa guni tu ni rabeʼ» (Juan 15:14). Cumu guiráʼ ni biʼniʼ mandar Jesús que zeeda ni de Jiobá la? nga runi ca xhamígube nga ca binni ni runi cani biʼniʼ mandar Dios. Guiráʼ ca xhamígube gunnaxhiicaʼ Dios.
Tuudxi de cani jma guca xhamigu Maestru Ni Jma Nanna Gusiidiʼ que nga ca apóstol stibe, zuuyuʼ laacabe lu dibuju zeeda lu yaza 75. Ca apóstol que guzánecaʼ laabe ne gucanecaʼ laabe gucheechebe diidxaʼ. Jesús nabé guyuu ra nuucabe. Gudócabe, guníʼcabe de Dios ne bíʼnicabe stale cosa juntu. Peru Jesús gúparuʼ jma xhamigu. Guyuu tiru biaanabe ralídxicaʼ ne guyuunebe laacaʼ nayecheʼ ti ratu.
Jesús nabé guyuulaʼdxiʼ guiaana ralidxi ti familia ni nabeza Betania, ti guidxi nuu gaxha de Jerusalén, guidxi roʼ que. Ñee rietenaláʼdxiluʼ tu laacabe la?... María, Marta ne bizáʼnacabe Lázaro. Jesús guníʼ naca xhamigu Lázaro (Juan 11:1, 5, 11). Jesús gunnaxhiibe ca binni riʼ ne guyuuláʼdxipebe chúʼnebe laacaʼ purtiʼ gunnaxhiicaʼ Jiobá ne bíʼnicaʼ ni nabe.
Xiñee biaana Jesús stale tiru ra nuu familia riʼ ora riebe Jerusalén. Ñee nannuʼ tu lácabe la?
Qué riníʼ diʼ nga qué ñaca Jesús nachaʼhuiʼ ne binni ni qué ñuni ni na Dios, sínuque gúcabe nachaʼhuiʼ ne laacaʼ, dede guyebe ralídxicaʼ ne gudonebe laacaʼ. Pur nga, guyuu binni guníʼ guca xhamigu Jesús cani runi cobrar impuestu ne cani qué rulabi ley (Mateo 11:19). Peru Jesús qué ñe diʼ ralídxicabe purtiʼ riulaʼdxiʼ modo nabánicabe, sínuque yegánnabe ca binni riʼ para guiníʼnebe laacaʼ de Jiobá. Bíʼnibe stipa para gacanebe laacaʼ guchaacaʼ modo nabánicaʼ ne gúnicaʼ ni na Dios.
Xiñee gudxiʼbaʼ Zaqueu lu ti yaga.
Zacá guca ti biaje, ora zidiʼdiʼ Jesús guidxi stiʼ Jericó para cheʼ Jerusalén. Ti hombre láʼ Zaqueu nuu guʼyaʼ Jesús, peru qué ganda diʼ purtiʼ nuu stale binni raqué ne laabe nachúcube. Ngue runi bixooñebe ne gudxíʼbabe lu ti yaga para ganda gúʼyabe Jesús ora tiidiʼ.
Ora bidxiña Jesús ra nuu yaga que la? gundisaʼ íquebe ne guniʼbe: guca purá biete, purtiʼ yanadxí ziaa raliʼdxuʼ. Peru Zaqueu guca ti hombre ricu ni biʼniʼ cosa malu. Xiñee guníʼ Jesús cheʼ ralidxi ti hombre zacá yaʼ....
Cadi purtiʼ diʼ riulaʼdxiʼ Jesús modo nabánibe, sínuque purtiʼ racaláʼdxibe guiníʼnebe laa de Dios. Biiyabe biʼniʼ hombre que stale stipa pur guʼyaʼ laabe, ne pur ngue gúnnabe nuu Zaqueu listu para gucaadiaga laabe. Galanpeʼ ngue cheʼ Jesús ralídxibe para guiniʼné laabe ximodo ndiʼ na Dios guibani binni.
Xiñee yeganna Jesús Zaqueu, ne xi guníʼ hombre riʼ zuni.
Casi rúʼyanu lu dibuju riʼ, xi guca óraque yaʼ.... Zaqueu guyuulaʼdxiʼ cani bisiidiʼ Jesús que. Biuubaʼ laabe pur gudxítebe binni ne guniʼbe zudxiguétabe bueltu ni guláʼnabe sticaʼ. Despué gúcabe discípulo stiʼ Jesús ne oraqueruʼ guca xhamígube laa (Lucas 19:1-10).
Pa chinándanu casi modo biʼniʼ Maestru Ni Jma Nanna Gusiidiʼ que, ñee zigánnanu binni ni cadi xhamígunu la?... Zigánnanu pue. Peru qué ziuudinu ralídxicabe purtiʼ riuláʼdxinu modo nabánicabe nin para guninenu laacabe cosa malu. Zigánnanu laacabe para guinínenu laacabe de Dios.
Cani dxandipeʼ xhamígunu laacaʼ nga cani jma riuláʼdxinu chuʼnu ra nuucaʼ. Peru para gannuʼ tuu nga naquiiñeʼ gaca xhamíguluʼ la? naquiiñeʼ gúnicabe ni riulaʼdxiʼ Dios. Zándaca qué gánnacabe tuu nga Jiobá, peru pa nuucabe guiziidicabe de laabe la? zanda gacanenu laacabe. Ne ora maʼ nadxiicabe Jiobá cásica laanu la? óraca maʼ zanda gaca xhamígunu laacabe.
Nuu sti modo gánnanu tuu nga zanda gaca xhamígunu. Biiyaʼ xi guiráʼ rúnibe. Ñee riuláʼdxibe gúnibe xiixa ni guchiichi sti binni la? Cadi galán diʼ nga, njaʼ.... Ñee nabé riuube lu guendanagana la? Qué ñuláʼdxidiluʼ ñuuluʼ lu guendanagana pur idxaagaluʼ laabe, njaʼ.... O rúnipebe cosa malu ne riníʼ íquebe guizáʼ listu laabe purtiʼ qué ránnacabe pa laabe rúnibe cani. Neca guirutiʼ tu ruuyaʼ laabe, peru Dios cayuuyaʼ xi cayúnibe, cadi dxandíʼ la?... Ñee raʼbuʼ naquiiñeʼ gaca xhamígunu binni ni runi guiráʼ nga la?...
Xiñee qué cueeluʼ Biblia stiluʼ. Guidúʼyanu xi cayabi ni laanu de modo rucaa ca xhamígunu riʼ laanu gúninu xiixa. Zadxélanu textu ca ndaaniʼ 1 Corintios, capítulo 15, versículo 33. Maʼ nápaluʼ ni la?... Nani sicaríʼ: «Peru cadi udii tu lugar chuʼ tu quite laatu. Casi na cabe: “Pa idxaagu ni nadxaba la? zacá ni lii”». Nga riníʼ pa sánenu binni ni runi cosa malu la? zándaca gúninu cani. Peru laaca dxandíʼ nga pa sánenu binni nachaʼhuiʼ la? zacanecaʼ laanu gúninu ni galán.
Cadi chuʼ dxi guiaandaʼ laanu, Binni ni jma risaca lu xquendanabáninu nga Jiobá. Qué racaláʼdxidinu gusaana de gaca xhamígunu laabe, njaʼ.... Nga runi naquiiñeʼ gúninu stipa pur gaca xhamígunu binni si ni nadxii Dios.
Ca textu ni culuíʼ laanu pabiáʼ risaca nga guyúbinu tuu ndiʼ zanda gaca xhamígunu zeeda cani ndaaniʼ Salmo 119:115; Proverbios 13:20; 2 Timoteo 2:22, ne 1 Juan 2:15.
Laaca zándaca ziuuláʼdxiluʼ ca ndiʼ
Libru stinneʼ de ca historia stiʼ Biblia
Abraham, xhamigu Dios
JESÚS: NEZA, NI DXANDÍʼ NE GUENDANABANI
Bisianda Jesús chupa ciegu ne gucané Zaqueo
¿Ñee biaʼsi nga ni riníʼ Biblia ora caníʼ bisianda Jesús ti hombre ciegu gaxha de Jericó la?
