JESÚS biinaʼ ora guti Lázaro xhamígube. Ñee raʼbuʼ qué ñuu Jiobá triste ora bininácabe ne biiticabe Xiiñibe la?... Biblia na nuu tuudxi cosa ni runiná ne rusiuubaʼ ladxidóʼ Dios (Salmo 78:40, 41; Juan 11:35).

Riníʼ íqueluʼ pabiáʼ gucaná Jiobá ora biiyabe guti Xiiñibe ni nadxiibe la?... Jesús nannadxichi qué zusiaandaʼ diʼ Dios laa. Ngue runi, ndiʼ nga ca diidxaʼ ni guniʼbe ante gátibe: Bixhozeʼ, lu naluʼ rusaanaʼ xquendanabaneʼ (Lucas 23:46).

Jesús nannadxichi zandisaʼ Dios laa, ne qué zusaanaʼ diʼ laabe «lade gueʼtuʼ», o ndaaniʼ baʼ. Biasa si Jesús la? apóstol Pedru guniʼbe ni maca cá ndaaniʼ Biblia de Maestru Ni Jma Nanna Gusiidiʼ que sicaríʼ: «Qué ziaana di[be] lade gueʼtuʼ ne qué ziuʼdxu cuerpu stiʼ[be]» (Hechos 2:31; Salmo 16:10). Cumu cadi xadxí diʼ biaana xcuerpu Jesús ndaaniʼ baʼ la? ngue runi qué ñuʼdxuʼ diʼ ni ne qué nindáʼ dxabaʼ diʼ ni.

Nuuruʼ Jesús lu Guidxilayú riʼ ora gúdxibe ca discípulo stibe qué ziaanadibe stale dxi ndaaniʼ  yu. Bisiénebe laacaʼ zuuticabe laabe ne lu chonna gubidxa ziásabe (Lucas 9:22). Ngue runi ca discípulo que qué gápacaʼ xi pur guidxagayaacaʼ ora guiasa Jesús. Peru, bidxagayaacabe la?... Guidúʼyanu xi guca.

Maestru Ni Jma Nanna Gusiidiʼ que gútibe lu yaga que ti viernes huadxí, biaʼ las tres ca. José, ti hombre ricu ni guca tobi de ca juez jma risaca que, biʼniʼ crebe Jesús, peru qué nusihuínnibe ni. Ora gúnnabe guti Jesús la? guyebe ra nuu Pilatu, xaíque stiʼ Roma, ne gúdxibe laa pa zanda guindétebe Jesús lu yaga que para gucaachibe laa. Oraqueruʼ yenebe laa ndaaniʼ ti jardín ra nuu ti baʼ.

Guluusibe xcuerpu Jesús ndaaniʼ baʼ que la? gucuaabe ti guié naroʼbaʼ para bichiibe ruaani. Biaʼ si de lu guionna gubidxa que, ti domingu. Caʼruʼ guiree Gubidxa, nacáhuiruʼ. Ora ca ni ruzaaquiʼ guʼxhuʼ que biseendacaʼ tuudxi soldadu para gápacaʼ baʼ que. Ñee nannuʼ xiñee la?...

Ca ni ruzaaquiʼ guʼxhuʼ que binadiágacaʼ guníʼ Jesús ziasa lade gueʼtuʼ. Ngue runi biseendacabe tu gapa raqué para cadi cuanaʼ ca discípulo que xcuerpu Jesús ne óraque guiniʼcaʼ maʼ biásabe lade gueʼtuʼ. Peru málasi biniibi guidxilayú ne bihuinni ti biaaniʼ lu guelacahui que. ¡Naca si ni ti ángel stiʼ Jiobá! Ca soldadu que guizáʼ bidxíbicaʼ dede qué ñanda niniibicaʼ. Ángel que guyé ra baʼ que ne gulee guié ni nuu ruaani. ¡Guirutiʼ nuu ndaaniʼ baʼ que!

Guca ca diidxaʼ ni guníʼ apóstol Pedru riʼ: «Jesús [...] undisa Dios [laa] de lade gueʼtuʼ» (Hechos 2:32). Dios bisibani Jesús ne bidiibe laa ti cuerpu cásica ni gúpabe ante gueedabe lu Guidxilayú riʼ. Gundísabe laa ne ti cuerpu ni qué rihuinni cásica stiʼ ti ángel (1 Pedro 3:18). Peru para ganda guʼyaʼ binni laabe la?  naquiiñeʼ guihuínnibe nezalucaʼ ne ti cuerpu de beela. Bíʼnibe ni la?... Guidúʼyanu.

Maʼ caree Gubidxa. Ca soldadu que maʼ zeecaʼ, María Magdalena ne stuudxi gunaa ni nácacaʼ xpinni Jesús zeecaʼ ziguuyacaʼ baʼ que, ne ziníʼ stiidxacaʼ: Tu cuee guié ca ruaa baʼ ca yaʼ, guizáʼ nanaa ni (Marcos 16:3). Peru ora guyuucabe raqué la? biiyacabe mápeca guyuu tu gulee ni. Ne laaca bidxagayaacabe ora biiyacabe nadachi nuu baʼ que ne gueʼtuʼ que maʼ qué guinni. María Magdalena biree guxooñeʼ zitidxi ni ca apóstol stiʼ Jesús.

Stuudxi gunaa que biaanacaʼ ra nuu baʼ que ne caniʼcaʼ paraa nuu xcuerpu Jesús. Málasi bihuinni chupa hombre dede ruzaaniʼ xhaba. ¡Ángel laacabe! Para gúdxicabe ca gunaa que: Xiñee cuyúbitu Jesús raríʼ. Maʼ biásabe. Lachitidxi ni ca discípulo stibe. Zanda guiníʼ íqueluʼ pabiáʼ nadipaʼ bixooñecabe. Lu neza que bidxagalú ti hombre laacabe. Ñee nannuʼ tu laabe la?

Jesús ngue bihuinni nezalúcabe ne ti cuerpu de beela. Para na rabi laacabe: Lachitidxi ca discípulo stinneʼ. Ca gunaa que guizáʼ biéchecaʼ. Ora bidxíñacabe ra nuu ca discípulo que la? gúdxicabe laacaʼ: ¡Nabani Jesús! ¡Maʼ bíʼyadu laabe! María Magdalena mápeca gúdxibe Pedru ne Juan guirutiʼ guinni ndaaniʼ baʼ que, ne guiropa apóstol que yeguuyacaʼ pa dxandíʼ ni, casi modo ruuyaluʼ lu dibuju ca. Pedru ne Juan biiyadxísicaʼ venda sicarú ni birenda Jesús que ne qué guidxélacaʼ xi guiníʼ íquecaʼ. Nuucabe guni crécabe maʼ bibani Jesús sti biaje, peru para laacabe nagánapeʼ ngue para guni crécabe ni.

Laaca domingu queca, qué nindaa de ni guca que, Jesús bihuinni nezalú chupa de ca discípulo stiʼ ni zecaʼ ti guidxihuiiniʼ la Emaús. Neca zizá Jesús cuéʼcabe ne ziniʼné laacabe, qué ñunibiáʼcabe laabe purtiʼ cadi ngueca diʼ xcuérpube neca de beela ni.  Peru despué gudócabe juntu ne óraruʼ biʼniʼ orar Jesús la? oraqueruʼ binibiáʼcabe laa. Ca discípulo que biéchecaʼ stale ngue runi nagueendaca bibiguétacabe Jerusalén, riaana ni stale kilómetru de ra nuucabe. Zándaca jma huadxíhuiiniʼ nga ora bihuinni Jesús nezalú Pedru para guluiʼbe laa nabánibe.

Huaxhinni que la? stale de ca discípulo stibe nuucaʼ ndaaniʼ ti yoo ne daʼguʼ puertaʼ que, málasi bihuinni Jesús galaa de laacabe. Oraqueruʼ gúnnacabe dxandipeʼ bibani Maestru Ni Jma Nanna Gusiidiʼ que sti biaje. ¡Guníʼ ique si pabiáʼ biéchecabe! (Mateo 28:1-15; Lucas 24:1-49; Juan 19:38–20:21.)

Biaʼ cuarenta dxi bihuinni Jesús nezalú ca xpinni ne gadxé  gadxé cuerpu de beela para gusihuínnibe nabánibe. Despué bisaanabe Guidxilayú ne bibiguétabe guibáʼ, ra nuu Bixhózebe (Hechos 1:9-11). Oraqueca bizulú ca discípulo que gúdxicaʼ guiráʼ binni que maʼ gundisaʼ Dios Jesús lade gueʼtuʼ. Neca gudiñe ca ni ruzaaquiʼ guʼxhuʼ que laacabe ne biʼniʼ mandarcaʼ gati tuudxi de laacabe la? qué nusaanadícabe de nucheechecabe diidxaʼ. Nánnacabe pa gáticabe la? Dios zietenalaʼdxiʼ laacabe, cásica bietenaláʼdxibe Xiiñibe.

¡Guizáʼ gadxepeʼ modo guca ca primé xpinni Jesús que de stale binni ni nuu yanna! Nuu guidxi, ora randa dxi biasa Jesús lade gueʼtuʼ la? ni riníʼ ique si stale binni nga de coneju ne dxita de guiráʼ color para Pascua. Peru Biblia cadi caníʼ diʼ nin ti biaje de coneju nin de dxita para Pascua. Ni caníʼ ni nga gúninu ni na Dios.

Laanu laaca zanda gácanu casi ca discípulo stiʼ Jesús pa guinínenu binni pabiáʼ ndiʼ sicarú gundisaʼ Dios Xiiñiʼ lade gueʼtuʼ. Qué chuʼ dxi guidxíbinu, neca guiníʼcabe zuuticabe laanu. Ne pa gátinu la? Jiobá zietenalaʼdxiʼ laanu ne zandisaʼ laanu, casi bíʼnibe ne Jesús.

Cadi dxandíʼ riéchenu ora gánnanu rietenalaʼdxiʼ Dios ca xpinni ne dede zandísabe laacaʼ la?... Ora rizíʼdinu ca ndiʼ la? rucaa cani laanu guyúbinu ximodo gusiéchenu Dios. Ñee nannuʼ laaca zanda gusiéchenu Dios la?... Lu sti capítulo ca zaninu de laani.