ÑEE riníʼneluʼ Jiobá Dios la?... Laabe nabe guʼnuʼ ni. Ora riníʼneluʼ Dios la? cayuni orarluʼ ngue. Jesús nabé guyuuláʼdxibe guiníʼnebe Bixhózebe ora maʼ nuube stúbibe. Biblia na ti dxi «udxiʼba be lú ti dani yeníʼ né be Dios, dede bixhinni be raqué, stubi lucha be» (Mateo 14:23).

Paraa zanda guni orarluʼ Jiobá lii si yaʼ.... Zándaca gúniluʼ ni ndaaniʼ lídxiluʼ ante gátaluʼ. Jesús guníʼ: «Ora chi iníʼ né tu Dios la? lachuu ndaani lidxi tu, lauseegu ra puerta ne lainíʼ né Bixhoze tu» (Mateo 6:6). Riníʼneluʼ Dios guiráʼ gueelaʼ ante gásiluʼ la?... Naquiiñeʼ gúniluʼ ni.

Jesús laaca biʼniʼ orar ora guyuuné stuudxi binni. Ora guti xhamígube Lázaro, biʼniʼ orarnebe xcaadxi binni ra bigaachiʼ Lázaro  que (Juan 11:41, 42). Jesús laaca biʼniʼ orarbe ora bidagulisaanebe ca discípulo stibe. Ñee rieluʼ ra riziidicabe de Dios ne ra runi orárcabe la?... Racá la? jma nga runi orar ti binni huaniisi. Naquiiñeʼ gucaadiaga chaahuiluʼ guiráʼ ni riniʼbe, purtiʼ caníʼnebe Dios pur lii. Óraque zanda guiniʼluʼ «amén» ra guiluxe oración que. Nannuʼ xiñee rininu «amén» la?... Purtiʼ zacá rusihuínninu guyuuláʼdxinu oración que, ne cayúninu oración ca stinu.

Jesús laaca biʼniʼ orar ante gó gueta, bidiibe xquixe Dios pur ca guendaró que. Lii yaʼ, runi orarluʼ Dios ante goloʼ gueta la?... Galán nga gudiʼnu xquíxepeʼ Jiobá ante guidoʼno. Nuu tiru sti binni runi ni. Peru pa cayoloʼ lii si o ne tuuxa ni qué rudii xquíxepeʼ Jiobá yaʼ, xi naquiiñeʼ guʼnuʼ óraque.... Óraque la? naquiiñeʼ gúniluʼ oración stiluʼ.

Ñee naquiiñeʼ guni orarnu nadipaʼ guiráʼ ora la? O runadiaga Jiobá ca oración rúninu ndaaniʼ ladxidoʼno.... Guidúʼyanu xi guca Nehemías. Laabe gúcabe ti xpinni Jiobá, ne bíʼnibe dxiiñaʼ ra palaciu stiʼ rey persa ni láʼ Artajerjes. Ti dxi Nehemías nabé guyuube triste ra gúnnabe caʼruʼ guiasa ca lindaa stiʼ Jerusalén, capital stiʼ xquídxibe.

 Ora gunabadiidxaʼ Rey que Nehemías xiñee nuu triste la? primé ca ni biʼniʼ Nehemías nga biʼniʼ orarbe ndaaniʼ ladxidoʼbe. Despué, gúdxibe rey que xiñee nuube zaqué ne gúdxibe laa pa zanda chebe Jerusalén para guindísabe ca lindaa stiʼ guidxi que. Xi guca yaʼ....

Dios bicabi oración stiʼ Nehemías. Rey que bidii lugar chebe, ne bidiibe Nehemías stale yaga para guindísacabe ca lindaa que. Casi bíʼyanu riʼ, Dios zanda guicabi ca oración stinu neca gúninu ni ndaaniʼ ladxidoʼno (Nehemías 1:2, 3; 2:4-8).

Ñee naquiiñeʼ guindete íquenu para guni orarnu la? O naquiiñeʼ guzuxíbinu. Lii xi raʼbuʼ.... Nuu tiru bizuxibi Jesús para biʼniʼ orar, ne  guyuu tiru bizuhuaabe. Laaca gundisaʼ íquebe guibáʼ, casi dxi biʼniʼ orarbe pur Lázaro que.

Xi rusihuinni ndiʼ yaʼ.... Rusihuinni ni qué risaca diʼ pa guzuhuaʼnu o guzuxíbinu. Nuu tiru zándaca jma galán nga guindete íquenu ne gutágunu lunu. Ne nuu tiru zándaca guzuxíbiluʼ, casi biʼniʼ Jesús. Peru bietenalaʼdxiʼ: zanda guni orarnu Dios ora tiisi, cásica ridxíʼ zaqueca huaxhinni, ne laabe zucaadiágabe laanu. Ni risaca nga guni crenu cucaadiaga Jiobá laanu. Runi creluʼ ni la?...

Xi naquiiñeʼ guininu lu oración stinu yaʼ.... Gudxi naa: ora runi orarluʼ, xi rábiluʼ Dios.... Jiobá rudii laanu stale cosa galán. Cadi dxandíʼ nga naquiiñeʼ gudiʼnu xquíxepeʼ Dios pur guirani la?... Nécapeʼ galán nga gudiʼnu xquíxepeʼ Dios pur cani ridoʼno, huadiiluʼ xquíxepeʼ laabe pur guibáʼ ca, ca yaga ca ne ca guieʼ sicarú ca la?... Laabe nga bizaʼbe cani.

Ti dxi, ca discípulo stiʼ Jesús gúdxicaʼ laabe gusiidibe laacaʼ guni orarcaʼ. Maestru Ni Jma Nanna Gusiidiʼ que bisiidiʼ laacabe xii nga cani jma risaca ne naquiiñeʼ guinábacabe ora guni orárcabe. Nannuʼ xi laacani la?... Pa guxháleluʼ Biblia stiluʼ lu Mateo, capítulo 6, versículo 9 dede 13, racá zadxélaluʼ oración ni runibiáʼcabe casi padrenuestro. Gúʼndanu ni.

 Casi maʼ bíʼndanu ca, Jesús guníʼ guinábanu lu oración stinu guisaca lá Dios. Tu láʼ Dios yaʼ.... Ngapeʼ, Jiobá, ne naquiiñeʼ gannaxhiinu labe.

Guiropa, Jesús bisiidiʼ laanu guinábanu guidxiña dxi guni mandar Gobiernu stiʼ Dios. Gobiernu riʼ nabé risaca ni purtiʼ laani chiguedané ni guendariuudxi lu Guidxilayú riʼ ne zúnibe ni ti paraísu.

Guionna, Maestru Ni Jma Nanna Gusiidiʼ que guníʼ naquiiñeʼ guni orarnu para gaca ni na Dios lu Guidxilayú riʼ cásica raca ni guibáʼ. Pa guinábanu ndiʼ la? laaca naquiiñeʼ gúninu ni riuláʼdxibe, gúninu ni nabe.

Despué, bisiidiʼ Jesús laanu guinábanu pur ni guidoʼno guiráʼ dxi. Ne laaca guniʼbe naquiiñeʼ gaca arrepentirnu ne guinábanu guni perdonar Dios donda stinu. Peru, pa racaláʼdxinu guni perdonar Dios stóndanu la? naquiiñeʼ guni perdonarnu donda stiʼ cani bicheené laanu. Ñee raca nagana para lii guni perdonarluʼ la?...

Últimu la? bisiidiʼ Jesús laanu guinábanu Jiobá Dios gapa laanu de Binidxabaʼ. Zanda guzeetenu lu oración stinu guiráʼ cani maʼ guninu riʼ.

Naquiiñeʼ guni crenu rucaadiaga Jiobá ca oración stinu. Peru, cadi guinábasinu gacanebe laanu, sínuque laaca naquiiñeʼ gudiʼnu xquíxepeʼ laabe. Laabe riéchebe ora lu oración stinu rininu ni runi sentirnu ne guinábanu ni riuláʼdxibe. Ne nánnanu zudiibe laanu ni guinábanu. Runi creluʼ nga la?...