ORA biniisi Jesús ne gúnnabe ximodo gupa Jiobá laabe dxi nahuiinibe, rábiluʼ biʼniʼ orarbe Bixhózebe para gudiibe xquíxepeʼ laa la?... Nouʼ xi gúdxibe María ne José ora gúnnabe yenecaʼ laabe Egipto para bilabe yaʼ....

Ya, Jesús maʼ cadi ti baʼduhuiiniʼ diʼ laa ne maʼ cadi nabézadibe lu Guidxilayú riʼ casi dxiqué. Peru, ñee huayuuyaluʼ nuu stale binni yanna riʼ, ruuyacabe Jesús casi ti baʼduhuiiniʼ ni nexheʼ ra ró maniʼ guixi la?... Stale guidxi ruuyacabe Jesús zacá, ne jma nga ora randa Navidad.

Neca maʼ qué guinni Jesús lu Guidxilayú riʼ, ñee raʼbuʼ nabánirube la?... Nabánibe pue; Dios gundisaʼ laabe ne yanna maʼ nácabe ti Rey guizáʼ nadipaʼ ni nuu guibáʼ. Yanna, ximodo raʼbuʼ zanda gápabe ca xpínnibe yaʼ.... Dxi bibani Jesús lu Guidxilayú riʼ bisihuínnibe zanda gulabe cani nadxii laabe. Guidúʼyanu ximodo bíʼnibe ni ti dxi, ora nuube ndaaniʼ ti barcuhuiiniʼ ne ca discípulo stibe.

Dxi que maʼ zixhinni, ne Jesús bisiidiʼ guidubi dxi que gaxha de nisadóʼ stiʼ  Galilea, ti nisa roʼbaʼ nexhedxí ni napa biaʼ gande kilómetru de ziuulaʼ ne doce de nalaga. Para rábibe ca discípulo stibe: «Chuu cherica nisa riʼ». Óraque gudxíʼbacabe ndaaniʼ ti barcuhuiiniʼ ne zécabe lu nisa que. Cumu Jesús guizáʼ maʼ bidxaga la? guyebe atrá de barcuhuiiniʼ que ne gúʼtabe lu ti almuhada. Oraqueca gucuá bacaandaʼ laabe.

Ca discípulo que gutanacaʼ para gúʼyacaʼ paneza chinecaʼ barcuhuiiniʼ que. Zécacabe galán, málasi biaba ti bi guizáʼ nadipaʼ. Zeʼ ora jma nadipaʼ ziyaca bi que, ne nisadóʼ que ziyácani jma nadipaʼ. Ca ola que cadxelasaacaʼ cueʼ barcuhuiiniʼ que, ne bizulú bidxá nisa ndaaniʼ ni.

Ca discípulo que bidxíbicaʼ pa guiaaziʼ barcu que. Laga cayaca ngue la? Jesús nisiaasiʼ nin ganna xi cayaca. Para bicuaani ca discípulo que laabe ne rábicaʼ laabe: Maestru, Maestru, bilá laanu, zátinu raríʼ. Ora binadiaga Jesús ngue, biásabe ne gúdxibe bi que ne nisadóʼ que, ne rábibe laacaʼ: ¡Lachuudxí!

Oraqueca guleza bi que, ne nisadóʼ que gutadxí.  Ca discípulo que guizáʼ bidxagayaacaʼ, purtiʼ qué huayuu dxi gúʼyacabe xiixa casi ni guca que. Guníʼ saacabe ne nácabe: «Tu laabe pue. Riníʼ né be bi ne nisa, ne ruzuuba cani stiidxa be» (Lucas 8:22-25; Marcos 4:35-41).

Lii yaʼ, ñee nánnaluʼ tuu nga Jesús la?... De paraa beeda poder stibe pue.... Ca discípulo que cadi naquiiñeʼ diʼ nidxíbicabe laga nuuné Jesús laacabe, purtiʼ cadi casi xcaadxi hombre laabe. Zanda gúnibe stale cosa ni raca nagana para binni guni. Chitidxeʼ lii xi bíʼnibe ora biaba sti bi cásica ni gudiʼdiʼ riʼ.

Caadxi dxi despué de ni guca riʼ. Ti huadxí gudxi Jesús ca discípulo stiʼ guicaacaʼ ti barcuhuiiniʼ ne tiidicaʼ sti guriá nisa que ne cuézacaʼ laabe raqué. Para bireebe laasibe zebe lu ti dani, purtiʼ raqué nuudxí ne zanda guni orarbe Bixhózebe, Jiobá Dios.

Ca discípulo que gudxíʼbacabe ndaaniʼ barcuhuiiniʼ que ne  zécabe lu nisa que. Peru ratuhuiiniʼ de zécabe que bizulú bindubi bi, ne zeʼ ora jma nadipaʼ ziyaca. Maʼ huaxhinni óraque. Laacabe bitópacabe lari stiʼ barcuhuiiniʼ que ne zécabe, peru qué ganda chécabe nagueenda purtiʼ cadxaagalúcabe bi que guizáʼ nadipaʼ. Barcuhuiiniʼ que riete ne riguiʼbaʼ lade ca ola que, ne zidxaruʼ jma nisa ndaaniʼ ni. Ca discípulo que cayúnicaʼ stale stipa pur chindacaʼ guriá que peru que ganda diʼ.

Maʼ bindaa Jesús de nuu laasi lu dani que. Ora bíʼyabe xi cayaca ca xhamígube lade ca ola ngola que, biétebe dede guriá nisa que. Cumu nuube gacanebe laacaʼ la? guzabe lu nisa que zidxíñabe laacaʼ lu nisadóʼ ni cadi nuudxí que.

Xi ñaca pa ñacaláʼdxiluʼ nizaluʼ lu nisa yaʼ.... Ñaaziluʼ ne ñándaca ñátiluʼ guiiguʼ. Peru Jesús gadxé laa purtiʼ nápabe poder ni qué gapa guirutiʼ. Para guidxíñabe dede ra nuu barcu que, gúpabe xi guzabe xiroobaʼ. Maʼ zeeda guirá gueelaʼ ngue ora biʼyaʼ ca discípulo que zidxíñabe laacaʼ zizabe lu nisa que. Laacabe qué guirá guidxagayaacabe ni cayuuyacabe que. Guizáʼ bidxíbicabe dede bicaacabe ridxi. Óraque gudxi Jesús laacabe: «Lachuu dxí. Cadi idxibi tu, naa ndiʼ».

Casi gudxiʼbaʼ Jesús ndaaniʼ barcu que la? gulezadxí bi ne ola que. Ca discípulo que bidxagayaacabe sti biaje. Bizuxíbicabe xañeebe ne gúdxicabe laabe: «Dxandí pe Xiiñi Dios lii» (Mateo 14:22-33; Juan 6:16-21).

Cadi galanpeʼ nga nibáninu ca dxi que para ñúʼyanu ximodo biʼniʼ Jesús ca milagru que la?... Ñee nánnaluʼ xiñee bíʼnibe cani la?... Purtiʼ gunnaxhiibe ca discípulo stibe ne guyuuláʼdxibe gacanebe laacaʼ. Ne gucaláʼdxibe gusihuínnibe pabiáʼ poder nápabe, ne laani nga zaquiiñebe ora guni mandarbe casi Rey lu Reinu stiʼ Dios.

 Yanna riʼ, Jesús laaca riquiiñebe poder stibe para gápabe ca xpínnibe ora gacalaʼdxiʼ Binidxabaʼ gucueeza laacaʼ de guiníʼnecaʼ binni de Reinu stiʼ Dios. Peru qué riquiiñedibe ni para gusiándabe o para cadi gaca huará ca xpínnibe. Dede ca apóstol stibe gúticaʼ despué. Jacobo, biʼchiʼ Juan, biiticabe laa, ne Juan la? bitaguyoocabe laa (Hechos 12:2; Apocalipsis 1:9).

Ca dxi stinu riʼ laaca zaqueca raca. Neca guni binni ni na Jiobá o coʼ, guiranu raca huaranu ne rátinu. Peru ora maʼ guni mandar Jesús casi Rey stiʼ Reinu stiʼ Dios la? guirani zadxaa. Qué zapa binni xi pur guidxibi, purtiʼ Jesús zaquiiñeʼ poder stiʼ para uguu ndaayaʼ guiráʼ ni guzuubaʼ stiidxabe (Isaías 9:6, 7).