XI JMA riuláʼdxiluʼ: gúniluʼ dxiiñaʼ la? o quíteluʼ.... Ya, cadi malu diʼ nga quite binni. Biblia na bidxá Jerusalén de hombrehuiiniʼ ne dxaapahuiiniʼ ni gudxítecaʼ luguiaa stiʼ ni (Zacarías 8:5).

Maestru Ni Jma Nanna Gusiidiʼ que guyuuláʼdxibe gúʼyabe quite ca baʼduʼ que. Ante gueedabe lu Guidxilayú riʼ, guniʼbe: Guyuaa gaxha de Dios casi tobi ni runi xhiiñabe jnézapeʼ ne guyuaa nayecheʼ nezalube guiráʼ ora. Ca diidxaʼ riʼ rusihuinni cani biʼniʼ Jesús dxiiñaʼ ne Jiobá guibáʼ. Laaca raqué nuube ora guniʼbe sicaríʼ: «Cani gunnaxhiee nga ca xiiñiʼ binni guidxilayú». Casi bizíʼdinu lu ca capítulo ni maʼ gudídinu ca, Maestru Ni Jma Nanna Gusiidiʼ que nabé guyuuláʼdxibe gacanebe  binni guidxilayú, dede ne baʼduʼ (Proverbios 8:30, 31).

Ñee raʼbuʼ gudxite Jesús dxi guca nahuiiniʼ la?... Zándaca. Peru cumu dxi guyuube guibáʼ gúcabe tobi ni runi dxiiñaʼ jnézapeʼ la? ñee cadi raʼbuʼ laaca bíʼnibe dxiiñaʼ lu Guidxilayú riʼ la?... Neca gúdxicabe laabe «xiiñi carpinteru», laaca gúdxicabe laabe «carpinteru». Xi riníʼ nga yaʼ.... Riníʼ ni bisiidiʼ José laabe dxiiñaʼ ni runi purtiʼ laa nga bisiniisi laabe casi xiiñiʼ. Nga runi guca Jesús ti carpinteru (Mateo 13:55; Marcos 6:3).

Ñee biʼniʼ Jesús dxiiñaʼ de carpinteru ca jneza la?... Cumu dxi guyuube guibáʼ gúcabe tobi ni biʼniʼ dxiiñaʼ jnézapeʼ la?  ñee cadi raʼbuʼ laaca zacaca gúcabe dxi guyuube lu Guidxilayú ne bíʼnibe dxiiñaʼ de carpinteru la?... Guníʼ ique si pabiáʼ nadipaʼ guca dxiiñaʼ de carpinteru ca dxiqué. Zándaca biyubi Jesús ti yaga, óraque bisábabe ni, bigabe ni pur trozo, ne yenebe yaga ca ra yoo ne bíʼnibe ni mexaʼ, banguʼ ne stuudxi cosa.

Ñee raʼbuʼ guyuulaʼdxiʼ Jesús guni dxiiñaʼ riʼ la?... Ñécheluʼ pa ñúniluʼ mexaʼ, banguʼ ni galán ne stuudxi cosa para niquiiñeʼ binni la?... Biblia na galán nga «guiechené binni xhiiñaʼ», ndiʼ ruchá ladxidoʼno ne qué ziuʼnu zacá pa puru quítesinuʼ (Eclesiastés 3:22).

Dxiiñaʼ ca galán ni para xquendabiaaninu ne zaqueca para xcuérpunu. Stale baʼduʼ ridíʼdicaʼ stale ora maʼ cayuuyacaʼ tele o maʼ caguítecaʼ maquinita, nga rusiroo laacabe ne qué rápacabe stipa. Ca baʼduʼ riʼ qué riuucabe nayecheʼ, ne qué rusiéchecabe stuudxi. Xi riquiiñeʼ gúninu para guiéchenu yaʼ....

Lu capítulo 17 que bizíʼdinu ora gudiʼnu ne gúninu xiixa pur sti binni la? rusiecheʼ ni laanu (Hechos 20:35). Biblia ruzeeteʼ Jiobá nga ti Dios nayecheʼ (1 Timoteo 1:11). Ne casi bíʼndanu ndaaniʼ Proverbios que, Jesús guyuu «nayecheʼ nezalube guiráʼ ora». Xiñee yaʼ.... Lápebe bizeetebe xiñee ora guniʼbe sicaríʼ: «Dede yanna cayuni Bixhoze dxiiñaʼ ne naa laca cayuneʼ» (Juan 5:17).

Jesús qué ñúnidiʼ dxiiñaʼ de carpinteru biaʼ dxi bibani lu Guidxilayú, purtiʼ Dios bidii laabe ti dxiiñaʼ nabé risaca. Ñee nannuʼ xi laani la?... Jesús guníʼ: «Napa xidé chaa xcaadxi guidxi. Chi güe nia binni modo runi mandar Dios, purti para nga bendáʼ» (Lucas 4:43). Ora bicheechebe diidxaʼ la? nuu stale binni ni biʼniʼ cré laabe ne guníʼnecaʼ stuudxi binni ni gúdxibe laacaʼ. Nga nga ni biʼniʼ samaritana ni ruuyaluʼ lu dibuju riʼ (Juan 4:7-15, 27-30).

 Xi guníʼ ique Jesús de dxiiñaʼ ca yaʼ. Nouʼ guyuuláʼdxibe ni la?... Laabe guniʼbe: «Endaró stinne nga gune ni na ni biseenda naa, ne gunduuxe dxiiña stiʼ» (Juan 4:34). Ximodo riuuluʼ ora goloʼ ti guendaró ni jma riuláʼdxiluʼ yaʼ.... Nga zacané lii gánnaluʼ ximodo guyuu Jesús ora bíʼnibe dxiiñaʼ ni biʼniʼ mandar Dios laabe.

Dios bizáʼ laanu para guiéchenu ora gúninu dxiiñaʼ. Laabe guniʼbe ni bisigáʼdebe binni nga «guiéchecaʼ pur dxiiñaʼ nadipaʼ rúnicaʼ». Nga runi, pa guiziidiluʼ gúniluʼ dxiiñaʼ ora nahuiiniluʼ la? ziécheluʼ biaʼ dxi guibániluʼ (Eclesiastés 5:19).

Nga qué riníʼ diʼ naquiiñeʼ guni ti baʼduʼ dxiiñaʼ ni runi ti binni huaniisi. Peru guiranu zanda gúninu xiixa dxiiñahuiiniʼ. Zándaca bixhózeluʼ ne jñaaluʼ nabé rúnicaʼ dxiiñaʼ para gápacaʼ bueltu ne ganda sicaʼ guendaró para binnilídxicaʼ ne gápacaʼ lídxicaʼ. Ne casi nánnaluʼ, ralídxiluʼ nuu stale ni gaca para chuʼ nayá ne gatachaahuiʼ cani nuu ndaaniʼ ni.

Xi dxiiñahuiiniʼ zanda gúniluʼ para gacaneluʼ binnilídxiluʼ yaʼ.... Zanda gacaneluʼ guiá lu mexaʼ, quíʼbiluʼ bladuʼ, chisaʼbuʼ guixi, gusialuʼ ra ráʼtaluʼ ne gutópaluʼ ca juguete stiluʼ. Zándaca maca ruʼnuʼ caadxi de laacani ne ruuyuʼ guizáʼ racané cani ca binnilídxiluʼ.

Guidúʼyanu ximodo racané ca dxiiñahuiiniʼ riʼ ca binnilídxiluʼ. Ora guiluxe quíteluʼ la? galán gutópaluʼ cani gudxíteluʼ. Xiñee raʼbuʼ riquiiñeʼ guʼnuʼ ni yaʼ.... Purtiʼ zacá nayá ziuu ralídxiluʼ ne qué zaca xiixa ni guniná tuuxa. Pa gusaanaluʼ ca juguete stiluʼ ratiicaʼ si, zándaca ti dxi chuʼ jñaaluʼ ra yoo ne nuabe xiixa, málasi guirenda tobi de laani ñeebe ne guiábabe. Zándaca dede ra hospital chinetu laabe. Cadi dxandíʼ guizáʼ feu nga la?... Nga runi, ora gutópaluʼ ca juguete ca zacaneluʼ guiráʼ binnilídxiluʼ.

Nuu stuudxi dxiiñahuiiniʼ laaca riquiiñeʼ guni ca baʼduʼ ca, cásixa, ca tariá stiʼ scuela. Ra scuela la? riziidiʼ binni guʼndaʼ. Nuu  baʼduʼ la? riulaʼdxiʼ ni, peru nuu tu rácani nagana para laa. Neca primé gácani nagana para lii, peru ziécheluʼ stale ora maʼ biziidiluʼ guʼndaʼ chaahuiluʼ, purtiʼ zacá zánnaluʼ stale cosa sicarú. Dede zanda lii si gúʼndaluʼ Stiidxaʼ Dios, Biblia. Nga runi pa gúniluʼ ca tariá stiluʼ jneza la? zacané ni lii stale, o cadi dxandíʼ nga la?...

Nuu binni qué riulaʼdxiʼ guni dxiiñaʼ. Zándaca runibiaʼluʼ tuuxa. Peru cumu Dios biʼniʼ laanu para gúninu dxiiñaʼ la? naquiiñeʼ guizíʼdinu guiéchenenu dxiiñaʼ stinu. Xi guníʼ ique Maestru Ni Jma Nanna Gusiidiʼ que de xhiiñaʼ yaʼ.... Guyuuláʼdxibe ni stale cásica ti guendaró ni jma riuláʼdxibe. Xi dxiiñaʼ ca yaʼ.... Guiníʼnebe stuudxi binni de Jiobá Dios ne ximodo zanda guicaacaʼ guendanabani ni qué zaluxe.

Raríʼ cá tuudxi cosa ni zacané lii chuláʼdxiluʼ dxiiñaʼ ni guʼnuʼ. Gunabadiidxaʼ laca lii: xiñee naquiiñeʼ guneʼ dxiiñahuiiniʼ riʼ. Pa nánnaluʼ xiñee risaca ni la? jma nagueenda zúniluʼ ni. Ne pa ti dxiiñaʼ roʼ ni o ti dxiiñahuiiniʼ ni la? biyubi modo guʼnuʼ ni jma galán. Zacá ziuláʼdxiluʼ dxiiñaʼ stiluʼ, cásica Maestru Ni Jma Nanna Gusiidiʼ que.