GUIRÁʼ bixhoze ne jñaa binni rúnicaʼ ti cosa ni qué rugaanda guiene binni: guirópacabe rudiicabe xiixa de laacabe para cháʼ ti baʼduhuiiniʼ ni zaniisi ndaaniʼ jñaa dede guiroobaʼ. Nga runi, qué ridxagayaadinu ora gale ti baʼduhuiiniʼ guiníʼ binni zeeda gácani casi ti milagru.

Dxandíʼ, ora gacané bixhoze ne jñaa binni cháʼ ti baʼduhuiiniʼ la? deruʼ cuzulú dxiiñaʼ stícabe nga. Ca baʼduhuiiniʼ ca riquiiñecaʼ de cani huaniisi ca lu guiráʼ ni gúnicaʼ, peru ora maʼ ziniisicaʼ maʼ cadi caquiiñesicaʼ chuʼ tu gapa laacaʼ, sínuque caquiiñeʼ chuʼ tu gacané laacaʼ guiníʼ íquecaʼ jneza, tu gapa ladxidoʼcaʼ, modo gaca xpiaʼcaʼ, ne modo guiniisicaʼ lu Stiidxaʼ Dios.

Ca baʼduʼ ca caquiiñepéʼcabe gannaxhii bixhózecabe ne jñaacabe laacabe para guiniisicabe galán. Nécaxa galán nga guiníʼcabe nadxiicabe xiiñicabe, laaca naquiiñeʼ gusihuínnicabe ni ne ni gúnicabe. Ne laaca caquiiñeʼ ca baʼduʼ ca conseju ni naquiiñeʼ chinándacaʼ dede ora naríʼnicaʼ. Purtiʼ pa cuézacabe guiniisicaʼ jma la? zanda gueeda gúnicaʼ xiixa ni guniná ladxidóʼcabe ne zacá huayácani.

Ca conseju ni jma galán ca zeeda cani ndaaniʼ Biblia. Ne dede zadxagayaaluʼ modo zacané ni laacabe, purtiʼ pur laani zanna ca baʼduʼ ca cadi de binni diʼ zeeda ni caziidicaʼ, sínuque de ni bizáʼ laacaʼ, Bixhózecaʼ ni nuu guibáʼ, purtiʼ nga rudii jma stipa ca conseju ca ne qué zanda guchaaganu ni ne stobi.

Biblia cucaa bixhoze ne jñaa binni gúnicaʼ stipa pur guzeetecaʼ ca conseju riʼ nezalú xiiñicaʼ dede guiaana ni ndaaniʼ íquecabe. Peru ora maʼ ziniisicaʼ la? jma nagana raca para bixhózecaʼ ne jñaacaʼ guiniʼné laacaʼ de ni jma naquiiñeʼ gánnacaʼ. Libru riʼ, GUIZÍʼDINU DE MAESTRU NI JMA NA NNA GUSIIDIʼ, gucuá ni para gacané ni laacabe ti cadi gaca nagana para laacabe gacanécabe xiiñicabe. Luni cá stale conseju stiʼ Dios para lii ne xiiñiluʼ ne zanda gúʼndatu cani guirópatu. Ne nabé rucaani ca baʼduʼ ca guiniʼcaʼ diidxaʼ ne binni ni gúʼndané laacaʼ libru riʼ.

Zuuyaluʼ canabaʼ libru riʼ guicabi ca baʼduʼ ca, purtiʼ lu ca yaza stini cá stale guendarinabadiidxaʼ, ne ra riluxe cani zeeda chonna puntuhuiiniʼ (...), laacani riquiiñeʼ cani para gusietenalaʼdxiʼ ni ca baʼduʼ ca ora naquiiñeʼ guiaanadxí ti ratu ne guicabi. Ca baʼduʼ ca nabé riuláʼdxicaʼ guicábicaʼ ne pa qué guiniʼcaʼ la? nagueenda rireecaʼ gana.

Peru ni jma risaca de ca guendarinabadiidxaʼ ca nga zacané ni lii gánnaluʼ xi riníʼ ique xiiñiluʼ. Zándaca cadi jneza guicábibe. Peru cani cá despué de ra canabadiidxaʼ ni ca zacané laabe guiníʼ íquebe jnézapeʼ.

Sti cosa sicarú ni napa libru riʼ nga neni jma de chupa gayuaa treinta dibuju. Guetehuiiniʼ si de laacani canabadiidxaʼ ni baʼduʼ ca ne cucaani laabe guiniʼbe ni cayuuyabe ne ni biluxe biindabe. Nga runi, biiyané xiiñiluʼ ca dibuju ca. Galanpeʼ cani, ne riquiiñeʼ cani para cadi guiaandaʼ ni guiziidicabe.

Ora maʼ guiziidiʼ xiiñiluʼ guʼndaʼ la? gudxi laabe gúʼndabe libru ca nezaluluʼ ne gúʼndabe ni laasibe, purtiʼ ora jma gúʼndabe ni la? jma ziaana ndaaniʼ íquebe ne ndaaniʼ ladxidoʼbe ca conseju galán stini. Peru para gannaxhiitu jma ne gapasaatu respetu la? naquiiñeʼ gúʼndatu libru ca guirópatu ne cadi gusaanatu de gúnitu ni.

Yanna riʼ, nabé nuu stale cosa dxabaʼ gaxha de ca baʼduhuiiniʼ ca, biaʼ qué huahuinni maʼ raca chupa chonna iza, casi gatanécabe ni cadi xheelacabe, guiniʼnécabe espíritu malu ne stuudxi cosa dxabaʼ. Nga runi caquiiñecabe gánnacabe ximodo gápacabe laacabe, ne libru riʼ cusiene chaahuiʼ laacabe ne stale respetu modo gúnicabe ni. Peru ca baʼduʼ ca jma nga caquiiñecabe guidxíñacabe Jiobá Dios, Bixhózenu ni nuu guibáʼ, purtiʼ laabe nga cudiibe guiráʼ ca guendananna stálepeʼ ca. Nga nga ni biʼniʼ Maestru Ni Jma Nanna Gusiidiʼ que guiráʼ ora. Racaláʼdxidu de guidubi ladxidoʼdo gacané libru riʼ lii ne binnilídxiluʼ para guibánitu modo riulaʼdxiʼ Jiobá ne zacá gápatu ndaayaʼ stibe guidubi naca xquendanabánitu.