Yené Nabucodonosor ca príncipe de guidxi Judá Babilonia, ne biʼniʼ mandarbe ti hombre ni runi dxiiñaʼ ra palaciu que ni láʼ Aspenaz para gapa laacabe. Laaca biʼniʼ mandarbe hombre riʼ guyubi ca hombrehuiiniʼ ni nazaaca ne ni nuu xpiaaniʼ lade ca príncipe que. Para gusiidicabe ca hombrehuiiniʼ riʼ chonna iza ti guicaacaʼ ti dxiiñaʼ risaca Babilonia. Naquiiñeʼ guiziidicabe gúʼndacabe, gucaacabe ne guiníʼcabe diidxaʼ acadio, diidxaʼ riníʼcabe Babilonia. Laaca naquiiñeʼ gócabe ca guendaró ni ró ca binni ni runi dxiiñaʼ ra palaciu stiʼ rey que. Tapa de ca hombrehuiiniʼ que lacaʼ Daniel, Hananías, Misael ne Azarías. Peru Aspenaz gulee lá laacabe casi lá ca binni de Babilonia: Beltsasar, Sadrac, Mesac ne Abednego. ¿Ñee rábiluʼ zaxeleʼ ca  hombrehuiiniʼ riʼ de Jiobá pur ni guiziidicaʼ la?

Ni jma gucalaʼdxiʼ ca hombrehuiiniʼ riʼ nga guzuubacaʼ stiidxaʼ Jiobá. Gúnnacabe cadi jneza ngue gócabe ca guendaró stiʼ rey que purtiʼ lu Ley stiʼ Jiobá ná cadi jneza gócabe caadxi de ca guendaró que. Ngue runi gúdxicabe Aspenaz: «Canábadu lii, cadi gucaaluʼ laadu guidoʼdo guendaró ni ró rey riʼ». Peru gudxi Aspenaz laacabe: «Pa qué goto guiráʼ ni ná rey ca ne gúʼyabe lutu ruluíʼ huaratu la? zuutibe naa».

Guníʼ ique Daniel guni xiixa. Gúdxibe guardia que: «Xiñee qué gudiiuʼ laadu verdura ne nisa si chii gubidxa ne despué guchaagaluʼ laadu né ca hombrehuiiniʼ ni ró guendaró stiʼ rey ca». Guyuulaʼdxiʼ guardia que ni gudxi Daniel laa.

Gudiʼdiʼ si chii gubidxa, jma nazaaca rihuinni Daniel ne xhonna xhamigu qué ca xcaadxi hombrehuiiniʼ que. Guizáʼ biecheʼ Jiobá purtiʼ bizuubaʼ ca hombrehuiiniʼ riʼ stiidxabe. Laaca bidiibe Daniel guendabiaaniʼ ti ganda guiene visión ne bacaandaʼ.

Gudiʼdiʼ si chonna iza de bisiidicabe ca hombrehuiiniʼ que, yené Aspenaz laacabe nezalú Nabucodonosor. Guyuiʼné rey que Daniel, Hananías, Misael ne Azarías diidxaʼ ne bidii cuenta jma nuu xpiaanicabe que ca xcaadxi hombrehuiiniʼ. Ngue runi gulí rey riʼ laacabe para gúnicabe dxiiñaʼ ra palaciu stiʼ. Despué, stale biaje gunabaʼ rey riʼ conseju laacabe ora chiguni xiixa cosa risaca. Gucané Jiobá laacabe gápacabe guendabiaaniʼ jma qué ca hombre nuu xpiaaniʼ ne ca magu runi xhiiñaʼ rey que.

Neca zitu nabeza Daniel, Hananías, Misael ne Azarías de xquídxicaʼ la? qué ñuu dxi nusiaandacaʼ nácacaʼ xpinni Jiobá. ¿Lii yaʼ? ¿Ñee rietenaláʼdxiluʼ de Jiobá ora qué guinni bixhózeluʼ ne jñaaluʼ ra nuuluʼ la?