Dxi ziné Jesús ti iza arondaʼ de cayuni predicar, gucuaabe ti decisión nabé risaca. Gupa xidé gulibe tuu nga cani guniné laabe dxiiñaʼ ne gapa ca xpínnibe. Ante guicaabe decisión que la? guníʼnebe Jiobá. Ngue runi guyebe lu ti dani ne raqué biʼniʼ orarbe Jiobá guidubi ti gueelaʼ. Sti dxi siadóʼ que, biʼniʼ reunirbe ca discípulo stibe ne ládecaʼ gulibe 12 apóstol. ¿Nánnaluʼ tu lácabe la? Pedro, Andrés, Santiago, Juan, Felipe, Bartolomé, Tomás, Mateo, Santiago xiiñiʼ Alfeo, Tadeo, Simón ne Judas Iscariote.

Guiráʼ ca 12 apóstol que yenándacabe Jesús ladu tiica guyé. Primeru bisiidiʼ Jesús laacabe ximodo guni predicárcabe ne despué biseendaʼ laacabe stúbicabe. Laaca bidii Jiobá laacabe poder para cueecabe demonio luguiáʼ binni ne gusiándacabe binni huará.

Para Jesús la? xhamígube nga ca 12 apóstol stibe ne gúpabe confianza laacaʼ. Ca fariseu que guníʼ íquecaʼ qué ganna ca apóstol que gastiʼ. Peru Jesús qué ñuu diʼ dxi ñuuyaʼ laacabe zacá. Laabe bisiidiʼ chaahuibe laacaʼ para gúnicaʼ dxiiñaʼ stibe. Qué zusaana ca  apóstol que Jesús ora guizaaca caadxi cosa risaca lu xquendanabani. Qué zusaanacaʼ laabe ante gátibe ne despué de guiásabe de lade gueʼtuʼ. Casi guiráʼ ca apóstol stibe de Galilea laacaʼ cásica laabe, ne guyuu de laacaʼ maʼ bichaganacaʼ.

Ca apóstol que imperfectu laacaʼ, ne guyuu biaje bicheecaʼ. Guyuu ora guniʼcaʼ xiixa sin guiníʼ íquecaʼ ne bíʼnicaʼ cosa ni cadi jneza. Guyuu ora huaxiéʼ paciencia gúpacaʼ. Dede gudinde diidxacaʼ tuu nga ni jma risaca ládecaʼ. Peru gúcacabe nachaʼhui ne gunnaxhiicabe Jiobá. Laacabe nga chigacanécabe ca xpinni Cristu ora maʼ qué guinni Jesucristu ndaaniʼ Guidxilayú.