Gudxi Jiobá Moisés: «Gudxiʼbaʼ ra nuaaʼ, lu dani riʼ. Chigucaaʼ ca ley stinneʼ lu chupa guié bata ne chigudieeʼ cani lii». Gudxiʼbaʼ Moisés lu dani que ne biaana raqué 40 dxi ne 40 gueelaʼ. Laga nuube raqué, bicaa Jiobá Chii Mandamientu lu chupa guié bata ne bidii ni laabe.

Nin qué nindaa, bizulú guníʼ ique ca israelita maʼ bisaana Moisés laacaʼ. Ngue runi gúdxicabe Aarón: «¡Racaláʼdxidu gápadu ti xaíque! ¡Biʼniʼ ti dios para laadu!». Para ná Aarón rabi laacabe: «Latané naa guiráʼ oro nápatu». Óraque, gucuaabe oro que ne biʼniʼ fundirbe ni para bíʼnibe estatua stiʼ ti yuzehuiiniʼ. Ca binni que guniʼcaʼ: «¡Yuzehuiiniʼ riʼ nga dios stidu ni gulee laadu de Egipto!». Bíʼnicaʼ ti saa ne bizulú biʼniʼ adorarcaʼ yuzehuiiniʼ de oro que. ¿Ñee rábiluʼ malu ni cayúnicabe riʼ la? Malu pue, purtiʼ guidxi que biʼniʼ prometer zuni adorar Jiobá si. Ne yanna cadi cayuni cumplircaʼ promesa bíʼnicaʼ.

 Biiyaʼ Jiobá guiráʼ ni cayúnicabe, ngue runi gúdxibe Moisés: «Biete, yeguuya guidxi ca purtiʼ maʼ cadi cuzuubacaʼ stiidxaʼ. Cayuni adorarcaʼ ti dios falsu». Biete Moisés de lu dani que naaze guiropa guié bata que.

Laga zidxiña Moisés ra nuu ca binni que, binadiágabe cayuundacaʼ. Ora yendabe, biiyabe cuyaacaʼ ne cayuni adorarcaʼ ti yuzehuiiniʼ de oro. Guizáʼ bidxiichi Moisés, bisáʼbibe guiropaʼ guié bata que layú ne gulaa cani. Óraque guyebe ne binidebe estatua que ne gunabadiidxabe Aarón: «¿Xiñee bicaacabe lii gúniluʼ cosa feu riʼ pue?». Para bicabi Aarón: «Cadi guidxiichiluʼ, nánnacouʼ ximodo laacabe. Nuucabe gápacabe ti dios, ngue runi bilaaʼ oro ca lu bele ne biree yuzehuiiniʼ riʼ». Cadi jneza ni biʼniʼ Aarón. Gudxiʼbaʼ Moisés lu dani que sti biaje ne gunábabe Jiobá guni perdonar guidxi que.

Biʼniʼ perdonar Jiobá ca israelita ni bizuubaʼ stiidxabe. ¿Ñee cadi dxandíʼ nabé risaca nga nucaadiágacabe Jiobá ne Moisés la?