Guyé chupa espía de Israel ndaaniʼ guidxi Jericó ne biaanacaʼ ra lidxi ti gunaa láʼ Rahab. Ora gunna rey stiʼ Jericó, biseendaʼ soldadu ra lidxi Rahab. Rahab bicaachiʼ guiropaʼ espía que ique lidxi ne gúdxibe ca soldadu que guyúbicaʼ ca espía que sti lugar. De raqué gudxi Rahab ca espía que: «Zacaniáʼ laatu purtiʼ nannaʼ zacané Jiobá laatu para guni ganartu guidxi riʼ. Peru laguni prometer naa, gastiʼ qué zaca familia stinneʼ».

Gudxi ca espía que Rahab: «Pa gundiibiluʼ ti doo naxiñáʼ ra ventana stiluʼ, cayuni prometerdu lii gastiʼ qué zaca guiráʼ binni ni chuʼ ndaaniʼ lídxiluʼ. Ne zacá zalá familia stiluʼ».

Gucané Rahab ca espía guireecaʼ de Jericó, ora guleebe laacaʼ ra ventana stibe né ti doo. Bicaachilú ca espía que lade ca dani que chonna gubidxa ante guibiguétacaʼ ra nuu Josué. Despué, gudiʼdiʼ ca israelita que guiiguʼ Jordán ne guyuucaʼ listu para guicaacaʼ guidxi que. Jericó nga primé guidxi ni guni ganárcabe. Gudxi Jiobá laacabe gudiicabe buelta guidubi guidxi que ti biaje lu ti dxi. Zaqué bíʼnicabe  xhoopaʼ gubidxa. Ra bizaa gadxe gubidxa, bidiicabe buelta guidxi que gadxe biaje. De raqué bixhidxi ca sacerdote trompeta sticaʼ ne ca soldadu israelita guizáʼ reciu biguaʼcaʼ ridxi. Biaba guiráʼ muru stiʼ guidxi que. Peru neca lu muru que zuba lidxi Rahab la? qué ñaba ni. Bilá Rahab ne familia stiʼ purtiʼ gúpacaʼ confianza Jiobá.