Biaʼ tiempu biʼniʼ adorar Salomón Jiobá, guyuu guendariuudxi ndaaniʼ guidxi Israel. Peru bichaganabe stale gunaa de sti guidxi ni runi adorar dios falsu. Chaahuidugá bichaa Salomón ne bizulú biʼniʼ adorar dios falsu. Bidxiichi Jiobá ne gudxi laabe: «Zaxhaʼ reinu stiʼ Israel familia stiluʼ ne zuneʼ ni chupa ndaa. Reinu ni jma naroʼbaʼ ca zudieeʼ ni tobi de cani runi xhiiñaluʼ, ne reinu ni jma nahuiiniʼ ca nga guiaanané familia stiluʼ».

Biʼniʼ Jiobá sti cosa para guiénecabe xii ngue nuu gabi laacabe. Ti hombre runi xhiiñaʼ Salomón ni láʼ Jeroboán biree zeʼ de viaje, neza zebe que bidxaagabe profeta Ahíya. Guxha profeta riʼ tobi de ca lari ni nacu, gucheza ni ne biʼniʼ ni 12 ndaa ne gúdxibe Jeroboán: «Zaxha Jiobá reinu stiʼ Israel familia stiʼ Salomón ne zuni ni chupa ndaa. Gucuaa chii ndaa riʼ, purtiʼ lii zácaluʼ rey stiʼ chii tribu stiʼ Israel». Ora gunna rey Salomón ni guca que, gucaláʼdxibe ñuutibe Jeroboán. Ngue runi yegucaachilú Jeroboán Egipto. Gudiʼdiʼ si tiempu, guti Salomón, ne bizulú biʼniʼ mandar Rehoboam xiiñiʼ. Ngue runi guníʼ ique Jeroboán maʼ qué zazaaca gastiʼ ne bibiguetaʼ Israel.

 Despué, gudxi ca binnigola de Israel Rehoboam: «Pa gácaluʼ nachaʼhui ne guidxi riʼ, zuzuubacabe stiidxaluʼ». Peru ca xhamígube ni nahuiiniʼ gúdxicaʼ laabe: «Cadi guialuʼ laacabe. Bicaa laacabe gúnicabe dxiiñaʼ nadipaʼ». Biʼniʼ Rehoboam ni gudxi ca xhamigu laa ne bininabe ca binni que. Ngue runi bicaalú guidxi que laabe ne bíʼnicaʼ Jeroboán rey lu reinu stiʼ chii tribu. Reinu stiʼ chii tribu que biree lani reinu stiʼ Israel. Reinu stiʼ chupa tribu que biree lani reinu stiʼ Judá, ne bizuubacaʼ stiidxaʼ Rehoboam. Zaqué nga gulaa ca 12 tribu stiʼ Israel.

Guyuu Jerusalén lu reinu stiʼ Rehoboam. Qué niná Jeroboán ñé chii tribu que niguni adorar Jiobá Jerusalén. ¿Nánnaluʼ xiñee la? Purtiʼ bidxíbibe nusaana ca binni que laabe ne ninándacaʼ Rehoboam. Ngue runi bíʼnibe chupa yuzehuiiniʼ de oro ne gúdxibe guidxi que: «Zítupeʼ riaana Jerusalén. Jma galán guiaanatu raríʼ guni adorartu ca yuzehuiiniʼ riʼ». Biʼniʼ ca binni que ni gúdxibe laacaʼ ne bisiaandacaʼ Jiobá sti biaje.