Xhono iza napa Josías dxi bizulú biʼniʼ mandar ndaaniʼ guidxi Judá. Ca dxi que, ca binni de guidxi que riquiiñecaʼ magia ne runi adorarcaʼ bidóʼ. Dxi napa Josías 16 iza, biyúbibe ximodo guni adorarbe Jiobá jneza. Ngue runi, dxi nápabe gande iza, bizulube binitilube ca bidóʼ ne ca altar ni nuu ndaaniʼ guidxi que. Ne dxi maʼ nápabe 26 iza, guluube listu guiráʼ cosa ni chiguiquiiñeʼ para gaca chaʼhuiʼ templu stiʼ Jiobá.

Ndaaniʼ templu que, bidxela sumo sacerdote Hilquías, rollo ra cá Ley stiʼ Dios. Zándaca Moisés nga bicaa rollo que. Yené Safán, secretariu stiʼ rey que, rollo que ra nuu Josías ne bizulú biindaʼ ni nezalube. Ora binadiaga Josías ni ná rollo que, bidii cuenta maʼ stale iza de cadi cuzuubaʼ guidxi que stiidxaʼ Jiobá. Óraque gudxi rey Josías Hilquías: «Cadxiichiné Jiobá laanu. Guniʼné laabe para gábibe laanu xi caquiiñeʼ gúninu». Ndiʼ nga ni gudxi Jiobá profetisa Huldá: «Maʼ bisaana guidxi Judá naa. Zuneʼ castigar laacabe, peru cadi tiempu cayuni mandar Josías, purtiʼ humilde laa».

Ora binadiaga Josías ni ná Jiobá, guyebe ra templu que ne biʼniʼ reunirbe guidxi Judá. De raqué, biindabe Ley stiʼ Jiobá nezalucaʼ. Biʼniʼ prometer Josías ne guidxi que zuzuubacaʼ stiidxaʼ Dios de guidubi ladxidoʼcaʼ.

Maʼ stale iza nga de cadi cayuni guidxi Judá saa stiʼ Pascua. Peru lu Ley ni biʼndaʼ Josías que ná naquiiñeʼ gaca saa stiʼ Pascua que guiráʼ  iza, ngue runi gúdxibe guidxi que: «Zúninu saa stiʼ Pascua para Jiobá». Despué, biʼniʼ mandar Josías cúʼcabe listu stale sacrificiu ne chuʼ ti coro ni guʼndaʼ ra templu que. Óraque bíʼnicabe saa stiʼ Pascua. Despué bíʼnicabe saa stiʼ Pan Sin Levadura, ni bindaa gadxe gubidxa. Qué huayúnicabe ti Pascua casi ni bíʼnicabe riʼ dede ca dxi bibani Samuel. Dxandíʼ gunnaxhii Josías Ley stiʼ Jiobá. ¿Lii yaʼ? ¿Laaca riuuláʼdxiluʼ guiziidiluʼ de Jiobá la?