Ca binni bibani dxiqué gunabaʼ Dios laacaʼ guidagulisaanecaʼ binnilídxicaʼ para chuʼcaʼ jma gaxha de Dios ne chuʼcaʼ tobi si (Deuteronomio 6:6, 7). Nga runi, guiráʼ semana ribee ca testigu stiʼ Jiobá ti tiempu huiiniʼ para guni adorarcaʼ Dios né binnilídxicaʼ, ne ruundacabe de xiixa ni zeeda lu Stiidxaʼ Dios ni zanda gacané cada tobi de laacabe. Dede né cani nuu stubi zanda guyúbicaʼ guiénecaʼ xiixa tema zeeda lu Biblia ora naguíxhecaʼ gusisácacaʼ Dios.

Racaneni chuʼdu jma gaxha de Jiobá. «Laidxiña gaxha de Dios, ne laa zadxiña gaxha de laatu.» (Santiago 4:8.) Ora guidúʼndadu Stiidxaʼ Dios ra caníʼ ximodo laabe ne xi guiráʼ huayúnibe la? runibiáʼ chaahuidu laabe. Para cadi gaca nagana para lii gúʼndaneluʼ binnilídxiluʼ zanda gúʼndatu Biblia, ne zanda chinándatu ra nexheʼ guiuundaʼ Biblia guiráʼ semana lu Xhiiñaʼ Dios ne modo nabáninu. Cada tobi de laacabe zanda guʼndaʼ ti ndaa ne despué guirácabe zanda guicábicabe xi biziidicabe.

Racaneni chuʼdu tobi si né binnilídxidu. Ca hombre ne ca gunaa ni maʼ bichaganáʼ, cani maʼ napa xiiñiʼ ne ca xiiñicabe riuucabe tobi si ora ruundacabe Biblia juntu. Ne ora gúnicabe ni naquiiñeʼ chúʼcabe nayecheʼ, gatadxí ladxidóʼcabe ne gácani ti cosa ni chuuláʼdxicabe gúnicabe guiráʼ semana. Zanda guʼndané binni xiiñiʼ xiixa tema ni zeeda lu revista Torre stiʼ ni rapa, ni zeeda lu xcaadxi libru ni napa xquidxi Dios o ni nuu lu sitiu jw.org, ne gúʼndanecaʼ laacabe biaʼ zanda guiénecabe pur iza nápacabe; o guiníʼnecaʼ laacabe de xiixa guendanagana rápacabe ra scuela ne guluiʼcaʼ laacabe ximodo zanda gudxiilúcabe ni. Laaca zanda guʼyanécabe xiiñicabe programa JW Broadcasting ne guzeetecabe xi biziidicabe luni. Ne zanda guni ensayárcabe ca diidxaʼ riuundaʼ ni chiguiuundaʼ lu guendaridagulisaa ne zanda gúnicabe xiixa cosa huiiniʼ gócabe ora guilúxecabe.

Tiempu ni ribeedu guiráʼ semana para guni adorardu Jiobá juntu, racaneni chuulaʼdxiʼ binnilídxidu guʼndaʼ Stiidxaʼ Dios ne riguu Jiobá ndaayaʼ stipa ni rúnidu (Salmo 1:1-3).

• Xiñee ribeedu tiempu para guni adorardu Dios né binnilídxidu.

• Xi zanda guni cani napa xiiñiʼ ti chuulaʼdxiʼ binnilidxi guni adorar Dios.