Stale binni runibiáʼ ca testigu stiʼ Jiobá pur ca scuela nápacaʼ para gusiidicaʼ ca xpínnicaʼ. Nuu caadxi scuela para ca Testigu ni rucheeche stiidxaʼ Reinu biaʼ gándatiʼ ti ganda gúnicaʼ guiráʼ ni bisaana Dios ladxinacaʼ (2 Timoteo 4:5).

Scuela stiʼ ca Precursor Regular. Gusaa si ti Testigu ti iza de naca precursor regular, maʼ zanda cheʼ scuela ni raca para ca precursor. Xhoopaʼ gubidxa nga rindaa scuela riʼ ne raca ni ndaaniʼ Yoo stiʼ Reinu ni riaana jma gaxha de ra nabézacabe. Raca ni para gacaneni ca precursor chuʼcaʼ jma gaxha de Jiobá ne gúnicaʼ xhiiñabe jma jneza ne para cadi gusaana de gácacaʼ precursor.

Scuela para cani rucheeche stiidxaʼ Reinu. Chupa beuu nga rindaa scuela riʼ. Luni rusiidicabe ca precursor ni nanna stale, ni zaná gusaana lidxi para chigacané sti lugar ra jma caquiiñeʼ tu gucheeche diidxaʼ. Ora gúnicabe zacá, casi ñaca niníʼcabe: «¡Rarí’ nuaaʼ! Biseenda’ naa» zacá nga zinándacabe ejemplu stiʼ Jesucristu, hombre ni jma risaca bicheeche stiidxaʼ Dios lu Guidxilayú (Isaías 6:8; Juan 7:29). Ora chindeza binni zitu de ra lidxi, napa xidé gusaana stale cosa ni napa. Ne zándaca gadxepeʼ costumbre napa ca binni ra chebe, zándaca nandáʼ o nananda ne zándaca gadxé ni rocaʼ. Ne nuu tiru naquiiñeʼ guiziidibe sti diidxaʼ. Scuela riʼ racaneni ca hermanu ne ca hermana ni caʼruʼ guichaganáʼ ne ca guendaxheelaʼ ni napa dede 23 iza hasta 65 iza, para gápacaʼ jma guenda sicarú ni zacané laacaʼ gúnicaʼ dxiiñaʼ guicaacaʼ ne laaca racaneni laacaʼ guiziidicaʼ gúnicaʼ xcaadxi cosa ti iquiiñeʼ Jiobá laacaʼ jma ne zaqueca xquidxi.

Scuela stiʼ Galaad stiʼ Watchtower. Diidxaʼ «Galaad» zeeda ni de ti diidxaʼ hebreu ni riníʼ «testigu». Dede dxi bizulú Scuela stiʼ Galaad maʼ guyé jma de xhono mil misioneru scuela riʼ ne maʼ biseendacabe laacaʼ chigucheechecaʼ diidxaʼ ra nuu «irá binni guidxilayú» ne huabeendúcabe stale cosa galán (Hechos 13:47). Dxi yendá ca primé misioneru guidxi Perú, gastiʼ nin ti neza binni ridagulisaa raqué; yanna maʼ nuu 1,255. Dxi yendácabe guidxi Japón nin qué rizaacabe chii Testigu; yanna maʼ nuu jma de chupa gayuaa mil. Gaayuʼ beeu rindaa Scuela stiʼ Galaad ne ruundaʼ chaahuicabe Stiidxaʼ Dios luni. Cani raca invitar para cheʼ scuela riʼ nga ca precursor especial, ca misioneru, cani nuu Betel ne ca superintendente de circuito, para gacanecaʼ guiroobaʼ xhiiñaʼ Dios ni cayaca lu Guidxilayú.

• Xi para raca Scuela stiʼ ca Precursor Regular.

• Tu zanda cheʼ Scuela para cani rucheeche stiidxaʼ Reinu.